1, 2. ¿Kasa naaʼinrajatka Timoteo saashin 1 Timoteo 6:20?

WAMAʼANALE wanee kasa eekai kojutuin maʼin, wanaajeʼerüin shia. Jamüshiijaʼa kanneetsere waya, wanaajeʼerüin tü wanneetsekat suluʼu wanko. Waaʼinrüin tia süpüla nnojoluinjatüin machikin jee nnojoluinjatüin suʼluwajünüin. Sünainjee tia, wayaawatüin saaʼu weʼitaʼawalin najapuluʼu na waneinnua wanee kasa eekai kojutuin maʼin wamüin.

² (Paashajeʼera 1 Timoteo 6:20). Nüküjain chi aluwataaushikai Pablo nümüin Timoteo naapüin Jeʼwaa nümüin wanee kasa kojutuka maʼin. Nikirajüin nia sünain tü pütchi shiimainkat süchiki tü nüchekakat Maleiwa napüleerua na wayuukana otta nuluwataain nia sünain aküjaa tü pütchikat sümüin wayuu (2 Tim. 4:2, 5). Naashin Pablo, naaʼinmajüinjatü Timoteo tü naapakat Jeʼwaa nümüin. Müshiʼiya wayakana, naapüin Jeʼwaa wamüin wanee kasa kojutuka maʼin. ¿Jarat shia? ¿Jamüsü waaʼinmajüinjatka shia?

3, 4. ¿Jamüsü kojutuka maʼin tü pütchi suluʼukat tü Wiwüliakat?

³ Naapüin Jeʼwaa wamüin wanee kasa kojutuka maʼin, shia nikirajüin waya sünain tü pütchi shiimain suluʼukat tü Wiwüliakat. Kojutusü maʼin tia pütchikat süka wekirajünüin süpüla aleewainjanain waya nümaa Jeʼwaa otta süpüla talatüinjatüin waaʼin. Waapaale sümaa tia pütchikat jee waaʼinrüle tü sümakat, nnojoleena waya süchepchiain tü alawaa ekirajünakalü anain otta tü amaʼüjirawaakalü akuwaʼipaa (1 Cor. 6:9-11).

⁴ Kojutusü maʼin tü pütchi suluʼukat tü Wiwüliakat süka nüküjain shia Jeʼwaa namüin na wayuu nnojoliikana yaletüin aaʼin otta «na kapülakana aaʼin nünüiki Maleiwa süpüla eeinjanain naya waneepia» (Aluw. 13:48, TNM). Wayuukana naainnua, nacheka achikit tü nikirajakalü akajee waya Jeʼwaa maaʼulu  yaa (Mat. 11:25; 24:45). Nnojoleerü watüjaain saaʼu tü pütchi shiimainkat sükajee neʼe waaʼin wamüiwaʼa. Wayaawatapa saaʼu tia pütchikat, alanaʼaleesia maʼin sujutu wamüin suulialeʼeya waneirua kasa (Prov. 3:13, 15).

5. ¿Kasa nuluwataaka anain waya Jeʼwaa?

⁵ Nuluwataain waya Jeʼwaa sünain ekirajaa wayuu süchiki tü shiimainkat nüchiki otta süchiki tü nüchekakat wapüleerua, kojutusü maʼin tia nuluwataakalü anain waya (Mat. 24:14). Alanaʼaleesia maʼin sujutu tia pütchikat, süka jamüin, nüpüsheenain Jeʼwaa na wayuu aapaakana sümaa otta kateerüin noʼu waneepia (1 Tim. 4:16). Jaʼitairü wainmain jee palitchoin oora waküjaka oʼu pütchi, akaalinjüshiʼiya waya sünain tü aʼyatawaa eekat maaʼulu nutuma Jeʼwaa (1 Tim. 2:3, 4). ¡Anakatche maʼin aʼyataajirawaa nümaa Maleiwa! (1 Cor. 3:9, TNM).

6. ¿Kasa alataka namüin waneinnua anoujashii?

