1. ¿Kasa naaʼinrajatka wanee wayuu süpülapünaa nukumajüin nipia?

JÜLÜJATAA paaʼin wanee wayuu akumajeekai nipia. Nütüjaa aaʼu jamüinjatüin nutuma sukuwaʼipa tü nipiakat. ¿Kasache naaʼinrüinjatka palajana? ¿Oʼunamaatüinjaiche nia sünain ayaʼlajaa tü kasa choʼujaakat nümüin süpüla nukumajüin tü nipiainjatkat? ¿Oʼttamaatüinjaiche nia sünain akumajaa shia? Nnojo. Tü naaʼinrajatkat palajana shia nütüjaainjatüin saaʼu jeʼrainjatüin maʼin sujuʼitaka aaʼu tü miichikat nüpüleerua. Choʼujaasü nütüjaainjatüin saaʼu tia palajana süpüla niyaawatüin saaʼu eere nümaʼana tü nneerü nikeraajüinjatkalü aka tü nipiainjatkat.

2. ¿Kasa jülüjainjatka paaʼin süpülapünaa woutiisain pia saashin Lucas 14:27-30?

² ¿Woutiiseeshiche pia süka alin püpüla Jeʼwaa otta süka kojutuin pümüin tü naaʼinrakat püpüleerua? Müle pia, müsü pukuwaʼipa maʼaka naaʼin chi wayuu akumajeekai nipia. ¿Suluʼu jamüin? Jülüja paaʼin tü nümakat Jesuu suluʼu Lucas 14:27-30 (paashajeʼera). Nüküjain sünain tia pütchikat kasainjatüin waaʼinrüin woushikajaweere süchiirua nukuwaʼipa. Naashin Jesuu, watüjaainjatü saaʼu weʼreenain müliaa otta eeinjatüin tü kasa wooʼulaainjatkalü oulia süpüla woushikajaain nüchiirua (Luc. 9:23-26; 12:51-53). Müsüjeseʼe jülüjainjatüin paaʼin süpülapünaa woutiisain pia tü paaʼinrajatkat süpüla puushikajaain nüchiirua Kürisüto. Paaʼinrüle tia, ayateechia pia sünain aʼyatawaa nümüin Jeʼwaa süchikijee woutiisain pia.

3. ¿Kasa wekirajaainjatka anain sünain ekirajaayakat tüü?

³ ¿Woutiiseeshiche pia sümaa pütüjaain saaʼu piʼreechin müliaa jee puuʼulaainjachin suulia waneirua kasa? Jamüsüsaʼa shia. Wainmeerü tü kasa anasü piʼrakat maaʼulu jee tü piʼreetkat mapeena woutiisale pia. Sünain ekirajaayakat tüü, wekirajaajeerü anain waneirua kasa süchiki tü woutiisaakat. Pütüjaapa  saaʼu tia, piyaawateerü saaʼu müleka keraale pia süpüla woutiisaa.

4. (1) ¿Kasa naaʼinraka wanee wayuu naapüle naaʼin nümüin Maleiwa? (2) Naapapa naaʼin wanee wayuu nümüin Jeʼwaa, ¿jamüsü nnojoluinjatka naaʼinrüin tü nüchekakat neʼe nümüiwaʼa saashin Mateo 16:24?

⁴ ¿Kasa naaʼinraka wanee wayuu naapüle naaʼin nümüin Maleiwa? Oʼuraajüshi nia nümüin Jeʼwaa suluʼujee naaʼin otta nüküjain nümüin niʼyataainjachin waneepia nümüin. Naaʼinrüin tia süpülapünaa woutiisain nia. Naapapa naaʼin nümüin Jeʼwaa, nnojotsü naaʼinrüin tü nüchekakat neʼe nümüiwaʼa (paashajeʼera Mateo 16:24). Jaʼitaichi katüin oʼu jee outuin nia, naapüitpa nukuwaʼipa nümüin Jeʼwaa (Roma 14:8, TNM). Naapapa naaʼin nümüin Jeʼwaa nüküjain nümüin shiainjatüin naaʼinmaain tü niʼyataainkat nümüin suulialeʼeya tü kasa anakat saaʼin nümüin. Nüpansaajüin nünüiki nümüin, nnojotpejeʼe apüleeruaanüin naaʼin nutuma Jeʼwaa süpüla naaʼinrüinjatüin tia. Nikeraajüinjatü tü nümakat nümüin (Sal. 116:12, 14).

