1. ¿Kasa wakooʼomüinreetka wasakireʼerüle waaʼin sünain tü nüküjakat Jehová wamüin?

 NÜKÜJAIN Jehová naapeerüin kataa oʼuu süpüla kaʼikat süpüshuaʼa namüin na oonookana nümaa (Roma 6:23, TNM). Wasakireʼerapa waaʼin sünain tia, akooʼomüinraasü tü naalinkat wapüla. Kateesü woʼu nutuma süpüla kaʼikat süpüshuaʼa süpüla nnojoliinjanain wakayalaain nuulia. Naaʼinrüin tia chi Washi iipünaajachikai süka muloʼuin waalin nüpüla.

2. ¿Jamüsü sükatsüinraka waaʼin tü nümakat Maleiwa süchiki katüinjatüin woʼu süpüla kaʼikat süpüshuaʼa?

² Sükatsüinrüin waaʼin soʼunnaa müliaa tü nümakat Maleiwa süchiki katüinjatüin woʼu süpüla kaʼikat süpüshuaʼa. Jaʼitainna noʼuteein aaʼin waya na waʼünüükana, nnojoleena waya ooʼulaain suulia aʼyatawaa nümüin Jehová. Jamüshiijaʼa outule waya sümaa waneepiain waya nümaa Jehová, nüsoʼireʼereerü waaʼin otta eesü süpüla katüin woʼu süpüla kaʼikat süpüshuaʼa (Juan 5:28, 29; 1 Cor. 15:55-58; Heb. 2:15). Anashii wekirajaale sünain waneirua kasa wayaawateetka atuma eein süpüla katüin woʼu waneepia.

3. ¿Jamüsü watüjaaka saaʼu nuuntuin Jehová naapüin wamüin kataa oʼuu waneepia? (Salmo 102:12, 24, 27).

³ Watüjaa aaʼu nuuntuin Jehová naapüin wamüin kataa oʼuu süpüla kaʼikat süpüshuaʼa süka niain kanainjeejachin tü kataakalü oʼuu otta süka eejeechin nia süpüla kaʼikat süpüshuaʼa (Sal. 36:9). Wekirajaa sünain waneirua wetsiikulo aashajaaka süchiki müinña nukuwaʼipa Jehová. Süküjain Salmo 90:2 eetüjülinña Maleiwa ooʼulaka eejeechin nia süpüla kaʼikat süpüshuaʼa. Suluʼu Salmo 102 eesü wanee pütchi makat aka saaʼin tia (paashajeʼera Salmo 102:12, 24, 27). Anuu wanee pütchi nüshajaka Habacuc nüchiki chi Washi iipünaajachikai: «Jehovákalee,  ¿nnojoishisa eetüjülinña pia sümaiwa? Tamaleiwasekalee, chi Wulekai akuwaʼipa, matüjainsai pia outaa» (Hab. 1:12).

4. ¿Jamüsü nnojoluinjatka shapaain waaʼin saaʼujee nnojoluin wayaawatüin saaʼu eetüjülin Jehová?

⁴ Eesüjaʼa nnojorüle piyaawatüin maʼin saaʼu jamakuwaʼipalin eein Jehová (Is. 40:28). Wainma na jülüjakana aaʼin tia. Anuu nünüiki Elihú nüchiki Maleiwa: «Nnojotsü süpüla wayaawajüin jeʼrairüin nuuyase» (Job 36:26). Eesüjaʼa nnojorüle wayaawatüin maʼin saaʼu jamakuwaʼipalüin sukumajaain wanee kasa, nnojotpejeʼe maluʼuluin nnojoluin eein shia. Eesüjaʼa nnojorüle wayaawatüin maʼin saaʼu kasain eein atuma tü korientekat, watüjaapejeʼe saaʼu eein shia. Akaʼaya neʼe nukuwaʼipa chi Maleiwakai, nnojotsü süpüla wayaawatüin maʼin saaʼu jamakuwaʼipalin eetüjülin nia otta jamüin eejeechikai nia süpüla kaʼikat süpüshuaʼa. Tü shiimainkat nüchiki chi Maleiwakai nnojotsü shiain neʼe tü wayaawatakalü aaʼu nüchiki (Roma 11:33-36). Eetüjüiya nia nnojoluiwaʼaya sukumajünüin tü kasa chakalü iipünaa maʼaka naaʼin chi Kaʼikai jee tü shüliwaikat. Anuu sünüiki tü Bibliakat nüchiki: «Nia kakumalaka tü mmakat, nukumajala shia sükajee tü nüpülainkat, [...] anasü maʼin sukumajia tü kasa chakalü iipünaa» (Jer. 51:15; Aluw. 17:24). Wekirajaa sünain wane kasaya wayaawataka atuma eein süpüla katüin woʼu süpüla kaʼikat süpüshuaʼa.

