1, 2. Sünainjee nukuwaʼipa Angelito, ¿kasa waaʼinrüinjatka waneʼewai wakua?

¿ANOUJASHIICHE nünain Jeʼwaa na wayuu kachooinkana pia? Müle naya, soteesü paaʼin nnojoleechin aleewain neʼe pia nümaa Jeʼwaa sünainjee tü nakuwaʼipakat. Jaʼitaina anoujain jee manoujain na wayuu kachooinkana waya, wachajaainjatü sukuwaʼipa waneʼewai wakua süpüla aleewainjanain waya nümaa Jeʼwaa.

² Anuu tü alatakat nümüin wanee wawala Angelito nünülia, anoujashii nünain Jeʼwaa na wayuu kachooinkana nia. Nnojoishi nia aleewain nümaa Maleiwa jintüliiwaʼaya nia. Anuu nünüiki: «Aʼyataashi neʼe taya nümüin Jeʼwaa süka naaʼinrüin shia na wayuu kachooinkana taya». Nüchajaaka sukuwaʼipa süpüla naashajeʼerawalin tü Wiwüliakat, nüsakireʼerüin naaʼin sünain tü sümakat jee oʼuraajawaishi nia waneepia. Anuu nünüiki chi wawalakai süchiki tü kasa niʼrakat sünainjee: «Tayaawata aaʼu aleeweechin taya nümaa chi Tashikai Jeʼwaa müleka teʼraajüle maʼin nia». Sünainjee tü nümakat chi wawalakai, watüjawee aaʼu piamasü kasa: ¿Jamüsü naataka atüjawaa saaʼu wanee kasa nüchiki Jeʼwaa suulia eʼraajaa nia? Otta ¿kasa waaʼinrajatka süpüla weʼraajüin Jeʼwaa?

3. Püküja jamüin naataka atüjawaa saaʼu wanee kasa nüchiki Jeʼwaa suulia eʼraajaa nukuwaʼipa.

³ «Teʼraajüin nukuwaʼipa Jeʼwaa», eeshijaʼa pümüle süka pütüjaain saaʼu kasaichin nünülia, pütüjaain saaʼu waneirua  kasa nüküjaka achiki jee waneirua kasa naaʼinraka. Nnojotpejeʼe piʼraajüin nukuwaʼipa sünainjee tia. Süpüla piʼraajüinjachin nia, ekirajaainjachi pia nüchiki otta süchiki tü nukuwaʼipakat. Paaʼinrüle tia, piyaawateerü aaʼu jamüin nüküjaka wanee kasa, jamüin naaʼinraka wanee kasa otta pütüjaweerü aaʼu anale nümüin tü jülüjakat paaʼin otta tü kasa paaʼinrakat. Piyaawatapa saaʼu tü nüchekakat Jeʼwaa püpüleerua, paaʼinrüinjatü shia.

4. ¿Kasa watüjaajeetka aaʼu wekirajaale nachiki waneinnua wayuu saashajaakana achiki tü Wiwüliakat?

⁴ Eeshii meeʼeraparale waya sutuma waʼyataweein nümüin Jeʼwaa jee wapüleeruaanüle aaʼin sutuma woʼunuin sünain tü outkajawaakat. Weʼitaale waaʼin nünain Jeʼwaa, nnojoleena waya niyüülajüin. Müle shia watuma, waikaleʼerüin sukuwaʼipa süpüla aleewainjanain waya nümaa Jeʼwaa waneepia. ¿Eesüche süpüla weʼraajüin nukuwaʼipa Jeʼwaa? Aa, eesü süpüla weʼraajüin. Ichaasaʼa niʼraajüin maʼin nia Moisés otta chi aluwataaikai David eerejeʼe wayuuin neʼe naya maʼaka waaʼin wayakana. Wekirajaa süchiki tü kasa naaʼinrakat süpüla neʼraajüin Jeʼwaa otta tü watüjakat nanainjee.

5. ¿Kasa naaʼinraka Moisés?

