1, 2. ¿Jamüsü watüjaainjatka saaʼu süsoʼiraainjatüin naaʼin na chainjanakana iipünaa?

WAINMA na wawalayuu aʼyataakana nümüin Jeʼwaa kepiainjanakana yaa saaʼu tü mmakat. Eetaashii waneinnua wawalayuu asoʼiraainjanakana aaʼin süpüla kepiainjanain naya chaa iipünaa. Wawalayuukana naainnua, natüjawee aaʼu jamüinjatüin nakuwaʼipa süsoʼiraapa naaʼin. Akaataajaʼa na wawalayuu yaainjanakana kepiain saaʼu tü mmakat natüjawee aaʼu tia, süka jamüin, eʼreenain naya kasa anasü sünainjee süsoʼiraainjatüin naaʼin na chainjanakana iipünaa. Jaʼitaina chainjanain waya kepiain iipünaa jee yaainjanale waya saaʼu tü mmakat, watüjawee aaʼu tü nakuwaʼipainjatkat na chainjanakana iipünaa süsoʼiraapa naaʼin.

² Nüshajirüin Maleiwa waneinnua nikirajüin Jesuu süchiki tü nakuwaʼipainjatkat na chainjanakana iipünaa süsoʼiraapa naaʼin. Anuu nünüiki chi aluwataaushikai Juan: «Mayaainje nüchooin waya Maleiwa maaʼulu yaa, nnojoliyülia eeʼiyatünüin wamüin jamüinjatüin wakuaippa soʼuweena wane kaʼi. Shiaʼla watüjaaka aaʼu sünain meenain aka waya naaʼin Cristo sünain anain soʼuweena tü kaʼi niweeteetkat oʼu nüchikua» (1 Juan 3:2). Nnojotsü natüjaain saaʼu na wawalayuu chainjanakana iipünaa jameerüin nakuwaʼipa süsoʼiraapa naaʼin. Neʼreechipejeʼe Jeʼwaa naapapa namüin tü namüinjatkat. Nnojotsü süküjain tü Wiwüliakat süpüshuaʼa tü nakuwaʼipainjatkat na chainjanakana iipünaa süsoʼiraapa naaʼin. Nüküjapejeʼe chi aluwataaushikai Pablo waneirua kasa süchiki tia. Naashin Pablo, eejeena nümaa Jesuu na chainjanakana iipünaa najaʼttirapa süpüshuaʼa tü aluwataayakalüirua saaʼujee tü mmakat jee müsia najaʼttirapa «tü outaakat». Shiasaʼa mapa, jüüjüüjeechi  Jesuu nümüin Jeʼwaa namaa na aluwataainjanakana nümaa jee müsia süpüshuaʼa tü kasakalüirua (1 Cor. 15:24-28). ¡Anakatche maʼin tia! *

3. Sünainjee tü sümakat 1 Corinto 15:30-32, ¿kasa naaʼinraka Pablo sutuma nunoujain sünain süsoʼiraajeerüin naaʼin na outushiikana?

³ Nüchecherüin naaʼin Pablo soʼunnaa tü alatakat nümüin sutuma nunoujain sünain süsoʼiraainjatüin naaʼin na outushiikana (paashajeʼera 1 Corinto 15:30-32, TNM). Anuu nünüiki namüin na corintojeʼewaliikana: «Teʼrüin tooʼomüin tü outaakat waneepia». Anuu sooʼomüin nünüiki: «Eejiraashi taya sümaa wüchii jashichi chaa Éfeso». Eeshijaʼa eejiraale Pablo sümaa wüchii jashichi chaa Éfeso (2 Cor. 1:8; 4:10; 11:23). Jee shiale eejiraain amaa nia na judío ayoutakana tü nikirajakalü anain jee waneinnua wayuu makana aka saaʼin sukuwaʼipa «wüchii jashichi» (Aluw. 19:26-34; 1 Cor. 16:8, 9). Soʼunnaa sülatüin nümüin Pablo tia, jülüjasü naaʼin waneepia aneerüin nukuwaʼipa mapeena (2 Cor. 4:16-18).

