1, 2. ¿Kasa tü waʼatapakat maʼin waya aʼyataashiikana nümüin Jeʼwaa?

CHOʼUJAASÜ maʼin kaʼatapalainjachin wanee wayuu. Eeshii na wayuu aʼatapakana sünain anainjatüin nakuwaʼipa sünain kaʼwayuusee, anainjatüin nakuwaʼipa nachonnii otta eeshii na aʼatapakana nalatüinjanain süchikumüin wanee ayuulii. Eesüjaʼa müle tü kasa waʼatapakat waya anoujashiikana. Alanaʼaleepejeʼe maʼin tü kasa waʼatapakat suulialeʼeya tia, süka jamüin, waʼatapüin katüinjatüin woʼu süpüla kaʼikat süpüshuaʼa otta süsoʼiraainjatüin naaʼin na wapüshi outuinnapakana.

² Anuu tü nümakat chi aluwataaushikai Pablo: «Otta tayaʼyaa, anoujashi nünain Maleiwa sümaa kaʼatapalain taya [...] sünain süsoʼiraajeerüin aaʼin tü wayuu ouktüsükalüirua, makat aka wayuu eekai saaʼinrüin tü anasükat otta türa eekai saaʼinrüin tü mojusükat» (Aluw. 24:15). Nnojoipejeʼe niain Pablo chi palajachikai aküjain süchiki süsoʼiraajeerüin naaʼin na outushiikana. Nüküjainya tia Job, niʼitaain naaʼin sünain sotuin nia naaʼin Maleiwa otta nüsoʼireʼenneechin aaʼin nüchikuaʼa nutuma (Job 14:7-10, 12-15).

3. ¿Kasa sükaalinjaka anain waya tü sümakat 1 Corinto kapiitulo 15?

³ Soʼutku tü kasa wekirajaakalü anain woʼttaiwaʼaya sünain anoujaa, shia süsoʼiraainjatüin naaʼin na outushiikana (Heb. 6:1, 2). Nüküjain Pablo suluʼu 1 Corinto kapiitulo 15 süsoʼiraainjatüin naaʼin na outushiikana. Atütülaakajasaʼa maʼin naaʼin na anoujashii namaiwajanakana sutuma tia pütchikat. Sünainjee tü nümakat Pablo akooʼomüinraajeerü wanoula sünain shiimain süsoʼiraajeerüin naaʼin na outushiikana.

4. ¿Jamüsüche watüjaaka saaʼu süsoʼiraajeerüin naaʼin na wapüshi outuinnapakana?

⁴ Sünainjee süsoʼiraain naaʼin Jesuu, wayaawata aaʼu sünain süsoʼiraajeerüin naaʼin na wapüshi outuinnapakana. Tüü, shia süpüshi tü  shiimain nüküjakat Pablo namüin na anoujashii chajanakana Corinto (1 Cor. 15:1, 2). Nüküjain chi aluwataaushikai Pablo, nnojoluin kasain saamüin nunoula wanee anoujashi nnojorüle nunoujain sünain süsoʼiraajeerüin naaʼin na outushiikana (1 Cor. 15:17). Sutuma wanoujain sünain süsoʼiraain naaʼin Jesuu, wanouja anainrü süsoʼiraajeerüin naaʼin na outushiikana.

5, 6. ¿Kasa weʼitaaka anain waaʼin sünainjee tü sümakat 1 Corinto 15:3, 4?

⁵ Soʼu nuʼttüin Pablo sünain ashajaa süchiki süsoʼiraainjatüin naaʼin na outushiikana, nüküjain apünüinsü kasa. Tü palajatkat shia outuin Kürisüto saaʼu waainjala. Tü piamakat shia nojoitünüin sutuma wayuu. Otta tü apünüinkat shia süsoʼiraain naaʼin süchikijee apünüin kaʼi maʼaka süküjünüin suluʼu tü karaloʼuta Nüchikimaajatkat Maleiwa (paashajeʼera 1 Corinto 15:3, 4).