5. ¿Kasa naʼatapajaka Adán sümaa Eva nutuma Jehová?

⁵ Süpüshuaʼa tü kasa katakalü oʼu yaa mmapaʼa nutuma Jehová, eesü süpüla outuin shia soʼu wanee kaʼi, nayapejeʼe akumajünüin namüiwaʼa na wayuukana süpüla katüinjatüin noʼu süpüla kaʼikat süpüshuaʼa. Anuu wanee kasa eejüinjatka oulia naaʼin Adán naashin Jehová: «Shiasaʼa nnojolüinjatüin piküin süchon tü wunuʼu atüjaweetkat atüma wayuu saaʼu tü anasükat je saaʼu tü mojusükat. Müleka piküle süchon wunuʼukot tüü, shiimüinshaana ouktajachin pia» (Gén. 2:17). Noonoolejeʼe Adán otta Eva sümaa nünüiki Jehová, nnojoishiijeʼe outuin naya. Eesüjaʼa süpüla naapüin Jehová namüin soʼu wanee kaʼi süchon tü wunuʼu «kataapalakat atüma soʼu wayuu waneepia». Nayaawatüinjeseʼe saaʼu eein süpüla katüin noʼu «süpüla kaʼikat süpüshua» (Gén. 3:22). b

6, 7. (1) ¿Kasa wayaawataka atuma nnojoliin wakumajuushin süpüla outaa? (2) ¿Kasa paaʼinreeka amüin katapa poʼu waneepia? (Piirakaa sümüin tü ayaakuaakalüirua).

 ⁶ Anasü maʼin tü nayaawatakalü aaʼu waneinnua científico süchiki tü wekiisholoinkat, watta saalii kasa eeka süpüla nünaajaain wanee wayuu nikiiruʼu naashin. Soʼu 2010, ashajünüsü suluʼu wanee rewiisüta chaa Estados Unidos eein süpüla nünaajaain wanee wayuu suluʼu nikii (nikiisholoin) maʼaka piama miyoone shiatapünaa gigabytes. Tia müsü aka saaʼin wanee video apünüinka miyon oora sümaʼa, süpüla wanaajüin tia videokot walatirüinjatü 300 juya sünain anajaa shia. Eepejeʼe sülanaʼaleere tü wanaajaakat wekiiruʼu suulia tia. Wayaawatakalaka saaʼu nukumajüin Jehová tü wekiisholoinkat süpüla wanaajaain watta saalii kasa suluʼu, nnojotsü shiain neʼe tü wanaajaakat soʼunnaa 70 jee shiale 80 juya kataka oʼu waya (Sal. 90:10).