4. ¿Kasa naaʼinraka waneinnua wawalayuu sutuma natüjaain saaʼu süsoʼiraajeerüin naaʼin na outushiikana? (Piirakaa sümüin tü ayaakuaa sünainkat süta tü rewiisütakat).

⁴ Eʼrüshiʼiya waya müliaa maaʼulu yaa. Eeshii na wawalayuu aainjünakana amüin kasa mojusü. Eetaashii na wawalayuu kepiakana eere joouluin atkawaa. Eeshii na wawalayuu kepiakana eere süpülajünüin tü aküjaakat pütchi. Eetaashii na wawalayuu aʼyataakana nümüin Jeʼwaa mayaainjeʼe eein süpüla püreesain naya jee outuin naya sünainjee. Ayatüshiʼiya wawalayuukana naainnua naʼwaajüin Jeʼwaa. Anasü maʼin nakuwaʼipa wapüleerua. Nnojoishii naya mmoluin süka natüjaain saaʼu outule naya aapüneerü wanee kasa anasü namüin mapeena nutuma Jeʼwaa.

5. ¿Kasa amalajeʼereetka wanoula sünain süsoʼiraainjatüin naaʼin na outushiikana?

⁵ Nüchiaain Pablo na anoujashiikana suulia majüin nanüiki mayaa: «Nnojoliirejeʼe nasoʼireʼennüinjanain aaʼin na outushiikana, anakajaʼa mata wekaale jee wasaale süka sülüʼülüin wakalia süpüla outaa». Mapuʼusia nanüiki waneinnua wayuu sümaiwa paala. Eesüjaʼa nüshajarale Pablo tia pütchikat suluʼujee Isaías 22:13. Nüküjain Pablo shiain neʼe jülüjain naaʼin na israeliitakana emiʼijawaa suulialeʼeya narütkaain nünainmüin Maleiwa. Müsia sünüiki wayuu maaʼulu yaa maʼaka saaʼin nanüiki na israeliitakana. Anuu nanüiki: «Anashii wemiʼijaale süka watüjaain saaʼu outajanain waya». Watüjaapejeʼe saaʼu mojuin nakuwaʼipa na israeliitakana sutuma müin nanüiki (2 Crón. 36:15-20).

6. ¿Jaralii na nnojoliinjanakana waʼaleewajaain amaa wanoujale sünain süsoʼiraainjatüin naaʼin na outushiikana?

⁶ Wanoujale sünain süsoʼiraainjatüin naaʼin na outushiikana, waneeküinjana jaraliin na waʼaleewajaainjanakana amaa. Na anoujashii corintojeʼewaliikana, nnojoluinjana naya aʼaleewajaain namaa na wayuu nnojoliikana anoujain sünain süsoʼiraainjatüin naaʼin na outushiikana. ¿Kasa watüjaka sünainjee tia? Waʼaleewajaale namaa na wayuu jülüjakana neʼe aaʼin emiʼijawaa, nnojoleena waya eʼrüin kasa anasü sünainjee waaʼinrüin tia. Eesü süpüla sumojujaain wakuwaʼipa natuma jee müsia eeshii süpüla waaʼinrüin wanee kasa nüʼürülaka Jeʼwaa. Müshiijeseʼe nüchiaain Pablo na anoujashiikana sükajee pütchikat tüü: «Anakaja müleka japüire jia saaʼu tü kasa mojusü jaaʼinrakat, [...]. Juuʼulaa jumaala suulia kaainjalaa» (1 Cor. 15:33, 34).

7. Saashin 1 Corinto 15:35-38, ¿kasa eeka süpüla nüsakirayaain anain waya wanee wayuu?

⁷ (Paashajeʼera 1 Corinto 15:35-38). Süpüla wainmajüinjatüin waaʼin saaʼu shiimainre süsoʼiraainjatüin naaʼin na outushiikana, eeshiijaʼa nüsakirayaale waya wanee wayuu mayaa: «¿Jamüinjatü sukuwaʼipa wanee wayuu süchikijee  süsoʼiraain saaʼin?». Anashii wekirajaale sünain tü nümakat Pablo süchiki tia, süka jamüin, naatayaa sümüin tü sunoujakalü anain wayuu süchiki tü alatakat nümüin wanee wayuu outapa nia. ¿Kasa süküjaka maʼin tü Wiwüliakat?

