▪ Watüjawee aaʼu jaraliin na saashajaakana achiki Eclesiastés 5:8. Anuu sünüiki: «Nnojo ponuin paaʼin müliale piʼrüin atumawaa na wayuu maʼletsekana, nnojorüle lotuin atumawaa sukuwaʼipa wanee kasa jee saainjünüle kasa mojusü puumainpaʼa. Chia sülaülakai mma, eeshi wanee laülaakai naaʼu chi jülüjakai aaʼin süpüshuaʼa tü kasa naaʼinrakat, eetaashii joo waneinnua laülaakana naaʼu naya sülaülashiikana mma».

Eesüjaʼa wayaawatüle saaʼu nayain na sülaülashiikana mma na saashajaakana achiki tia wetsiikulokot. Shiasaʼa jülüjale maʼin waaʼin tü sümakat tia wetsiikulokot, wayaawateerü aaʼu saashajaainya nüchiki Jeʼwaa, amülialaasü waaʼin otta anasü waaʼin sutuma watüjaain saaʼu tia.

Aashajaasü Eclesiastés 5:8 nüchiki wanee sülaülashi mma müliakai atuma na wayuu maʼletsekana. Nnojotpejeʼe sotuin naaʼin eein wanee laülaakai nuulia jülüjakai aaʼin süpüshuaʼa tü kasa naaʼinrakat otta eetaashii joo waneinnua laülaakana naaʼu. Aaʼinrapejeʼe kasa mojusü na sülaülashiikana mma, müshiijeseʼe müliain maʼin na wayuu maʼletsekana.

Mojule maʼin tü kasa naaʼinrakat na sülaülashiikana mma, watüjaa aaʼu niʼrüin Jeʼwaa süpüshuaʼa tü kasa mojusü naaʼinrakat süka Miyoʼushin nia noulia. Wachunta kaalinwaa nümüin Jeʼwaa jee waküja nümüin süpüshuaʼa tü alatakat wamüin (Sal. 55:22; Filip. 4:6, 7). Watüjaa aaʼu «niʼrüin Jeʼwaa süpüshuaʼa tü kasa alatakat sainküinpünaa tü mmakat otta nükaalinjain chi aʼyataakai nümüin süka süpüshuaʼa naaʼin» (2 Crón. 16:9).

Sünainjee tü sümakat Eclesiastés 5:8, wayaawata aaʼu eein wanee miyoʼushikai maʼin noulia na sülaülashiikana mma. Niapejeʼe Jeʼwaa chi Miyoʼushikai saaʼu tü kasakat süpüshuaʼa. Aluwataashi nia maaʼulu yaa nükajee Jesucristo chi Nüchonkai. Chi Maleiwa Pülashikai maʼin, niʼrüin süpüshuaʼa tü kasa alatakat, lotusü nukuwaʼipa otta lotusü nukuwaʼipa chi Nüchonkai.