5. ¿Kasa naataka aluʼu tü aapaakalü aaʼin nümüin Maleiwa suulia tü woutiisaakat?

⁵ ¿Kasa naataka aluʼu tü aapaakalü aaʼin nümüin Maleiwa suulia tü woutiisaakat? Wanaa sümaa paapüin paaʼin nümüin Jeʼwaa, nnojotsü jaralüin atüjaain saaʼu, piaʼala neʼe atüjaaka saaʼu nümaa Jeʼwaa. Akaajasaʼa woutiisale pia, wainma na wayuu eʼrakana pia süka saainjünawalin tia sünain tü outkajawaakat miyoʼu. Woutiisapa pia, shiyaawateerü aaʼu wayuu paapüichipain paaʼin nümüin Jeʼwaa. * Nayaawateerü aaʼu alin maʼin püpüla Jeʼwaa süka süpüshuaʼa paaʼin, süka tü jülüjakat paaʼin, süka tü kasa paaʼinrakat otta püneeküin piʼyataainjachin nümüin waneepia (Mar. 12:30).

6, 7. ¿Jamüshi woutiisainjachika pia saashin 1 Pedro 3:18-22?

⁶ ¿Woutiisainjaiche pia? Jülüja paaʼin tü sümakat 1 Pedro 3:18-22, TNM (paashajeʼera). Shiʼrapa wayuu tü anuwa nukumajakat Noé shiyaawata aaʼulu kanoulain nia nünain Maleiwa. Mataajaʼa neʼe sukuwaʼipa woutiisapa pia, shiyaawatüin wayuu paapüichipain paaʼin nümüin Maleiwa. ¿Woutiisainjaiche pia? Aa, choʼujaasü paaʼinrüin tia. Naashin Pedro shia tü paaʼinrajatkat palajana süpüla puʼttaainjachin. Eeshijaʼa puʼttaajeechire woutiisale pia, punoujale sünain naapajiraain nikii Jesuu paaʼu, nüsoʼiraain aaʼin otta chain nia iipünaa nikialuʼujee Maleiwa.

⁷ Woutiisainjachi pia süpüla wuleinjatüin paaʼin sünain aʼyatawaa nümüin Maleiwa. Aleeweechi pia nümaa Maleiwa paapüle paaʼin nümüin otta woutiisale pia. Nülatirüin Maleiwa sooʼopünaa naaʼin tü kasa mojusü paaʼinrakat süka piyaawajaain suulia paainjala otta süka punoujain sünain naapajiraain nikii Jesuu paaʼu. Müsüjeseʼe eein süpüla wulein paaʼin sünain aʼyatawaa nümüin Maleiwa.

8. ¿Kasa woutiisainjachika aaʼujee pia?

⁸ ¿Kasa woutiisainjachika aaʼujee pia? Süka pikirajaain maʼin sünain tü Wiwüliakat, wainma tü kasa pütüjakat nüchiki Jeʼwaa maʼaka saaʼin jamüin maʼin nukuwaʼipa otta jamüin sukuwaʼipa nutuma tü kasa naaʼinrakat. Antüsü tia suluʼumüin paaʼin otta akooʼomüinraasü maʼin naalin püpüla sünainjee tia. Müshijeseʼe woutiisainjachin pia saaʼujee alin püpüla Jeʼwaa.

9. ¿Jamaluʼulu tü nümakat Jesuu süchiki woutiisainjachin wanee wayuu saaʼu nünülia chi Nüshikai, saaʼu nünülia Niakai jee saaʼu nünülia chi naaʼinkai Maleiwa maʼaka süküjain Mateo 28:19, 20?

⁹ Woutiisashi piaʼaya sünainjee pütüjaain saaʼu tü sümakat tü Wiwüliakat otta punoujain sünain tia. Soto paaʼin tü nümakat Jesuu namüin na nikirajüinkana süchiki nekirajüinjatüin wayuu süpüla suushikajaain süchiirua nukuwaʼipa (paashajeʼera Mateo 28:19, 20).  Naashin Jesuu, woutiisainjana na wayuukana saaʼu nünülia chi Nüshikai, saaʼu nünülia Niakai jee saaʼu nünülia chi naaʼinkai Maleiwa. ¿Jamaluʼulu tia? Tü nüküjeekalü achiki Jesuu shia punoujainjachin sünain tü sümakat tü Wiwüliakat nüchiki Jeʼwaa, nüchiki Jesuu otta nüchiki chi naaʼinkai Maleiwa. Kaawainsü maʼin tia pütchikat otta eesü süpüla sütanalüin paaʼin (Heb. 4:12, TNM). Wekirajaa süchiki tia.

