1. ¿Kasache jülüjaka naaʼin waneinnua wayuu süchiki tü aʼyatawaakat?

¿KASACHE jülüjaka naaʼin na wayuu kepiakana waʼütpünaa süchiki tü aʼyatawaakat? Suluʼu waneirua mma, watta naalii na wayuu aʼyataakana waneepia. Sünainjee müin nakuwaʼipa nnojotsü asetaain kaʼi süpüla neemeraainjanain, süpüla kottuinjanain naya sümaa napüshi otta süpüla nekirajaain nüchiki Maleiwa (Ecl. 2:23). Eepejeʼe na wayuu meejiakana amüin aʼyatawaa otta wainma nanüiki shiiʼiree nnojoluin naʼyataain (Prov. 26:13, 14).

2, 3. ¿Kasa niʼitaaka ekii wapüleerua Jeʼwaa nümaa Jesuu?

² Sainküin mmakat watta naalii na wayuu aʼyataakana waneepia otta eeshii na nnojoliikana aʼyataweein. ¿Kasache jülüjaka naaʼin Jeʼwaa nümaa Jesuu süchiki tü aʼyatawaakat? Watüjaa aaʼu niʼyataalin maʼin Jeʼwaa. Müshijeseʼe nümüin Jesuu nüchiki: «Chi Tashikai ayatüshia nia aʼyataain maaʼulu, akaajaʼa neʼe tayakai, ayatüshia aʼyataain» (Juan 5:17, TNM). Jülüjataa waaʼin süpüshuaʼa tü kasa nukumalakat Jeʼwaa maʼaka naaʼin na wattakana naalii aapiee, tü jolotsükalüirua, tü planetakalüirua otta weʼrüin anain maʼin tü kasa nukumalakat yaa saaʼu tü Mmakat. Anuu tü nümakat David süchiki tia: «¡Jeʼwaakalee, watta maʼin saalii tü kasa pukumajakat! Otta shiiʼiyatüin kekiin maʼin pia. Pukumajala süpüshuaʼa tü kasa eekat saaʼu tü mmakat» (Sal. 104:24).

³ Aʼyataajiraashi Jesuu nümaa Jeʼwaa sünain akumajaa tü sirumatuʼukat otta atüjashi maʼin nia süpüleerua niʼyataain (Prov. 8:27-31). Kakalia süchikijee tia, soʼu yaajachin Jesuu saaʼu tü Mmakat, anashaatasü maʼin niʼyataain. Talatüsü maʼin naaʼin Jesuu sünain aʼyatawaa nümüin Jeʼwaa. Talatüsü naaʼin naashin maʼaka talatüin naaʼin wane wayuu emirapa nia (Juan 4:34; 5:36; 14:10).

4. ¿Kasa watüjaka nünainjee Jeʼwaa otta Jesuu süchiki tü eemerawaakat?

 ⁴ Aʼyataai maʼin Jeʼwaa otta Jesuu, ¿nnojoliinjanache waya eemeraain sünainjee müin nakuwaʼipa wapüleerua? Nnojotsiaajeʼe shiain tia. Jamüshijaʼa Jeʼwaa, matüjainsai nia mapüsaa, müsüjeseʼe nnojoluin choʼujaain nümüin eemerawaa süchiki aaʼinraa wanee kasa. Süküjapejeʼe tü Wiwüliakat neemeraain Jeʼwaa süchikijee nukumajüin tü sirumatuʼukat otta tü Mmakat (Éx. 31:17). Eemeraashi Jeʼwaa suulia aʼyatawaa otta talatüsü naaʼin saaʼujee tü kasa nukumalakat. Mayaainjeʼe niʼyataain maʼin Jesuu wanaa sümaa yaajachin nia saaʼu Mmakat, eemeraʼawaishi nia otta ekaʼawaishi nia namaa nütünajunnuu (Mat. 14:13; Luc. 7:34).

5. ¿Kasa tü eekat süpüla kapüleein wamüin?

