1. ¿Kaseerü alataka wamüin mojule waaʼin?

WAINMA tü kasa mojusü alatakat wamüin jee wachecherüin waaʼin soʼunnaa tia. Kapüleejeetpejeʼe wamüin wachecherüin waaʼin müleka mojule waaʼin. Nnojoleena kasain anain apüla waya saaʼin wamüin jee nnojoleerü talatüin waaʼin müleka mojule waaʼin. Anuu sünüiki Proverbios 24:10: «Mojule paaʼin wanaa sümaa müliain pia, matsüinjeerü paaʼin».

2. (1) ¿Kasa tü eekat süpüla mojuin atuma waaʼin? (2) ¿Kasa wekirajaainjatka anain sünain ekirajaayakat tüü?

² Wainma tü kasa eekat süpüla mojuin atuma waaʼin. Eesü mojule waaʼin sutuma tü mojukat watuma, sutuma tü kasa mojusü keejiakat wamüin, sutuma ayuulin waya, sutuma nnojoluin saapünüin wamüin wanee aʼyatawaa waʼyataweeka anain suluʼu nupueulose Jeʼwaa jee waküjale pütchi eere palirüin na wayuu achekakana tü pütchikat. Sünain ekirajaayakat tüü, wekirajaajeerü anain tü waaʼinrajatkat süpüla wachecherüin waaʼin suulia mojuin maʼin waaʼin.

3. ¿Kasa waaʼinrajatka süpüla nnojoluin mojukuʼu sümüin waaʼin sutuma tü kasa mojukat watuma?

³ Mojukuʼu sümüle waaʼin sutuma tü kasa mojukat watuma jee sutuma tü kasa mojusü keejiakat wamüin, jülüjeerü waaʼin nnojoleenain walatüin nutuma Jeʼwaa suluʼumüin tü Mma jeketkat. Jülüjale waaʼin tia, mojeerü maʼin waaʼin. ¿Kasa waaʼinrajatka süpüla anain tü jülüjakat waaʼin? Kaainjalashii waya wapüshuaʼa, niaʼala maainjalaka Jesukürisüto (Roma 3:23). Nnojotpejeʼe jülüjain naaʼin Jeʼwaa tü kasa mojusü waaʼinrakat, nütüjaa aaʼu nnojoluin lotuin tü wakuwaʼipakat. Aishii waya nüpüla otta nnojoishi nia aashichijaain wamüin. Nütüjaa aaʼu wachajaain sukuwaʼipa süpüla waaʼinrüin tü anasükat otta süpüla nnojoluin yüülain waaʼin, nükaalinjeein waya Jeʼwaa (Roma 7:17-19).

4, 5. Sünainjee tü sümakat 1 Juan 3:19, 20, ¿kasa akaalinjaka piamashii wawalayuu süpüla nnojoluin yüülain naaʼin?

 ⁴ Anuu süchiki tü alatakat sümüin Deborah otta María. * Jintüluuiwaʼaya Deborah müsü maalinkai saaʼin napüla na süpüshikana, nnojotsü natütüleʼerüin saaʼin. Müsüjeseʼe müliain maʼin saaʼin jee mojuin maʼin saaʼin. Eere wanee kasa mojuka sutuma, müsü nnojotkai kasain anain apüla shia saaʼin sümüin. Meematsia tü jülüjakat saaʼin María, eʼrüsü shia japülii natuma na süpüshikana. Sünainjee tia, nnojotsü kasain anain apüla shia saaʼin sümüin. Jaʼitakajaʼa woutiisapa shia, nnojotsü wanaain sümaa süküjalüinjatüin pütchi nüchiki Jeʼwaa saaʼin sümüin.

