1, 2. ¿Kasa wekirajaajeetka anain sünain ekirajaayakat tüü?

¿JAMÜSÜ paaʼin kakaliale süpüla süntüin wanee kasa aluwataanaka pümüin? Eesüjaʼa müle paaʼin maʼaka süküjain Proverbios 13:12, tü makat: «Ayuuisü saaʼin wanee wayuu nnojorüle shiʼrüin tü kasa saʼatapajakat». Müleka pütüjaale saaʼu jamüin nnojotka süntamaatüin tü kasa paʼatapajakat, eesüjaʼa nnojoleerüle süshapalaain paaʼin.

² Sünain ekirajaayakat tüü, wekirajaajeerü anain waneirua pütchi sümaka tü Bibliakat anaka wamüin süpüla nnojoluin süshapalaain waaʼin soʼunnaa tü kasa mojusü weʼrakat (Miq. 7:7). Wekirajaajeerü anain piamasü kasa nnojoluinjatka süshapalaain atuma waaʼin süka nükaalinjeenain waya Jeʼwaa. Wekirajaajeerü anain tü neʼreetkat na wayuu eʼitaakana naaʼin nünain Maleiwa.

3. ¿Kasa watüjaka sünainjee Proverbios 13:11?

³ Anuu sünüiki Proverbios 13: 11: «Washirüle wanee wayuu uatuwoʼushi ajaʼlajamaateerü tü nuwashirüinkat nuulia, eekajasaʼa chi wayuu aʼyataakai, kooʼomüin kooʼomüin meerü tü nuwashirüinkat». ¿Kasa watüjaka sünainjee tia pütchikat? Tü watüjakat sünainjee shia nnojoliinjanain washapajaain sünain aaʼinraa wanee kasa suulia mojuin sukuwaʼipa watuma.

4. ¿Kasa watüjaka sünainjee Proverbios 4:18?

⁴ Anuu sünüiki Proverbios 4:18: «Napüna na lotushiikana akuwaʼipa müsü aka saaʼin nuwarala chi kaʼikai, suwasajaa suwasajaa sümapa tü aikat». Wayaawata aaʼu sünainjee tia pütchikat nikirajüin  Jeʼwaa shiʼipaʼaya tü nupueulosekat süpüla shiyaawatüin saaʼu tü keeʼireekat naaʼin. Jee wane kasa wayaawataka sünainjee tia pütchikat shia sükooʼomüinraain shiʼipaʼaya nunoula wanee anoujashi süpüla aleewain nia nümaa Jeʼwaa. Nnojoishii waya aleewamaatüin nümaa Jeʼwaa, kakaliasü süpüla wountuin tia. Müleka wekirajaʼawaire sünain tü Bibliakat jee waaʼinrawaire tü sümakat jee tü sümakat nupueulose Maleiwa, washateerü nukuwaʼipa Kürisüto otta weʼraajeerü maʼin nukuwaʼipa Maleiwa. Wekirajaa sünain tü nümakat Jesuu süchiki wanee waüyee süpüla watüjaain saaʼu jamüin sunoutaainjatka shiʼipaʼaya wakuwaʼipa.

5. ¿Kasa nüküjaka achiki Jesuu süpüla wayaawatüin saaʼu nnojoluin sunoutaamaatüin nukuwaʼipa wanee wayuu?

⁵ Naashin Jesuu tü pütchi anasü waküjakat nüchiki Maleiwa, müsü aka saaʼin tü waüyee nüpünajakat wanee wayuu. Anuu nünüiki Jesuu: «Chi apünajüikai, wanaa sümaa naʼatapajüin, jaʼitaichi atunküin, maaʼaya aka katüle noʼu, osotüsia neʼe nujuuna tü nüpünajüinkat je müleʼosü shiaʼaya sünain nnojolüin nütüjaain saaʼu jamakuaippalüin. Eweetüsü shia sümüiwa süleʼeruʼujee mma. Osotüsü palajana tü süpanakat. Eweeta müsia tü süsiikat süchikijee. Je süchiki tü süsiikat, kachon müsia» (Mar. 4:27, 28). ¿Kasa nüküjeeka achiki Jesuu? Tü nüküjeekalü achiki shia sükooʼomüinraain shiʼipaʼaya nunoula wanee wayuu aapaka nüchiki Maleiwa maʼaka saaʼin shimiyoʼulaain wanee pünajüt. Jamüshiijaʼa na wekirajüinkana sünain tü Bibliakat sümaʼinruʼu narütkaain nünainmüin Jeʼwaa, weʼreerü sunoutaain shiʼipaʼaya nakuwaʼipa (Éf. 4: 22-24). Sotuinjatpejeʼe waaʼin niain Jeʼwaa miyoʼuka atuma nanoula (1 Cor. 3:7).