⁵ Tütüinjana waya sünain aʼyatawaa saashin tü Wiwüliakat, nnojoishii waya shokulainjanain (Prov. 15:19). Eeshiijaʼa waʼyataale maʼin süpüleerua waʼwayuuse otta wachonnii jee müsia aküjainjana waya tü pütchi anasükat. Choʼujaapejeʼe weemeraainjanain. ¿Eesüche kapüleere wamüin wayaawatüin saaʼu jetsüinjatüin wamaʼa sünain aʼyatawaa, aküjaa pütchi otta sünain eemerawaa? ¿Kasa waaʼinrajatka süpüla watüjaain saaʼu jetsüinjatüin wamaʼa sünain aʼyatawaa otta sünain eemerawaa?

6. Sünainjee tü sümakat Marcos 6:30-34, ¿jamüsü watüjaaka saaʼu niyaawatüin Jesuu choʼujaain niʼyataainjachin otta eemerawaajachin?

⁶ Choʼujaasü wayaawatüin saaʼu jetsüinjatüin wamaʼa sünain aʼyatawaa. Naashin chi aluwataaikai Salomón, «eesü kaʼi süpüla saaʼinnüin wanee kasa» maʼaka saaʼin apünajaa, akumajaa, aʼyalajaa, asirajaa otta oyonnojoo (Ecl. 3:1-8). Choʼujaasü maʼin waʼyataainjanain otta weemeraainjanain. Mapuʼusü sukuwaʼipa nutuma Jesuu. Jamüsüjaʼa soʼu wanee kaʼi, aleʼejüshii na aluwataaushikana sünainjee aküjaa pütchi sümaa mapüsajüin maʼin naya, nnojoireeshiʼiya naya aikalaain sünain ekaa. Nümaka Jesuu namüin: «Jooʼuya tamaaiwa jia chamüin eere yüütüülin mmakat süpüla jeemeraainjanain» (paashajeʼera Marcos 6:30-34). Mayaapejeʼe mapüsawalin Jesuu namaa na nikirajüinkana, eeshii neemeraale neʼe motsomüin. Nütüjaapejeʼe saaʼu Jesuu choʼujaain namüin neemeraainjanain.

7. ¿Kasa wayaawateetka aaʼu wekirajaale sünain tü nuluwataakalü anain Jeʼwaa na israeliitakana süchiki eemerawaa saawanoʼu?

⁷ Choʼujaʼawaisü wamüin wapüshuaʼa weemeraain otta waaʼinrüin waneirua kasa naata suulia tü waʼyataainkat. Wayaawata aaʼu tia sutuma tü nuluwataakalü anain Jeʼwaa na israeliitakana nükajee Moisés: eemeraʼawaliinjana naya saawanoʼu. Mayaapejeʼe nnojoluin waluwataanüin sünain aaʼinraa tü sümakat tü Pütchi aapünakat nümüin Moisés, wainmeerü kasa watüjeetka sünainjee tü sümakat süchiki eemerawaa saawanoʼu. Sükajee tia, wayaawateerü aaʼu shiale waaʼinmaain maʼin tü aʼyatawaakat jee shiale tü eemerawaakat.

8. Saashin Éxodo 31:12-15, ¿kasa naaʼinrawalinjatka na israeliitakana saawanoʼu?

⁸ Saashin tü Wiwüliakat, ojolooshi Jeʼwaa suulia akumajaa kasa yaa saaʼu tü Mmakat noʼu chi «kaʼi» akaratshikai (Gén. 2:2). Aʼyataaipejeʼe maʼin Jeʼwaa otta ayatüshi nia aʼyataain maaʼulu sünain waneirua kasa (Juan 5:17, TNM). Tü nuluwataakalü anain Jeʼwaa na israeliitakana süchiki eemerawaa saawanoʼu, meematüsü aka saaʼin tü sümakat tü karaloʼutakat Génesis, süka jamüin, neemeraain Jeʼwaa noʼu chi akaratshikai kaʼi. Tü kaʼi neemeraakalü oʼu na israeliitakana shiyaawasesü nutuma Jeʼwaa süpüla sütüjaanüin aaʼu nayain nupueulosein. Eemeraainjana naya noʼu kaʼikai chia otta kojutuinjatü shia namüin süka naʼwaajüinjachin Jeʼwaa soʼu tia (paashajeʼera Éxodo 31:12-15). Nnojotsü jaralinjatüin aʼyataain soʼu tia, jaʼitakajeʼe neʼe na tepichikana, na achepchieekana otta tü mürütkalüirua  (Éx. 20:10). Sünainjee tia, shia jülüjaka naaʼin na israeliitakana aʼwaajaa Jeʼwaa.