⁶ ¿Kasa eeka sutuma outuin Jesuu, nojoitünüin jee süsoʼiraain naaʼin? Nüküjain Isaías nuʼutuneechin aaʼin chi Mesíaskai jee nojoitüneechin saʼaka wayuu kaainjarannuu. Nnojotpejeʼe shiain alatüinjatüin neʼe tia nümüin, nüküjainya Isaías naapajiraainjachin nikii Jesuu süpüla outaa saaʼu saainjala wayuu. Ekeraajüsia tia, aapajiraashi nikii Jesuu saaʼu waainjala (Is. 53:8, 9, 12; Mat. 20:28; Roma 5:8). Sünainjee outuin Jesuu, nojoitünüin jee süsoʼiraain naaʼin, weʼitaashaatain waaʼin sünain taasheenain waya suulia kaainjalaa, outaa jee weʼreenain nachikuaʼa na wapüshi outuinnapakana.

7, 8. ¿Jamüshii wanoujaka sünain süsoʼiraain naaʼin Jesuu?

⁷ Süpüla wanoujain sünain süsoʼiraainjatüin naaʼin na outushiikana, choʼujaasü wanoujainjatüin sünain süsoʼiraainya naaʼin Jesuu. ¿Jamüsü watüjaaka saaʼu süsoʼireʼennüin naaʼin Jesuu nutuma Jeʼwaa?

⁸ Wainma na wayuu eʼrakana Jesuu süchikijee süsoʼiraain naaʼin (1 Cor. 15:5-7). Nüküjain Pablo niiʼiyataainya Jesuu nümüin chi aluwataaushikai Pedro (Cefas). Naküjainya waneinnua anoujashii niiʼiyataain Jesuu nümüin Pedro süchikijee süsoʼiraain naaʼin (Luc. 24:33, 34). Eeʼiyataashiaʼaya Jesuu namüin na polookana piamamüin aluwataaushi süsoʼiraapa naaʼin. «Shiasa süchikijee tia, niiʼiyataakalaka namüin maa aka 500 wawalayuu wanaa sümaa jutkatüin naya», eesüjaʼa shiale soʼu chajanain naya jutkatüin Galilea maʼaka süküjünüin suluʼu Mateo 28:16-20. Eeʼiyataashia Jesuu nümüin Santiago, eeshijaʼa niale chi nuwala nnojoikai anoujain sünain niain Jesuu chi Mesíaskai (Juan 7:5). Anoujashi Santiago nünain Jesuu niʼraleepa süsoʼiraain naaʼin. Soʼunnaa tü juyakat 55, wanaa sümaa nüshajüin Pablo tü karaloʼuta namüinjatkat na anoujashii chajanakana Corinto, eejana noʼutku na wayuu eʼrakana paala Jesuu sünain asoʼirawaa aaʼin. Müshiijeseʼe eein süpüla yootuin naya namaa na wayuu wainmajakana aaʼin saaʼu shiimainrejeʼe süsoʼiraain naaʼin Jesuu.

9. Sünainjee tü sümakat Aluwataaushikana 9:3-5, ¿jamüsü eeka süpüla nüküjain Pablo süchiki süsoʼiraainya naaʼin Jesuu?

⁹ Mapa, eeʼiyataashi Jesuu nümüin Pablo (1 Cor. 15:8). Oʼunushi Pablo Damascomüin, «shiasaʼa chamüin nülüʼülaapa süpüla nüntüin [...], sootoloʼola sümakalaka wane luusa chejeejatü sirumaluʼujee», naapakalaka Pablo nünüiki Jesuu (paashajeʼera Aluwataaushikana 9:3-5). Sünainjee tü alatakat nümüin Pablo, wayaawata aaʼu sünain nnojoluin alawaain süsoʼiraain naaʼin Jesuu (Aluw. 26:12-15).

10. ¿Kasa naaʼinraka Pablo sutuma nunoujain sünain süsoʼiraain naaʼin Jesuu?

¹⁰ Wainma na wayuu kamalainkana amüin tü nümakat Pablo süka müliapuʼuin maʼin na anoujashiikana nutuma süpülapünaa niiʼiyataain Jesuu nümüin. Nütüjaapa Pablo saaʼu süsoʼiraain naaʼin Jesuu, aküjashi nia süchiki tia namüin na waneinnua. Soʼunnaa naaʼinrüin tia, aʼyaajünüshi nia, püreesashi nia atumawaa otta emerojoosü anuwa nümaa (1 Cor. 15:9-11; 2 Cor. 11:23-27). Nütüjaa aaʼu Pablo sünain süsoʼiraain naaʼin Jesuu. Müshijeseʼe nnojolin nia mmoluwaain seema aküjaa süchiki tia, jaʼitashi oʼutunuin aaʼin nia. Sünainjee  tü namakat na anoujashii eʼrakana Jesuu, ¿aashin weʼitaain waaʼin sünain süsoʼiraain naaʼin Jesuu?, ¿aashin weʼitaain waaʼin sünain süsoʼiraajeerüin naaʼin na outushiikana?

