«¿TAAPÜINCHE analuʼut saaʼu wanee kasa?». Anasü wasakirüle waaʼin sünain tia. Süküjatüjülia tü Wiwüliakat eeinjatüin wayuu maaʼulu eekai matüjain aapaa analuʼut (2 Tim. 3:2). Eeshiijaʼa weʼraajüle wayuu eekai nayain neʼe aapüneein amüin kasa. Nnojoishii aapüinjanain analuʼut saaʼu wanee kasa naashin. Nnojotsü jaralüin aleeweein sümaa wayuu eekai müin akuwaʼipa.

Nnojotpejeʼe müinjatüin wakuwaʼipa naashin Jeʼwaa. Nücheküin napüleerua na aʼyataashiikana nümüin naapüinjanain analuʼut saaʼu wanee kasa (Col. 3:15; 1 Tes. 5:18). Eesü kasa anasü weʼraka sünainjee waapüin analuʼut. ¿Jamüshii waapüinjanaka analuʼut? Wekirajaa sünain tia.

Anasü waaʼin sutuma waapüin analuʼut. Anasü naaʼin wanee wayuu naapüle analuʼut, akaʼaya chi aapünakai amüin analuʼut anasü naaʼin sutuma. ¿Jamüsü anaka waaʼin? Anuu wanee sukuwaʼipa: naaʼinrüle wanee wayuu wanee kasa anasü wapüleerua, naaʼinrüin shia süka kojutuin waya nümüin jee nükaalinjeein waya. Anasü waaʼin sutuma tia. Jamüsüjaʼa Rut, talatüsü saaʼin süka kamaneein Boaz sümüin. Anasü saaʼin Rut süka kapülain naaʼin Boaz tü sukuwaʼipakat (Rut 2:10-13).

Shialeekajaʼa nümüin Maleiwa, waapüinjatü analuʼut nümüin. Watta saalii tü kasa naainjakat wapüleerua otta ayatüsia shia naaʼinrüin maaʼulu (Deut. 8:17, 18; Aluw. 14:17). Nnojo sotuin neʼe waaʼin motsomüin tü kasa naaʼinrakat Jeʼwaa wapüleerua. Akatalüinjana waya kaʼi süpüla wasakireʼerüin suluʼu waaʼin süchiki tü naainjakat wapüleerua otta napüleerua na wapüshikana. Talateerü waaʼin waaʼinrüle tia otta wayaawateerü aaʼu alin waya nüpüla otta kojutuin waya nümüin (1 Juan 4:9).

Süchikijee wasakireʼerüin suluʼu waaʼin sünain tü naainjakat Jeʼwaa wapüleerua, waapa analuʼut saaʼu tia (Sal. 100:4, 5). Talatüsü naaʼin wanee wayuu naapüle analuʼut saaʼu wanee kasa.

Wanee kasa eeka sutuma waapüin analuʼut, shia aleewajiraain waya namaa na waneinnua. Choʼujaasü wamüin kojutuin waya atumawaa. Aleewajiraashii maʼin waya namaa na waneinnua waapüle analuʼut namüin saaʼu naainjain kasa anasü wapüleerua (Roma 16:3, 4). Wanee wayuu aapakai analuʼut, nükaalinjeein na waneinnua. Süka saainjünüin kasa anasü nüpüleerua, kamaneeshi nia namüin na waneinnua suluʼujee tia. Talatüsü waaʼin wakaalinjale na waneinnua. Anuu nünüiki Jesuu süchiki tia: «Anakuaippaʼireʼeya chi wayuu aapakai nuulia chi aapünakai amüin» (Aluw. 20:35).

Robert Emmons, shikiipüʼüjana wanee ekirajawaa süchiirua aapaa analuʼut chaa suluʼu tü eʼikülee miyoʼu chajatkat California. Anuu nünüiki: «Süpüla watüjainjanain aapaa analuʼut, choʼujaasü wamüin nakaalinjain waya na waneinnua otta wakaalinjain naya». Shiimain tia, choʼujaashii wamüin na waneinnua otta choʼujaashii waya namüinya. Jamüshiijaʼa na waneinnua, eeshii süpüla nasülajüin eküülü wamüin otta nakaalinjain waya süpüla weʼrajeʼerüin (1 Cor. 12:21). Na wayuu atüjakana aapaa analuʼut, nnojotsü motuin naaʼin tü kasa aainjünakat napüleerua otta kojutusü tia namüin. ¿Jama wayakana? ¿Atüjashiiche waya aapaa analuʼut?

