1, 2. ¿Jamüsü sünüiki Eclesiastés 11:6 süchiki tü aküjaakat pütchi?

SULUʼU waneirua mma watta naalii na wayuu ekirajaweekana sünain tü sümakat tü Wiwüliakat. Eepejeʼe waneirua mma eere nnojoluin kasajatüin sümüin wayuu tü pütchi aküjünakat nüchiki Maleiwa otta süchiki tü sümakat tü Wiwüliakat. ¿Jamawaisü nanüiki na wayuukana wamüin waküjapa pütchi namüin? Jaʼitairü jamawalain nanüiki na wayuukana, ayatüinjanaʼaya waya sünain aküjaa pütchi waneʼereʼeya «kettaasü yaapünaa» nümapa Jeʼwaa wamüin.

² Nüneeküitpa Jeʼwaa tü kaʼi sajaʼlajaainjatkalü oʼu tü aküjaakat pütchi, süchikijee tia «anteerü sükalia sajaʼlajaainjatkat oʼu tü kasakat süpüshua» (Mat. 24:14, 36). ¿Kasa waaʼinrajatka süpüla woonooin sümaa tü pütchikat «nnojo peemeraain suulia»? (Paashajeʼera Eclesiastés 11:6). *

3. ¿Kasa wekirajaainjatka anain sünain ekirajaayakat tüü?

³ Sünain ekirajaaya 36, wekirajaa anainrü pienchisü kasa waaʼinrajatka süpüla watüjainjanain okotchojoo wayuu (Mat. 4:19). Sünain ekirajaayakat tüü, wekirajaajeerü anain apünüinsü kasa waaʼinrajatka süpüla kamalainjatüin wamüin aküjaa pütchi jaʼitasü kasain alatüin wamüin. Wekirajaajeerü anain tü waaʼinrajatkat süpüla waaʼinmaainjatüin tü aküjaakat pütchi, nnojoliinjanain washapajaain otta katchinjatüin wanoula.

4. ¿Jamüsü waaʼinmaainjatka maʼin tü aʼyatawaa naapakat Jeʼwaa wamüin?

⁴ Nüküjain Jesuu tü alatajatkat sülüʼütpa süpüla sajaʼttüin tü kasakalüirua otta nüküjain jamüinjatüin sukuwaʼipa tü wayuukalüirua soʼunnaa tia. Shiasaʼa sutuma tia, nüküjain Jesuu eein  süpüla nnojoluin naaʼinmaain na nikirajüinkana tü aküjaakat pütchi. Anuujeseʼe nünüiki namüin: «Anakaja müleka eere jaaʼin» (Mat. 24:42). Nükalioʼu Noé wainma tü kasa nnojotkat naaʼinmaain atuma na wayuukana tü pütchi aküjünakat namüin, müsia neʼe sukuwaʼipa maaʼulu (Mat. 24:37-39; 2 Ped. 2:5). Makalaka shiainjatüin waaʼinmaain maʼin tü aʼyatawaa naapakat Jeʼwaa wamüin.