11. ¿Kasache eeka süpüla nnojoluin pansaain atuma tü jülüjakat naaʼin na anoujashii chajanakana Corinto süchiki süsoʼiraainjatüin naaʼin na outushiikana?

¹¹ Eeshii waneinnua anoujashii chajanakana Corinto suluʼu tü mmakat Grecia, nnojotsü pansaain tü nanoujakalü anain süchiki süsoʼiraainjatüin naaʼin na outushiikana otta eeshii na aküjakana süchiki matüjain asoʼirawaa saaʼin wayuu (1 Cor. 15:12). ¿Jamüsüche nnojotka pansaain tü jülüjakat naaʼin naya anoujashiikana? Eeshii waneinnua wayuu atüjakana maʼin chaa Atenas suluʼu tü mmakat Grecia, nemeeʼerainpalasü tü aküjünakat süchiki süsoʼiraain naaʼin Jesuu. Suluʼujee tia, eeshiijaʼa süpüla eein na anoujashii wanaawakana aaʼin namaa chaa Corinto (Aluw. 17:18, 31, 32). Eetaashii na nnojoliikana anoujain sünain shiimain nasoʼiraain aaʼin na outushiikana, naashin nayakana müshii outakai naaʼin süpülapünaa nanoujain, shiasaʼa nanoujapa müitpa süsoʼiraakai naaʼin süka motuin naaʼin Maleiwa naainjala. Amüla neʼe nanoujain sünain tia, süka jamüin, nnojoluin nanoujain sünain süsoʼiraainjatüin naaʼin na outushiikana. Nnojorülejeʼe nüsoʼireʼennüin aaʼin Jesuu nutuma Jeʼwaa, nnojotsüjaʼa mata alaʼajaanüin waainjala woulia. Na wayuu nnojotkana anoujain sünain süsoʼiraajeerüin naaʼin na outushiikana, nnojotsü kasain saamüin namüin tü nanoujakalü anain (1 Cor. 15:13-19; Heb. 9:12, 14).

12. Saashin 1 Pedro 3:18, 22, ¿jamüsü nnojotka wanaawain süsoʼireʼeria naaʼin Jesuu namaa na asoʼireʼennakana aaʼin nüpülapünaa?

¹² Nütüjaa aaʼu Pablo sünain süsoʼiraain naaʼin Kürisüto. Mayaainjeʼe eein na wayuu asoʼireʼennakana aaʼin süpülapünaa süsoʼireʼennüin naaʼin Jesuu, outushii naya nachikuaʼa. Naatapejeʼe maʼin süsoʼireʼeria naaʼin Jesuu. Anuu tü nümakat Pablo nüchiki Jesuu: «Jee jooluʼu, atameʼennüitchipa Kürisüto chi palajachikai asoʼiraain aaʼin naʼakajee na outushiikana». ¿Jamüshi niaka Jesuu chi palajachikai asoʼireʼennüin aaʼin naʼakajee na outushiikana? Shia süka niain chi palajachikai wayuu asoʼireʼennüin aaʼin suluʼu meʼrujuin nia otta süka niain chi palajachikai wayuu sünain oʼunaa chaa iipünaamüin (1 Cor. 15:20, TNM; Aluw. 26:23; paashajeʼera 1 Pedro 3:18, 22).

13. ¿Kasa nuʼwanaajireʼeraka aluʼu Pablo nukuwaʼipa Adán nümaa Jesuu?

¹³ ¿Jamüsü eeka süpüla katüin soʼu watta saalii wayuu sünainjee neʼe outuin wanee wayuu? Pansaasü tü nümakat Pablo süchiki tia pütchikat. Nuʼwanaajireʼerüin Pablo tü kasa eekat sünainjee kaainjalain Adán sümaa tü kasa eejeetkat sutuma naapajiraain nikii Jesuu. Nüküjain Pablo outuin Adán saaʼu naainjala. Müshiʼiya wayakana, müliashii waya sünainjee tia. Asoʼiraajeeria naaʼin na outushiikana sutuma nüsoʼireʼennüin aaʼin Jesuu nutuma Maleiwa. Maʼaka outuin wayuu sünainjee naainjala Adán, suunteeria wayuu katüin soʼu nünainjee Kürisüto (1 Cor. 15:21, 22).