10, 11. ¿Kasa pikirajaaka anain jee punoujaka anain nüchiki chi Washikai Maleiwa?

¹⁰ ¿Sotusü paaʼin tü pikirajaakalü anain nüchiki chi Nüshikai Jesuu? Jeʼwaa nünülia, nia chi Miyoʼushikai saaʼu kasakat süpüshuaʼa otta niaʼala neʼe Maleiwakai nümüiwaʼa (Sal. 83:18; Is. 37:16). Nia Jeʼwaa kakumalaka waya otta nia oʼtteʼeraka waya (Sal. 3:8; 36:9). Nukumajüin Jeʼwaa sukuwaʼipa süpüla nuʼtteʼerüin waya suulia kaainjalaa jee suulia outaa. Jee müsia, katüinjatü woʼu nutuma süpüla kaʼikat süpüshuaʼa (Juan 17:3, TNM). Paapüle paaʼin nümüin Jeʼwaa jee woutiisale pia, sütüjaajeerü aaʼu wayuu pücheküin püküjalinjachin pütchi nüchiki Jeʼwaa (Is. 43:10-12). Puwalayuujeena na wayuu aʼwaajakana Jeʼwaa, na kojutukana amüin neʼnnaajünüin sükajee nünülia otta na aküjakana pütchi nüchiki sümüin wayuu (Sal. 86:12).

¹¹ Kojutusü maʼin wamüin tü watüjakat suluʼujee tü Wiwüliakat nüchiki chi Washikai Maleiwa. Punoujale sünain tü aküjünakat nüchiki, paapeerü paaʼin nümüin jee püchekeerü woutiisain pia.

12, 13. ¿Kasa pütüjaaka aaʼu jee punoujaka anain nüchiki Jesuu?

¹² ¿Jamüsü paaʼin wanaa sümaa pütüjaain saaʼu kojutuleein maʼin Jesuu nüchikumüin Jeʼwaa sümaa nuʼtteʼerüin waya otta naapajiraain nikii waaʼu? Kojutule pümüin tü naaʼinrakat jee kanourale pia nünain, nülaʼajaaweerü Jeʼwaa tü paainjalakat, aleeweechi pia nümaa otta kateerü poʼu süpüla kaʼikat süpüshuaʼa (Juan 3:16, TNM). Nia Jesuu chi Laülaashikai napüleerua na Sacerdootekana otta nükaalinjeein pia süpüla piʼrüinjachin tü kasa anasü eekat sünainjee naapajiraain nikii. Otta nükaalinjain pia süpüla aleewain pia nümaa Jeʼwaa (Heb. 4:15; 7:24, 25). Süka niain Jesuu aneekünüin nutuma Jeʼwaa süpüla Aluwatawaa, nukumajeerü sukuwaʼipa süpüla kojutuinjatüin nünülia Jeʼwaa sutuma wayuu. Najaʼttireerü tü kasa mojusükat otta eʼreena waya kasa anasü nutuma suluʼu tü Paʼaraiisükat (Mat. 6:9, 10, TNM; Alat. Map. 11:15). Nia Jesuu püshatüinjachikai akuwaʼipa (1 Ped. 2:21). Naaʼinrüin waneepia Jesuu tü nüchekakat Jeʼwaa nüpüleerua otta müinjatia shia putuma (Juan 4:34).

¹³ Aijeechi püpüla Jesuu, chi Nüchonkai Maleiwa, punoujale sünain tü sümakat tü Wiwüliakat nüchiki. Aire nia püpüla, paaʼinreerü tü nüchekakat Jeʼwaa püpüleerua maʼaka naaʼinrüin shia Jesuu. Müle shia putuma, püchekeerü achiki paapüin paaʼin nümüin Jeʼwaa jee woutiisain pia.

14, 15. ¿Kasa pütüjaaka aaʼu jee punoujaka anain nüchiki chi naaʼinkai Maleiwa?

