1, 2. Saashin Salmo 34:8, ¿kasa waaʼinrajatka süpüla wayaawatüin saaʼu anamiain Jeʼwaa wamüin?

SAAPÜNÜLE wamüin wanee eküülü nnojotpuʼuka weküin, eesüjaʼa waatüle seejuu, wekirajaale sünain jamüin suʼlakajaaya otta wasakirüle na ekaajakana shia süchiki tü seʼejükat. Watüjaweerü saaʼu jemetüle shia wooʼulakaleepa seʼejü.

² Eesü süpüla watüjaain saaʼu anamiain Jeʼwaa waashajeʼerüle tü Bibliakat, waashajeʼerüle tü karaloʼutairua eekat wamaʼana jee waapüle nanüiki waneinnua wawalayuu aküjakana süchiki tü kasa anasü naaʼinrakat Jeʼwaa napüleerua. Wayaawateetpejeʼe saaʼu anamiain Jeʼwaa wayale alatüin amüin tia (paashajeʼera Salmo 34:8). Anuu wanee sukuwaʼipa süpüla wayaawatüin saaʼu tia. Müleka keeʼireere waaʼin waʼyataweein nümüin Jeʼwaa waneepia, wooʼulaainjatü waneirua kasa. Eesüjaʼa waashajeʼerawaire tü nümakat Jesuu süchiki naapeerüin Jeʼwaa tü kasa choʼujaakat nümüin wanee wayuu naaʼinmaale tü niʼyataainkat nümüin, eepejeʼe süpüla nnojoluin wayaawatüin maʼin saaʼu tia süka nnojoluin wooʼulaain naaʼinrüin Jeʼwaa tia wapüleerua (Mat. 6:33, TNM). Sutuma weʼitaain waaʼin sünain nünüiki Jesuu, nnojoleerü siraain kaʼi waaʼu sünain aʼyatawaa waneepia jee wooʼulaajeerü waneirua kasa süpüla waaʼinmaain tü aküjaakat pütchi. Waaʼinrüle tia, naapeerü wamüin Jeʼwaa tü kasa choʼujaakat wamüin. Sünainjee tia, wayaawateerü saaʼu anamiain Jeʼwaa wamüin.

3. Sünainjee tü sümakat Salmo 16:1, 2, ¿jaralii naapaka amüin Jeʼwaa kasa anasü?

³ «Anamia Jeʼwaa sümüin wayuu süpüshuaʼa», akaʼaya namüin na wayuu nnojoliikana eʼraajüin nukuwaʼipa (Sal. 145:9; Mat. 5:45). Wainmapejeʼe maʼin tü kasa anasü naapakat namüin na aikana apüla nia jee na aʼyataakana nümüin süka süpüshuaʼa naaʼin (paashajeʼera Salmo 16:1, 2). Wekirajaa sünain waneirua kasa anasü naaʼinraka Jeʼwaa wapüleerua.

4. ¿Kasa anasü naaʼinraka Jeʼwaa napüleerua na arütkaakana nünainmüin?

 ⁴ Waaʼinrawaitpa tü wekirajaakat nüchiki Jeʼwaa, anasü wakuwaʼipa. Wanaa sümaa wekirajaain nüchiki, kooʼomüinsü naalin wapüla jee nükaalinjain waya süpüla wooʼulaain suulia tü kasa mojusü keejiakat wamüin kaʼyataka atuma waya nuulia (Col. 1:21). Wanaa sümaa waapüin waaʼin nümüin Jeʼwaa jee woutiisain waya, wayaawatüin maʼin saaʼu anamiain nia wamüin süka wulein waaʼin nutuma jee nürütkeʼerüin waya nünainmüin (1 Ped. 3:21).

5. ¿Kasa naaʼinraka Jeʼwaa wapüleerua waküjapa pütchi?

⁵ Wanaa sümaa waküjain pütchi weʼrüin tü kasa anasü naaʼinrakat Jeʼwaa wapüleerua. Eesüjaʼa süpüla nnojoluin süntüin wekiiruʼu waküjainjanain pütchi sainküin piichi sümüin wayuu nnojotka weʼraajüin. Eekajasaʼa maaʼulu, waaʼinrawalin tia jee nükaalinjain waya Jeʼwaa süpüla waaʼinrüin tia sümaa talatüin waaʼin. Jamüshijaʼa nia, nükaalinjain waya süpüla waküjainjanain pütchi sümüin wayuu eekai jashichin wamüin. Akaʼaya nia, nükaalinjain waya süpüla sotojooin waaʼin waneirua pütchi suluʼuka tü Bibliakat süpüla waküjain shia nümüin wanee wayuu eekai naapajeein tü pütchikat. Jee müshia nia, nükaalinjain waya süpüla ayatüin waküjain pütchi eere kepiain wayuu mamalainka amüin tü pütchikat (Jer. 20:7-9).