9. ¿Jamüsü nnojotka pansaain tü aainjünawaikat saawanoʼu nükalioʼu Jesuu?

⁹ Anapuʼusü maʼin namüin na aʼyataakana nümüin Maleiwa tü kaʼi neemeraakalü oʼu. Wainmapejeʼe kasa napülajaka na fariseokana, na saduceokana jee na karaloʼutamaajanakana. Naashin nayakana, nnojotsü süpüla süsürüttünüin trigo soʼu kaʼikat tia jee nnojotsü süpüla shiiyajünüin wayuu eekai ayuulin (Mar. 2:23-27; 3:2-5). Nüküjainjeseʼe Jesuu namüin na aapajakana nünüiki nnojoluin pansaain tü namakat naya wayuukana sümaa tü keeʼireekat naaʼin Jeʼwaa.

10. ¿Kasa watüjaka sünainjee tü nümakat Jesuu suluʼu Mateo 12:9-12 süchiki sükalia eemerawaa?

¹⁰ Eemeraʼawaishi Jesuu saawanoʼu namaa na nikirajüin judíokana. Naaʼinrapuʼuin tia süka noonooin sümaa tü Pütchi aapünakat namüin na israeliitakana nükajee Moisés. * Nüküjapejeʼe Jesuu nnojoluin mojuin aaʼinraa kasa anasü süpüleerua wayuu saawanoʼu; aaʼinrapuʼushi nia kasa anasü süpüleerua wayuu soʼunnaa tia kaʼikat. Anuu nünüiki: «Anasü müleka waaʼinrule kasa anasü sümüin wayuu jaʼitasü sükalioʼuin eemerawaa» (paashajeʼera Mateo 12:9-12). Naashin Jesuu, nnojotsü mojutuin tü sükaliakat eemerawaa sutuma sükaalinjünüin wayuu soʼu tia. Sükajee tü naaʼinrakat Jesuu, atüjaana aaʼu kasapülajatüin maʼin tü kaʼi neemeraakalü oʼu na israeliitakana. Süka nnojoluin naʼyataain soʼu tia kaʼikat, nnojotsü kasain ataʼülüin nakuwaʼipa suulia aʼwaajaa Jeʼwaa. Jesuu namaa na nuwalayuukana, tü niikat otta chi nüshiyaashikai, naʼwaajapuʼuin Jeʼwaa soʼu tü kaʼi neemeraakalü oʼu. Watüjaa aaʼu tia  sutuma tü sümakat tü Wiwüliakat süchiki tü naaʼinrakat chaa Nazaret. Anuu sünüiki tü Wiwüliakat: «Soʼu tü kaʼi neemeraakat oʼu na judíokana, ekerotshi nia suluʼumüin tü ekirajüleekat, maa akaapüʼü nütüma [...]. Nüshaʼwalaakalaka süpüla naashajeʼerüinjatüin tü karaloukta nüchikimaajatkat Maleiwa» (Luc. 4:15-19).

11. ¿Jarai ekirajaka Jesuu sünain aʼyatawaa jawatüsü?

¹¹ Eeshijaʼa nikirajünüle Jesuu nutuma José, chi nüshiyaashikai, sünain tü nümakat Jeʼwaa süchiki tü aʼyatawaakat otta nikirajaleeinya nia sünain akumajaa kasa süka taapüla (Mat. 13:55, 56). Eeshijaʼa niʼrawaire Jesuu niʼyataain maʼin José süpüleerua nüpüshi. Kakalia süchikijee tia, müshi Jesuu namüin na nikirajüinkana: «Awalaajünachi chi eekai niʼyataain» (Luc. 10:7, TNM). Atüjashi Jesuu süpüleerua aʼyatawaa eekai jawatüin.

