Nnojotsü shiain aküjüneein achiki tia. Wetsiikulokot tüü, aashajaasü nüchiki chi wayuu kojuyatuakai alatüin amüin kasa mojusü, eʼrakai müliaa jee achecherakai naaʼin soʼunnaa tia.

Anuu tü ashajünakat süpülapünaa otta süchikijee tia wetsiikulokot: «Nnojo puroloijain süʼütpünaa nipia chi wayuu lotokoi akuwaʼipa shiiʼiree paaʼinreein kasa mojusü nümüin. Nnojo pajaʼttirüin tü kasa eekat nümaʼana. Nujutuule akaratshitua chi wayuu lotokoi akuwaʼipa, atamaweechi nia nüchikuaʼa; akanasaʼa na mojulaashiikana, ashanaweena naya sutuma kasa mojusü. Nnojo talatüin paaʼin sutuma nujuttüin chi püʼünüükai; nnojo talatüin paaʼin sutuma nüshanaain» (Prov. 24:15-17).

Eeshii na wayuu makana niain aashajaanüin achiki chi wayuu kojuyatuakai ojutuuin suluʼu naainjala jee anoutakai nukuwaʼipa mapa nümaa Maleiwa. Müsia shia nekiiruʼu noʼutku na aküjakana pütchi sümaiwa paala jee maaʼulu yaa naashin piamashii shikiipuʼujana iküleesia chaa Inglaterra. Anuu nanüiki naya piamashiikana wayuu süchiki tia: «Sutuma tia namakat naya wayuukana, eesüjaʼa jülüjeerüle naaʼin wanee wayuu ayateechin nia alin nüpüla Maleiwa jee moteerüin naaʼin naainjala niyaawajaale suulia naainjala, jaʼitashi nia wainmatuain kaainjalain». Wanee wayuu nnojoikai ooʼulaweein suulia naainjala, eesüjaʼa anale nümüin tia pütchikat.

Nnojotpejeʼe shiain tia süküjeein achiki tü wetsiikulokot 16.

Tü pütchikat hebreo «nujutuule» sümakat wetsiikulokot 16 otta 17, kojuyasü sukuwaʼipa. Jamüshijaʼa nujutuule wanee paaʼa toolo wopuluʼu, ojutuushi münüshi nia. Akaataajaʼa nujutuule wanee wayuu saaʼujee nipia, ojutuushi münüshi nia. Müsia neʼe sujutuule wanee ipa, ojutuusü münüsü shia (Deut. 22:4, 8; Amós 9:9). Anuu wanee sukuwaʼipaya: «Talatüle naaʼin Jeʼwaa nümaa wane wayuu, nuʼunirüin nukuwaʼipa. Jaʼitaichi nujuttuin, nnojoleechi yalaichimaʼaleein nia palasii müin mmoluʼu, süka jamüin, nnojoluin nüjütüin Jeʼwaa süchiki najapü» (Sal. 37:23, 24; Prov. 11:5; 13:17; 17:20).

Tü pütchi hebreo aküjünakat suluʼu wetsiikulokot 16, naashin wanee wayuu ekirajaakai süchiirua sukuwaʼipa tü Wiwüliakat, nnojotsü aashajaain nüchiki wanee wayuu ojutuukai suluʼu naainjala. Anuu nünüiki waneʼeya süchiki tia wetsiikulokot: «Jaʼitashii müliain atumawaa na aʼyataashiikana nümüin Maleiwa, ayateenaʼaya eein naya. Akaajasaʼa na mojulaashiikana, nnojoleena eein naya».

Tü sümakat Proverbios 24:16, nnojotsü aashajaain nüchiki wanee wayuu «ojutuukai» suluʼu naainjala. Tü saashajaakalü achiki, shia nüchiki wanee wayuu kojuyatuakai alatüin amüin kasa mojusü jee müliaa. Maaʼulu yaa, eeshi ayuuire wanee wayuu lotokoi akuwaʼipa jee sülatüle nümüin waneirua kasa mojusü otta müliale naaʼin natuma na laülaakana saaʼu wayuu. Nükaalinjeechipejeʼe nia Maleiwa süpüla nüchecherüin naaʼin soʼunnaa tü alatakat nümüin jee nülatüin süchikumüin. Eeshiijaʼa anakuwaʼipaliire na aʼyataashiikana nümüin Maleiwa. ¿Jamüshii anakuwaʼipaliika naya? Anuu tü sümakat tü Wiwüliakat: «Nükaalinjain Jeʼwaa napüshuaʼa na wayuu ojuttakana otta nütameeʼerüin napüshuaʼa na ojutteekana» (Sal. 41:1-3; 145:14-19).

Makalaka nnojoluin talatüin naaʼin chi wayuu lotokoi akuwaʼipa niʼrüle müliain na waneinnua. Talatüsü naaʼin süka nütüjaain saaʼu anain nakuwaʼipa na wayuu mmoluwaakana aaʼin neema chi Maleiwa shiimainshikai (Ecl. 8:11-13; Job 31:3-6; Sal. 27:5, 6).