⁵ Mayaainjeʼe kapüleein maʼin tü alatakat namüin naya wawalayuukana, ayatüshiʼiya naya aʼyataain nümüin Jeʼwaa. ¿Kasa akaalinjaka naya süpüla nnojoluin yüülain naaʼin? Achuntushii naya kaalinwaa nümüin Jeʼwaa. Naküjain nümüin Jeʼwaa tü kasa mojukalü atuma naaʼin (Sal. 55:22). Nayaawata aaʼu nütüjaain saaʼu Jeʼwaa eein süpüla mojuin maʼin waaʼin sünainjee tü alatakat wamüin sümaiwa paala. Niʼrüin Jeʼwaa tü wakuwaʼipa anasükat mayaainjeʼe nnojoluin weʼrüin shia (paashajeʼera 1 Juan 3:19, 20, TNM).

6. ¿Jamüsü naaʼin wanee wayuu nujutuule nüchikuaʼa sünain aaʼinraa wanee kasa mojusü?

⁶ Jamüshijaʼa wanee wayuu achajaakai maʼin sukuwaʼipa süpula nnojoluin naaʼinrüin wanee kasa mojusü kiʼrapuʼukalü anain nia jee nujutuule nüchikuaʼa, eesüjaʼa mojule maʼin naaʼin. Alepejeʼeya tia, mojusü maʼin waaʼin kaainjarale waya (2 Cor. 7:10). Nnojotsü yüülainjatüin waaʼin jee nnojotsü müinjatüin wanüiki: «Nnojoishi kasain anain apüla taya, nnojoleerü motuin naaʼin Jeʼwaa taainjala». Nnojotsü anain müle wanüiki süka eein süpüla wakayalaain nuulia Jeʼwaa. Soto waaʼin tü sümakat Proverbios 24:10: mojule waaʼin wanaa sümaa müliain waya, matsüinjeerü waaʼin. Sülatüle wamüin tia, woʼuraaja nümüin Jeʼwaa süpüla motuin naaʼin waainjala jee woloʼira wakuwaʼipa nümaa (Is. 1:18). Waaʼinrüle tia, niʼreerü Jeʼwaa mojuin maʼin waaʼin jee moteerü naaʼin waainjala. Jee müsia, waashajaa namaa na laülaashiikana, nnojoleena naya aashichijaain wamüin. Nakaalinjeena waya süpüla sunoutaain wakuwaʼipa nümaa Jeʼwaa (Sant. 5:14, 15).

7. ¿Jamüsü nnojotka yüülainjatüin waaʼin eejiraale waya sümaa wanee kasa mojusü keejiakat wamüin?

⁷ Jean-Luc nia wanee laülaashi chejeʼewai Francia, anuu nünüiki namüin na eejiraakana sümaa tü kasa mojusü keejiakat namüin: «Na wayuu lotokana akuwaʼipa noʼuluʼu Jeʼwaa, nnojoishii nayain na matüjainkana aaʼinraa kasa mojusü, naya na mojukana aaʼin sünainjee mojuin natuma wanee kasa jee nachajaain sukuwaʼipa süpüla nanoutuin nakuwaʼipa» (Roma 7:21-25). Makalaka nnojoluinjatüin jülüjain waaʼin mepin wakuwaʼipa, soteesü waaʼin kaainjalain waya wapüshuaʼa. Anapejeʼe waya noʼuluʼu Jeʼwaa  sükajee anamiain maʼin nia jee sünainjee naapajiraain nikii Jesuu (Éf. 1:7; 1 Juan 4:10).

8. Choʼujaale wamüin sütütüleʼennüin waaʼin, ¿jaralii na anakana süpüla wachuntuin amüin kaalinwaa?

⁸ Choʼujaale wamüin sütütüleʼennüin waaʼin wachunta kaalinwaa namüin na wawalayuukana, na wapüshikana naaʼu Jeʼwaa. Natütüleʼereerü waaʼin jee naapajeerü tü wamakat namüin (Prov. 12:25; 1 Tes. 5:14). Joy shia wanee wawala chejeʼewat Nigeria, kakaliairü shia achecherüin saaʼin suulia mojuin maʼin saaʼin. Anuu sünüiki: «¿Kasaje taaʼinraka nnojoliire na tawalayuukana? Shiimaintaʼaleeja naapüin Jeʼwaa tanüiki. Nekirajüinya taya sünain atütüleʼeraa naaʼin na mojukana aaʼin». Eejeetpejeʼe nnojorüle natüjaain saaʼu na wawalayuukana choʼujaain sütütüleʼennüin waaʼin. Makalaka eein süpüla wachuntuin kaalinwaa nümüin wanee wawala laülaakai aaʼin sünain anoujaa jee shiale wanee wawala.

