1, 2. Sünainjee tü sümakat Aluwataaushikana 8:27-31, 35, 36, 38, ¿kasa woutiisaka aaʼujee chi wayuu chejeʼewaikai Etiopía?

¿WOUTIISEESHI pia jee oushikajaweeshi pia süchiirua nukuwaʼipa Kürisüto? Watta naalii na wayuu aaʼinrakana tia süka alin Jeʼwaa napüla otta kojutuin namüin tü naaʼinrakat napüleerua. Jülüjataa paaʼin tü naaʼinrakat wanee wayuu chejeʼewai Etiopía. Wayuu kajapuluʼushi wanee miyoʼu aʼyatawaa, süpüʼüyashi suwashirüin Candace.

² Woutiisamaatüshi chi wayuu chejeʼewaikai Etiopía niyaawatapa saaʼu woutiisainjachin nia saashin tü Ashajuushikat (paashajeʼera Aluwataaushikana 8:27-31, 35, 36, 38). ¿Jamüsüche naaʼinraka tia? Shia süka kojutuin maʼin nümüin tü Nünüikikat Maleiwa. Wanaa sümaa suluʼujachin nia tü kareeta neʼejenasükat, naashajeʼerüin süpüshi tü ashajuushikat nutuma Isaías. Shiasaʼa süchikijee nüküjain Felipe nümüin tü naaʼinrakat Jesuu nüpüleerua, talatüsü maʼin naaʼin sutuma tia. Wayaawata aaʼulu alin Jeʼwaa nüpüla chia wayuukai süka chejeejachin nia Jerusalénjee sünain aʼwaajaa Jeʼwaa. Ooʼulaashijaʼa nia suulia tü nunoujapuʼukalü anain otta nuʼwaajüichipa Maleiwa wanaa namaa na judíokana. Süka alin Jeʼwaa nüpüla nüneeküin woutiisain nia jee nuushikajaain süchiirua nukuwaʼipa Kürisüto (Mat. 28:19).

3. ¿Kasa ataʼülaka nukuwaʼipa wanee wayuu suulia woutiisaa? (Paashajeʼera tü pütchikat « ¿Jarat tü mma makalü aka saaʼin pukuwaʼipa?»).

³ Woutiiseechi pia aire püpüla Jeʼwaa. Eepejeʼe waneirua kasa eeka süpüla sütaʼülüin pukuwaʼipa suulia woutiisaa. Jamüsüjaʼa sülanaʼaleere naalin na püpüshikana püpüla jee nayale na paʼaleewain manoujainkana, wainmajeerü paaʼin saaʼu woutiisainjachin pia. Otta eesüjaʼa jülüjale paaʼin eein süpüla maalin pia napüla paaʼinrüle tia (Mat. 10:37). Eesüjaʼa kapüleere pümüin  puuʼulaain suulia aaʼinraa waneirua kasa nülerajaka Maleiwa (Sal. 97:10). Eesüjaʼa kamalainre pümüin waneirua miʼiraa naaʼinraka na suluʼukana tü iküleesia ekirajakat sünain alawaa, talatapuʼusü paaʼin sutuma, müsüjeseʼe kapüleein pümüin puuʼulaain suulia tü miʼiraa niyoutakat Jeʼwaa (1 Cor. 10:20, 21, TNM). Tü püsakireekalü anain paaʼin shia kasain alanaʼaleein ojutu pümüin.

4. ¿Kasa woutiisaka aaʼujee wanee wayuu?

⁴ Eesüjaʼa eere tü kasa kojutukat maʼin pümüin, nnojotpejeʼe mojuin tia. Jamüsüjaʼa süpülapünaa pikirajaain sünain tü Wiwüliakat namaa na Aküjaliikana pütchi, eesüjaʼa kojutatüjürüle pümüin tü sümakat tü Wiwüliakat. Eeshijaʼa aitüjüire püpüla Jesuu otta anale paaʼin namaa na wawalayuukana, jama piʼraajüinnapain naya. Nnojotpejeʼe paapeerüin paaʼin nümüin Jeʼwaa jee woutiisain pia sünainjee neʼe tia. Woutiiseechi pia aire püpüla Maleiwa. Sülanaʼaleepa naalin Jeʼwaa püpüla nnojoleerü eein wanee kasa ataʼüleetka pukuwaʼipa suulia piʼyataain nümüin. Aire Jeʼwaa wapüla woutiiseena waya otta ayateenaʼaya waya oonooin sümaa tü nümakat.

5. ¿Jarat tü pütchi wekirajaainjatkalü anain?

⁵ Naashin Jesuu, alinjachi Jeʼwaa wapüla süka süpüshuaʼa waaʼin, süka tü jülüjakat waaʼin otta süka tü kasa waaʼinrakat (Mar. 12:30, TNM). ¿Kasa waaʼinrajatka süpüla alinjachin Jeʼwaa wapüla jee kojutuinjachin nia wamüin? Sotuinjatü waaʼin tü kasa anasü naaʼinrakat wapüleerua (1 Juan 4:19). ¿Kaseetka waaʼinrüin aipa Jeʼwaa wapüla? * Wekirajaa süchiki tia.