5. Saashin Aluwataaushikana 1:6-8, ¿jalamüinjatü aküjünüin tü pütchi anasükat?

⁵ Maaʼulu yaa, waaʼinmaainjatü tü aküjaakat pütchi süchiki Nuluwataaya Maleiwa. Nüküjatüjülia Jesuu süküjünüinjatüin tü pütchikat sainküinpünaa tü mmakat otta ayatüinjatia shia aküjünüin süchikijee outuin nia (Juan 14:12). Outapa Jesuu, aʼyataashii nachikuaʼa sünain ejimejaa noʼutku na nikirajüinkana. Soʼu wanee kaʼi süchikijee süsoʼiraain naaʼin Jesuu, ejimejüshii naya, wainmajaaka jime nasirü nutuma Jesuu. Naaʼinrüin tia Jesuu süpüla natüjaainjatüin saaʼu na nikirajüinkana choʼujaain maʼin süküjünüin tü pütchikat suulialeʼeya wanee aʼyatawaa (Juan 21:15-17, TNM). Süpülapünaa nuʼunuin Jesuu iipünaamüin, nüküjain namüin na nikirajüinkana süküjünajatüin tü pütchikat suluʼupünaa süpüshuaʼa mma wattapünaa, nnojotsü shiainjatüin neʼe tü mmakat Israel (paashajeʼera Aluwataaushikana 1:6-8). Kojuya juya süchikijee tia, niʼrüin Juan tü kasa alatajatkat soʼu nükalia chi Senyotkai. * Niʼrüin wanee aapiee waawatüin iipünaapünaa, eʼitaaushi nia süpüla aküjaa «tü pütchi shiimüinkat [...]. Nüküjainjatü shia sümüin eʼirukuukat süpüshua sainküin mmakat süpüshua» (Alat. Map. 1:10; 14:6). Shiaʼaya keeʼireeka naaʼin Jeʼwaa waküjainjatüin tü pütchikat waneʼereʼeya wooʼulaain suulia «kettaasü yaapünaa» nümapa wamüin.

6. ¿Kasa waaʼinrajatka süpüla waaʼinmaainjatüin maʼin tü aküjaakat pütchi?

⁶ Jülüjale waaʼin tü naaʼinrakat Jeʼwaa süpüla  nükaalinjain waya, waaʼinmaajeerü tü aküjaakat pütchi. Jamüshijaʼa nia, niʼitaain tü pütchikat wamüin suluʼu karaloʼuta, suluʼu Internet, akürawaajünüsü shia süpüla waapajüinjatüin, süpüla wanajüinjatüin otta eʼitaanüsü shia suluʼu JW Broadcasting®. Jülüjataa waaʼin tü eʼitaanakat suluʼu jw.org®, alatüsü suulia miit anüikii tü eʼitaanakalü suluʼu (Mat. 24:45-47). Mayaainjeʼe nnojoliin paaʼinwajiraain na wayuukana sutuma tü poliitikakat, sutuma tü iküleesiakalüirua otta sutuma eein na washinnuukana jee na maʼletsekana, paaʼinwajiraashii waya namaa napüshuaʼa na wawalayuukana, alatüshii waya suulia 8 miyoone sainküinpünaa tü mmakat. Jamüsüjaʼa aaʼuriiroʼu 19 soʼu 2019, wanajüin wayakana wapüshuaʼa sainküinpünaa tü mmakat, wanee video süchikimaajatü tü pütchi waashajeʼerawaikat wattaʼa maalü. Soʼu aikat tia, outkajaashii 20.919.041 wayuu sünain tü Outkajawaakat eere Sotuin Waaʼin Outuin Jesuu. Waaʼinmaajeerü tü aküjaakat pütchi jülüjale waaʼin tü kasa naaʼinrakat Jeʼwaa.

7. ¿Jamüsü waaʼinmaajeetka tü aküjaakat pütchi washatüle nukuwaʼipa Jesuu?

⁷ Wane kasa waaʼinmaajeetka atuma tü aküjaakat pütchi shia washatüle nukuwaʼipa Jesuu. Nnojotsü naaʼinmaain Jesuu wanee kasa naata suulia tü aküjaakat pütchi (Juan 18:37). Jamüshijaʼa nia, wanaa sümaa niiʼiyatüin Satanaa nümüin «tü suumainkalüirua wayuu süpüshuaʼale sünain anashaatain maʼi shia», nnojoishi eirakaain nia sümüin. Akaataajaʼa wanaa sümaa niʼitaaneein süpüla aluwatawaa natuma na wayuukana, oʼunushi nia noulia (Mat. 4:8, 9; Juan 6:15). Mayaainjeʼe eein tü kasa choʼujaakat nümüin, nnojoishi nia oʼunuin süchiirua wainmeein kasa nümaʼana. Mayaainjeʼe müliain nia atumawaa, nnojoishi nia eimmolojooin (Luc. 9:58; Juan 8:59). Washatüle nukuwaʼipa Jesuu maʼaka nüküjain shia Pablo, nnojoleena waya ooʼulaain suulia aküjaa pütchi, jaʼitashii müliain waya atumawaa sünainjee tü wanoulakat (Heb. 12:3).