14. Püküja süchiki jamüin nnojoleetka süsoʼiraain naaʼin Adán.

¹⁴ Wanaa sümaa nümüin Pablo: «Maleeirümaʼaka ouktüin wayuu», naya naashajaaka achiki Pablo napüshuaʼa na wayuukana. Naleʼeruʼusü tü kaainjalaakat jee tü outaakat nünainjee Adán (Roma 5:12). Nnojoleechi asoʼiraain aaʼin Adán sükajee kaainjalain nia nuulia Maleiwa sümaa wayuuin loto akuwaʼipachi nia nutuma. Nnojoleerü niʼrüin kataa oʼuu sünainjee naapajiraain nikii Jesuu. Tü alatakat nümüin Adán shieeria neʼe tü alatakat namüin na wayuu süsaleenakana naainjala nutuma Jesuu, na makana aka saaʼin kaaʼula. Saashin tü Wiwüliakat ajaʼttinneena naya (Mat. 25:31-33; Mat. 25:46, TNM; Heb. 5:9).

15. ¿Jaralii na katüinjanakana oʼu nünainjee Kürisüto?

¹⁵ Jülüja waaʼin tü nümakat Pablo süchiki katüinjatüin soʼu wayuu nünainjee Kürisüto (1 Cor.  15:21, 22). Tü karaloʼuta nüshajakat Pablo namüin na anoujashii chajanakana Corinto, namüinjatü na anoujashii aneekünakana süpüla aluwatawaa nümaa Jesuu. Anoujashiikana naainnua, akatannüshii suulia naainjala nünainmüin chi Maleiwakai jee sünainjee tü naaʼinrakat Kürisüto otta nüküjainya Pablo nachiki na «anoujakana nünain Cristo eekai ouktüin» (1 Cor. 1:1, 2; 15:18; 2 Cor. 5:17). Anuu tü wane nüshajakat Pablo nachiki naya anoujashiikana: «Maa aka ouktüin [Jesuu], müshii aka ouktakai waya wanaa nümaa [...]. Je maa aka susoʼiraain naaʼin Cristo, akaweenia wayakana osoʼiraweeria waaʼin mapeena» (Roma 6:3-5). Asoʼireʼennüsü naaʼin Jesuu suluʼu meʼrujuin nia otta nuʼunaka chaa iipünaamüin. Meeria neʼe nakuwaʼipa na wayuu aneekünakana süpüla aluwatawaa wanaa nümaa.

16. ¿Jamüshi nümaka Pablo niain Jesuu chi asoʼiraakai aaʼin palajana?

¹⁶ Nüküjain Pablo niain Jesuu «chi palajachikai asoʼiraain aaʼin naʼakajee na outushiikana». Eeshii waneinnua wayuu asoʼireʼennakana aaʼin süpüla kepiainjanain naya nachikuaʼa saaʼu tü mmakat maʼaka naaʼin Lázaro. Akaajasaʼa Jesuu, nia chi palajachikai asoʼireʼennüin aaʼin suluʼu meʼrujuin nia otta saapünüin nümüin kataa oʼu süpüla kaʼikat süpüshuaʼa. Nuʼwanaajireʼerüin Pablo tü alatakat nümüin Jesuu sümaa tü palajatkat süchon naʼttia na israeliitakana, tü nasülajapuʼukat nümüin Maleiwa. Tü nüküjeekalü achiki Pablo, shia nasoʼiraajeenain aaʼin waneinnua wayuu nüchikijee Jesuu süpüla chainjanain naya chaa iipünaa. Meeria neʼe tü alatakat namüin na aluwataaushikana jee na wayuu aneekünaka süpüla aluwatawaa nümaa Jesuu chaa iipünaa.

17. ¿Joujainjatü asoʼiraain naaʼin na anoujashii chainjanakana aluwataain nümaa Jesuu chaa iipünaa?