9. ¿Jamüsü sütütüleʼeraka waaʼin Salmo 41:3 otta 94:19?

⁹ Wachunta kaalinwaa nümüin Jeʼwaa. Kapüleesü wamüin jülüjain waaʼin kasa anasü ayuuire waya, shialeekajaʼa mepire tü ayuulii wanainkat. Mayaainjeʼe nnojolin analaa wamüin nutuma Jeʼwaa maaʼulu yaa, nümülialüin waaʼin otta katchinsü waaʼin nutuma süpüla wachecherüin waaʼin soʼunnaa tü ayuuliikat (paashajeʼera Salmo 41:3; 94:19). ¿Kasa naaʼinraka Jeʼwaa wapüleerua? Nükaalinjain waya nakajee na wawalayuukana. Eeshii nakaalinjale waya na wawalayuukana sünain ayaʼlajaa jee sünain aaʼinraa waneirua kasa miichipaʼa. Eeshii noʼuraajüle na wawalayuukana wapüleerua. Otta eesü süpüla sotuin waaʼin nutuma Jeʼwaa wanee pütchi suluʼujee tü Wiwüliakat atütüleʼereetka waaʼin, maʼaka saaʼin nnojoleenain ayuulin waya suluʼu tü Mma jeketkat (Roma 15:4).

10. ¿Kasa akaalinjaka chi wawalakai Isang süpüla nülatüin süchikumüin yüülaa aaʼin?

¹⁰ Isang, nia wanee wawala kepiakai Nigeria, kemionsitshi nia, isasü nüchiki atamawaa. Naashin chi tottootkai müichia nia matamaain. Anuu nünüiki chi wawalakai: «Mojusü maʼin taaʼin jee yüülasü taaʼin». ¿Kasa akaalinjaka chi wawalakai süpüla nülatüin süchikumüin tia? Anuu nünüiki: «Tayakai sümaa tü taʼwayuusekat oʼuraajüshii waya waneepia nümüin Jeʼwaa jee ekirajaashii waya waneepia sünain tü Wiwüliakat. Jee müsia, talatüsü waaʼin sümaa tü kasa eekat wamaʼana. Süpüshi tia kasakat shia kepiainjanain waya suluʼu tü Mma jeketkat».

11. ¿Kasa saaʼinraka tü wawalakat Cindy süpüla talatüin saaʼin mayaainjeʼe ayuulin shia?

¹¹ Anuu süchiki tü alatakat sümüin tü wawalakat Cindy, chejeʼewat shia México. Antüna anainrü sünain wanee ayuulii eeka süpüla outuin atuma shia. ¿Kasa saaʼinraka süpüla süchecherüin saaʼin soʼunnaa tia? Soʼunnaa tratamientoin shia, süneeküin süküjainjatüin pütchi soʼukaiwai. Anuu sünüiki: «Nnojotsü jülüjain taaʼin tawaʼnnajatüin jee müliain maʼin taya sutuma tia ayuuliikat. Shia jülüjaka taaʼin takaalinjain na waneinnua. Anuu tü taaʼinrapuʼukat: sümaʼinruʼu yootuin taya namaa na tottootkana jee nayale na perümeerakana, tasakirüin naya sünain napüshi jee tasakirüin naya jamüin naneekaka tia aʼyatawaakat sümaa kapüleein maʼin shia. Sutuma taaʼinrüin tia, mapüleesat tamüin yootoo namaa süchiki tü kasa kamalainkat namüin. Eeshii na ponokana aaʼin tü taaʼinrakat jee naapüin analuʼut tamüin. Naküjain tamüin eiwaʼalüin neʼrüin wanee wayuu eekai ayuulin sünain akaalinjaa naya. Eeshii na ashajakana tamüin sunuumerose naserulaatse jee jalain kepiain naya. Soʼunnaa tü alatakat tamüin, nükaalinjain taya Jeʼwaa süpüla talatüinjatüin maʼin taaʼin, ponusü maʼin taaʼin tia» (Prov. 15:15).