Wanee kasa eeka sutuma aapaa analuʼut shia anain tü kasa jülüjakat waaʼin. Eesü jülüjale waaʼin tü kasa anasükat jee nnojorüle jülüjain waaʼin tü kasa mojusükat. Nütüjale aapaa analuʼut wanee wayuu, anasü tü jülüjakat naaʼin, nnojotsü jülüjain  naaʼin kasa mojusü. Eʼrüshii waya kasa anasü sünainjee watüjain aapaa analuʼut, wakaalinjeein na waneinnua sutuma tia. Waaʼinrüin tü nümakat Pablo: «Talata maʼi jaaʼin waneepia» (Filip. 4:4).

Nnojoleerü mojuin tü jülüjakat waaʼin watüjale aapaa analuʼut. Wachunjale, mojule waaʼin otta jashichikuʼu wamüle, iseerü wachiki aapaa analuʼut. Na wayuu atüjakana aapaa analuʼut, nnojotsü kachiiruain naaʼin kamaʼanaa wainma korolo, jama kojutuin namüin tü kasa eekat namaʼana jee nnojotsü kachiiruain naaʼin wainma kasa (Filip. 4:12).

Kapülasü naaʼin Satanaa seemiajaale wanoula jee mojule maʼin waaʼin sutuma tü kasa mojusü alatakat wamüin maaʼulu. Anasü maʼin nümüin mojule tü kasa jülüjakat waaʼin otta younakuʼu wamüle saaʼu kasa süpüshuaʼa. Nnojoleerü wekeraajüin tü waʼyataainkat sünain aküjaa pütchi müle wakuwaʼipa. Watüjale aapaa analuʼut, talateerü waaʼin süka weʼrüin tü kasa anasü naainjakat Maleiwa wapüleerua otta wanoujeerü anain shikeraajeerüin tü nümakat (Gal. 5:22, 23).

Wayakana aʼyataashiikana nümüin Maleiwa, watüjaa aaʼu shiimain tü waashajaaitpakalü achiki. Watüjaapejeʼe saaʼu nnojoluin joʼuujiraain waya sünain atüjaa aapaa analuʼut jee sünain anain tü jülüjakat waaʼin. Nnojotsü mojuinjatüin waaʼin sutuma tia. Wounteerü watüjain aapaa analuʼut jee aneerü tü jülüjakat waaʼin. Jülüja waaʼin waneepia tü kasa eekat süpüla waapüin aaʼujee analuʼut. Waaʼinrüle shia waneepia, nnojoleerü kapüleein wamüin aapaa analuʼut. Talateerü maʼin waaʼin noulialeʼeya na jülüjakuʼu makana aaʼin tü kasa mojusü alatakat namüin. Jülüja waaʼin tü kasa anasü naainjakat Maleiwa wapüleerua jee tü naainjakat na waneinnua wapüleerua süpüla natütüleʼerüin waaʼin otta jülüja waaʼin süpüshuaʼa tü kasa talatakalü atuma waaʼin. Eesüjaʼa süpüla washajüin sünain wanee karaloʼuta piamasü jee apünüinsü kasa waapüinjatkat aaʼujee analuʼut. Eesü süpüla waaʼinrüin tia soʼukaiwai.

Waapawaire analuʼut namüin na waneinnua naashin na cientiificokana, anoutaajeerü tü wekiirujutkat otta jülüjeerü waaʼin kasa anasü. Na wayuu atüjakana aapaa analuʼut, talatüsü naaʼin waneepia. Talata waaʼin sümaa tü kasa eekat wamaʼana, sümaa tü kasa anasü weʼrakat jee waapaa analuʼut waneepia. Waaʼinra tü sümakat tü Wiwüliakat: «Waapa analuʼut nümüin Jeʼwaa süka anamiain nia» otta waapa analuʼut saaʼu kasa süpüshuaʼa (1 Crón. 16:34; 1 Tes. 5:18).