1. ¿Kasa naʼyataaka achiirua waneinnua wawalayuu?

 WAINMA kasa waaʼinrüinjatka süpülapünaa sajaʼttüin kasa süpüshuaʼa (Mat. 24:14; Luc. 10:2; 1 Ped. 5:2). Sutuma waʼyataweein nümüin Jeʼwaa, wachajaain maʼin sukuwaʼipa süpüla wakooʼomüinrüin shia. Eeshii na aʼyataakana süchiirua süpüla pürekutsooliinjanain naya, süpüla naʼyataainjanain suluʼu Weteet jee shiale sünain akumajaa otta anouteʼeraa piichi waʼwaajaka aluʼu Maleiwa. Eeshii na aʼyataakana süchiirua süpüla laülaashiinjanain naya napüleerua na wawalayuukana jee shiale süpüla naʼyataain neʼipajee na laülaashiikana (1 Tim. 3:1, 8). Talatakajasaʼa naaʼin Jeʼwaa niʼrapa tü naaʼinrakat na aʼyataakana nümüin (Sal. 110:3; Is. 6:8).

2. ¿Jameerü waaʼin nnojorüle waʼyataain sünain tü waʼyataweekalü amüin suluʼu nupueulose Jeʼwaa?

² Eesüjaʼa yüülale waaʼin weʼrüle sülata sülata sümüin tü kaʼikat sümaa nnojoluin waʼyataain sünain tü waʼyataweekalü amüin suluʼu nupueulose Jeʼwaa. Eesüjaʼa nnojorüle wountuin tia sutuma laülaain waya jee shiale sutuma waneirua kasa (Prov. 13:12). Alatüsü tia sümüin Melissa, * aʼyataweesü shia suluʼu Weteet jee oʼuneesü shia sünain tü Ekirajawaa napülajatkat na Aküjaliikana Pütchi. Anuu sünüiki: «Kapüleesü tamüin taaʼinrüin tia süka laülaairüin taya. Eesia mojuwaire taaʼin sutuma tia».

3. ¿Kasa naaʼinrajatka waneinnua wawalayuu süpüla saapünüin namüin wanee aʼyatawaa suluʼu nupueulose Jeʼwaa?

³ Wainma jimaʼalii nnojoliika jooin naya süpüla ayuulii, shiajaʼa neʼe choʼujaaka laülaainjatüin naaʼin jee jaʼyainjatüin naaʼu tü  akuwaʼipaa eeinjatkat nünain wanee anoujashi süpüla saapünüin namüin wanee aʼyatawaa suluʼu nupueulose Jeʼwaa. Eeshiijaʼa kekiire naya, naaʼinramaatüle wanee kasa jee nnojoliire shokulain naya sünain aʼyatawaa. Eeshiijaʼa kashapajaaraliire naya, choʼujaale namüin tütüinjanain naya sünain aʼyatawaa jee kojutuinjanain namüin na waneinnua. Müleka nanouteʼerüle tia sünain nakuwaʼipa, ainkeerü neʼe naaʼin saapünapa namüin wanee aʼyatawaa suluʼu nupueulose Jeʼwaa. Jülüjataa waaʼin tü alatakat nümüin Nick, wanaa sümaa 20 nuuyase mojusü naaʼin süka nnojolin nüneekünüin süpüla niʼyataainjachin neʼipajee na laülaashiikana. Anuu nünüiki: «‹Eetaasü tü kasa nnojotkalü anain tatuma›, maa müsü taaʼin». Nnojoipejeʼe nia ayüülajaain. Ayatüsia nüchajaain sukuwaʼipa süpüla niʼyataain napüleerua na wawalayuukana jee süpüla nükooʼomüinrüin niʼyataain sünain aküjaa pütchi. Maaʼulu yaa, niashi wanee noʼutku na Laülaashii Jülüjakana aaʼin tü aʼyatawaakat suluʼu Weteet.

4. ¿Kasa wekirajaainjatka anain sünain ekirajaayakat tüü?