6, 7. ¿Kasa watüjaka sünainjee jamakuwaʼipalüin sukumajia tü Mmakat nutuma Maleiwa?

⁶ Nnojoishi kashapajaaralin Jeʼwaa sünain tü kasa naaʼinrakat. Naaʼinrüin tia süpüla kojutuinjachin nia atumawaa jee anainjanain na wayuukana nutuma. Wekirajaa sünain tü naaʼinrakat Jeʼwaa süpüla nukumajüin shiʼipaʼaya tü Mmakat sümaa tü kasa eekat saaʼu.

⁷ Süküjain tü Bibliakat jamüin sukumajia nutuma Jeʼwaa tü Mmakat. Niʼitaain tü seeruluinkat  otta tü sajaʼapüinkat (Job 38:5, 6). Kettaapa nukumajüin Maleiwa wanee kasa nünanajüin joo shia (Gén. 1:10, 12). Jülüjataa waaʼin jamüin naaʼin na aapieekana neʼrapa kettaawalin wanee kasa nutuma Maleiwa. Watüjaa aaʼu talatüin maʼin naya süka naʼwaatüin sümaa naʼwatüin najapü saashin tü Bibliakat (Job 38:7). ¿Kasa watüjaka sünainjee tia? Tü watüjakat shia kakaliashaatain süpüla kettaawalin nutuma Jeʼwaa tü kasa nukumajakat, maʼaka saaʼin tü Mmakat, tü jolotsükalüirua, tü mürütkalüirua otta na wayuukana. Shiasaʼa nünanajapa joo tü nukumalakat niʼrüin anain maʼin shia (Gén. 1:31).

8. ¿Kasa wekirajaainjatka anain jooluʼu?

⁸ Wekirajaaitpa anain wainmain pütchi suluʼu tü Bibliakat wayaawataka anainjee nnojoliinjanain kashapajaaraliin waya. Wekirajaajeerü anain jooluʼu piamasü kasa nnojoluinjatka süshapalaain atuma waaʼin süka nükaalinjeenain waya Jeʼwaa.

9. ¿Kasache eeka süpüla süshapalaain atuma waaʼin?

⁹ Nnojorüle nusoutamaatüin Jeʼwaa sümüin wanee kasa wachuntaka nümüin. Wachuntule nümüin Jeʼwaa süpüla nüchecherüin waaʼin soʼunnaa wanee kasa alataka wamüin jee shiale süpüla wooʼulaain suulia waaʼinrüin wanee kasa nnojotka anain nuʼupala, eesüjaʼa jülüjale waaʼin nnojoluin nusoutamaatüin sümüin tü kasa wachuntakat nümüin. ¿Jamüshiche nnojoikai nusoutamaatüin Jeʼwaa sümüin süpüshuaʼa tü kasa wachuntakat nümüin?

10. ¿Jamüshii nnojoliinjanaka kashapajaaraliin waya wachuntapa wanee kasa nümüin Jeʼwaa?

¹⁰ Naapajüin Jeʼwaa wanüiki woʼuraajapa nümüin (Sal. 65:2). Nütüjaa aaʼu kanoulain waya nünain süka woʼuraajüin nümüin (Heb. 11:6). Anasü nümüin Jeʼwaa wachuntapa kaalinwaa nümüin jee niʼreein waaʼinrüin tü keeʼireekat naaʼin wapüleerua (1 Juan 3:22). Süpüla wooʼulaainjatüin suulia waaʼinrüin wanee kasa nnojotka anain noʼuluʼu Jeʼwaa, nnojoliinjana waya kashapajaaraliin jee pansaainjatü wakuwaʼipa wanaapünaa sümaa tü wachuntakat nümüin. Anuu nünüiki Jesuu: «Anakaja müleka juchuntüle nümüin Maleiwa waneepia süka süpüshua jaaʼin. Maa aka wane wayuu nuchuntüle, aapüna amüinchi. Maa aka wane wayuu mekeerüle, nünta anainrü tü nüchajaakat achiki. Maa aka wane wayuu nütaletüle miichoʼu, ajutanna apüleechi». Tü nüküjeekalü achiki Jesuu shia eein süpüla nnojoluin nusoutamaatüin Jeʼwaa sümüin tü wachuntakat nümüin (Mat. 7:7, 8). Müsüjeseʼe anain waaʼinrüle tü nümakat Jesuu, wachunta maʼin nümüin Maleiwa waneepia. Watüjaa aaʼu naapajüin Jeʼwaa wanüiki jee nusouteerüin sümüin tü kasa wachuntakat nümüin (Col. 4:2).