8. ¿Jamüsü nünüiki Pablo süpüla wayaawatüin saaʼu shiiʼiratüinjatüin nakuwaʼipa na asoʼiraainjanakana aaʼin süpüla kepiaa chaa iipünaa?

⁸ Outapa wanee wayuu, ajaʼlajaasü tü niʼirukukat. Asoʼiraajeetpejeʼe naaʼin nutuma Jeʼwaa, jama niain kakumalain tü kasakalüirua otta eeʼirateerü nukuwaʼipa nutuma (Gén. 1:1; 2:7). Süpüla watüjaain saaʼu shiiʼiratüinjatüin nukuwaʼipa wanee wayuu süsoʼiraapa naaʼin, nüküjain Pablo wamüin sükajee sukuwaʼipa wanee waüyee yotopa shia. Jamüshiijaʼa wapünajüle wanee waüyee, nnojotsü ayatüin waüyeein shia yotopa shia, eeʼiratüsü tü sukuwaʼipakat.

9. ¿Jamüsü sünüiki 1 Corinto 15:39-41 süchiki naatayaa sümüin sukuwaʼipa tü kasakalüirua?

⁹ (Paashajeʼera 1 Corinto 15:39-41). Aashajaashi Pablo süchiki naatayaa sümüin sukuwaʼipa tü kasa nukumajalakat Maleiwa. Jamüsüjaʼa tü paaʼakalüirua naata sukuwaʼipa suulia tü wüchiikalüirua, suulia tü jimekalüirua jee suulia waneirua wüchii. Nüküjain naatain nukuwaʼipa chi Kaʼikai nuulia chi Kashikai jee müsia «tü jolotsükalüirua, eesü eekai miyoʼuin noʼu sünain chuwatüin, je eesü eekai joʼuuchoin noʼu». Watüjaa aaʼu müin sukuwaʼipa mayaainjeʼe wattain shia woulia. Naashin na cientiificokana, eesü jolotsü eekai miyoʼuyuuin sümaa ishojüin shia, eesü eekai jooʼuchein sümaa kasuujain shiairua otta eesü eekai mariiain maʼaka naaʼin chi Kaʼikai. Naashin Pablo, «tü kasa anakat maʼi weʼrüin chaa iipünaa, naata sukuaippa suulia tü weʼrakat anain maʼi yaa mmaluʼu». ¿Kasa nüküjeeka achiki? Wayakana yaakana kepiain saaʼu tü mmakat, eeshii süpüla shiʼrüin waya wayuu. Akaajasaʼa na kepiakana chaʼayaa iipünaa, nnojoishii süpüla weʼrüin naya süka meʼrujuin naya maʼaka naaʼin na aapieekana.

10. ¿Kasa müinjatka aka saaʼin nakuwaʼipa na asoʼiraainjanakana aaʼin süpüla kepiaa chaa iipünaa?

¹⁰ Anuu sooʼomüin nünüiki Pablo: «Wojoitünapa süchikijee ouktaa, ajaʼlajaasü tü weʼirukukat yala, je mojutsat sütüma wayuu süka sajaʼlajaaitpain. Otta soʼuweena tü kaʼi süsoʼiraainjatkat oʼu  saaʼin wayuu, eeʼiranajaweerü wakuaippa süpüla nnojolüin sajaʼlajaain». Outapa wanee wayuu, ajaʼlajaasü tü niʼirukukat jee mmashi nia nüchikuaʼa (Gén. 3:19). «Eeʼiranajaweerü wakuaippa süpüla nnojolüin sajaʼlajaain», ¿jamaka nümaka Pablo? Nnojoishi aashajaain Pablo nüchiki wanee wayuu asoʼiraainjachikai aaʼin yaa saaʼu tü mmakat, maʼaka naaʼin na wayuu asoʼiraakana aaʼin nutuma Elías, Eliseo otta Jesuu. Aashajaashi Pablo nachiki na asoʼiraainjanakana aaʼin süpüla chainjanain naya iipünaa, meʼrujusaliinjana naya (1 Cor. 15:42-44).