⁴ Mojule waaʼin sutuma nnojoluin waʼyataain sünain tü waʼyataweekalü amüin suluʼu nupueulose Jeʼwaa, waküja nümüin Jeʼwaa jamüin waaʼin (Sal. 37:5-7). Wasakira waneinnua wawalayuu laülaakana aaʼin sünain anoujaa süchiki tü waaʼinrajatkat süpüla anain wakuwaʼipa sünain aʼyatawaa nümüin Jeʼwaa jee waaʼinra tü namakat wamüin. Müle shia watuma, eesüjaʼa süpüla saapünüin wamüin tü waʼyataweekalü amüin. Nnojorüle saapünüin wamüin tia maʼaka sülatüin sümüin Melissa, ¿kasa waaʼinrajatka süpüla ayatüin talatüin waaʼin? Sünain ekirajaayakat tüü wekirajaajeerü anain pütchikat tüü: ¿Kasa eeka süpüla talatüin atuma waaʼin? ¿Kasa waaʼinrajatka süpüla ayatüin talatüin waaʼin? ¿Kasa eeka süpüla waʼyataain achiirua süpüla ayatüin talatüin waaʼin?

5. ¿Kasa waaʼinrajatka süpüla talatüin waaʼin? (Eclesiastés 6:9).

⁵ Süpüla talatüin waaʼin choʼujaasü waaʼinrüin tü sümakat Eclesiastés 6:9 (paashajeʼera). Chi wayuu talatakai aaʼin sümaa tü niʼrakat, kojutusü nümüin tü kasa eekat süpüla naaʼinrüin. Ichaatain jee iseetain nümüle wanee wayuu süpaʼa mma süchiirua wanee kasa keeʼireekat naaʼin nnojoleerü talatüin naaʼin. Müsüjeseʼe talateerüin waaʼin jülüjale waaʼin tü eekat süpüla waaʼinrüin sünain aʼyatawaa nümüin Jeʼwaa.

6. ¿Kasa wekirajaainjatka anain jooluʼu?

⁶ Anasü waaʼin waaʼinrüle waneirua kasa naataka suulia tü kiʼrakalü anain waya. Sutuma müin wakuwaʼipa, ¿eesüche süpüla ayatüin talatüin waaʼin sümaa tü kasa waaʼinrawaikat? Aa, eesü süpüla ayatüin talatüin waaʼin. Süpüla watüjaain saaʼu jamüin eekai süpüla wountuin tia, waashajaa nachiki na achepchiee aapünakana amüin woʼot nneerümaajatü naashajaaka achiki Jesuu suluʼu Mateo 25:14-30.

7. Püküja tü nümakat Jesuu nachiki na achepchiee aapünakana amüin woʼot nneerümaajatü.

⁷ Aashajaashi Jesuu nüchiki wanee wayuu oʼunaka wattamüin, shiasaʼa süpülapünaa nuʼunuin neenajüin na nüchepchiakana süpüla niʼitaainjatüin najapuluʼu nuwashirüin. Naapaka nümüin wanee nüchepchia jaʼrai woʼot nneerümaajatü, nümüin wane naapüin piamasü woʼot ooʼulaka nümüin chi wane wanee woʼot. * Oʼunusü tia süchiirua tü nountakat waneʼewai nakua. Chi aapünakai amüin jaʼrai woʼot nneerümaajatü otta chi aapünakai amüin piamasü woʼot, kachonsü tü nneetkat natuma. Akaisaʼa chi aapünakai  amüin wanee woʼot, machonsat tü nneetkat nutuma. Müshijeseʼe nüjünajaanüin naʼakajee na wane achepchiakana.

8. ¿Jamüsü talataka naaʼin chi achepchiee aapünakai amüin jaʼraisü woʼot nneerümaajatü?

⁸ Talatakajasaʼa maʼin naaʼin chi achepchiee aapünakai amüin jaʼraisü woʼot nneerümaajatü nutuma chi nülaamainkai. Wainma maʼin nneerü aapünaka nümüin jee nütüjaa aaʼu niʼitaain naaʼin chi nülaamainkai nünain. ¿Jamüsüche naaʼin chi wane achepchiee aapünakai amüin piamasü woʼot? ¿Mojusüche naaʼin sutuma saapünüin nümüin palit nneerü nuulia chi wane? Joʼu wekirajaai sünain tia.

9. ¿Kasa nnojotka nüküjain Jesuu nüchiki chi achepchiee aapünakai amüin piamasü woʼot nneerümaajatü? (Mateo 25:22, 23).