11. Nnojoire nusoutamaatüin wamüin Jeʼwaa, ¿jamüsü nnojoleetka süshapalaain waaʼin sünainjee tü sümakat Hebreokana 4:16?

¹¹ Mayaainjeʼe müin kakaliakai naaʼin Jeʼwaa saaʼin wamüin süpüla nusoutuin shiʼipajee tü wachuntakat nümüin, watüjaa aaʼu nükaalinjeenain waya «soʼu tü kaʼi choʼujaajeetkalü oʼu shia wamüin» (paashajeʼera Hebreokana 4:16, TNM). Nnojotsü anain jülüjale waaʼin naʼalijirüin Jeʼwaa woulia tü kasa wachuntakat. Eeshii wawalayuu kakaliainnakana achuntuin nümüin Maleiwa süpüla neʼrüin najaʼttirüin tü kasa mojusükat. Nnojotpejeʼe mojuin wachuntule tia, nüküjain Jesuu wachuntuinjanain nümüin Maleiwa süpüla nuluwataainjachin saaʼu Mmakat (Mat. 6:10, TNM). Malaa neʼe wooʼulaale suulia anoujaa sutuma nnojoluin süntüin nükalia Maleiwa soʼu tü kaʼi waʼatapajakalü oʼu shia (Hab. 2:3; Mat. 24:44). Kekiire waya nnojoleerü ashapalaain waaʼin jee ayateena waya oʼuraajüin nümüin sümaa weʼitaain waaʼin nünain. Anteerü nükalia Maleiwa soʼu tü kaʼi anakalü oʼu shia nümüin. Nüneeküitpa Jeʼwaa joujaleerüin süntüin tia kaʼikat (Mat. 24:36; 2 Ped. 3:15).

12. ¿Kasa kapüleejeetka aaʼujee wamüin nnojoluin süshapalaain waaʼin?

 ¹² Nnojorüle weʼrüin najaʼttirüin Jeʼwaa tü kasa mojusü aainjünakat wamüin. Maaʼulu yaa, wainma jieyuu müliakana atumawaa, eeshii eekai müliain sutuma naatain noumain, naatain neʼiruku jee nakuwaʼipapala, eeshii nemeeʼerainpalale wanee wayuu sutuma joʼuuin sümaa kamojulain nia jee malale nia sutuma ayuulin nikii. Otta müsia wainma na wawalayuu müliakana atuma saaʼu nanoujain sünain tü sümakat tü Bibliakat. Saainjünüle kasa mojusü wamüin makat aka saaʼin tia, anasü sotule waaʼin nünüiki Jesuu, müshi nia: «Chi eekai nüchecherüin naaʼin suʼunnaa tü müliaa niʼrakat, ayateechi oʼtteʼennüin tatüma» (Mat. 24:13). ¿Kaseerü paainjaka pütüjaale saaʼu naaʼinrüin kasa mojusü wanee wawala? Natüjaaitpale saaʼu na laülaashiikana süchiki tia, ¿paʼatapajeetche nanoutuin sukuwaʼipa tia wanaapünaa sümaa tü nümakat Jeʼwaa? ¿Kasa naaʼinraka na laülaashiikana kaainjarale wanee wawala?

13. ¿Kasa keeʼireeka naaʼin Jeʼwaa naaʼinrüin na laülaashiikana kaainjalapa wanee wawala?