⁵ Pansaasü nukuwaʼipa Moisés sümaa tü nikirajaakalü anain. Wanaa sümaa 40 nuuyase Moisés, nükaalinjain tü nupueulosekat Jeʼwaa. «Niyouktüin süpüleerua ayataa sünain süchonyaain nia tü nüchonkot chi sülaülakai mma» (Heb. 11:24). Niyoutuin kapülainjachin nia saaʼin wayuu. Nükaalinjainya na hebreokana mayaainjeʼe eein süpüla jamajüin nia nutuma faraón, chi aluwataakai saaʼu Egipto. Kanoulashi maʼin Moisés jee niʼitaain maʼin naaʼin nünain Jeʼwaa. Sutuma müin nukuwaʼipa, nüikaleʼerüin sukuwaʼipa süpüla aleewainjachin nia waneepia nümaa Jeʼwaa (Prov. 3:5).

6. ¿Kasa pütüjaka sünainjee nukuwaʼipa Moisés?

⁶ ¿Kasa pütüjaka sünainjee tü naaʼinrakat Moisés? Piainjachi aneekaka piʼyataainjachire jee nnojolinjachire piʼyataain nümüin Jeʼwaa. Eeshii wooʼulaale suulia waneirua kasa süpüleerua waʼyataain nümüin Jeʼwaa otta eesü süpüleeruaanüle waaʼin natuma na meʼraajüinkana nia. Weʼitaale waaʼin nünain chi Washi iipünaajachikai, nükaalinjeena waya.

7, 8. ¿Kasa ayataka nikirajaain achiki Moisés?

⁷ Ayatüshia Moisés ekirajaain süchiki nukuwaʼipa Jeʼwaa jee naaʼinrüin tü nüchekakat nüpüleerua. Jamüshijaʼa nia wanaa sümaa nüneekünüin nutuma Jeʼwaa süpüla niyuʼluin na israeliitakana Egiptojee, nüküjain nümüin iseerüin nüchiki naaʼinrüin tü nuluwataakalü anain nia. Akaalinjünapejeʼe Moisés nutuma Jeʼwaa jee amülialaasü naaʼin naalin (Éx. 4:10-16). Müshijeseʼe oʼunuin nia nümaʼanamüin faraón jee nüküjain nümüin outuinjachin nia nutuma Jeʼwaa. Süchikijee tia, niʼrüin Moisés nüpülain Jeʼwaa wanaa sümaa taashin nutuma na israeliitakana jee outuin faraón nutuma shiroku tü palaa Ishosükat namaʼaleʼeya na nümaajanakana (Éx. 14:26-31; Sal. 136:15).

⁸ Süchikijee niyuʼluin Moisés na israeliitakana Egiptojee, aʼyounalaashii naya waneepia nooʼomüin Jeʼwaa. Soʼunnaa tia, niʼrüin Moisés nnojolin naashichijaain Jeʼwaa sooʼomüin tü nupueulosekat (Sal. 78:40-43). Jee müsia, wanaa sümaa nusoutuin Moisés naaʼu na israeliitakana, niʼrüin nnojoluin yaletüin naaʼin Jeʼwaa süka naapajüin nünüiki jee nnojoluin  nuʼutuin naaʼin na israeliitakana (Éx. 32:9-14).

9. ¿Jamüsü sünüiki Hebreokana 11:27 süchiki nukuwaʼipa Moisés nümaa Jeʼwaa?

⁹ Süchikijee nujuʼitüin Moisés Egiptojee, aleewashi maʼin nia nümaa Jeʼwaa, jülüjashi nia naaʼin waneepia, mayaashijeʼe nnojolin niʼrüin nia (paashajeʼera Hebreokana 11:27). Anuu sünüiki tü Wiwüliakat nüchiki: «Yootushi Jeʼwaa nümaa Moisés maʼaka yootuin wanee wayuu nümaa waneʼeya» (Éx. 33:11).

10. ¿Kasa paaʼinrüinjatka süpüla piʼraajüinjachin Jeʼwaa?