¹⁴ ¿Jamüsü paaʼin wanaa sümaa pütüjaain saaʼu nnojolin wayuuin chi naaʼinkai Maleiwa jee shiain tü nütchinkat? Nuʼunirüin Jeʼwaa nakuwaʼipa na wayuu ashajakana tü Wiwüliakat nükajee chi naaʼinkai. Nükaalinjainjeseʼe waya nükajee chi naaʼinkai süpüla wayaawatüinjatüin saaʼu tü sümakat tü Wiwüliakat otta süpüla waaʼinrüin tü sümakat (Juan 14:26; 2 Ped. 1:20, 21). Nükatsüinrüin waaʼin Jeʼwaa nükajee chi naaʼinkai (2 Cor. 4:7). Nükaalinjain waya Jeʼwaa nükajee chi naaʼinkai süpüla waküjain tü pütchi anasükat, süpüla wachecherüin waaʼin suuʼulakünapa waaʼin, mojupa waaʼin otta süpüla wachecherüin waaʼin soʼunnaa tü kasa mojusü alatakat wamüin. Otta nükaalinjain waya Jeʼwaa nükajee chi naaʼinkai süpüla eeinjatüin wanain tü akuwaʼipa eekat  nutuma chi naaʼinkai (Gal. 5:22). Naapeechi Jeʼwaa chi naaʼinkai namüin na wayuu eʼitaakana naaʼin nünain Jeʼwaa otta na achuntakana chi naaʼinkai nümüin (Luc. 11:13).

¹⁵ Anasü waaʼin sutuma watüjaain saaʼu nükaalinjeenain waya Jeʼwaa nükajee chi naaʼinkai süpüla ayatüinya waya aʼyataain nümüin. Punoujale sünain tü sümakat tü Wiwüliakat nüchiki chi naaʼinkai Maleiwa, püchekeerü achiki paapüin paaʼin nümüin Jeʼwaa jee woutiisain pia.

16. ¿Kasa tü wekirajaaitpakalü anain sünain ekirajaayakat tüü?

¹⁶ Paapüinjatpa paaʼin nümüin Maleiwa jee woutiisainjachipa pia, soteesü paaʼin piʼreechin müliaa saaʼujee tia. Alanaʼaleepejeʼe tü kasa anasü eekat sünainjee woutiisain pia suulialeʼeya tü kasa puuʼulaakat süpüleerua. Oʼttaajeechi pia woutiisale pia otta wuleerü paaʼin. Woutiisainjachi pia süka alin püpüla Jeʼwaa. Punoujainjatü sünain tü sümakat tü Wiwüliakat nüchiki chi Washikai Maleiwa, nüchiki Jesuu otta nüchiki chi naaʼinkai Maleiwa. Sünainjee süpüshuaʼa tü pikirajaaitpakalü anain, ¿keraashiche pia süpüla woutiisaa?

17. ¿Kasa tü paaʼinrüinjatkat süpülapünaa woutiisain pia?

¹⁷ Keraale pia süpüla woutiisaa, wainma tü kasa paaʼinrakat süpüla aleewainjachin pia nümaa Jeʼwaa. * Wainma tü kasa pütüjakat nüchiki Jeʼwaa otta nüchiki Jesuu süka pikirajaain maʼin sünain tü Wiwüliakat, suluʼujee tia punoujain nanain (Heb. 11:6). Piʼitaain paaʼin sünain nikeraajeerüin Jeʼwaa tü nümakat suluʼu tü Wiwüliakat otta punouja anainrü puʼtteʼenneechin suulia paainjala jee outaa sükajee naapajiraain nikii Jesuu paaʼu. Ayaawajaaichipa pia suulia paainjala otta mojusü maʼin paaʼin saalinjee paaʼinrüin tia, müshijeseʼe puchuntüin nümüin Jeʼwaa motuinjatüin naaʼin tü paainjalakat. Puuʼulaaitpa oulia tü kasa mojusü paaʼinrapuʼukat otta shiaitpa paaʼinraka tü kasa anakat noʼuluʼu Maleiwa (Aluw. 3:19). Püküjeeitpa namüin na waneinnua süchiki tü punoujakalü anain. Keraaichipa pia süpüla püküjain pütchi sümaa nnojolin woutiisain pia otta ojuʼitawaishi pia sünain aküjaa pütchi namaa na wawalayuukana (Mat. 24:14). Talatüsü maʼin naaʼin Jeʼwaa pümaa süka paaʼinrüin süpüshuaʼa tia (Prov. 27:11).