8. ¿Jamüsü choʼujaaka maʼin nnojoliinjanain washapajaain?

⁸ Keeʼireere waaʼin sajaʼlajaain wanee kasa mojusü alataka otta nnojorüle weʼramaatüin tü kasa anasü eekat sünainjee waʼyataain, nnojoliinjana waya ashapajaain. Jamüshijaʼa Habacuc chi nünüikimaajachikai Maleiwa, keeʼireesü naaʼin sajaʼlajaain tü kasa mojusü alatakat chaa Judá (Hab. 1:2). Müshiʼiya na nikirajüinkana Jesuu «alüʼülüyaasü nükalia Maleiwa süpüla aluwatawaa» saaʼin namüin jee oʼttaainjanayaa naya noulia na romaanokana saaʼin namüin (Luc. 19:11). Akaataajaʼa wayakana, keeʼireesü waaʼin nüntirüin Maleiwa tü sukuwaʼipakat aluwatawaa nutuma süpüla najaʼttirüin tü kasa mojusükat otta nüntirüinjatüin tü Mma jeketkat (2 Ped. 3:13). Nnojoliipejeʼe waya ashapajaainjanain, waʼatapajüinjatü tü kaʼi nüneekakat Jeʼwaa süpüla naaʼinrüin tia. Wekirajaa sünain waneirua kasa nikirajaka aka waya Jeʼwaa süpüla nnojoliinjanain washapajaain.

9. ¿Jamüsü watüjaaka saaʼu nnojolin naashichijaamaatüin Jeʼwaa?

⁹ Watüjaa aaʼu anain maʼin nukuwaʼipa Jeʼwaa süka nnojolin naashichijaamaatüin. Wanaa sümaa nukumajüin Noé tü anuwakat nnojoishi nia apüleeruaanüin aaʼin nutuma Jeʼwaa, naʼatapajüin kettaain shia nutuma jee naʼatapüin nüküjain süchiki tü pütchi anasükat (2 Ped. 2:5; 1 Ped. 3:20). Wanaa sümaa nüsakiijünüin pejeewa nutuma Abraham shiiʼiree nnojoliinjanain najaʼttirüin na kepiakana Sodoma otta Gomorra, nnojoishi nia aashichijaain nooʼomüin Abraham, naapajüin tü nümakat (Gén. 18:20-33). Kakalia na israeliitakana sünain aaʼinraa kasa mojusü noʼuluʼu Jeʼwaa, nnojoipejeʼe nia aashichijaamaatüin nooʼomüin (Neh. 9:30, 31). Müsia nukuwaʼipa Jeʼwaa maaʼulu yaa, nnojoishi nia aashichijaain nooʼomüin na mojulaashiikana, naʼatapajüin nouyantüinjanain suulia naainjala jee aleewainjanain naya nümaa  (Juan 6:44; 1 Tim. 2:3, 4; 2 Ped. 3:9). Müinjanaʼaya waya maʼaka naaʼin Jeʼwaa, nnojoliinjana waya aashichijaamaatüin, ayatüinjanaʼaya waya aküjain pütchi otta ekirajüin wayuu. Nikirajüin waya Jeʼwaa süpüla nnojoliinjanain washapajaain, naaʼinrüin tia sükajee wanee kasa nüshajitka suluʼu tü Wiwüliakat. Wekirajaa süchiki tia.

10. ¿Kasa watüjaka sünainjee nukuwaʼipa chi apünajüi aküjünakai achiki suluʼu Santiago 5:7, 8?