⁶ Nükalioʼu Timoteo, eejana waneinnua anoujashii mojutkana amüin naʼyataajiraain nümaa Maleiwa. Jamüshijaʼa Demas, kachiiruasü naaʼin tü washirüükat, niyoutuinjeseʼe niʼyataajiraain nümaa Pablo (2 Tim. 4:10). Figelo otta Hermógenes, ooʼulaashii naya suulia aküjaa pütchi. Mmotshii seema müliaa atumawaa maʼaka müliain atumawaa Pablo (2 Tim. 1:15). Himeneo, Alejandro otta Fileto, ooʼulaʼalaʼa müshii suulia ekirajaa sünain tü shiimainkat süpüleerua ekirajaa sünain alawaa (1 Tim. 1:19, 20; 2 Tim. 2:16-18). Wayuukana naainnua, aipuʼushi Jeʼwaa napüla. Shiasaʼa mapa, mojutulaʼa müsü namüin tü nikirajakalü anain naya.

7. ¿Kasa nimeejeeka aka waya Satanaa?

⁷ ¿Kasa nimeejeeka aka waya Satanaa süpüla wooʼulaainjanain suulia tü nikirajakalü anain waya Jeʼwaa? Wekirajaa süchiki süpüshi tia. Nimeejeein waya sükajee tü wanajakat, tü waapajakat otta tü namakat na ojuʼitakana suluʼu telewisoot. Naaʼinrüin tia shiiʼiree jülüjainjatüin waaʼin shia jee wooʼulaainjanain suulia tü nikirajakalü anain waya Jeʼwaa. Nimeejeein waya sükajee wapüleeruaanüin aaʼin natuma na waneinnua jee müliain waaʼin natuma. Naaʼinrüin tia shiiʼiree weimmolojooinjanain jee wooʼulaainjanain suulia aküjaa pütchi. Nimeejeein waya sükajee tü alawaa nekirajakalü anain na wayuukana. Naaʼinrüin tia shiiʼiree wooʼulaainjanain suulia tü shiimain nikirajakalü anain waya Jeʼwaa (1 Tim. 6:20, 21).

8. ¿Kasa watüjaka sünainjee tü alatakat nümüin Daniel?

⁸ Nnojorüle eejüin waaʼin, eeshiijaʼa wooʼulaajeenale suulia wanoujain sünain tü pütchi shiimainkat. Anuu tü alatakat nümüin Daniel. * Kamalainsü maʼin nümüin ashaitaa süka videojuego. Anuu nünüiki: «Ashaitüshi taya süka videojuego polooiwaʼaya touyase. Anasü tü kasa  tashaitakalü aka paala. Shiasaʼa joo mapa, ashaitüshi taya süka aʼinirawaa otta süka sukuwaʼipamaajatü yolujaa». Eesü siraale 15 oora naaʼu sünain ashaitaa. Anuu sooʼomüin nünüiki Daniel: «Tatüjaa aaʼu takayalaain nuulia Jeʼwaa sutuma tü videojuego tashaitakat otta sutuma siraain kaʼi taaʼu. Nnojotpejeʼe mojuin saaʼin tamüin tü taaʼinrakat sükajee nnojoluin kachipünaain taaʼin tü sümakat tü Wiwüliakat». ¿Kasa watüjaka sünainjee tia? Eeshii wooʼulaajeenale suulia anoujaa sünain tü pütchi shiimainkat nnojorüle wayaawatüin saaʼu kasain washaitüin, waapajüin otta wanajüin. Sülatüle wamüin tia, amülouijeerü woulia tü kasa kojutusü naapakat Jeʼwaa wamüin.