12, 13. (1) ¿Kasa naaʼinraka na wawalayuu ayuuikana otta na laülaayuuinnakana süpüla naküjainjanain pütchi? (2) ¿Kasa neʼraka sünainjee tia?

¹² Eeshii na wawalayuu nnojoliinnapakana aʼyataain maʼin nümüin Maleiwa sutuma ayuulin naya jee shiale sutuma laülaayuuinnain naya. Mojusü maʼin naaʼin sutuma tia. Mayaainjeʼe müin nakuwaʼipa, nachajaain sukuwaʼipa süpüla naküjain pütchi. Eesü wanee wawala chejeʼewat Estados  Unidos, Laurel sünülia, 37 juya shia suluʼu wanee maakina süpüla süsanalaain. Jee müsia, ayuuisü shia sutuma cáncer, kojuyatuairü awaʼnnüin shia jee eesü wanee ayuulii mepisat sütapaʼanain. Mayaainjeʼe kapüleein maʼin tü alatakat sümüin, nnojotsü shia ooʼulaain suulia aküjaa pütchi. Aküjasü shia pütchi namüin na perümeerakana otta namüin na akaalinjakana shia chaa shipialuʼu, 17 na wayuu sükaalinjakana sünain eʼraajaa Jeʼwaa. *

¹³ Eeshi wanee laülaashi chejeʼewai Francia, Richard nünülia. Nüküjain wanee kasa eeka süpüla naaʼinrüin na isainnakana achiki ojuʼitaa nepialuʼujee jee na suluʼukana tü miichi napülajatkat na laülaayuuinnakana. Anuu nünüiki: «Eesü süpüla shiʼitaanüin tü karaloʼutakalüirua eere jaʼyain shia namüin na wayuukana. Nalatapa süʼütpünaa, neʼreerü shia jee asakireena naya. Yooto meenaʼaya na wawalayuukana namaa. Müle sukuwaʼipa atumawaa, atütülaajeerü naaʼin na wawalayuu nnojoliinnapakana ojuʼitüin sünain aküjaa pütchi sainküin miichi». Jee müshiʼiya na nnojoliikana süpüla nojuʼitüin nepialuʼujee, eeshii süpüla naküjain pütchi suluʼu karaloʼuta jee suluʼupünaa serulaat.

14. ¿Jamüsü anaka süpüla washatüin nukuwaʼipa chi aluwataaikai David?

¹⁴ Eeshiijaʼa waʼatapajüle wanee aʼyatawaa waʼyataweekalü anain suluʼu nupueulose Jeʼwaa. Wainmapejeʼe tü kasa nnojotkalü aapünüin anainjee wamüin wanee aʼyatawaa. Eesüjaʼa shiale sünainjee laülaayuuinnain waya jee sünainjee ayuulin waya jee shiale sünainjee waneirua kasa. Nnojorüle saapünüin wamüin wanee aʼyatawaa, sükaalinjeena waya tü nukuwaʼipakat David. Nukumajee amüinrü tü aʼwaajüleekat Maleiwa, shiasaʼa naapapa süchiki nnojolin nüneekünüin süpüla tia, nükaalinjain chi wayuu nüneekakai Maleiwa süpüla akumajaa tü aʼwaajüleekat. Jee müshia nia, aapüshi ooro sümaa pülaata. ¡Anakatche nukuwaʼipa wapüleerua! (2 Sam. 7:12, 13; 1 Crón. 29:1, 3-5).