¹⁰ (Paashajeʼera Santiago 5:7, 8). Jülüjale waaʼin nukuwaʼipa wanee wayuu eekai nüpünajülin, nnojoleena waya ashapajaain. Eesü pünajüt eekai miyoʼumaatüin jee kachonmaatüin, eepejeʼe pünajüt nnojotka jakütamaatüin süchon. Jamüsüjaʼa chaa Israel, aipirua kashi süpüla jakütüinjatüin süchon wanee pünajüt. Apünajünüsü shia suʼttaiwaʼaya iiwa jee atpajünüsü tü süchonkot sajaʼttapa iiwa (Mar. 4:28). Kekiire maʼin waya, washateerü nukuwaʼipa chi apünajüikai, nnojoleena waya ashapajaain. Eepejeʼe kapüleere tia wamüin.

11. ¿Kaseerü waaʼinraka sünain aküjaa pütchi jee sünain ekirajaa wayuu nnojoliire kashapajaaraliin waya?

¹¹ Süka waleʼeruʼuin tü kaainjalaakat, weʼramaateein maalü tü waʼyataakalü achiirua. Jamüshijaʼa wanee wayuu eekai niʼreein kachooin nüpünajüin, nupotuinjatü süpülajana, nüpünajüinjatü shia, najaralüinjatü saaʼu jee niʼyotuinjatü wüin saaʼu. Müsia neʼe tü waaʼinrüinjatkat wekirajapa wayuu. Wekirajüinjana na wayuukana süpüla nnojoliinjanain kachekalaʼatain naya jee süpüla aipüraliinjanain naya. Nnojoliire washapajaain nnojoleena waya ooʼulaain suulia aküjaa pütchi nayoutule na wayuukana tü pütchi waküjakat namüin. Akaataajaʼa wekirajüle wanee wayuu achekakai tü pütchikat, nnojotsü wapüleeruainjatüin naaʼin süpüla nunoujain sünain tü sümakat tü Wiwüliakat. Alatüsü tia namüin na nikirajüinkana Jesuu, kakalia naya süpüla nayaawatüinjatüin saaʼu tü nikirajakalü anain naya (Juan 14:9). Mayaainjeʼe wayain apünajüin jee woʼyonuin wüin saaʼu, soteesü waaʼin niain Maleiwa miyoʼuka atuma shia (1 Cor. 3:6).

12. ¿Kasa waaʼinrajatka süpüla nnojoluin süshapajaain waaʼin waküjapa pütchi namüin na wapüshikana?

 ¹² Eesü süshapajaale waaʼin waküjainjanapa pütchi namüin na wapüshi manoujainkana. Sükaalinjeenapejeʼe waya tü pütchi ashajünakat suluʼu Eclesiastés 3:1, 7, tü makat: «Eesü kaʼi süpüla koʼutaa otta kaʼi süpüla aashajawaa». Mayaainjeʼe eein süpüla nanoujain na wapüshikana sünainjee anain wakuwaʼipa, wachajaainjatü sukuwaʼipa süpüla waküjainjatüin namüin tü pütchikat (1 Ped. 3:1, 2). Waaʼinmaain tü aküjaakat pütchi otta ekirajaa wayuu, nnojoliipejeʼe waya ashapajaain shiiʼiree nanoujamaatüinjanain na wayuukana, nayaleekajaʼa na wapüshikana.

13, 14. ¿Jaralii na anoujashii anakana süpüla washatüin akuwaʼipa?

¹³ Sümaiwa paala otta maaʼulu wainma na anoujashii nnojoliikana kashapajaaraliin. Jamüshijaʼa Habacuc, keeʼireesü naaʼin najaʼttireein Maleiwa tü kasa mojusükat, anuujeseʼe nünüiki: «Ayateechi taya eejüin aaʼin sümaa shaʼwatüin taya» (Hab. 2:1). Mayaainjeʼe nikeraajeein maʼin Pablo tü niʼyataainkat nümüin Maleiwa, ayatüshia nia sünain aküjaa «süchikü tü pütchi anasükat» (Aluw. 20:24).