¹⁷ Wanaa sümaa nüshajüin Pablo tü karaloʼuta namüinjatkat na anoujashii chajanakana Corinto, nnojotsü asoʼiraain naaʼin na aneekünakana süpüla aluwatawaa nümaa Jesuu chaa iipünaa. Anuujeseʼe tü nümakat Pablo süchiki tü alatajatkat: «Katatawaisü sukuwaʼipa tia, chi palajachikai asoʼiraain aaʼin nia Kürisüto, süchikijee na anoujashii aluwataainjanakana chaa iipünaa soʼunnaa tü nükaliakat» (1 Cor. 15:23, TNM; 1 Tes. 4:15, 16). Maaʼulu yaa, kepiashii waya «soʼunnaa nükalia» Kürisüto. Na aluwataaushi outakana paala jee waneinnua anoujashii aneekünakana, naʼatapüin nükalia Jesuu süpüla süsoʼiraain naaʼin jee noʼunuin chaa iipünaa.

18. (1) ¿Jamüsü watüjaaka saaʼu süsoʼiraajeerüin naaʼin waneinnua wayuu nachikumüin na chainjanakana iipünaa? (2) Sünainjee tü sümakat 1 Corinto 15:24-26, ¿kaseerü naaʼinraka na aluwataaushikana nümaa Jesuu chaa iipünaa?

¹⁸ ¿Kaseetka alatüin namüin na anoujashii nnojoliinjanakana  chain iipünaa? Asoʼiraajeʼeria naaʼin. Saashin tü Wiwüliakat, Pablo jee na anoujashii chainjanakana iipünaa, napüshi na asoʼiraainjanakana aaʼin palajana (Filip. 3:11, TNM). Sutuma tia, wayaawata aaʼu süsoʼiraajeerüin naaʼin waneinnua wayuu nachikumüin. Pansaasü tia sümaa tü nunoujakalü anain Job süchiki tü alatajatkat nümüin (Job 14:15). Cheena iipünaa nümaa Jesuu napüshuaʼa na aneekünakana süpüla aluwatawaa soʼu najaʼttirüin Jesuu sukuwaʼipa naluwataaya na wayuukana. Müiria nnojoluin outaa otta nnojoleena outuin nachikuaʼa na chainjanakana iipünaa. ¿Jameetka nakuwaʼipa na wane wayuukana? (Paashajeʼera 1 Corinto 15:24-26, TNM).

19. ¿Asoʼiraajeetche saaʼin wayuu saaʼu tü mmakat?

¹⁹ ¿Asoʼiraajeetche saaʼin wayuu saaʼu tü mmakat? Anuu tü nümakat Pablo süchiki tia: «Otta tayaʼyaa, anoujashi nünain Maleiwa sümaa kaʼatapalain taya [...] sünain süsoʼiraajeerüin aaʼin tü wayuu ouktüsükalüirua, makat aka wayuu eekai saaʼinrüin tü anasükat otta türa eekai saaʼinrüin tü mojusükat» (Aluw. 24:15). Sünainjee tia wayaawata aaʼu süsoʼiraajeerüin saaʼin wayuu saaʼu tü mmakat, jama nnojolin süpüla chain iipünaa na wayuu aaʼinrakana kasa mojusü.

20. ¿Jamüsü sükooʼomüinraaka punoula sünainjee tü sümakat ekirajaayakat tüü?

²⁰ Shiimain süsoʼiraajeerüin naaʼin na wayuu outushiikana. Na wayuu asoʼiraajeenakana aaʼin saaʼu tü mmakat, eesü süpüla katüin noʼu süpüla kaʼikat süpüshuaʼa. Piʼitaa maʼin paaʼin sünain shikeraajeerüin pütchikat tia. Sümülialeerü paaʼin pütchikat tia sotopa paaʼin na püpüshi outuinnapakana. Eesü süpüla süsoʼiraain naaʼin soʼunnaa tü miit juya nuluwataainjatkalü oʼu Jesuu otta na nümaajanakana (Alat. Map. 20:6, TNM). Jaʼitakajeʼe outule waya, watüjaa aaʼu süsoʼireʼenneerüin waaʼin. «Nnojoleena waya eʼrüin japülii» süka watüjaain saaʼu shikeraajeerüin pütchikat tia (Roma 5:5). Sükatchinreerü paaʼin tia otta talateerü paaʼin sutuma sünain aʼyatawaa nümüin Jeʼwaa. Nnojotpejeʼe shiain watüjain neʼe tia sünainjee tü sümakat 1 Corinto kapiitulo 15. Wekirajaajeerü sooʼomüin süchiki tia sünain tü wane ekirajaayakat.