⁹ (Paashajeʼera Mateo 25:22, 23). Nnojotsü nüküjain Jesuu jashichin chi achepchiee aapünakai amüin piamasü woʼot nneerümaajatü jee nnojoishi ayüülajaain nia. Nnojotsü nüküjain Jesuu müin nünüiki chi achepchieekai mayaa: «Tütüshia taya maʼaka naaʼin chi wane aapünakai amüin jaʼraisü woʼot. Nnojorüle kojutuin nümüin chi talaamainkai tü taaʼinrakat, anasüjaʼamata tojoitüle tü nneetkat jee taʼyataaiwa neʼe tapüleerua».

10. ¿Kasa naainjaka chi achepchieekai süka tü piamasü woʼot nneerümaajatü aapünakat nümüin?

¹⁰ Kojutusü maʼin nümüin chi achepchiee aapünakai amüin piamasü woʼot nneerümaajatü maʼaka kojutuin nümüin chi wane aapünakai amüin jaʼraisü woʼot. Aʼyataashi maʼin nia süpüla nikeraajüin tü niʼyataainkat nümüin chi nülaamainkai. Sutuma tütüin maʼin nia, kachonsü tü nneetkat nutuma. Talatüshi maʼin chi nülaamainkai nümaa jee naapüin sooʼomüin niʼyataain nümüin.

11. ¿Kasa waaʼinrajatka süpüla ayatüin talatüin waaʼin?

 ¹¹ Akaʼaya wayakana, eeshii süpüla talatüin maʼin waya waaʼinmaale tü aʼyatawaa aapünakat wamüin suluʼu nupueulose Jeʼwaa, maʼaka saaʼin tü aküjaakat pütchi jee tü waaʼinrakat napüleerua na wawalayuukana (Aluw. 18:5; Heb. 10:24, 25). Anasü yapale watuma tü wekirajaainjatkalü anain sünain tü outkajawaakat süpüla watütüleʼerüin naaʼin na wawalayuukana wasoutapa shiʼipajee tü pütchi asakinnakalü anain. Kojutuinjatü wamüin wekirajüinjanale na wawalayuukana sünain tü outkajawaakat Wakuwaʼipa otta Waʼyataain nümüin Maleiwa, tü kanüliakat «Atüjainjana waya ekirajaa». Suchuntunüle wamüin waaʼinrüin wanee kasa napüleerua na wawalayuukana, jüüjüü waya jee waaʼinra shia. «Nnojotsü choʼujaain maʼin anainjatüin sukuwaʼipa, waaʼinramaata shia», nnojotsü müinjatüin wanüiki. Acheküsü anainjatüin watuma tü aʼyatawaa aapünakat wamüin (Prov. 22:29). Waaʼinmaale maʼin tü waʼyataainkat nümüin Jeʼwaa, aleeweena waya nümaa jee talateena maʼin waya (Gal. 6:4). Jee müsia, talateena waya nümaa wanee wawala aapünaka amüin wanee aʼyatawaa waʼyataweeka amüin (Roma 12:15; Gal. 5:26).

12. ¿Kasa naaʼinraka Nick jee müsia Melissa süpüla talatüin maʼin naya?

¹² Jülüjataa waaʼin sukuwaʼipa Melissa. Mayaainjeʼe nnojoluin suʼunuin süpüla shiʼyataainjatüin suluʼu Weteet jee suʼunuin sünain tü Ekirajawaa napülajatkat na Aküjaliikana Pütchi, ayatüsia talatüin saaʼin. Anuu sünüiki: «Süka pürekutsoolüin rekulaat taya, tooʼulaküin sukuwaʼipa süküjia pütchi eekai eein. Talatüsü maʼin taaʼin sutuma taaʼinrüin tia». Jülüjataa waaʼin tü naaʼinrakat Nick suulia mojuin naaʼin wanaa sümaa nnojolin nüneekünüin süpüla niʼipajanain nia na laülaashiikana. Anuu nünüiki: «Shia taaʼinmaaka maʼin tü aʼyatawaa eekat süpüla taaʼinrüin nümüin Maleiwa maʼaka saaʼin aküjaa pütchi jee anain tanüiki shiʼipajee tü asakinnakalü anain sünain tü outkajawaakat. Jee müsia tepirajüin tü karaloʼuta napülajatkat na aʼyataweekana suluʼu Weteet, eenajünüshi taya wanee juya süchikijee».