¹⁰ ¿Kasa pütüjaka sünainjee tü naaʼinrakat Moisés? Süpüla piʼraajüinjachin maʼin Jeʼwaa, nnojotsü pikirajaainjatüin neʼe anain tü nukuwaʼipakat, paaʼinrajatü tü nüchekakat püpüleerua. ¿Kasa tü nüchekakat püpüleerua? Anuu sünüiki tü Wiwüliakat: «Süka keeʼireein maʼi naaʼin [Maleiwa] suʼtteʼennüinjatüin wayuu süpüshua sümaa sütüjaainjatüin saaʼu tü shiimüinkat» (1 Tim. 2:3, 4). Wanee sukuwaʼipa süpüla paaʼinrüin tü nüchekakat Jeʼwaa püpüleerua, shia pikirajüle wayuu nüchiki.

11. ¿Jamüshi weʼraajaka maʼin Jeʼwaa wekirajüle wayuu nüchiki?

¹¹ Weʼraajüin maʼin Jeʼwaa wekirajüle wayuu nüchiki. Jamüshijaʼa wanaa sümaa nükaalinjain waya sünain antaa nanain na wayuu aleeweekana nümaa, wayaawata aaʼu nümülialaain aaʼin saalin (Juan 6:44; Aluw. 13:48, TNM). Wanaa sümaa weʼrüin neeʼiratüin nakuwaʼipa na wekirajüinkana, wayaawata aaʼu pülashaatain Jeʼwaa (Col. 3:9, 10). Jee müsia, süka kojuyatuain nuluwataain waya Jeʼwaa sünain waküjain pütchi namüin na wayuukana, wayaawata aaʼu nnojolin naashichijaamaatüin nooʼomüin (Roma 10:13-15, TNM).

12. (1) ¿Kasa nuchuntaka Moisés nümüin Jeʼwaa suluʼu Éxodo 33:13? (2) ¿Jamüsü nuchuntaka tia?

¹² Kojutusü nümüin Moisés tü nukuwaʼipakat nümaa Jeʼwaa. Mayaapejeʼe wainmain tü kasa pülasü naainjakat Moisés nutuma Maleiwa, nuchuntuin nümüin niʼraajüinjachin maʼin nia (paashajeʼera Éxodo 33:13). Nütüjaapejeʼe saaʼu Moisés nikirajaainjachin sooʼomüin nüchiki Jeʼwaa mayaainjeʼe 80 süsapoʼumüin nuuyase soʼu tia.

13. ¿Jarat tü wane kasa waaʼinrüinjatkat süpüla kojutuin wamüin tü wakuwaʼipakat nümaa Jeʼwaa?

¹³ ¿Kasa watüjaka sünainjee tü naaʼinrakat Moisés? Kojutuinjatü wamüin tü wakuwaʼipakat nümaa Jeʼwaa jaʼitaina kakaliainnain otta jekenain waya sünain anoujaa. Tü wane kasa waaʼinrüinjatkat süpüla kojutuin wamüin tü wakuwaʼipakat nümaa, shia waashajaale nümaa.

14. ¿Jamüshii waashajaainjanaka nümaa Jeʼwaa süpüla weʼraajüin maʼin nia?

¹⁴ Aleeweere waya nümaa wanee wayuu, aashajaʼawalinjana waya nümaa. Müshiijeseʼe waashajaʼawalinjanain nümaa Jeʼwaa. Waküja nümüin süpüshuaʼa tü jülüjakat waaʼin otta tü suluʼukat waaʼin (Éf. 6:18). Anuu sünüiki Krista, wanee wawala chejeʼewat Turquía: «Wanaa sümaa taküjain nümüin Jeʼwaa tü jülüjakat taaʼin jee teʼrüin nükaalinjain taya, kooʼomüinsü maʼin naalin tapüla jee teʼitaain maʼin taaʼin nünain. Sutuma teʼrüin naapüin Jeʼwaa tanüiki, müichipa nia aka Tashi tamüin jee Taʼaleewain».

15. ¿Jamüsü nünüiki Jeʼwaa nüchiki David?

