¿Sotusüche paaʼin tü pütchi ojuʼitakat suluʼu Aapiria Wayuu soʼujatka 2019?

«Jaʼitairü kasain maʼin aainjüneein pümüin, amalajaajeerü shia», ¿kasa nüküjeeka Jeʼwaa sükajee tia pütchikat? (Is. 54:17).

Maʼaka saaʼinmajünüin wanee wayuu suulia wanee wawai sutuma wanee süsepü piichi, naaʼinmajeena waya Jeʼwaa noulia na müliakana atuma waya (Is. 25:4, 5). Jaʼitairü kasain aaʼinnüin waka, kateeria neʼe woʼu waneepia nutuma Jeʼwaa (w19.01 süpana 6, 7).

Sünainjee tü naaʼinrakat Jeʼwaa naka na israeliita eʼrüliikana wayumüin otta na kananeokana, ¿jamüsü watüjaaka saaʼu anain nümüin lotule sukuwaʼipa wanee kasa?

Süsalashii nutuma Jeʼwaa na kashüülakana maʼin sünain amaʼüjirawaa nakuwaʼipa otta na müliakana atuma na jieyuukana jee na tepichikana. Anapejeʼe nakuwaʼipa na israeliitakana nutuma wanaa sümaa waneepiain naya nümaa otta lotuin sukuwaʼipa wanee kasa natuma (w19.02 süpana 22, 23).

¿Kasa waaʼinrajatka nuʼuraajüle wanee manoujainsai?

Kojuteerü wamüin tü naaʼinrakat jee yüüteena neʼe waya. Nnojoleenapejeʼe «amén» müin waya otta nnojoleena waya aapaajiraain wajapü namaa. Eeshii süpüla woʼuraajüin nümüin Jeʼwaa suluʼu waaʼin (w19.03 süpana 31).

¿Jamüsü mojuka maʼin nütaüjaanüle wanee jintüi?

Shia süka mojushaatain tia namüin na ataüjaanüshiikana, namüin na anoujashiikana, namüin na sülaülashiikana mma jee mojushaatasü tia nümüin Jeʼwaa. Suchuntunüle natuma na sülaülashiikana mma, süküjünüinjatüin sümüin pulusiia süchiki nütaüjaanüin wanee jintüi jee shiale wanee jintut, naaʼinrüin shia na laülaashiikana (w19.05 süpana 9, 10).

¿Kasa waaʼinrajatka süpüla wooʼulaain suulia tü kasa mojusü jülüjapuʼukat waaʼin?

Apünüinsü kasa waaʼinrajatka süpüla wountuin tia: oʼuraajüinjana waya, wasakireʼerüinjatü suluʼu waaʼin kasain wanouteʼerüinjatka sünain wakuwaʼipa otta aleewainjana waya namaa na aikana apüla Jeʼwaa (w19.06 süpana 11).

¿Kasa waaʼinrajatka süpüla kettaajüin waya süpülapünaa müliain waaʼin atumawaa?

Aleewainjana waya nümaa Jeʼwaa, nnojoluinjatü woʼtchejaain amaa alin waya nüpüla jee nnojoleenain waya nüpütüin wamüiwaʼa, waashajeʼerüinjatü tü Wiwüliakat weinshi otta oʼuraajüinjana waya. Soteesü waaʼin aneerüin kasa süpüshuaʼa nuluwataapa Jeʼwaa, ekirajaainjana waya sünain tü wetsiikulo kamalainkat wamüin otta tü jayeechikalüirua (w19.07 süpana 2-4).

¿Kasa waaʼinrüinjatka süpüla noʼttaainjanain na wapüshikana?

Amülialaainjatü waaʼin naalin, waaʼinrüinjatü kasa anasü noʼupala, nnojoliinjana waya akulajaain aaʼin nanainjee otta kamaneeinjana waya namüin (w19.08 süpana 15-17).

¿Jamüsü süpüla anain waaʼin nutuma Jesuu saashin Mateo 11:28?

Shia süka anamiain na wekiipüʼükana, anamiain na waʼyataajiraakana amaa otta anashaatasü tü waʼyataakalü anain (w19.09 süpana 23).

¿Kasa naaʼinraka Jeʼwaa süpüla keeʼireeinjatüin waaʼin wountuin waʼyataain nümüin? (Filip. 2:13).

Waashajeʼerüle tü Wiwüliakat otta wasakireʼerüle waaʼin sünain nükaalinjeena waya Jeʼwaa süpüla keeʼireeinjatüin waaʼin aaʼinraa tü nümakat otta wountuinjatüin shia. Nükaalinjeena waya nükajee chi naaʼinkai süpüla watüjaleein aaʼinraa wanee kasa (w19.10 süpana 21).

¿Kasa waainjainjatka süpülapünaa waneeküin wanee kasa waaʼinrajatka?

Jaʼraisü kasa waaʼinrajatka: wekirajaa maʼin süchiirua tü waaʼinrajatkat, wachunta kekiiwaa nümüin Maleiwa, jülüja waaʼin jamüin waaʼinreeka wanee kasa, pansaa tü waaʼinrajatkat otta wayaawata saaʼu tü wountakat jee tü isakat wachiki (w19.11 süpana 27-29).

¿Akumajaasüche tü alawaa ekirajünakat süchiki sujuʼitüin naaʼin wanee wayuu outapa nia suluʼujee tü nümakat Satanaa sümüin Eva?

Nnojo. Nnojotsü nüküjain Satanaa sümüin Eva outuinjatüin neʼe tü shiʼirukukat jee shiainjatüin ojuʼitüin tü saaʼinkat, tü nüküjakat sümüin shia katüinjatüin soʼu waneepia. Shiʼitapa tü Juya miyoʼushaatakat ajaʼlajaasü tü alawaa nikirajakalü anain Satanaa. Tü alawaa aküjünakat süchiki sujuʼitüin naaʼin wanee wayuu outapa nia, akumajaasü süchikijee tü Juya miyoʼushaatakat otta aʼwalakalaasü shia wanaa sümaa nuʼwalakajeʼerüin Maleiwa sainküinpünaa mmakat na wayuu chajanakana Babel (w19.12 süpana 15).