11, 12. (1) ¿Jamüsü nukuwaʼipa Jesuu süsoʼiraapa naaʼin? (2) ¿Jamüsü nakuwaʼipa na chainjanakana iipünaa süsoʼiraapa naaʼin?

¹¹ Wanaa sümaa yaajachin Jesuu saaʼu tü mmakat, shiʼrüin nia wayuu süka wayuuin nia. Shiasaʼa süsoʼiraapa naaʼin, meʼrujuichipa nia jee nuʼunaka iipünaamüin. Müinjatia neʼe nakuwaʼipa na asoʼiraainjanakana aaʼin süpüla kepiaa chaa iipünaa, meʼrujusaliinjana naya. Anuu nünüiki Pablo: «Kataiwaʼaya woʼu, müshii aka waya naaʼin Adán sünain wayuuin waya. Je süsoʼiraapeena waaʼin, meena aka waya naaʼin Cristo, süka shiiʼiranajaajeerüin wakuaippa süpüla ayateenain waya nümaa chaʼaya iipünaa» (1 Cor. 15:45-49).

¹² Soteesü waaʼin shiiʼiranajaain nukuwaʼipa Jesuu süsoʼiraapa naaʼin. ¿Jamüsü watüjaaka saaʼu? Anuu nünüiki Pablo süchiki tia: «Müleka nnojorule shiiʼiranajaain wakuaippa, nnojoleena waya ayatüin nümaa chi Maleiwakai waneepia chaa eere nuluwataain» (1 Cor. 15:50). Na aluwataaushikana namaa na waneinnua aneekünakana süpüla aluwatawaa iipünaa, nnojoishii oʼunuinjanain naya iipünaamüin nnojorüle shiiʼiranajaain nakuwaʼipa. ¿Joujeetka süsoʼiraain naaʼin naashin Pablo? Nnojotsü asoʼiraamaatüinjatüin naaʼin süchikijee outuin naya. Wanaa sümaa nüshajüin Pablo 1 Corinto, outatüjüliʼiya waneinnua nikirajüin Jesuu maʼaka naaʼin chi aluwataaushikai Santiago (Aluw. 12:1, 2). Akaʼaya waneinnua aluwataaushi namaa waneinnua aneekünaka süpüla aluwatawaa iipünaa, outushii naya mapa (1 Cor. 15:6).

13. ¿Kaseerü alataka «soʼunnaa nükalia» Jesuu?

¹³ Aashajaashi Jesuu süchiki tü nükaliakat.  Müshia Pablo, aashajaashi süchiki tia. Soʼunnaa tia joouluinjatü atkawaa, akutkujaainjatü tü mmakat, joouluinjatü ayuulii outasiroʼu jee waneirua kasa alatajatka sainküin tü mmakat. Ekeraajüsü tia soʼujee tü juyakat 1914. Eepejeʼe wanee kasa anasü alatajatka soʼunnaa tia. Naashin Jesuu, aküjüneerü «tü pütchi anasükat, tü süchikikat nukuaippa Maleiwa sünain aluwatawaa. Aküjüneerü sainküin mmakat süpüshua» jee müsia «kettaapa shia, anteerü sükalia sajaʼlajaainjatkat oʼu tü kasakat süpüshua» (Mat. 24:3, 7-14). Naashin Pablo, soʼunnaa nükalia Kürisüto, asoʼiraainjatü naaʼin na aneekuushikana süpüla chainjanain naya iipünaa, na outakana paala (1 Tes. 4:14-16; 1 Cor. 15:23, TNM).

14. ¿Kaseerü alataka namüin na aneekuushi outakana soʼunnaa nükalia Kürisüto?