¹⁴ Wekirajaa nüchiki wanee wawala sümaa nuʼwayuuse agraduajakana suluʼujee tü Ekirajaaleekat Galaad, aluwataanüshii naya suluʼumüin wanee mma eere alin maʼin neeʼiree Aküjalii pütchi otta eere wainmain wayuu nnojotka anoujain nünain Kürisüto. Palitchon na wayuu nekirajakana sünain tü Wiwüliakat. Akanasaʼa na wawalayuu agraduajakana wanaa namaa ajütünakana suluʼumüin waneirua mma, ashajawaishii naya namüin nachiki na wayuu naküjakana amüin pütchi otta nachiki na wayuu woutiisakana. Mayaainjeʼe nnojolin nawainmalaain na wayuu nekirajakana na wane wawalayuukana, nnojoishii naya ashapajaain, ayatüshiʼiya naya aküjain pütchi. Mekiisat juya süchikijee tia, woutiisashi wanee nekirajüin. ¿Kasa watüjaka sünainjee nakuwaʼipa na anoujashii namaiwajanakana otta na eekana maaʼulu? Nnojoishii naya akulajaain jee nnojoishii naya ooʼulaain suulia aküjaa pütchi otta ekirajaa wayuu. Nükaalinjain naya Jeʼwaa süka müin nakuwaʼipa. Washata nakuwaʼipa na anoujashii achechetkana naaʼin sünain naʼatapajüin tü naaʼinrüinjatkat chi Maleiwakai namüin saaʼu pansaain nünüiki namüin (Heb. 6:10-12).

15. ¿Jamüshii ayateenaka waya sünain aküjaa pütchi katsüinre wanoula?

¹⁵ Wanouja anainrü tü pütchi waküjakat müsüjeseʼe waküjeein shia sümüin wayuu maʼleekalia. Wanouja anainrü sünain shiimain tü nümakat Maleiwa (Sal. 119:42; Is. 40:8). Weʼrüirü ekeraajüin maaʼulu süpüshi tü pütchi ashajünakat suluʼu tü Wiwüliakat. Weʼrüinya sunoutaain nakuwaʼipa na wayuukana sutuma naaʼinrüin tü sümakat tü Wiwüliakat. Sünainjee tia, watüjaa aaʼu choʼujaain maʼin süküjünüinjatüin tü pütchi anasükat sainküin mmakat süpüshuaʼa.

16. Saashin tü sümakat Salmo 46:1-3, ¿jamüsü kamalainjeetka wamüin aküjaa pütchi kanourale waya nünain Jeʼwaa otta nünain Jesuu?

¹⁶ Wanouja anainria niain Jeʼwaa, chi kamaʼanajeejachikai tü pütchi waküjakat sümüin wayuu. Otta nünain Jesuu chi aneekünakai nutuma Jeʼwaa süpüla aluwatawaa (Juan 14:1). Jaʼitairü kasain alatüin wamüin nükaalinjeena waya Jeʼwaa otta katchinjeerü waaʼin nutuma (paashajeʼera Salmo 46:1-3). Watüjaa aaʼu niain Jesuu oʼunirüin sukuwaʼipa tü aküjaakat pütchi chejee iipünaajee, nuuntuin tia süka saapünüin laülawaa nümüin nutuma Jeʼwaa (Mat. 28:18-20).