6. ¿Kasa waaʼinrajatka saashin Roma 1:20 süpüla alinjachin Jeʼwaa wapüla?

⁶ Jülüja paaʼin tü kasa nukumajalakat Jeʼwaa süpüla kooʼomüin naalin püpüla (paashajeʼera Roma 1:20; Alat. Map. 4:11). Jülüja paaʼin kekiin maʼin Jeʼwaa sünainjee anain maʼin nutuma sukumajia tü wunuʼuliakalüirua, tü mürütkalüirua jee tü wüchiikalüirua. Pikirajaa sooʼomüin süchiki jamüin anaka maʼin nutuma Jeʼwaa wakumajia (Sal. 139:14). Soteesü paaʼin pülashaatain maʼin Jeʼwaa sünainjee nukumajüin chi Kaʼikai suluʼu jaʼishaatain maʼin nia. Nnojotpejeʼe moteein waaʼin eein waneirua jolotsü maʼaka naaʼin chi Kaʼikai (Is. 40:26). * Jülüjale paaʼin tia jee piyaawatüle saaʼu pülain maʼin Jeʼwaa otta kekiin maʼin nia, kojuteechi nia pümüin. Choʼujaapejeʼe piʼraajüin maʼin nukuwaʼipa süpüla kooʼomüin naalin püpüla otta süpüla aleewain maʼin pia nümaa.

7. ¿Kasa wayaawatüinjatka aaʼu süpüla alinjachin Jeʼwaa wapüla?

⁷ Piyaawatüinjatü saaʼu alin pia nüpüla Jeʼwaa. ¿Kapüleesüche pümüin ayaawataa saaʼu kachipünaain pia naaʼin chi Kakumalakai kasakat süpüshuaʼa? Kapüleere shia pümüin, soteesü paaʼin nnojoluin wattain Maleiwa woulia (Aluw. 17:26-28). Nüküjain David nümüin Salomón «niʼraajüin [Jeʼwaa] tü suluʼukat saaʼin wayuu süpüshuaʼa». Nüküjain Jeʼwaa nürütkaajeechin pünainmüin püchajaale nüchiki (1 Crón. 28:9). Pikirajaale sünain tü Wiwüliakat, shia süka nürütkeʼerüin pia Jeʼwaa nünainmüin (Jeremías 31:3). Kojutule maʼin pümüin tü naaʼinrakat Jeʼwaa püpüleerua akooʼomüinraajeerü naalin püpüla.

8. ¿Kasa paaʼinrajatka kojutule pümüin alin pia nüpüla Jeʼwaa?

⁸ Wanee kasa paaʼinrajatka süka kojutuin pümüin alin pia nüpüla Jeʼwaa, shia puchuntuin kaalinwaa nümüin. Akooʼomüinraajeerü naalin Jeʼwaa püpüla püküjale nümüin tü shapaakalü atuma paaʼin jee kojutule pümüin  tü kasa naaʼinrakat püpüleerua. Aleeweechi maʼin pia nümaa Jeʼwaa piʼrüle nusoutuin shiʼipajee pünüiki (Sal. 116:1). Suluʼujee tia, piyaawateerü aaʼu kachipünaain naaʼin Jeʼwaa tü alatakat pümüin. Süpüla pürütkaainjachin maʼin nünainmüin Jeʼwaa piyaawatüinjatü saaʼu kasain nücheküin, kasain niyoutuin, jamüin naaʼinraka wanee kasa otta paaʼinrüinjatüin tü nüchekakat püpüleerua. Puunteerü tia pikirajaale sünain tü Wiwüliakat.

9. ¿Kasa paaʼinrajatka kojutule pümüin tü sümakat tü Wiwüliakat?

⁹ Kojuta pümüin tü sümakat tü Wiwüliakat. Shiaʼala neʼe tü Wiwüliakat aküjaka tü shiimainkat nüchiki Jeʼwaa jee süchiki tü naaʼinrüinjatkat püpüleerua. ¿Kasakaʼa paaʼinrajatüin kojutule shia pümüin? Paashajeʼerüinjatü soʼukaiwai, yapainjatü putuma tü pikirajaainjatkalü anain süpülapünaa nüntüin chi ekirajüinjachikai pia otta paaʼinrüinjatü tü sümakat tü Wiwüliakat (Sal. 119:97, 99; Juan 17:17). ¿Joujawaisü paashajeʼerüin tü Wiwüliakat?

10. ¿Kasa maa anaka maʼin suluʼujee tü Wiwüliakat?