⁷ Nukumajüin waya Jehová süpüla suchuntaain waaʼin ayatüin katüin woʼu. Süküjain tü Bibliakat niʼitaain Maleiwa suluʼu waaʼin katüinjatüin woʼu süpüla kaʼikat süpüshuaʼa (Ecl. 3:11). Müsüjeseʼe waʼünüüin tü outaakat (1 Cor. 15:26). Jülüjataa waaʼin tüü: mayeinre waya sutuma wanee ayuulii, ¿ayüülajaajeenache waya sümaa nnojoluin wachajaain süchiki tü shipinjatkat? Nnojottaa, tü waaʼinrakat shia woʼunuin nümaʼanamüin wanee tottoot süpüla watüjaain saaʼu tü shipinaseinjatkat tia ayuuliikat. Waaʼinrüin tia süka kateein woʼu. Outule wanee wayuu aikai wapüla, jaʼitaichi niain wanee tepichi jee niale wanee wayuu jaʼapüichi, aishaatasü wamüin tia, nnojotsü alatamaatüin tü saalinkat wamüin (Juan 11:32, 33). Süka alin waya nüpüla Jehová, nnojoishii nukumajüin waya süpüla outaa. Eesü waneirua kasa wayaawataka atuma eein süpüla katüin woʼu süpüla kaʼikat süpüshuaʼa. Wekirajaa sünain waneirua kasa  naaʼinrapuʼuka Jehová otta naaʼinraka maaʼulu wayaawataka atuma nnojoluin nuʼwanajaain tü keeʼireekat naaʼin wapüleerua.

8. ¿Kasa wayaawataka sünainjee tü sümakat Isaías 55:11?

⁸ Mayaainjeʼe kaainjalain Adán sümaa Eva jee outuin na nachonniikana sünainjee naainjala, nnojotsü nuʼwanajaain Jehová tü keeʼireekat naaʼin wapüleerua (paashajeʼera Isaías 55:11). Ayatüsia keeʼireein naaʼin Jehová katüinjatüin noʼu waneepia na waneepiakana nümaa. Watüjaa aaʼu tia saaʼujee tü nümakat jee tü naaʼinrakat süpüla nikeraajüin tü keeʼireekat naaʼin.

9. ¿Kasa nüküjatüjütkalia Jehová? (Daniel 12:2, 13).

⁹ Nüküjatüjülia Jehová nüsoʼireʼerüinjatüin saaʼin wayuu outusü otta eein süpüla naapüin kataa oʼuu namüin süpüla kaʼikat süpüshuaʼa (Aluw. 24:15; Tito 1:1, 2). Nütüjaa aaʼu Job keeʼireein maʼin naaʼin Jehová nüsoʼireʼerüin saaʼin wayuu outusü (Job 14:14, 15). Nütüjaa aaʼu Daniel chi nünüikimaajachikai Maleiwa süsoʼiraainjatüin saaʼin wayuu outusü nutuma Maleiwa otta eein süpüla naapüin kataa oʼuu namüin süpüla kaʼikat süpüshuaʼa (Sal. 37:29; paashajeʼera Daniel 12:2, 13). Natüjaa aaʼu na judío eejanakana nükalioʼu Jesús eein süpüla naapüin Jehová namüin na waneepiakana nümaa kataa oʼuu süpüla kaʼikat süpüshuaʼa (Luc. 10:25; 18:18, TNM). Kojuyatua naashajaain Jesús süchiki süsoʼiraainjatüin saaʼin wayuu oʼutusü otta asoʼireʼennüsü naaʼin nutuma chi Nüshikai (Mat. 19:29; 22:31, 32; Luc. 18:30, TNM; Juan 11:25, TNM).

10. ¿Kasa wayaawataka sünainjee süsoʼireʼennüin saaʼin wayuu outusü sümaiwa? (Piirakaa sümüin tü ayaakuaakat).

¹⁰ Nia Jehová aapaka kataa oʼuu wamüin otta nia chi ountakai asoʼireʼerüin saaʼin wayuu outusü. Naapüin nümüin Elías chi nünüikimaajachikai wanee pülaa süpüla nüsoʼireʼerüin naaʼin süchon wanee wayuu outa aʼwayuuse chejeʼewatka Sarepta (1 Rey. 17:21-23). Jee mapa, nükaalinjain Maleiwa Eliseo chi nünüikimaajachikai süpüla nüsoʼireʼerüin naaʼin süchon wanee wayuu chejeʼewat Sunem (2 Rey. 4:18-20, 34-37). Wayaawatakalaka saaʼu nuuntuin Jehová nüsoʼireʼerüin saaʼin wayuu outusü. Yaaiwaʼaya Jesús yaa mmapaʼa atüjaana aaʼu saaʼujee tü naaʼinrakat naapüin chi Nüshikai nümüin wanee pülaa süpüla nuuntuin nüsoʼireʼerüin saaʼin wayuu outusü (Juan 11:23-25, 43, 44). Maaʼulu yaa, chashi Jesús iipünaa otta laülaashi nia atumawaa «chaa sirumatuʼu jee yaa saaʼu tü mmakat». Müsüjeseʼe eein süpüla nuuntuin nüsoʼireʼerüin naaʼin na outushiikana süpüla saapünüin namüin kataa oʼuu waneepia (Mat. 28:18, TNM; Juan 5:25-29).