9. Saashin 1 Timoteo 1:18, 19, ¿kasa maka aka saaʼin nukuwaʼipa Timoteo naashin Pablo?

⁹ (Paashajeʼera 1 Timoteo 1:18, 19). Naashin Pablo, müsü nukuwaʼipa Timoteo maʼaka saaʼin nukuwaʼipa wanee surulaat otta eejiraainjachi nia naashin. Nnojotpejeʼe wayuuin tü eejiraainjachikalü amaa nia. ¿Jamüsü maka wakuwaʼipa maʼaka saaʼin nukuwaʼipa wanee surulaat? ¿Jamüinjatü wakuwaʼipa wayakana nusurulaatsekana Kürisüto? Jaʼraisü kasa watüjaka sünainjee tü nümakat Pablo süpüla wachecheraainjanain süchiirua tü shiimainkat. Wekirajaa süchiki tia.

10. (1) ¿Kasa waaʼinrajatka keisarale waya sümüin wakuwaʼipa nuʼupala Maleiwa? (2) ¿Jamüsü waaʼinrajatka tia?

¹⁰ Keisala waya sümüin wakuwaʼipa nuʼupala Maleiwa. Waneepiashi wanee surulaat nümaa chi nikiipüʼükai. Eejiraashi nia süka süpüshuaʼa naaʼin süpüla naaʼinmajüin wanee wayuu aikai nüpüla jee shiale wanee kasa kojutuka maʼin nümüin. Naashin Pablo, keisalainjachi Timoteo sümüin nukuwaʼipa nuʼupala Maleiwa. ¿Kasa naaʼinrajatka süpüla tia? Alinjachi Maleiwa nüpüla otta waneepiainjachi nia nümaa (1 Tim. 4:7). Aire wapüla Maleiwa jee waneepiale waya nümaa, achecheraajeena waya süchiirua tü pütchi shiimainkat (1 Tim. 4:8-10; 6:6).

11. ¿Jamüsü waaʼinrajatka tü münakat wamüin?

¹¹ Waaʼinra tü münakat wamüin. Jamüshijaʼa wanee surulaat, naaʼinrüinjatü tü münakat nümüin süpüla nikeraajüin niʼyataain. Nikeraajüin Timoteo tü niʼyataainkat sutuma naaʼinrüin tü nümakat Pablo nümüin. Nnojoishi nia oʼunuin süchiirua tü kasa mojusü suchuntaakat naaʼin, anasü nukuwaʼipa jee namaashi nia na nuwalayuukana (2 Tim. 2:22). Müinjanaʼaya waya, waaʼinrajatü tü münakat wamüin süpüla nnojoluin waaʼinrüin tü kasa mojusü suchuntaakat waaʼin (Roma 7:21-25). Wachajaainjatü sukuwaʼipa süpüla weeʼiratüinjatüin wakuwaʼipa (Éf. 4:22, 24). Jamüshiijaʼa nnojoliire woʼuneein sünain tü outkajawaakat sutuma mapüsain maʼin waya süchikijee waʼyataain, oʼunajanaʼaya neʼe waya waneepia (Heb. 10:24, 25).

12. ¿Kasa waaʼinrajatka süpüla watüjainjanain ekirajaa wayuu sükajee tü Wiwüliakat?

¹² Ekirajaainjachi palajana wanee surulaat süpüla nütüjainjachin süpüleerua tü nütkaayakat. Müinjanaʼaya waya anoujashiikana. Ekirajaainjana waya palajana süpüla watüjainjanain süpüleerua tü sümakat tü Wiwüliakat (2 Tim. 2:15). Ekirajünüshii waya sünain tü outkajawaakat süpüla wountuin tia. Keeʼireere waaʼin nayaawatüin saaʼu na wayuukana tü pütchi wekirajakat suluʼujee tü Wiwüliakat, ekirajaainjana waya palajana sünain. Otta wakatsüinrüinjatü wanoula sükajee tü sümakat. Nnojotpejeʼe waashajeʼeraʼalüinjatüin neʼe shia. Jülüjainjatü waaʼin tü sümakat tü wetsiikulo waashajeʼerakat, ekirajaainjana waya sooʼomüin süpüla wayaawatüin saaʼu tü sümakat otta süpüla mapüleein wamüin waküjapa shia sümüin wayuu (1 Tim. 4:13-15). Müle shia watuma, yapeena waya süpüla wekirajüin na waneinnua  sükajee tü sümakat tü Wiwüliakat. Nnojotpejeʼe waashajeʼeraʼalüinjatüin neʼe wanee wetsiikulo namüin. Wakaalinjainjana naya süpüla natüjaainjatüin saaʼu otta süpüla sütanalüinjatüin naaʼin. Wekirajaale sünain tü Wiwüliakat waneepia, atüjeena waya ekirajaa (2 Tim. 3:16, 17).