13. ¿Jameerü waaʼin waaʼinmaale maʼin tü waainjakat nüpüleerua Maleiwa maaʼulu yaa? (Eclesiastés 2:24).

¹³ Müleka waaʼinmaale maʼin tü aʼyatawaa eekat wamaʼana, ¿aapüneetche sooʼomüin wamüin? Eesüjaʼa süpüla müin shia maʼaka saaʼin tü alatakat nümüin Nick. Eepejeʼe süpüla nnojoluin müin shia. Eesü süpüla talatüin maʼin waaʼin sutuma tü kasa waainjakat maaʼulu süpüla waʼyataain nümüin Maleiwa maʼaka saaʼin sukuwaʼipa Melissa (paashajeʼera Eclesiastés 2:24). Jee müsia talateerü waaʼin sutuma watüjaain saaʼu kojutuin nümüin Jesuu tü kasa waaʼinrakat, jama niain walaamain.

14. ¿Kasa wachajaainjatka maʼin akuwaʼipa?

¹⁴ Waaʼinmaale maʼin tü waʼyataainkat nümüin Jeʼwaa, eesüjaʼa jülüjale waaʼin nnojoluin choʼujaain wakooʼomüinrüin shia. Nnojotsü anain wekiiruʼule tia. Wachajaweein sukuwaʼipa süpüla watüjain süpüleerua wakaalinjain na wawalayuukana, watüjain aküjaa pütchi jee ekirajaa wayuu. Wounteerü tia, kekiire maʼin waya jee wayaawatüle saaʼu eein tü isakat wachiki otta kapürale waaʼin nakuwaʼipa na waneinnua suulialeʼeya jülüjain waaʼin wakuwaʼipa neʼe wamüiwaʼa (Prov. 11:2; Aluw. 20:35).

15. ¿Jarat tü kasa waʼyataainjatkalü achiirua talateetka atuma waaʼin?

¹⁵ ¿Kasa eeka süpüla waʼyataain achiirua? Wachunta nümüin Jeʼwaa kaalinwaa süpüla wayaawatüin saaʼu tü kasa eekat süpüla wountuin waaʼinrüin (Prov. 16:3; Sant. 1:5). Eesü süpüla waʼyataain süchiirua tü kasa aküjünakat suluʼu  tü pütchikat waneesia, maʼaka saaʼin pürekutsooliin waya, waʼyataain suluʼu Weteet jee shiale süpüla akumajaa otta anouteʼeraa tü piichi  waʼwaajakalü aluʼu Maleiwa. Eesü süpüla wekirajaain sünain wanee anüikii naatajatü süpüla waküjain pütchi nüchiki Maleiwa. Eeshii süpüla wakolojooin suluʼu wanee mma naatajatü eere palitchoin wawalayuu. Watüjaweere sooʼomüin tü kasa eekat süpüla waaʼinrüin, anasü waashajeʼerüle tü karaloʼutakat Organizados para hacer la voluntad de Jehová ekirajaaya 10 jee waashajaale namaa na laülaashiikana eere woutkajaain. * Sümaʼinruʼu waʼyataain süchiirua tü waʼyataweekalü amüin, jaʼyeerü waaʼu laülaain waaʼin jee talatüin maʼin waaʼin.

16. ¿Kasa waaʼinrajatka nnojoliire süpüla waʼyataain nümüin Maleiwa sünain tü waʼyataweekalü amüin?

¹⁶ ¿Kasa waaʼinrajatka nnojoliire süpüla waʼyataain nümüin Maleiwa sünain tü waʼyataweekalü amüin? Eesü süpüla wachajaain waneʼeya eeka süpüla waʼyataain anain. Wekirajaa sünain waneirua kasa eeka süpüla waʼyataain achiirua.