¹⁵ Anoujashii nünain Jeʼwaa na wayuu kachooinkana David otta müshiʼiya na nüpüshikana. Nnojoipejeʼe anoujain neʼe nia sünainjee tia. Aʼaleewajaashi David nümaa Jeʼwaa otta aishi maʼin nia nüpüla  Jeʼwaa. «Wayuu [...] anashi tamüin», müshi nia nüchiki David (Aluw. 13:22). ¿Kasa naaʼinraka David süpüla aleewain maʼin nia nümaa Jeʼwaa?

16. ¿Kasa nütüjaka David nüchiki Jeʼwaa süka jülüjain naaʼin tü kasa nukumajalakat Jeʼwaa?

¹⁶ Eʼraajünüshi Jeʼwaa nutuma David süka jülüjain naaʼin tü kasa nukumajalakat. Arüleejüi anneerü David jintüliiwaʼaya nia. Eesüjaʼa jülüjapuʼule naaʼin tü kasa nukumajalakat Jeʼwaa. Wanaa sümaa jülüjain naaʼin tü shüliwaikalüirua, shia jülüjaka naaʼin pülashaatain maʼin Jeʼwaa. Anuujeseʼe nünüiki süchiki: «Atüjaana aaʼu pülashin maʼin Maleiwa sutuma tü kasa chakat iipünaa jee atüjaana aaʼu süpüshuaʼa tü kasa nukumajakat chayaa» (Sal. 19:1, 2). «Atüjakaiche maʼin chi Maleiwakai», müshi nia suluʼu naaʼin süka anain maʼin nukumajia wanee wayuu (Sal. 139:14). Wanaa sümaa jülüjain naaʼin David tü kasa nukumajalakat Jeʼwaa, niʼrüin sülanaʼaleein maʼin nukuwaʼipa Jeʼwaa (Sal. 139:6).

17. ¿Kaseerü watüjaka nüchiki Jeʼwaa jülüjale waaʼin tü kasa nukumajalakat?

¹⁷ ¿Kasa watüjaka sünainjee nukuwaʼipa David? Jülüja waaʼin tü kasa nukumajalakat Jeʼwaa. Nnojoishii eeʼeraainjanain neʼe waya, jülüjeesü waaʼin tü kasa nukumajalakat süpüla watüjain nüchiki. Wanaa sümaa waaʼinrüin wanee kasa, jülüja waaʼin tü kasa watüjeetkat nüchiki Maleiwa sünainjee tü kasa nukumajalakat maʼaka saaʼin tü wunuʼuliakalüirua, tü mürütkalüirua jee tü wayuukalüirua. Waaʼinrüle tia, atüjeena waya nüchiki Jeʼwaa, chi Washi aikai apüla waya (Roma 1:20). Jee müsia, kooʼomüinjeerü naalin wapüla.

18. ¿Kasa niyaawataka aaʼu David saashin Salmo 18?

¹⁸ Niyaawata aaʼu David nükaalinjünüin nutuma Jeʼwaa. Jamüshijaʼa nia wanaa sümaa nuʼutuin naaʼin wanee wasashi otta wanee jeesü saaʼujee naʼanneetse, niyaawata aaʼu niain Jeʼwaa akaalinjain nia. Wanaa sümaa nuʼutuin naaʼin Goliat, niyaawata aaʼu niain Jeʼwaa akaalinjain nia (1 Sam. 17:37). Akaʼaya wanaa sümaa isain nia nuulia Saúl, chi aluwataaikai, niyaawata aaʼu niain Jeʼwaa isain atuma nia (Sal. 18, suʼttianainjee). Müleka wayuulejeʼe yaleta aaʼinchi nia, «taya kakajeejachika tia», müshije nia. Nnojotpejeʼe yaletüin naaʼin David, müsüjeseʼe niyaawatüin saaʼu niain Jeʼwaa akaalinjain nia (Sal. 138:6).

19. ¿Kasa watüjaka sünainjee tü naaʼinrakat David?