13. Saashin Hebreokana 5:14, ¿jamüsü eeinjatka waaʼin sünain tü anasükat süpüla waaʼinrüinjatüin shia?

¹³ Eeinjatü waaʼin waneepia sünain tü anasükat süpüla waaʼinrüinjatüin shia. Jamüshijaʼa wanee surulaat, eejüinjatü naaʼin suulia tü kasa mojeetkalü atuma nukuwaʼipa otta akayalaainjachi nia suulia. Müinjanaʼaya waya, eejüinjatü waaʼin suulia tü kasa mojeetkalü atuma wakuwaʼipa otta akayalaainjana waya suulia (Prov. 22:3; paashajeʼera Hebreokana 5:14). Anainjatü watuma süneekia tü kasa wanajüinjatkat otta tü waapajüinjatkat. Eesü sujuʼitüle amaʼüjirawaa akuwaʼipaa suluʼupünaa tü telewisootkat jee suluʼupünaa peliikula. Mojusü wanajüle wanee kasa eekai müin aka saaʼin tia. Eemiajaajeerü tü naalinkat Jeʼwaa wapüla sutuma tia. Watüjaa aaʼu nülerajüin Jeʼwaa tü amaʼüjirawaakalü akuwaʼipaa. Na wayuu aaʼinrakana tia, namojujain nakuwaʼipa jee nakuwaʼipa na waneinnua (Éf. 5:5, 6).

14. ¿Kasa naaʼinraka Daniel sutuma eejüin naaʼin sünain tü anasükat süpüla naaʼinrüinjatüin shia?

¹⁴ Daniel, chi wachuntakai anülia, niyaawata aaʼu mapa mojuin nüshaitüin süka aʼinirawaa jee süka sukuwaʼipamaajatü yolujaa. Ekirajaashi nia sünain tü pütchi suluʼukat Watchtower Library süpüla nuuʼulaainjachin suulia tia. ¿Kasa niʼraka sünainjee nikirajaain? Ooʼulaashi nia suulia ashaitaa jee ooʼulaashi nia suulia aleewaa namaa na ashaitapuʼukana nümaa. Anuu nünüiki: «Eeshi taaʼinrawaire waneirua kasa suulia tia jee namaʼawaire taya na wawalayuukana». Pürekutsootshi maaʼulu Daniel otta laülaashi nia suluʼu tü outkajaaleekat.

15. ¿Jamüsü mojuka anoujaa sünain tü pütchi nashajakat na ekirajüliikana sünain alawaa?

¹⁵ Waaʼinrajatü tü naaʼinrakat Timoteo, eejüinjatü waaʼin suulia wanoujaʼalüin sünain tü pütchi namakat na akayalaakana nuulia Jeʼwaa süpüla nekirajüin sünain alawaa (1 Tim. 4:1, 7; 2 Tim. 2:16). Eeshii naküjale alawaa nachiki na wawalayuukana jee süchiki tü nupueulosekat Jeʼwaa. Naaʼinrüin tia shiiʼiree wainmajüinjatüin naaʼin na wawalayuukana. Wanoujale sünain tia alawaakat, amalajaajeerü wanoula. Nnojo wooʼulaain nemeejüin waya, süka jamüin, nekiiruʼujeejatüin shia na wayuu  jülüjakana aaʼin kasa mojusü waneepia. Tü keeʼireekat naaʼin shia mojujiraainjanain waya jee watkaajiraainjanain (1 Tim. 6:3-5). Tü keeʼireekat naaʼin na ekirajüliikana sünain alawaa shia wanoujain sünain tü alawaa namakat jee nnojoluinjatüin wanoujain sünain tü namakat na wawalayuukana.