¹⁴ Na aneekuushikana outakana maaʼulu yaa, asoʼiraamaateerü naaʼin süpüla noʼunuinjanain iipünaamüin. ¿Jamüsü watüjaaka saaʼu tia? Sünainjee tü nümakat Pablo suluʼu 1 Corinto 15:51, 52: «Eejeena eekai kateenain noʼu wanaa sümaa nüleʼejüin Cristo. Je waya anoujashiikana eekai kateenain woʼu nüpüla, namaa na eekai ouktüin paala, eeʼiranajaweerü wakuaippa waapapa shiʼira wane jontoroyoi chajee iipünaajee». Ekeraajüsü tia pütchikat, maaʼulu yaa. Süsoʼiraapa naaʼin na nuwalayuukana Kürisüto, talateerü maʼin naaʼin otta eejeena naya waneepia nümaa (1 Tes. 4:17).

15. ¿Kasa naaʼinrajatka chaa iipünaa na aneekuushi asoʼiraamaatüinjanakana aaʼin?

¹⁵ Süküjain tü Wiwüliakat tü naaʼinrajatkat chaʼayaa iipünaa na aneekuushi asoʼiraamaatüinjanakana aaʼin. Anuu nünüiki Jesuu: «Chi eekai nükanajuuin chi Kamaʼüraikai nütüma sümaa ayatüin naaʼinrüin tü tachekakat nüpüleerua süntaleepaʼa sükalia tü sajaʼlajaainjatkat oʼu kasakat süpüshua, laülaajeechi nia tatüma saaʼu wayuu sainküin mmakat süpüshua, maa aka niʼitaain taya chi Tashikai süpüla laülawaa sünain nümüin tamüin: ‹Teʼitaain pia süpüla aluwatawaa  saaʼu wayuu süpüshua sünain meʼrujuinjachin amüin pia. Eekai shiʼrüin pümüin suʼunnaa puluwataain, asaichijaweerü pütüma maa aka saaʼin amüchi eekai süsottüin›» (Alat. Map. 2:26, 27). Oushikajaajeena naya nüchiirua Jesuu, chi Nekiipüʼükai otta laülaajeena naya saaʼu wayuu süpüshuaʼa (Alat. Map. 19:11-15).

16. ¿Jamüsü süpüla nakanajüinjatüin tü outaakat watta naalii wayuu?

¹⁶ Nakanajeerü tü outaakat na aneekuushikana nutuma Maleiwa (1 Cor. 15:54-57). Sutuma süsoʼiraaitpain naaʼin, eejeena naya sünain ajaʼttiraa tü kasa mojusükat sülüʼülaapa maʼin Armagedón. Wainmeena na anoujashii oʼttaajeenakana süchikumüin tü müliaa miyoʼusükat, alateena naya suluʼumüin tü mma jeketkat (Alat. Map. 7:14). Wawalayuukana naainnua, neʼreerü sükanajuuin tü outaakat, süka jamüin, süsoʼiraajeerüin naaʼin watta naalii wayuu outakana sümaiwa paala. ¡Anakatche maʼin tia! (Aluw. 24:15). Na waneepiakana nümaa Jeʼwaa, nakanajeerü tü outaakat jee kateerü noʼu süpüla kaʼikat süpüshuaʼa.

17. ¿Kasa waaʼinrajatka maaʼulu yaa saashin 1 Corinto 15:58?

¹⁷ Talatüsü waaʼin maaʼulu sutuma tü nüshajakat Pablo namüin na corintojeʼewaliikana, tü nüshajakat süchiki süsoʼiraainjatüin naaʼin na outushiikana. Müshiijeseʼe woonooinjanain sümaa tü nümakat Pablo, waʼyataainjanain nümüin chi Senyotkai waneepia süka süpüshuaʼa waaʼin (paashajeʼera 1 Corinto 15:58). Waneepiale waya nümaa Maleiwa jee wachajaale sukuwaʼipa süpüla waʼyataain nümüin, talateerü maʼin waaʼin. Weʼreerü nnojoleerüin amülain neʼe tü waʼyataainkat nümüin chi Senyotkai.