15. ¿Kasa naaʼinraka wanee wawala süpüla nnojoluin mojuin maʼin naaʼin?

¹⁵ Eeshi wanee wawala chejeʼewai Francia, Hugues nünülia. Nnojoluichipa nia laülaashin suluʼu tü outkajaaleekat sutuma ayuulin nia. Nnojoluichipa süpüla niʼyataain sünain waneirua kasachein nipialuʼu. Anuu nünüiki: «Mojusü maʼin taaʼin paala. Müshi nnojoikai kasain anain apüla taya saaʼin tamüin. Shiasaʼa mapa, ooʼulaashi taya suulia mojuu aaʼin sünainjee tü kasa isaitpakat tachiki, shiaitpa jülüjaka taaʼin tü tountakat, tü taʼyataainkat nümüin Jeʼwaa. Talatüsü taaʼin sutuma tia. Müshi taya maʼaka naaʼin Gedeón otta na 300 wayuu nümaajanakana. Mayaainjeʼe nnojoluichipain katchin taya, ayateechia taya achecherüin taaʼin» (Juec. 8:4).

16. ¿Kasa watüjaka sünainjee nakuwaʼipa na aapieekana?

¹⁶ Anasü süpüla washatüin nakuwaʼipa na  aapieekana. Soʼu wanee kaʼi, nüsakirüin Jeʼwaa naya sünain kasain anain süpüla nimeejünüin aka chi aluwataaikai Acab. Kojuya na aapiee aküjakana nümüin Jeʼwaa kasain anain süpüla saainjünüin nümüin. Waneeshia neʼe chi aapiee nüneekakai Jeʼwaa jee nüküjain nümüin anain tü nümakat (1 Rey. 22:19-22). ¿Jama na wane aapieekana?, ¿mojusüche naaʼin? «Amülashii neʼe waya asoutuin», ¿müshiiche naya? Nnojotsü müin nanüiki. Nnojotsü yaletüin naaʼin jee nacheka achikit niainjachin Jeʼwaa kojutuin atumawaa (Juec. 13:16-18; Alat. Map. 19:10).

17. ¿Kasa waaʼinrajatka mojule waaʼin sutuma nnojoluin saapünüin wamüin wanee aʼyatawaa suluʼu nupueulose Jeʼwaa?

¹⁷ Kojuta wamüin waküjaliin pütchi nüchiki Jeʼwaa jee waküjain pütchi süchiki Nuluwataaya. Eesü süpüla saapünüin wamüin wanee aʼyatawaa jee amüloulin shia woulia. Nnojotpejeʼe shiain kojutuin anainjee waya nümüin Jeʼwaa tia aʼyatawaakat jee namüin na wawalayuukana, kojuteena waya müleka nnojorüle yaletüin waaʼin. Müshiijeseʼe wachuntuinjanain kaalinwaa nümüin Jeʼwaa süpüla nnojoluinjatüin yaletüin waaʼin. Jülüja waaʼin nakuwaʼipa na wayuu nnojoliikana yaletüin aaʼin, na ashajünakana anülia suluʼu tü Wiwüliakat otta wachajaa sukuwaʼipa süpüla wakaalinjain na wawalayuukana süka süpüshuaʼa waaʼin (Sal. 138:6; 1 Ped. 5:5).

18, 19. Waküjale pütchi eere palitchon na wayuu aapaakana sümaa tü pütchikat, ¿kasa waaʼinrajatka süpula ayatüin talatüin waaʼin?