11. ¿Jamüsü eeka süpüla katüin woʼu süpüla kaʼikat süpüshuaʼa nünainjee Jesús?

¹¹ ¿Jamüshi nuuʼulaaka Jehová outuin chi Nüchon aishikai nüpüla sümaa müliain nia atumawaa? Anuu nünüiki Jesús süchiki tia: «Aisü maʼin wayuu nüpüla Maleiwa, naapüinjeseʼe nikii chi waneeshikai Nüchon süpüla nnojoliinjanain amüloulin na wayuu anoujakana nünain. Neʼreenaka suluʼujee tia kataa oʼuu süpüla kaʼikat süpüshuaʼa» (Juan 3:16, TNM). Sükajee naapüin Maleiwa nikii chi Nüchonkai süpüla taashin waya suulia waainjala, eesü süpüla katüin woʼu nutuma süpüla kaʼikat süpüshuaʼa (Mat. 20:28). Anuu nünüiki chi aluwataaushikai Pablo süchiki tia: «Outusü wayuu nünainjee neʼe waneeshia wayuu, asoʼiraajeetpejeʼe saaʼin wayuu süchikijee outaa nünainjee waneeshia wayuu. Outayaa müsü wayuu maʼleekalia nünainjee Adán, eekajasaʼa nünainjee Cristo kateerü soʼu wayuu süpüshuaʼa» (1 Cor. 15:21, 22, TNM).

12. ¿Kasa naaʼinrajatka Jehová süpüla nikeraajüin tü keeʼireekat naaʼin?

 ¹² Nikirajüin Jesús na nikirajüinkana süpüla nachuntuin Nuluwataainjachin Maleiwa yaa saaʼu tü Mmakat otta süpüla saainjünüin tü keeʼireekat naaʼin chi Nüshikai (Mat. 6:9, 10, TNM). Süpüshi tia keeʼireekat naaʼin Jehová shia katüinjatüin noʼu na wayuukana süpüla kaʼikat süpüshuaʼa yaa saaʼu tü Mmakat. Süpüla tia, nüneeküin Jehová chi Nüchonkai süpüla nuluwataainjachin otta nükotchojüin 144.000 wayuu akaalinjainjanakana Jesús süpüla saainjünüin tü keeʼireekat naaʼin Maleiwa (Alat. Map. 5:9, 10).

13. (1) ¿Kasa naaʼinraka Jehová maaʼulu? (2) ¿Kasakaʼa paaʼinrajatüin?

¹³ Nükotchojüin Jehová watta saalii wayuu sümaa nikirajüin naya süpüla kepiainjanain naya saaʼu tü mmakat nuluwataapeena saaʼu (Alat. Map. 7:9, 10; Sant. 2:8). Mayaainjeʼe nnojoluin paaʼinwajiraain wayuu sutuma tü üttaakalü aaʼin jee tü atkawaakat, aʼyataashii maʼin na wayuu nükotchojakana Jehová süchiirua nasünneʼerüin suluʼujee naaʼin tü üttaakalü aaʼin. Müsü naapaakai saaʼin tü chajaruuta natkaayakat süpüla napünajüin süka (Miq. 4:3). Suulia noʼunuin sünain tü atkawaakat, tü outakat maʼin atuma wayuu, nekirajüin na wayuukana nüchiki chi Maleiwa shiimainshikai jee süchiki tü naaʼinrajatkat süpüla nachecheraain «süchiirua tü kataa oʼuu aapüneetkat» namüin (1 Tim. 6:19, TNM). Süka nacheküin niain Maleiwa aluwataain naaʼu, eesüjaʼa süpüleeruaanüle naaʼin natuma na napüshikana otta müliale naya sutuma alin shiiʼiree nneerü, naapapejeʼe Jehová tü kasa choʼujaakat  namüin (Mat. 6:25, 30-33, TNM; Luc. 18:29, 30). Wayaawatakalaka saaʼu nuluwataaichipain Jehová otta ayateerüin nikeraajüin tü keeʼireekat naaʼin.