18. ¿Kasa maa paaʼinrajatka süpülapünaa woutiisain pia?

¹⁸ Eesü waneirua kasa paaʼinrajatka süpülapünaa woutiisain pia. Maʼaka wekirajaainnapain, paapüinjatü paaʼin nümüin Maleiwa. Paaʼinrüin tia wanaa sümaa puʼuraajüin nümüin pümüiwaʼa otta püküjain nümüin suluʼujee paaʼin paaʼinrüinjatüin tü nüchekakat püpüleerua (1 Ped. 4:2). Süchikijee paaʼinrüin tia, püma nümüin chi wawala akumajakai napüleerua na laülaashiikana tü aainjünajatkat suluʼu tü outkajaaleekat woutiiseein pia. Nüküjeerü tia namüin waneinnua laülaashii süpüla naashajaain  pümaa. Nnojo mmoluwaain paaʼin sutuma naashajaainjanain pümaa, soto paaʼin alin pia napüla jee neʼraajüin pia. Nasakireechi pia sünain waneirua pütchi pütüjaaitpaka aaʼu suluʼujee tü Wiwüliakat. Nasakireechi pia sünain tia süpüla natüjaain saaʼu piyaawatüle saaʼu tia pütchikat otta piyaawatüle saaʼu nnojoluin ashaitaain paapüin paaʼin nümüin Maleiwa jee woutiisainjachin pia. Keraale pia neʼrüin süpüla woutiisaa, naküjeerü pümüin eein süpüla woutiisain pia sünain tü outkajawaa miyoʼu eeinjateetkat.

19, 20. (1) ¿Kasa paaʼinrajatka süchikijee woutiisain pia? (2) ¿Kasa paaʼinrajatka süpüla pikeraajüin tü pümakat nümüin Jeʼwaa?

¹⁹ ¿Kasa paaʼinrüinjatka süchikijee woutiisain pia? * Paapüle paaʼin nümüin Jeʼwaa püpansaajüin pünüiki nümüin otta nücheka achikit pikeraajüin tü pümakat. Süchikijee woutiisain pia, pikeraajüinjatü tü pümakat nümüin Jeʼwaa. ¿Kasa paaʼinrajatka süpüla pikeraajüin tia?

²⁰ Aleewa pia namaa na wawalayuukana. Woutiisapa pia, paaʼinweechi pia namaa na aʼyataashiikana nümüin Jeʼwaa (1 Ped. 2:17). Püpüsheena na wawalayuukana. Aleeweechi maʼin pia namaa waneepiale pia sünain tü outkajawaakat. Paashajeʼerawai tü Wiwüliakat jee püsakireʼera suluʼu paaʼin sünain tü sümakat (Sal. 1:1, 2). Anteerü suluʼumüin paaʼin tü sümakat tü Wiwüliakat püsakireʼerüle paaʼin sünain tü paashajeʼerawaikat. Puchunta waneepia nümüin Maleiwa (Mat. 26:41). Arütkaajeechi maʼin pia nünainmüin Jeʼwaa püküjale nümüin tü suluʼukat paaʼin. Paaʼinmaa waneepia tü piʼyataainkat nümüin Maleiwa (Mat. 6:33, TNM). Paaʼinrüin tia wanaa sümaa püküjain maʼin pütchi. Waneepiale pia sünain, katsüinjeerü punoula otta pükaalinjeerü wayuu süpüla suuntuin katüinjatüin soʼu süpüla kaʼikat süpüshuaʼa (1 Tim. 4:16).

21. ¿Kasa piʼreetka woutiisale pia?

²¹ Paapüle paaʼin nümüin Jeʼwaa jee woutiisale pia, alanaʼaleesia maʼin tia suulialeʼeya wanee kasa eekai püneeküin. Mayaainjeʼe piʼreechin müliaa jee puuʼulaainjachin suulia waneirua kasa, nnojoleechi pia amülain neʼe woutiisain. Motsomüin neʼe sümaa tü müliaa piʼrakat maaʼulu (2 Cor. 4:17). Woutiisale pia talateerü maʼin paaʼin otta kateerü poʼu waneepia (1 Tim. 6:19, TNM). Müsüjeseʼe jülüjainjatüin paaʼin tü paaʼinrajatkat, puchunta kaalinwaa nümüin Jeʼwaa otta püsakira paaʼin sünain tüü: «¿Keraashiche taya süpüla woutiisaa?».