¹³ Natüjaapa saaʼu na laülaashiikana kaainjalain wanee wawala, achuntushii naya nümüin Maleiwa süpüla kekiinjanain maʼin naya jee nayaawatüinjatüin saaʼu tü alatakat (Sant. 3:17). Tü keeʼireekat naaʼin na laülaashiikana shia niyaawajaainjachin wanee wawala suulia naainjala (Sant. 5:19, 20). Jee müsia keeʼireesü naaʼin naaʼinmajüin na wawalayuukana suulia mojuin nakuwaʼipa jee namüliajüin na mojukana aaʼin saaliijee naainjala wanee wawala (2 Cor. 1:3, 4). Süpüla nakumajüin sukuwaʼipa na laülaashiikana naainjala wanee wawala, asakirüinjana naya palajana süchiirua tü alatakat süpüla natüjaain saaʼu. Eesü süpüla kakaliain tia süpüla pansaain tü natüjaakalü aaʼu süchiki tü alatakat. Achuntushii maʼin kaalinwaa nümüin Maleiwa, naküjain tü sümakat tü Bibliakat nümüin chi kaainjalashikai otta nachiaain nia wanaapünaa sümaa tü nukuwaʼipakat otta tü naaʼinrakat (Jer. 30:11). Nnojoishii kakaliain maʼin na laülaashiikana süpüla nakumajüin sukuwaʼipa wanee kasa alataka, nnojotpejeʼe naneekamaatüin tü anakat süpüla naaʼinrüin nüpüleerua chi kaainjalashikai. Nachiaapa na laülaashiikana wanee wawala kaainjalakai wanaapünaa sümaa tü nümakat Jeʼwaa, aneerü nakuwaʼipa na wawalayuukana. Mayaainjeʼe naaʼinrüin na laülaashiikana tü nümakat Jeʼwaa süchiki tü naaʼinrajatkat kaainjarale wanee wawala, eesü süpüla ayatüin mojuin naaʼin wanee wawala saaliijee tü kasa naaʼinrakat chi kaainjalashikai. Sülatüle pümüin tia, ¿kasa anaka süpüla paaʼinrüin suulia mojuin paaʼin?

14. Püküja nüchiki wanee wayuu anakai süpüla püshatüin akuwaʼipa saainjünüle kasa mojusü pümüin.

 ¹⁴ ¿Eeiria aainjünüin kasa mojusü pümüin? ¿Eesüche süpüla naaʼinrüin tia pümüin wanee wawala? Wanee kasa piʼitaajeetka atuma paaʼin nünain Jeʼwaa shia tü süküjakat tü Bibliakat nachiki waneinnua wayuu aʼatapajaka nunouteʼerüin Jeʼwaa tü aainjünakat namüin. Jülüjataa waaʼin nukuwaʼipa José, wainma kasa mojusü naainjaka na nuwalayuukana nümüin, nnojoipejeʼe yüülain nia. Shia naaʼinmaaka maʼin tü niʼyataainkat nümüin Jeʼwaa. Anakalaka maʼin nukuwaʼipa nutuma Jeʼwaa süka niʼitaain naaʼin nünain (Gén. 39:21). Mapa, motusü naaʼin José naainjala na nuwalayuukana nümüin otta niʼrüin tü kasa anasü naapakat Jeʼwaa nümüin (Gén. 45:5). Maʼaka naaʼin José, atütülaasü waaʼin waʼaleewajaale maʼin nümaa Jeʼwaa jee wooʼulaale nunoutuin tü kasa mojusü aainjünakat wamüin soʼu tü kaʼi anakalü oʼu shia nümüin (Sal. 7:17; 73:28).

15. ¿Kasa saaʼinraka wanee wawala süpüla süchecherüin saaʼin soʼu saainjünüin wanee kasa sümüin?