14, 15. ¿Jamüsü süpüla sajaʼttinnüinjatüin tü outaakat?

¹⁴ Aluwataaichipa Jesús chaa iipünaa nutuma Maleiwa jee nikeraajeerü süpüshuaʼa tü nüküjatüjütkalia Jehová (2 Cor. 1:20). Soʼujee 1914 aluwataashi nia naʼakapünaa na nüʼünüükana (Sal. 110:1, 2). Soʼu palit kaʼi, Jesús namaa na 144.000 najaʼttireena na mojulaashiikana (Alat. Map. 6:2).

¹⁵ Soʼunnaa tü miit juya nuluwataainjatkalü oʼu Jesús, nüsoʼireʼereerü naaʼin na outushiikana jee nükaalinjeena na wayuu waneepiakana nümaa Maleiwa süpüla lotuinjatüin nakuwaʼipa shiʼipaʼaya. Kettaapa nuuʼulaküin naaʼin Satanás na wayuukana, naapeerü Jehová tü Mmakat namüin na wayuu lotokana akuwaʼipa otta kateerü noʼu süpüla kaʼikat süpüshuaʼa nutuma (Sal. 37:10, 11, 29). Otta «ajaʼttinneerü tü outaakat tü makalü aka saaʼin tü chiiruaajatkat waʼünüü» (1 Cor. 15:26, TNM). ¡Anataʼaleesüjaʼa maʼin tia!

16. ¿Jamüshii waneepieeka waya nümaa Jehová?

¹⁶ Wekirajaaitpa anain saashajaain maʼin achiki tü Bibliakat katüinjatüin woʼu süpüla kaʼikat süpüshuaʼa. Tia sükatsüinrüin waaʼin süpüla waneepiain waya nümaa Maleiwa soʼunnaa tü kasa alatakat maaʼutpünaa, tü keemakat maʼin. Aneere wakuwaʼipa noʼuluʼu Jehová, waneepiainjana waya nümaa otta nümaa Jesús, nnojotsü waaʼinrüin neʼe tia saaʼujee katüinjatüin woʼu, waaʼinrüinña shia süka alin naya wapüla süka süpüshuaʼa waaʼin (2 Cor. 5:14, 15). Süka alin naya wapüla, oʼuneeshii waya süchiirua nakuwaʼipa otta aashajaweeshii waya süchiki tü kasa anasü waʼatapajakat (Roma 10:13-15). Waʼyataale maʼin süchiirua nnojoluin kapülain waaʼin wakuwaʼipa neʼe wamüiwaʼa jee kamaneere waya, keeʼireejeerü maʼin naaʼin Jehová aleewain nia wamaa (Heb. 13:16).

17. ¿Kasa ayatüinjatka waaʼinrüin süpüla naapüin Jehová wamüin kataa oʼuu süpüla kaʼikat süpüshuaʼa? (Mateo 7:13, 14).

¹⁷ ¿Eejeenache waya naʼaka na wayuu katüinjanakana oʼu süpüla kaʼikat süpüshuaʼa? Eesü süpüla naapüin tia wamüin Jehová, ayatüinjanapejeʼe waya suluʼu tü wopu kaluʼukat kataa oʼuu (paashajeʼera Mateo 7:13, 14, TNM). ¿Jameetche wakuwaʼipa katapa woʼu süpüla kaʼikat süpüshuaʼa? Wekirajaajeerü anain tia sünain tü wane ekirajaayakat.