6. ¿Jamüsü watüjaaka saaʼu anamiain Jeʼwaa wamüin süka nikirajüin waya?

⁶ Anamia Jeʼwaa wamüin süka nikirajüin waya süpüla watüjainjanain aküjaa pütchi (Juan 6:45). Eeʼiyatünüsü wamüin waneirua akuwaʼipaa süpüla watüjainjanain aküjaa pütchi sünain tü outkajawaakat Wakuwaʼipa otta Waʼyataain nümüin Maleiwa. Eeshiijaʼa mmorüle waya süpüla wooʼulaküin wanee jeketü sukuwaʼipa waküjia pütchi. Shiasaʼa wooʼulakapa tia, anasü waaʼin weʼrapa naapajeein na wayuukana tü pütchikat. Aküjünawaisü wamüin sünain tü outkajawaakat jee sünain tü outkajawaakat miyoʼu süpüla wooʼulaküin waneirua sukuwaʼipa süküjia pütchi nnojotpuʼuka waaʼinrüin. Wekirajaweerü anain jooluʼu tü kasa anasü naapeetkat wamüin Jeʼwaa waaʼinrüle tia sümaa weʼitaain waaʼin nünain, jaʼitasü kapüleein shia wamüin. Jee mapa, wekirajaajeerü anain tü waaʼinrajatkat süpüla wakooʼomüinrüin waʼyataain nümüin Maleiwa.

7. ¿Kasa weʼreetka wakooʼomüinrüle waʼyataain nümüin Maleiwa?

⁷ Aleewashii maʼin waya nümaa Jeʼwaa. Jülüjataa waaʼin nukuwaʼipa wanee laülaashi, Samuel nünülia. * Niakai sümaa tü nuʼwayuusekat, aʼyataashii naya nümüin Jeʼwaa chaa Colombia otta anasü naaʼin süka pürekutsooliin naya. Keeʼireepejeʼe naaʼin naküjain pütchi eere palitchoin na wawalayuukana. Süpüla naaʼinrüin tia nooʼulaain waneirua kasa. Anuu nünüiki Samuel: «Waaʼinrüin tü sümakat Mateo 6:33 jee nnojotsü wayaʼlajüin kasairua nnojotka choʼujaain wamüin. Kapüleesü maʼin wamüin wapütüin tü wepiakat süka kiʼrain waya sünain jee nnojoishii waya kojuyaalain sünain». Shiasaʼa nakolojoopa, nayaawata aaʼu nnojoluin choʼujaain wainmainjatüin nneerü namaʼana. Anuu sooʼomüin nünüiki Samuel: «Wayaawata aaʼu niain Jeʼwaa oʼuniraka wakuwaʼipa jee naapüin wamüin tü wachuntakat nümüin. Watüjaa aaʼuchi talatüin nia wamaa jee alin waya nüpüla saaʼujee tü kasa anasü naaʼinrakat wapüleerua». ¿Eesüche süpüla wakooʼomüinrüin waʼyataain nümüin Maleiwa? Mülejeʼe shia, aleeweena maʼin waya nümaa Jeʼwaa jee naaʼinmajeena waya (Sal. 18:25).

8. ¿Kasa watüjaka sünainjee tü nüküjakat Iván sümaa Viktoria?

⁸ Talateerü maʼin waaʼin sutuma waʼyataain nümüin Jeʼwaa. Jülüjataa waaʼin tü nüküjakat Iván sümaa Viktoria tü nuʼwayuusekat. Pürekutsoot naya jee aʼyataashii naya nümüin Jeʼwaa chaa Kirguistán. Nnojotsü kachiiruain naaʼin kamaʼanaa wainma kasa süka nakaalinjeein eere  choʼujaain kaalinwaa suluʼu nupueulose Jeʼwaa, maʼaka saaʼin sünain akumajaa piichi eeinjachire nuʼwaajünüin Maleiwa. Anuu nünüiki Iván: «Waaʼinrüin süka süpüshuaʼa waaʼin tü aʼyatawaa aapünakat wamüin. Mayaapejeʼe mapüsain maʼin waya sajaʼttiamüin tü kaʼikat, anasü waaʼin süka watüjaain saaʼu nümüinjatüin Jeʼwaa tü waaʼinrakat. Talatüshii wayaʼaya süka wainmain na waʼaleewainkana jee wainmain tü kasa weʼrakat sünainjee waʼyataain nümüin Maleiwa» (Mar. 10:29, 30).