17. Saashin 1 Timoteo 4:13, 15, ¿kasa naaʼinrajatka wanee wawala süpüla nütüjainjachin ekirajaa wayuu?

¹⁷ (Paashajeʼera 1 Timoteo 4:13, 15). Woutiisaichire pia, püchajaa sukuwaʼipa süpüla pütüjain aashajawaa jee ekirajaa. ¿Jamüsü anaka paaʼinrüle tia? Shia süka mapüleejeerüin pümüin pükaalinjain na wayuu aapajakana pünüiki. Eesü süpüla pikirajaain sünain waneʼewai sukua tü aküjünakat suluʼu tü poyeetokot Ayata pia sünain aashajeʼeraa otta ekirajaa. Eesü süpüla puuʼulaküin palajana chaa pipialuʼu jee puuʼulakeetka shia pikirajapa na wawalayuukana. Puchunta kaalinwaa nümüin chi wawala niʼipajachikai chi sülaülakai tü outkajawaakat * jee nayale na laülaashii atüjakana ekirajaa wayuu  (1 Tim. 5:17). Nnojotsü neʼe pütüjaainjatüin süpüleerua tü ekirajaaya suluʼukat tia poyeetokot, shia anaka aluʼu pükaalinjale na aapajakana pünüiki süpüla naaʼinrüin tü naapajakat. Paaʼinrüle tia, talateechi maʼin pia jee talateena na aapajakana pünüiki.

18. ¿Kasa waaʼinrajatka süpüla watüjain aküjaa pütchi jee ekirajaa wayuu?

¹⁸ Aluwataanüshii waya wapüshuaʼa sünain aküjaa pütchi jee ekirajaa wayuu (Mat. 28:19, 20; Roma 10:14, TNM). ¿Kasa waaʼinrajatka süpüla wountuin tia? Sümaʼinruʼu wekirajaain sünain tü poyeetokot Ekirajaa, wooʼulaka waneirua sukuwaʼipa suluʼujee tü wekirajaakat sünain. Eesü süpüla watüjain sooʼomüin süchiki tü waaʼinrajatkat sükajee tü karaloʼutakat Wekirajaayainjatü sünain tü outkajawaakat Wakuwaʼipa otta Waʼyataain nümüin Maleiwa jee suluʼu tü video sümaajatkat tü wanüikinjatkat waküjapa pütchi eeʼiyatünaka sünain tü outkajawaakat Wakuwaʼipa otta Waʼyataain nümüin Maleiwa. Wooʼulaka kojuyatua süpüla watüjaain saaʼu jaralüin tü anakat süpüla waaʼinrüin. Waaʼinrüle süpüshuaʼa tia, talateena maʼin waya, jama watüjeenain ekirajaa wayuu (2 Tim. 4:5).

19. ¿Kasa waaʼinrajatka süpüla anainjatüin wakuwaʼipa nuʼupala Maleiwa?

¹⁹ Wanee kasa anaka maʼin süpüla waʼyataain achiirua shia anainjatüin wakuwaʼipa nuʼupala Maleiwa (Gal. 5:22, 23; Col. 3:12; 2 Ped. 1:5-8). Jamüsüjaʼa keeʼireere waaʼin katsüinjatüin wanoula, eesü süpüla waashajeʼerüin tü karaloʼuta aashajaakat süchiki tü naaʼinrajatkat wanee wayuu süpüla katsüinjatüin nunoula. Eesü süpüla wanajüin tü video suluʼukat JW Broadcasting^® aashajaaka nachiki waneinnua wawalayuu katsüinkana maʼin anoula soʼunnaa tü alatakat namüin. Jülüja maʼin waaʼin tü eekat süpüla washatüin sünainjee nanoula.

20. ¿Kasa waaʼinrajatka süpüla talatüin maʼin waya jee nnojoliin wayüülajaain?

²⁰ Keeʼireesü maʼin waaʼin waaʼinrüin wainma kasa nüpüleerua Jeʼwaa, eepejeʼe isale wachiki waaʼinrüin shia maaʼulu. Nnojoleerü kapüleein wamüin waaʼinrüin tia paʼaraiisüpa tü mmakat. Sümaʼinruʼu waʼatapajüin tia kaʼikat, waaʼinmaa tü aʼyatawaa eekat wamaʼana suluʼu nupueulose Jeʼwaa. Waaʼinrüle tia, talateena maʼin waya otta nnojoleena ayüülajaain waya nnojorüle waʼyataain sünain tü waʼyataweekalü amüin. Jee talateechi maʼin Jeʼwaa wamaa (1 Tim. 1:11, TNM). Talataʼaya waya sümaa tü waʼyataainkat nümüin Jeʼwaa maaʼulu.