Tü sümakat Deuteronomio 22:25-27 süpülajatü sütüjaanüin aaʼu amaʼülaain tü aainjünakat sümüin tü jietkat, nnojotsü shiain süpüla sütüjaanüin aaʼu shiimainre kaainjalain chi ataüjaashikai. Wekirajaa sünain tia.

Süpülapünaa Deuteronomio 22:25-27 aküjünüsü nüchiki chi wayuu aainjiraakai nukuwaʼipa «pueulopaʼa» sümaa wanee jierü achuntuushiirü, süka müin, kasaalüitpakai saaʼin tia wayuukot, süsaleechi naainjala chia wayuukai süka nümaʼüjiraain nukuwaʼipa sümaa. ¿Jamaka tia wayuukot? ¿Süsaleetche shia saainjala? Süsaleerü shia nümaʼaleʼeya chi wayuu amaʼüjiraakai nukuwaʼipa sümaa, süka jamüin «nnojoluin suʼwaatüin süpüla achuntaa kaalinwaa». Suʼwaatülejeʼe, aapünüsüjeʼe shikiisa otta eesüjeʼe wayuu akaalinjaka shia (Deut. 22:23, 24).

«Eekajasaʼa wanaale nümaa wanee wayuu chaa mojuuipaʼa wanee jierü achuntuushiirü otta nütaüjaale shia, oʼutunajachi aaʼin chia wayuu makai aainjala sümüin; nnojotpejeʼe jamajüinjatüin atumawaa tü jietkat. Nnojotsü kaainjalain shia süpüla suʼutunajatüin aaʼin. Tü naaʼinrakat chia wayuukai, müsü aka saaʼin tü naaʼinrakat chi wayuu anaataakai nooʼomüin wanee wayuu sümaa nuʼutuin naaʼin, süka jamüin, nütaaüjaain shia chaa mojuuipaʼa. Aʼwaatüsiaajeʼe shia sünain achuntaa kaalinwaa; nnojotpejeʼe jaralüin aapüin shikiisa süpüla sükaalinjünüin» (Deut. 22:25-27).

Na laülaashii anoutakana sukuwaʼipa wanee kasa, nanoujain tü sümakat tü jietkat. Nayaawata aaʼu suʼwaatüin sümaa nnojoluin jaralüin akaalinjain shia. Müsüjeseʼe nnojoluin sümaʼüjiraasüin sukuwaʼipa nümaa chi makai atuma shia. Nia kaainjalaka chia wayuukai süka nütaüjaain shia jee nümaʼüjiraain nukuwaʼipa sümaa.

Tia Pütchi naapakat Jeʼwaa nükajee Moisés, süpülajatü sütüjaanüin aaʼu amaʼülaain tü aainjünakat sümüin tü jietkat otta kaainjalain chi wayuu ataüjaakai shia jee nümaʼüjiraain nukuwaʼipa sümaa. Watüjaa aaʼu nekirajaain naya laülaashiikana süchiirua tia süpüla nanoutuin sukuwaʼipa tia sükajee tü nuluwataakalü anain Jeʼwaa (Deut. 13:14; 17:4; Éx. 20:14).