9. (1) ¿Kasa saaʼinraka wanee wawala süpüla sükooʼomüinrüin shiʼyataain nümüin Maleiwa mayaainjeʼe kapüleein tü alatakat sümüin? (2) ¿Kasa shiʼraka suluʼujee tia?

⁹ Talatüshii waya sünain aʼyatawaa nümüin Jeʼwaa jaʼitairü kapüleein tü alatakat wamüin. Jülüjataa waaʼin sukuwaʼipa wanee wawala jaʼapüirü outa aʼwayuuse, Mirreh sünülia. Kepiasü shia chaa África Occidental otta pürekutsootsü shia süchikijee suuʼulaain suulia tottoolüin shia. Ayuuisü shia, aishaatasü sümüin tü shiipüsekat jee eesü isawaire süchiki suwarairaain. Müsüjeseʼe eein süpüla süküjain pütchi sainküin piichi wanee oora neʼe. Eepejeʼe süpüla sülatirüin wainma oora sünain aküjaa pütchi süka kareetachon. Wainma na wayuu shikirajakana sünain tü Bibliakat jee na suuyantakana amaʼanamüin. Noʼutku naya, eeshii na shikirajakana suluʼupünaa teleepono. ¿Jamüsü sükooʼomüinraka Mirreh shiʼyataain nümüin Maleiwa? Anuu sünüiki: «Aishaatashi maʼin tapüla Jeʼwaa otta Jesuu. Achuntusü taya waneepia nümüin Jeʼwaa süpüla nükaalinjain taya sünain tü kasa eekat süpüla taʼyataain nümüin» (Mat. 22:36, 37).

10. Saashin 1 Pedro 5:10, ¿kasa neʼreetka nutuma Jeʼwaa na aʼyataakana nümüin?

¹⁰ Ekirajünüshii waya nutuma Jeʼwaa. Jülüjataa waaʼin nukuwaʼipa wanee wawala, Kenny nünülia. Pürekutsoot nia jee kepiashi nia chaa Mauricio. Wanaa sümaa niyaawatüin saaʼu tü shiimainkat nüchiki Maleiwa, ooʼulaashi nia suulia ekirajawaa suluʼu tü eʼiküleekat miyoʼu, woutiisashi nia jee aʼyataashi nia nümüin Maleiwa waneepia. Anuu nünüiki: «Pansaasü takuwaʼipa wanaapünaa sümaa tü nümakat Isaías, chi nünüikimaajachikai Maleiwa, chi makai anüiki: ‹Anii taya. Taya puluwataa›» (Is. 6:8). Wainmatuaichi akaalinjain Kenny sünain akumajaa piichi eeinjachire nuʼwaajünüin Maleiwa jee aʼyataashi nia sünain ashajaa karaloʼuta suluʼu tü anüikii naashajaakalü aluʼu. Anuu sooʼomüin nünüiki: «Ekirajünüshi taya süpüla tatüjainjachin süpüleerua tü aʼyatawaa aapünakat tamüin». Nnojotsü neʼe shiain nütüjaain saaʼu jamüinjatüin sukuwaʼipa aʼyatawaakat nutuma. Anuu sooʼomüin nünüiki Kenny: «Tayaawata aaʼu tü kasa isakat tachiki jee tatüjaa aaʼu tü taaʼinrajatkat süpüla anain maʼin takuwaʼipa nuʼupala Jeʼwaa» (paashajeʼera 1 Pedro 5:10). ¿Eesüche süpüla pukumajüin pukuwaʼipa süpüla nikirajüin sooʼomüin pia Jeʼwaa?

11. (1) ¿Kasa naaʼinraka waneinnua wawalayuu süpüla nakooʼomüinrüin naʼyataain nümüin Maleiwa? (2) ¿Kasa neʼraka suluʼujee tia? (Piirakaa sümüin tü ayaakuaa sünainkat süta tü rewiisütakat).