16. ¿Kasa tü nnojoluinjatkat waaʼinraain wamüin?

¹⁶ Nnojo waaʼinraain wamüin wanee kasa naata. Süka nusurulaatsein Kürisüto Timoteo, shia naaʼinmaaka maʼin tü niʼyataainkat nümüin Maleiwa. Nnojotsü naaʼinraain nümüin waneirua kasa suulia maʼaka saaʼin oʼunaa süchiirua kamaʼanaa wainma korolo otta waneirua kasa (2 Tim. 2:3, 4). Müinjanaʼaya waya. Nnojotsü shiainjatüin waaʼinmaain oʼunaa süchiirua kamaʼanaa wainma korolo. Kachiiruale waaʼin tia, amalajaajeerü tü naalinkat Jeʼwaa wapüla, nnojoleerü kojutuin wamüin tü sümakat tü Wiwüliakat otta nnojoleena waya aküjain pütchi (Mat. 13:22). Wakumajüinjatü sukuwaʼipa süpüla shiainjatüin waaʼinmaain maʼin tü waʼyataainkat nümüin Maleiwa (Mat. 6:22-25; Mat. 6:33, TNM).

17, 18. ¿Kasa waaʼinrajatka süpüla waaʼinmajüin wakuwaʼipa nümaa Jeʼwaa?

¹⁷ Watüjaatüjülüinjatü saaʼu tü waaʼinrajatkat. Jamüshijaʼa wanee surulaat nütüjaatüjülüinjatü saaʼu tü naaʼinrajatkat süpülapünaa sülatüin wanee kasa nümüin. ¿Kasa waaʼinrajatka waaʼinmaweere tü kasa naapakat Jeʼwaa wamüin? Jülüjatüjülüinjatü waaʼin tü waaʼinrajatkat süpülapünaa sülatüin wamüin wanee kasa.

¹⁸ Eere wanee outkajawaa, aküjünüsü namüin na jutkatüshiikana jülüjatüjülüinjatüin naaʼin jalapünaainjanain naya ojuʼitüin sülatalaʼa sümüle wanee kasa. Naaʼinrüle tia, natüjaajeerü aaʼu jalapünaainjanain nojuʼitüin. Müsia neʼe sukuwaʼipa tü waaʼinrajatkat, jülüjatüjülüinjatü waaʼin tü waaʼinrajatkat sujuʼitalaʼa sümüle suluʼu telewisoot, suluʼu Internet jee suluʼu peliikula wanee kasa neʼitaaka na ekirajüliikana sünain alawaa jee shiale shiyaakua wayuu amaʼüjiraaka sukuwaʼipa jee atkawaa. Watüjaatüjürüle saaʼu tü waaʼinrajatkat, wayoutamaateerü tia kasa mojusükat süpüla waaʼinmajüin wakuwaʼipa nümaa Jeʼwaa otta süpüla wulein waaʼin noʼuluʼu (Sal. 101:3; 1 Tim. 4:12).

19. ¿Kasa weʼreetka waaʼinmajüle tü kasa kojutusü naapakat Jeʼwaa wamüin?

¹⁹ Waya anoujashiikana, waaʼinmajüinjatü tü kasa kojutusü naapakat Jeʼwaa wamüin. Tia shia tü pütchi shiimain suluʼujeejatkat tü Wiwüliakat otta wekirajüin wayuu sünain tia pütchikat. Waaʼinrüle tia, wuleerü waaʼin, watüjaajeerü aaʼu tü wakuwaʼipainjatkat otta wakaalinjeena na waneinnua sünain eʼraajaa Jeʼwaa. Nükaalinjeena waya Jeʼwaa süpüla waaʼinmajüin tü kasa kojutusü naapakat wamüin (1 Tim. 6:12, 19).