12. ¿Jarat tü wetsiikuloirua aküjünakalü aluʼu tütüin maʼin Pablo sünain aʼyatawaa?

¹² Müshia chi aluwataaushikai Pablo, tütüshi maʼin sünain aʼyatawaa. Shia niʼyataaka maʼin anain aküjaa pütchi nüchiki Jesuu otta tü nikirajapuʼukalü anain. Aʼyataapejeʼe nia süpüleerua tü choʼujaakat nümüin. Natüjaa aaʼu na anoujashii chejeʼewaliikana Tesalónica niʼyataapuʼuin maʼin Pablo soʼukai jee saʼwai süpüla nnojoluinjatüin jaralin nikeʼejüin aaʼin süchiirua tü niküinjatkat (2 Tes. 3:8; Aluw. 20:34, 35). Eesüjaʼa shiale naashajaain achiki Pablo tü niʼyataapuʼukalü anain chaa Corinto. Chayaa, makatüshi nia nümaʼana Áquila sümaa Priscila otta aʼyataajiraashi namaa süka shiain naʼyataain anain «tü aainjülüükat loona ojotonnokat süpüla miichin». Nnojoipejeʼe waneepiain Pablo sünain tia aʼyatawaakat. Jamüshijaʼa nia, aküjawaishi pütchi saawanoʼu namüin na judíokana süka seemeraain wayuu soʼu tia (Aluw. 13:14-16, 42-44; 16:13; 18:1-4).

13. ¿Kasa watüjaka sünainjee nukuwaʼipa Pablo?

¹³ Wainma kasa anasü watüjaka sünainjee nukuwaʼipa Pablo. Jamüshijaʼa nia, mayaainjeʼe niʼyataain süpüleerua tü choʼujaakat nümüin, aküjashi nia waneepia tü pütchi anasü nümaʼanajeejatkat Maleiwa (Roma 15:16, TNM; 2 Cor. 11:23). Jee nütütüleʼerüinya naaʼin na wane anoujashiikana süpüla naküjainjanain tia pütchikat sümüin wayuu. Müshijeseʼe niʼyanaajiraain Áquila otta Priscila nümaa Pablo «sünain aküjaa nüchiki Cristo Jesús» (Roma 12:11; 16:3). Nütütüleʼerüin Pablo naaʼin na anoujashii Corintojeʼewaliikana süpüla naʼyataainjanain nümüin «chi Senyotkai waneepia» (1 Cor. 15:58; 2 Cor. 9:8). Anuu wanee pütchi nüshajaka Pablo nutuma Jeʼwaa: «Chi eekai shukulajaain naaʼin sünain aʼyatawaa, nnojoleechi ekinnüin» (2 Tes. 3:10).

14. ¿Kasa naashajaaka achiki Jesuu suluʼu Juan 14:12?

¹⁴ Tü aʼyatawaa waaʼinmaainjatkat maʼin maaʼulu shia aküjaa pütchi otta ekirajaa wayuu sünain tü Wiwüliakat. Nüküjatüjülia Jesuu sünain sülanaʼaleeinjatüin maʼin tü naaʼinrakat na nikirajüinkana suulialeʼeya tü naaʼinrakat niakai (paashajeʼera Juan 14:12). Nnojotpejeʼe shiain naashajaain achiki Jesuu naaʼinreenain kasa pülasü maʼaka saaʼin tü naaʼinrapuʼukat niakai, shia naashajaaka achiki naküjeenain pütchi otta nekirajeenain watta saalii wayuu suluʼu wainma mma otta kakaliainjanain naya nuulia sünain aaʼinraa tia.

15. (1) ¿Kasa püsakireʼerüinjatka anain paaʼin? (2) ¿Jamüsü püsakireʼerüinjatka paaʼin sünain tia?