¹¹ Na wawalayuu kakaliainnakana sünain anoujaa, eeshii süpüla nekirajünüin nutuma Jeʼwaa nooʼulaküle wanee sukuwaʼipa süküjia pütchi. Jülüjataa waaʼin tü namakat waneinnua laülaashii chejeʼewalii naya Corea del Sur soʼunnaa tü ayuuliikat COVID-19. Anuu nanüiki: «Eeshii waneinnua wawalayuu isakana nachiki naküjain pütchi sainküin piichi sutuma ayuulin naya. Eekajasaʼa jooluʼu aküjashii pütchi suluʼupünaa videoconferencia. Eesü apünüinsü wawalayuu 80 nouyase, ekirajaashii naya süpüla natüjainjanain süpüleerua computador jee jooluʼu aküjashii pütchi süka» (Sal. 92:14, 15). ¿Eesüche süpüla pükooʼomüinrüin piʼyataain nümüin Maleiwa süpüla piʼrüin tü kasa anasü naapeetkat pümüin? Wekirajaa sünain waneirua kasa wounteetka atuma tia.

12. ¿Kasa naapeetka Jeʼwaa namüin na eʼitaakana naaʼin nünain?

¹² Weʼitaa waaʼin nünain Jeʼwaa. Wainmeerü tü kasa anasü naapeetkat wamüin weʼitaale waaʼin  nünain jee waʼyataale nümüin süka süpüshuaʼa waaʼin (Mal. 3:10). Shiaʼaya naaʼinrakat tia Jeʼwaa süpüleerua wanee wawala, Fabiola sünülia, kepiasü shia chaa Colombia. Pürekutsooleesü rekulaat shia süchikijee woutiisain shia. Aʼyataainjatpejeʼe shia süpüla sükaalinjain chi suʼwayuusekai jee na apünüinshiikana süchonnii sünain tü kasa choʼujaakat namüin. Kettaapa suuyase süpüla saapünüin sümüin tü pensionkat, achuntashaatasü nümüin Jeʼwaa süpüla saapünüin shia sümüin. Anuu sünüiki: «Kakaliasü süpüla saapünüin wanee pensión nümüin wanee wayuu. Eekajasaʼa tamüin tayakat, aapünamaatüsü tamüin wanee kashi süchikijee tachuntuin shia. Teʼrüin nükaalinjain taya Jeʼwaa». Shiasaʼa piama kashi süchikijee tia, pürekutsootsü shia. 70 suuyase maaʼulu jee alatüirü suulia 20 juya sünain pürekutsoolüin shia. Soʼunnaa pürekutsoolüin shia, sükaalinjain mekiisat wayuu süpüla woutiisain naya. Anuu sünüiki: «Eesü kaʼi mapüsawaika oʼu taya, nükatchinrapejeʼe taaʼin Jeʼwaa süpüla ayatüin pürekutsoolüin taya».

13, 14. ¿Kasa atütüleʼereetka waaʼin süpüla weʼitaain waaʼin nünain Jeʼwaa jee süpüla wakooʼomüinrüin waʼyataain nümüin?

¹³ Watüja nanainjee na wayuu eʼitaakana naaʼin nünain Jeʼwaa. Aküjünüsü suluʼu tü Bibliakat nachiki waneinnua wayuu aʼyataakana maʼin nümüin Jeʼwaa. Naʼakajee naya wayuukana, eeshii na aaʼinrakana waneirua kasa palajana süpüla naapüin Jeʼwaa naʼanasia namüin. Jamüshijaʼa Abraham, eʼrüshi nia kasa anasü nutuma Jeʼwaa süchikijee nujuʼituin nipialuʼujee suluʼumüin wanee mma «mayaasüje nnojolüin nütüjaain saaʼu [...] jalainjachin noʼotüin» (Heb. 11:8). Akaʼaya Jacob, naapüin Jeʼwaa naʼanasia nümüin süchikijee naapiraain nümaa chi aapiee nümaʼanajeejachikai Jeʼwaa (Gén.  32:24-30). Jee müshiʼiya na israeliitakana, ekerotushii suluʼumüin tü Mma Aapünajatkat namüin nutuma Maleiwa süchikijee nacholetüin na sacerdootekana shiroku tü süchikat Jordán wanaa sümaa süsetüin (Jos. 3:14-16).