¹⁹ ¿Kasa watüjaka sünainjee nukuwaʼipa David? Wachuntapa kaalinwaa nümüin Jeʼwaa, jülüjeesü waaʼin kasain naaʼinrüin wapüleerua otta joujain naaʼinrüin tia. Nnojorüle yaletüin waaʼin, wayaawateerü aaʼu eein tü kasa isakat wachiki otta choʼujaweerüin wamüin nükaalinjain waya Jeʼwaa. Weʼrüle nükaalinjain waya Jeʼwaa, aleeweena maʼin waya nümaa. Shia naaʼinraka tia chi wawalakai Isaac, chejeʼewai nia Fiyi, kakaliaichi nia anoujain nünain Jeʼwaa. Anuu nünüiki: «Jülüjale taaʼin takuwaʼipa toʼttaiwaʼaya sünain ekirajawaa sünain tü Wiwüliakat, teʼrüin nükaalinjain taya Jeʼwaa waneepia. Müichipa nia maʼaka naaʼin wanee taʼaleewain tamüin».

20. ¿Kasa watüjaka sünainjee nukuwaʼipa David nümaa Jeʼwaa?

²⁰ Nüshatüin David nukuwaʼipa Jeʼwaa. Nukumajüin waya Jeʼwaa süpüla wountuin washatüin nukuwaʼipa (Gén. 1:26). Waaʼinreerü tü naaʼinrakat Jeʼwaa wekirajaale maʼin süchiki tü nukuwaʼipakat. Süka niʼraajüin maʼin David nukuwaʼipa Jeʼwaa,  nümüliajüin na waneinnua. Mayaainjeʼe nümaʼüjiraain nukuwaʼipa sümaa Bat-Seba jee nuʼutirüin naaʼin chi suʼwayuusekai, nülatirüin Jeʼwaa sooʼopünaa naaʼin tü naainjalakat (2 Sam. 11:1-4, 15). Naaʼinrüin tia Jeʼwaa sutuma nüshatüin David tü nukuwaʼipakat jee nümüliajüin na waneinnua. Süka aleewain maʼin David nümaa Jeʼwaa, aishi maʼin nia napüla na wayuu chajanakana Israel otta «jüshata nukuwaʼipa David», müshi Jeʼwaa namüin na wane aluwataalii chajanakana Israel (1 Rey. 15:11; 2 Rey. 14:1-3).

21. ¿Kasa weʼreetka sünainjee washatüin nukuwaʼipa Maleiwa saashin Éfeso 4:24 otta 5:1?

²¹ ¿Kasa watüjaka sünainjee nukuwaʼipa David? Washatüinjatü nukuwaʼipa Maleiwa. Washatüle nukuwaʼipa, eʼreena waya kasa anasü otta weʼraajeechi maʼin nia. Kachiiruale waaʼin müin wakuwaʼipa maʼaka saaʼin nukuwaʼipa Maleiwa, weeʼiyatüin sünain nüchoin waya (paashajeʼera Éfeso 4:24; 5:1).

22, 23. ¿Kaseerü naaʼinraka Jeʼwaa waaʼinrüle tü wekirajaakalü anain?

²² Watüjaaitpa aaʼu weʼraajeechin Jeʼwaa jülüjale waaʼin tü kasa nukumajalakat otta wekirajaale sünain tü Wiwüliakat. Ashajünüsü suluʼu tü Wiwüliakat nachiki wainma wayuu aʼyataakana nümüin Jeʼwaa otta anakana süpüla washatüin akuwaʼipa maʼaka naaʼin Moisés nümaa David. Wainma kasa naaʼinraka Jeʼwaa süpüla weʼraajüin nia. Müshiijeseʼe wekirajaainjanain maʼin nüchiki.

²³ Wainma tü kasa watüjeetkat nüchiki Jeʼwaa, jama wekirajaainjanain waneepia nüchiki (Ecl. 3:11). Nnojoliinjanapejeʼe waya atüjain neʼe nüchiki, waaʼinrüinjatü tü wekirajaakalü anain. Müle shia watuma jee washatüle nukuwaʼipa, arütkaajeechi nia wanainmüin (Sant. 4:8). Nüküjain suluʼu tü Wiwüliakat nnojoleenain niyüülajüin na wayuu arütkaakana nünainmüin.