¹⁵ Mayaainjeʼe nnojoluin saainjünüin wamüin tü kasa mojusü aainjünakat nümüin José, eesü saainjünüle wamüin wanee kasa mojeetka atuma waaʼin. Mojujiraale waya nümaa wanee wayuu, jaʼitaichi nnojolin nunoujain wanaa wamaa, aneerü wakuwaʼipa waaʼinrüle tü sümakat tü Bibliakat (Filip. 2:3-5). Jülüjataa waaʼin tü alatakat sümüin wanee wawala mojuka maʼin aaʼin sutuma shiperulajüin shia wanee wayuu aʼyataajiraaka sümaa. Sutuma sotuin saaʼin tü wawalakat nukuwaʼipa Jesuu, nnojotsü jashichijaain shia. Jamüshijaʼa Jesuu soʼu müliain nia atumawaa jee meeʼerapalain nia sutuma wayuu, nnojotsü mojuin nünüiki neʼipajee (1 Ped. 2:21, 23). Sutuma süshatüin nukuwaʼipa Jesuu tü wawalakat, süchecherüin saaʼin suulia saaʼinrüin wanee kasa nnojotka anain süpüla sunoutuin tü aainjünakat sümüin. Sütüjaaka aaʼu mapa tü wawalakat ayuulin tü wayuu mojukalü anüiki süchiki sümaa shapaain maʼin saaʼin. «Sutuma shapaain maʼin saaʼin nnojotsü shiyaawatüin saaʼu sünüiki tachiki», maa müsü saaʼin süleʼeruʼu tü wawalakat süchiki tia wayuukot. Talataka saaʼin tü wawalakat süka süchecherüin saaʼin suulia jashiee jee anasü saaʼin sutuma.

16. ¿Kasa amülialeetka paaʼin saainjünüle pümüin kasa mojusü? (1 Pedro 3:12).

¹⁶ Saainjünüle pümüin wanee kasa mojuka atuma paaʼin, soto paaʼin nnojolin wattaluʼuin Jeʼwaa noulia na mojukana aaʼin (Sal. 34:18).  Aishi pia nüpüla Jeʼwaa süka piʼitaain paaʼin nünain jee süka püküjain nümüin tü alatakat pümüin (Sal. 55:22). Nia Jeʼwaa chi kasalajanainjachikai atuma saainjala wayuu süpüshuaʼa, nnojotsü eein wanee kasa eeka süpüla suunjulajünüin nuulia (paashajeʼera 1 Pedro 3:12). Sülatüle pümüin wanee kasa isaka püchiki punouteʼerüin, ayataʼaya piʼitaain paaʼin nünain Jeʼwaa.

17. ¿Kasa nüküjaka wamüin Jeʼwaa suluʼu Isaías 30:18?

¹⁷ Wainmeerü maʼin tü kasa anasü weʼreetkat nuluwataapeena Jeʼwaa yaa saaʼu tü mmakat. Anuu sünüiki Isaías 30:18: «Eejashaatasü naaʼin Jeʼwaa shiiʼiree nükaalinjain jia, atamaajeechi nia süpüla nümülialaain aaʼin jaalin. Süka niain Jeʼwaa wanee Maleiwa loto akuwaʼipachi. Anataʼaleeshiijaʼa na aʼatapajakana shikeraajüin tü nümakat». Na wayuu ayatakana eʼitaain naaʼin nünain Jeʼwaa, wainmeerü kasa anasü neʼreetka maaʼulu jee mapeena.

18. ¿Kasa weʼreetka suluʼupa waya tü paʼaraiisükat?

¹⁸ Suluʼupa waya tü paʼaraiisükat müiria nnojoluin shapaain waaʼin otta nnojoleerü weʼrüin tü alatakat wamüin maaʼutpünaa. Müiria nnojoluin aainjünüin kasa mojusü otta müiria nnojoluin eein müliaa (Alat. Map. 21:4). Nnojoleerü shapaain waaʼin saaʼujee wanee kasa, jama eejeerüin wamaʼana tü choʼujaakat wamüin (Sal. 72:16; Is. 54:13). Kasataalejeseʼe süntamaatüin tia kaʼikat.

19. ¿Kasapülajana yapaka waya maaʼulu nutuma Jeʼwaa?

¹⁹ Sümaʼinruʼu wanouteʼerüin wakuwaʼipa jee jaʼyain waaʼu tü akuwaʼipaa anasükat, yapashii waya nutuma Jeʼwaa süpüla kepiainjanain waya saaʼu tü mmakat nuluwataapeena saaʼu. Nnojo pümalajaain aaʼin, anashaateerü maʼin wakuwaʼipa soʼu palit kaʼi. Müsüjeseʼe anain maʼin ayatüle weʼitaain waaʼin nünain Jeʼwaa sümaa talatüin waaʼin sümaʼinruʼu nikeraajüin tü nümakat.