¹⁵ Piʼyataale sünain wanee kasa, püsakireʼera paaʼin sünain tüü: «¿Eʼnnaajünüshiche taya sünain wayuuin tütüshi taya sünain aʼyatawaa? ¿Kettamaatüsüche tatuma tü taʼyataainkat sümaa anain shia tatuma?». Müle pukuwaʼipa, eeshi süpüla talateechin chi pülaamainkai pümaa otta eesüjaʼa naapajeerüle tü pütchi anasükat na aʼyanaajiraakana pümaa. Püsakireʼera paaʼin jooluʼu sünain tü paaʼinrakat süpüla püküjain pütchi otta pikirajüin wayuu: «¿Eʼnnaajünüshiche taya sünain tütüin taya sünain aküjaa pütchi otta ekirajaa wayuu? ¿Takumajawalinche tü tanüikinjatkat süpülapünaa touyantüin  tachikuaʼa sümaʼanamüin wayuu? ¿Ouyantamaatüshiche taya sümaʼanamüin wayuu eekai shikirajaweein? ¿Aküjawaishiche taya pütchi sainküin piichi, eere jouluin wayuu jee sükajee kareetachonka?». Paaʼinrüle tia, talateerü paaʼin sünain aʼyatawaa nümüin Jeʼwaa.

16. (1) ¿Kasa jülüjaka naaʼin Jesuu otta na nikirajüinkana süchiki tü eemerawaakat? (2) ¿Jamüsü naataka tia suulia tü jülüjakat saaʼin wayuu?

¹⁶ Nütüjaa aaʼu Jesuu choʼujaain nümüin otta namüin na nikirajüinkana neemeraʼawalinjanain. Eepejeʼe wainma wayuu makana akuwaʼipa maʼaka naaʼin chi wayuu washirü naashajaakai achiki Jesuu. Anuu nünüiki chia wayuukai: «Watta saalin korolo tamaʼana jooluʼu, tü tepijaajeetkat atüma süpüla wainma juya. Anakaja jooluʼu teemeraale, sümaa tekaain, sümaa tasaain sümaa talataa aaʼin» (Luc. 12:19; 2 Tim. 3:4). Tü naaʼinmaakat maʼin chia wayuukai shia eemerawaa otta nüshaitüin waneepia. Eekajasaʼa Jesuu namaa na nikirajüinkana, nnojotsü shiain naaʼinmaain tia.

17. ¿Kasa waaʼinrawaika weemeraapa suulia waʼyataain?

¹⁷ Süka washateein maʼin nukuwaʼipa Jesuu, aküjawaishii waya pütchi otta oʼunawaishii waya sünain tü outkajawaakat weemeraapa suulia waʼyataain. Wachajaain maʼin sukuwaʼipa süpüla waaʼinrawalin tia waneepia süka sünainpünaain shia waʼyataain nümüin Jeʼwaa (Heb. 10:24, 25). Jaʼitashii wakasioin waya, ayatüshii oʼunuin waya sünain tü outkajawaakat otta waküja amüinrü pütchi wayuu eekai wanaain wamaa (2 Tim. 4:2).

18. ¿Kasa nüchekaka wapüleerua Jesukürisüto, chi Aluwataakai waaʼu?

¹⁸ Talatüshii maʼin waya süka nnojoluin waluwataanüin nutuma Jesukürisüto sünain aaʼinraa wanee kasa isaka wachiki. Jee nükaalinjain waya süpüla wayaawatüin saaʼu jetsüinjatüin wamaʼa sünain aʼyatawaa otta sünain eemerawaa (Heb. 4:15). Nücheküin Jesuu wapüleerua weemeraʼawalinjanain, waʼyataainjanain süpüleerua tü choʼujaakat wamüin otta wekirajüin wayuu sünain tü Wiwüliakat. Sünain tü wane ekirajaayakat, wekirajaajeerü anain tü naaʼinrakat Jesuu süpüla taashin waya nutuma suulia kaainjalaa jee outaa.