¹⁴ Eesü tü kasa watüjakat nanainjee na wawalayuu eʼitaakana naaʼin nünain Jeʼwaa maaʼulu sümaa nakooʼomüinrüin naʼyataain nümüin. Jamüshijaʼa chi wawalakai Payton sümaa Diana, tü nuʼwayuusekat, kamalainsü maʼin namüin naashajeʼerüin nachiki na wawalayuu akooʼomüinrakana naʼyataain nümüin Jeʼwaa, maʼaka saaʼin tü nachikimaajatkat na wawalayuukana suluʼuka Internet, tü makalü anülia «Se ofrecieron para ayudar». * Anuu nünüiki Payton: «Wanaa sümaa waashajeʼerüin nachikimaajatü na wawalayuukana, müshi weʼrakai naaʼin wanee wayuu talatakai naaʼin sünain ekaa tü eküülü nikaajakat maʼin. Shiasaʼa waashajeʼerapa kojuyatua tü nachikimaajatkat na wawalayuukana, keeʼireesü waaʼin meein wakuwaʼipa jee weʼreein naʼanasia Jeʼwaa». Mapa, akolojooshi Payton sümaa Diana eere palitchoin wawalayuu sünain aküjaa pütchi. Anasü waashajeʼerüle tia karaloʼuta nachikimaajatkat naya wawalayuukana jee anasü wanajüle tü video suluʼukat jw.org, eere sümüin Predicación en lugares apartados: Australia jee Predicación en lugares apartados: Irlanda. Tia sütütüleʼereerü paaʼin süpüla pükooʼomüinrüin piʼyataain nümüin Jeʼwaa.

15. ¿Jamüsü sütütüleʼereetka waaʼin waʼaleewajaale namaa na anakana akuwaʼipa?

¹⁵ Waʼaleewajaa namaa na anakana akuwaʼipa. Eesü süpüla weküin wanee eküülü nnojotpuʼuka weküin namaale waya na ekaajakana shia. Akaataajaʼa wayakana, wakooʼomüinreerü waʼyataain nümüin Maleiwa waʼaleewajaale namaa na wawalayuu aaʼinmaakana naʼyataain nümüin Maleiwa. Shiaʼaya naaʼinrakat tia Kent sümaa Verónica. Anuu nünüiki Kent: «Natütüleʼerüin waaʼin na waʼaleewainyuukana jee na wapüshikana süpüla wakooʼomüinrüin waʼyataain nümüin Maleiwa. Müleka waʼaleewajaale namaa na wawalayuu aaʼinmaakana naʼyataain nümüin Maleiwa, keeʼireejeerü waaʼin wakooʼomüinrüin waʼyataain nümüin». Pürekutsootshi pesiaat maaʼulu Kent sümaa Verónica chaa Serbia.

16. Sünainjee tü nümakat Jesuu suluʼu Lucas 12:16-21, ¿jamüsü wooʼulaainjatka waneirua kasa süpüleerua waʼyataain nümüin Jeʼwaa?

¹⁶ Wooʼulaa waneirua kasa süpüleerua waʼyataain nümüin Jeʼwaa. Nnojotsü choʼujaain wooʼulaainjatüin süpüshuaʼa tü kasa wamaʼanakat süpüla talatüin Jeʼwaa wamaa (Ecl. 5:19, 20). Nnojorüle wakooʼomüinreein waʼyataain nümüin Jeʼwaa shiiʼiree nnojoluin wooʼulaain waneirua kasa, meena waya maʼaka naaʼin chi wayuu washit anaajaakai nüpünajüin, chi naashajaakai achiki Jesuu (paashajeʼera Lucas 12:16-21). Anuu nünüiki wanee wawala kanüliakai Christian, kepiashi nia chaa Francia: «Nnojotpuʼusü taaʼinmaain maʼin tü taʼyataainkat nümüin Jeʼwaa jee nnojoipuʼushii taaʼinmaain maʼin na tapüshikana». Mapa, pürekutsootshi nia sümaa nuʼwayuuse. Süpüla nountuin tia, nooʼulaain tü naʼyataainkat. Shiasaʼa süpüla joo tü nepijaainjatkalü aaʼu, aʼyataashii naya sünain epitajaa jee talatüshii naya sümaa tü kasa eekat namaʼana. ¿Kasa neʼraka sünainjee nooʼulaain waneirua kasa süpüleerua naʼyataain nümüin Jeʼwaa? Anuu nünüiki Christian: «Eekajasaʼa maaʼulu, talatüshii waya sünain aküjaa pütchi jee talatüshii waya sutuma nekirajaain nüchiki Jeʼwaa na wekirajüinkana jee na wayuu wouyantakana amaʼanamüin».