17. Püküja süchiki jamüin ayatüinjanaka waya aküjain pütchi.

¹⁷ Sünainjee kanoulain waya, watüjaa aaʼu anakuwaʼipaleerüin tü waʼyataainkat nutuma Jeʼwaa, jaʼitairü nnojoluin watüjaain saaʼu jameerüin sukuwaʼipa nutuma (Ecl. 11:6).  Anuu wanee sukuwaʼipa, wainma na wayuu alatakana waneepia süʼütpünaa tü kareetachonkot otta süʼütpünaa wanee meesa eere shiʼitaanüin tü karaloʼuta waküjakalü aka pütchi. ¿Eesüchejeʼe anoujain wayuu sünainjee tia? Aa, eeshii na anoujakana. Aküjünüsü suluʼu tü karaloʼutakat Waʼyataain nümüin Maleiwa ojuʼitaka nowienpüroʼu 2014 süchiki wanee wayuu ekirajaaka suluʼu wanee eʼikülee miyoʼu. Ashajeesü shia nachiki na aküjaliikana pütchi nüchiki Jeʼwaa, nnojotpejeʼe süntüin sünain tü Piichi Outkajaaleekat. Shiasaʼa suʼunapa suluʼumüin tü eʼiküleekat miyoʼu, shiʼraka wanee meesa eere shiʼitaanüin tü karaloʼuta waküjakalü aka pütchi, suusütaka sünain tü pütchi süshajüinjatkat nachiki na Aküjaliikana pütchi. Woutiisasü mapa tia wayuukot otta pürekutsoot rekulaat shia maaʼulu. Sutuma tia alatakat, akatchinraasü waaʼin süpüla ayatüinya waya sünain aküjaa pütchi, eeyüliʼiya na wayuu choʼujaakana amüin naapajüin süchiki tü Nuluwataayakat Maleiwa.

18. ¿Jamüsü watüjaaka saaʼu wooʼulaajeenain suulia aküjaa pütchi «kettaasü yaapünaa» nümapa Jeʼwaa?

¹⁸ Watüjaa aaʼu wooʼulaajeenain suulia aküjaa pütchi «kettaasü yaapünaa» nümapa Jeʼwaa wamüin. Sünainjee tü alatakat soʼu nükalia Noé, watüjaa aaʼu naaʼinreerüin Jeʼwaa tü nümakat soʼu tü kaʼi nüneekakalü oʼu shia. Nüküjatüjülia Jeʼwaa maʼaka saaʼin 120 juya shiʼitajatüin wanee juya miyoʼushaata. Kojuya juya süchikijee tia, aluwataanüshi Noé nutuma Jeʼwaa sünain akumajaa wanee anuwa. Nukumajüin Noé tia anuwakat soʼunnaa 40 jee shiale 50 juya, aʼyataashi maʼin nia sünain tia. Mayaainjeʼe nnojoluin soonooin wayuu sümaa tü pütchi nüküjakat, ayatüshia nia sünain aaʼinraa tia. Ooʼulaashi nia suulia nuluwataanapa nutuma Jeʼwaa sünain ekerojiraa tü mürütkalüirua suluʼumüin tü anuwakat. Anta müsüjaʼaya tü kaʼi nüneekakat Jeʼwaa süpüla nüsülajaain soʼu tü anuwakat (Gén. 6:3; 7:1, 2, 16).

19. ¿Kaseerü weʼraka nnojoliire wooʼulaain suulia aküjaa pütchi?

¹⁹ Alüʼütsü tü kaʼi nüneekakat Jeʼwaa süpüla «kettaasü yaapünaa» nümüin wamüin suulia tü aküjaakat pütchi otta süpüla najaʼttirüin tü kasa nuluwataakalü aaʼu Satanaa. Nüntireerü wanee mma jeketü eere kepiainjanain na wayuu oonoojeenakana nümaa Jeʼwaa. Sümaʼinruʼu süntüin tia kaʼikat, washata nukuwaʼipa Noé, Habacuc otta waneinnua anoujashii waneepiakana nümaa Maleiwa, ayatüshiʼiya naya sünain aküjaa pütchi. Ayataʼaya waya sünain waaʼinmaain tü aküjaakat pütchi, nnojo washapajaain, katchin wanoula nünain Jeʼwaa otta sünain tü nümakat.