¹⁸ Eeshii waküjale pütchi eere nnojoluin jimatüin na wayuukana nepialuʼu jee nnojorüle naapajeein tü pütchikat. Mojule waaʼin sutuma tia, ¿kasa waaʼinrajatka süpüla ayatüin talatüin waaʼin? Sünain tü pütchi kanüliakat, « Waaʼinrajatka süpüla talatüin waaʼin sünain aküjaa pütchi», ashajünüsü yala waneirua kasa anaka süpüla waaʼinrüin. Soteepejeʼe waaʼin anainjatüin tü jülüjakat waaʼin süchiki tü waʼyataainkat. ¿Kasa waaʼinrüinjatka süpüla wountuin tia?

¹⁹ Soteesü waaʼin jamüin waküjaka pütchi süchiki nünülia Maleiwa jee süchiki Nuluwataaya. Naashin Jesuu, palitchon na wayuu antakana sünain tü wopu katüinjatkalü atuma soʼu wayuu (Mat. 7:13, 14, TNM). Wanaa sümaa waküjain pütchi, aʼyataajiraashii waya nümaa Jeʼwaa, Jesuu otta na aapieekana (Mat. 28:19, 20; 1 Cor. 3:9, TNM; Alat. Map. 14:6, 7). Neenaküin Jeʼwaa suluʼumüin tü nupueulosekat na wayuu aʼyataweekana nümüin (Juan 6:44). Na wayuu nnojoliikana aapaain sümaa tü pütchikat maaʼulu yaa, eeshiijaʼa  naapaajeenale sümaa mapeena waküjapa tü pütchikat namüin.

20. Sünainjee tü sümakat Jeremías 20:8, 9, ¿kasa akaalinjeenaka waya süpüla nnojoluin mojuin waaʼin?

²⁰ Atüjeena waya sünainjee nukuwaʼipa Jeremías, chi nünüikimaajachikai Maleiwa. Aküjashi nia pütchi eere nnojoluin jaralüin aapaain sümaa tü pütchikat. Aʼülüjüna amüinchi nia sutuma wayuu, siraasü kaʼi naaʼu sümaa meeʼerapalain nia sutuma wayuu (paashajeʼera Jeremías 20:8, 9). Mojusü naaʼin sutuma tia jee ooʼulaainjachia nia suulia aküjaa pütchi, nnojotpejeʼe naaʼinrüin tia. ¿Jamüshi nnojoikai nuuʼulaain? Naashin niakai, müsü aka saaʼin suchuwala siki suluʼu naaʼin tü nünüikikat Jeʼwaa, nnojoishi süpüla koʼutuin nia naashin. Meeria tü waaʼinrakat weʼitaale suluʼu wekii jee suluʼu waaʼin tü nünüikikat Maleiwa. Müshiijeseʼe wekirajaainjanain sünain soʼukaiwai jee jülüjainjatüin waaʼin tü sümakat. Waaʼinrüle tia, talateerü waaʼin sünain aküjaa pütchi jee eejeena na wayuu aapaakana sümaa tü pütchikat (Jer. 15:16).

21. ¿Kasa waaʼinrajatka süpüla nnojoluin mojuin waaʼin?

²¹ Anuu sünüiki Deborah, tü wachuntakalü anülia suluʼu pütchi 4: «Eeshii süpüla najayatüin waya Satanaa soʼunnaa mojuin waaʼin». Pülaleepejeʼe Jeʼwaa nuulia Satanaa jee suulia tü kasa niʼitaakat wapüleerua. Jaʼitairü kasain mojuin atuma waaʼin, waküja nümüin Jeʼwaa jamüin waaʼin jee wachunta kaalinwaa nümüin. Nükaalinjeena waya süpüla nnojoluin mojuin waaʼin sutuma tü kasa mojukat watuma, sutuma tü kasa keejiakat wamüin, sutuma ayuulin waya otta sutuma nnojoluin saapünüin wamüin wanee aʼyatawaa waʼyataweeka anain. Nükaalinjeena waya süpüla anain tü jülüjakat waaʼin süchiki tü aküjaakat pütchi. Shiimainya tia, nükaalinjeena waya Jeʼwaa süpüla nnojoluin mojuin waaʼin.