17. ¿Jamüsü kapüleeka namüin waneinnua wawalayuu nooʼulaküin wanee sukuwaʼipa süküjia pütchi?

¹⁷ Wooʼulaka waneirua sukuwaʼipa süküjia pütchi (Aluw. 17:16, 17; 20:20, 21). Jülüjataa waaʼin tü saaʼinrakat wanee wawala, Shirley sünülia, pürekutsoot shia jee kepiasü chaa Estados Unidos. Süchajaain sukuwaʼipa süpüla süküjainjatüin  pütchi soʼunnaa tü ayuuliikat COVID-19. Nnojotpuʼusü maʼin keeʼireein saaʼin süküjain pütchi suluʼupünaa teleepono. Shiasaʼa shikirajünapa jamüinjatüin sukuwaʼipa nutuma chi wawala alapalaakai naaʼu na wawalayuukana, kamalainsü sümüin jee aküjawaisü shia pütchi süka. Anuu sünüiki: «Kapüleesü maʼin tamüin toʼttaiwaʼaya sünain aküjaa pütchi suluʼupünaa teleepono. Kamalainsü maʼin shia tamüin jooluʼu. Wainmaleeitpa maʼin wayuu waküjaka amüin pütchi».

18. ¿Kasa waaʼinrajatka kapüleere wamüin wakooʼomüinrüin waʼyataain nümüin Maleiwa?

¹⁸ Weʼitaa wapüleerua wanee kasa waʼyataweeka amüin otta waʼyataa süchiirua tia. Sülatüle wamüin wanee kasa, achuntushii waya kaalinwaa nümüin Jeʼwaa jee wachajaain sukuwaʼipa süpüla walatüin süchikumüin tia (Prov. 3:21). Jülüjataa waaʼin tü sümakat Sonia, wanee pürekutsoot rekulaat aküjaka pütchi suluʼu tü anüikiikat romaní chaka Europa. Müsü shia: «Tashajawalüin sünain wanee karaloʼuta tü taaʼinrajatkat jee takacherüin shia eere jaʼyashiin tamüin. Saaʼu tü temeesainkat eesü piamasü shiyaakua karateet apaajiraaka, wane uuchimüinsü jee tü wane palaamüinsü. Taneekajatpa wanee kasa, jülüjasü taaʼin tia piamasükat karateet süpüla tatüjaain saaʼu tü taaʼinrajatkat süpüla taʼyataain süchiirua tü taʼyataweekalü amüin». Nnojotsü amalajaain Sonia süchiirua tü shiʼyataweekalü amüin, jaʼitairü kapüleein shia sümüin. Anuu sooʼomüin sünüiki: «Jülüjasü taaʼin eejeerüle wanee kasa ataʼüleetka takuwaʼipa suulia taaʼinrüin tü taʼyataweekalü amüin, eesüjaʼa meerüle shia tamüin maʼaka saaʼin wanee süsepü piichi tamüin jee meerüle shia tamüin maʼaka saaʼin wanee puente eepünaainjatüle talatüin».

19. ¿Kasa waaʼinrajatka süpüla jaʼyain waaʼu kojutuin wamüin tü naaʼinrakat Jeʼwaa wapüleerua?

¹⁹ Wainma kasa anasü naapaka wamüin Jeʼwaa. Jaʼyeerü waaʼu kojutuin wamüin tü naaʼinrakat waʼwaajüle nia (Heb. 13:15). Waaʼinrüin tia wanaa sümaa wachajaain sukuwaʼipa süpüla wakooʼomüinrüin waʼyataain nümüin Jeʼwaa. Weʼreetkalaka anain wakuwaʼipa nutuma. Wachajaa maʼin sukuwaʼipa süpüla wayaawatüin saaʼu süka waaʼin wamüiwaʼa anamiain Jeʼwaa. Waaʼinrüle tia, meerü wanüiki maʼaka naaʼin Jesuu soʼu nümüin: «Maa aka wane wayuu eekai talatüin naaʼin emirapa, akaajaa tayakai talateerü maʼi taaʼin müleka taaʼinrüle tü ajütünakat apüla taya nütüma Maleiwa, süka keeʼireein maʼi taaʼin tekeraajeein tü nüchekakat tapüleerua» (Juan 4:34).