¿Sotusüche paaʼin tü pütchi ojuʼitakat suluʼu Aapiria Wayuu soʼujatka 2022? Pusouta shiʼipajee pütchikat tüü:

¿Kasa anasü weʼreetka wakatarüle kaʼi süpüla waashajaain nümaa Jehová, waapajüin nünüiki otta süpüla jülüjain waaʼin nukuwaʼipa?

Aneerü tü kasa waneekakat, atüjeena waya ekirajaa, katsüinjeerü wanoula otta kooʼomüinjeerü naalin wapüla Jehová (w22.01, süpana 29-31).

¿Jamüsü anaka weʼitaale waaʼin nünain Jehová otta nanain na wayuu nüneekakana süpüla nuʼunirüin wakuwaʼipa?

Choʼujaasü maaʼulu yaa weʼitaain waaʼin sünain lotuin süpüshuaʼa tü kasa naaʼinrakat Jehová. Waaʼinrüin tia weʼitaapa waaʼin sünain tü naluwataakalü anain waya na laülaashiikana. Müle wakuwaʼipa mayaa, yapeena waya süpüla jüüjüüin sümüin tü aluwataaneenakalü anain waya soʼunnaa tü müliaa miyoʼusükat jaʼitairü nnojoluin müin pansaakai saaʼin wamüin (w22.02, süpana 4-6).

¿Jamüsü nüküjaka chi aapieekai nümüin Zacarías neʼrüinjatüin tü plomadakat najapuluʼu Zorobabel chi aluwataaikai? (Zac. 4:8-10).

Tü nüküjeekalü achiki chi aapieekai sümüin nupueulose Jehová shia kettaainjatüin tü piichi aʼwaajüleekat otta nücheküinjatüin Jehová nuʼwaajünüin suluʼu jaʼitairü müin pounuayaakai saaʼin namüin (w22.03, süpana 16, otta 17).

¿Kasa waaʼinrajatka süpüla anain wanüiki suʼupala wayuu? (1 Tim. 4:12).

Kamanee waya jee kojuta wamüin na wayuu waküjakana amüin pütchi, weeʼiraja sümaa talatüin waaʼin sünain tü outkajawaakat sümaa wasoutawalin sünain, waküja tü shiimainkat waneepia, waküja pütchi analuʼut atütüleʼereetka saaʼin wayuu otta jalia waya suulia waashajaain pütchi mojuluʼut (w22.04, süpana 6-9).

¿Jamüsü kottoka nünain chi wanülüü aküjünakai achiki suluʼu Alateetkat Mapeena 13:1, 2 süpüshuaʼa tü akuwaʼipaakalüirua katatawaika nanain na pienchishiikana wanülüü (aluwataalii) aküjünaka achiki suluʼu Daniel kapiitulo 7?

Chi wanülüü aküjünakai achiki suluʼu Alateetkat Mapeena 13, niyaawase napüshuaʼa na aluwataakana saaʼu wayuu, nnojoishi neʼe niyaawasein waneeshia sülaüla mma (w22.05, süpana 9).

¿Kasa waaʼinrajatka weʼitaale waaʼin sünain lotuin süpüshuaʼa tü kasa naaʼinrakat Jehová?

Naaʼinrüle kasa mojusü wamüin wanee wayuu, wooʼulaainjatü suulia jashiee, nnojoluinjatü üttüin waaʼin nünain otta wapütüinjatü najapuluʼu Jehová tü aainjünakat wamüin. Najaʼttirüinjatü Jehová süpüshuaʼa tü kasa eekat sünainjee tü kaainjalaakat (w22.06, süpana 10 otta 11).

¿Kasa jülüjainjatka naaʼin wanee wawala nuʼuraajapa sünain tü outkajawaakat?

Jülüjainjatü naaʼin nnojolinjachin nuʼuraajüin süpüla nüchiaain na wawalayuukana jee shiale süpüla nüküjain wanee kasa namüin otta paliʼirüinjatü nünüiki shialeekajaʼa suʼttianainjee tü outkajawaakat (Mat. 6:7) (w22.07, süpana 24, 25).

¿Jamüshii nasoʼiraainjanaka aaʼin «na wayuu aaʼinrapuʼukana kasa mojusü» süpüla kasalajanain naainjala? (Juan 5:29).

Nnojoleena süsalain naya naainjala kataiwaʼaya noʼu paala. Tü naaʼinreetkat Jesús shia jülüjeerüin naaʼin naapaale amaa tü nüchekakat Maleiwa katapa noʼu nachikuaʼa (w22.09, süpana 18).

¿Kasa pütchi anaka maʼin nüküjaka chi wawalakai Joseph Rutherford sünain wanee outkajawaa miyoʼu soʼu 1922?

Anuu tü nüküjakat sünain wanee outkajawaa miyoʼu chaa Cedar Point (Ohio, Estados Unidos): «Aluwataaichipa chi aluwataainjachikai. Jiakana, jia aküjainjanakana nüchiki. Jüküja, jüküja, jüküja nüchiki chi aluwataaikai otta süchiki tü nuluwataainjatkalü aaʼu» (w22.10, süpana 3-5).

Saashin Isaías kapiitulo 30, ¿jeʼtsü tü apünüinsükat kasa naaʼinraka Jehová süpüla nüchecherüin waaʼin soʼunnaa müliaa?

Nüküjain Isaías suluʼu tia kapiitulokat naapajüin Jehová wanüiki woʼuraajapa nümüin sümaa nusoutuin wamüin, nuʼunirüin wakuwaʼipa otta naapeerüin kasa anasü wamüin maaʼulu otta mapeena (w22.11, süpana 9).

¿Jamüsü watüjaaka saaʼu shikeraajüin sümaiwa tü sümakat Salmo 37:10, 11, 29 otta shikeraajeerüin mapeena?

Sünainjee tü nüshajakat David ayaawatüna aaʼu jameerüin sukuwaʼipa wayuu soʼunnaa nuluwataain Salomón. Soʼu kaʼikat tia eepuʼusü jimataa aaʼin namüin na israelitakana otta joutsü emiraa suluʼupünaa mmakat Israel. Nikirajüin Jesús watta saalii wayuu süchiki tü Paʼaraiisükat sükajee tü wetsiikulokot 11 (Mat. 5:5; Luc. 23:43, TNM) (w22.12, süpana 8-10, 14).