¹⁰ Wane kasa anaka maʼin suluʼujee tü Wiwüliakat, shia süka süshajünüin nanüiki waneirua wayuu eʼrakana Jesuu. Shiaʼala neʼe tü Wiwüliakat aküjünaka aluʼu tü naaʼinrakat Jesuu püpüleerua. Aleeweejeerü paaʼin nümaa Jesuu pütüjaapa saaʼu tü kasa naaʼinrakat jee tü nümakat.

11. ¿Kasa paaʼinrüinjatka süpüla sükooʼomüinraain naalin Jeʼwaa püpüla?

¹¹ Ai püpüla Jesuu süpüla sükooʼomüinraain naalin Jeʼwaa püpüla. Meerü tia süka nüshatüin Jesuu nukuwaʼipa chi Nüshikai (Juan 14:9). Piʼraajüle maʼin nukuwaʼipa Jesuu piyaawateerü aaʼu jamüin maʼin nukuwaʼipa Jeʼwaa otta aijeechi maʼin nia püpüla. Jülüja paaʼin tü naaʼinrakat Jesuu soʼu sümülialaain naaʼin naalin na wayuu mojutukana sümüin wayuu süka maʼletsein naya jee ayuulin naya. Soto paaʼin tü nümakat pümüin shiiʼiree aneein pukuwaʼipa jee jülüja paaʼin tü kasa anasü piʼrakat sünainjee paaʼinrüin tü nümakat (Mat. 5:1-11; 7:24-27).

12. ¿Kaseerü paaʼinraka piyaawatüle saaʼu naapajiraain nikii Jesuu paaʼu?

¹² Akooʼomüinraajeerü naalin Jesuu püpüla, sotule paaʼin naapajiraain nikii süpüla sülaʼajaanüin paainjala puulia (Mat. 20:28). Piyaawatüle saaʼu naapajiraain nikii Jesuu paaʼu,  ayaawajaweechi pia suulia paainjala jee ouyanteechi pia nünainmüin Jeʼwaa süpüla nülaʼajaain paainjala puulia (Aluw. 3:19, 20; 1 Juan 1:9). Sükooʼomüinraale maʼin naalin Jesuu otta Jeʼwaa püpüla, püchekeerü achiki namaain pia na wayuu aikana apüla naya.

13. ¿Jaralii na wayuu aijeenakana apüla pia?

¹³ Ai püpüla na wayuu aikana apüla Jeʼwaa. Eesüjaʼa nnojorüle nayaawatüin saaʼu na püpüshi manoujainkana jee na paʼaleewainpuʼukana jamüin piʼyataweeka nümüin Jeʼwaa otta nayoutule tia püpüleerua. Mayaainjeʼe sülatüin tia pümüin, aijeechi pia napüla na wayuu aikana apüla Jeʼwaa. Namaale pia na wawalayuukana, piʼreerü paalin napüla jee nakaalinjeechi pia (Mar. 10:29, 30; Heb. 10:24, 25). Eeshiijaʼa nanoujeenale mapa na püpüshikana otta noonooin sümaa tü nümakat Jeʼwaa (1 Ped. 2:12).

14. Sünainjee tü sümakat 1 Juan 5:3, ¿kasa piyaawataka aaʼu sünainjee tü nuluwataakalü anain Jeʼwaa?

¹⁴ Kojuta pümüin tü nuluwataakalü anain Jeʼwaa jee paaʼinra shia. Süpülapünaa pikirajaain nüchiki Jeʼwaa, eesüjaʼa püneeküle pümüiwaʼa tü anakat jee tü mojukat saaʼin pümüin. Piyaawatapejeʼe saaʼu anain aaʼinraa tü nuluwataakalü anain Jeʼwaa (Sal. 1:1-3; paashajeʼera 1 Juan 5:3). Jülüja paaʼin tü nümakat Jeʼwaa namüin na tooloyuu kaʼwayuusekana, namüin na jieyuu kaʼwayuusekana, namüin na wayuu kachonshiikana jee namüin nachonnii (Éf. 5:22–6:4). ¿Anasüche pukuwaʼipa sümaa püpüshi sünainjee paaʼinrüin tü nümakat Jeʼwaa? ¿Anasüche pukuwaʼipa maaʼulu sutuma paʼaleewajaain namaa na wayuu anakana akuwaʼipa? ¿Talatüsüche paaʼin maaʼulu? (Prov. 13:20; 1 Cor. 15:33, TNM). «Aa», eeshijaʼa pümüle.

15. ¿Kasa paaʼinrajatka nnojorüle pütüjaain saaʼu jamüinjatüin sukuwaʼipa putuma wanee pütchi aküjünaka suluʼu tü Wiwüliakat?

¹⁵ Eesü nnojorüle pütüjaain saaʼu jamüinjatüin sukuwaʼipa putuma wanee pütchi aküjünaka suluʼu tü Wiwüliakat. Naapapejeʼe Jeʼwaa pümüin karaloʼutairua sükajee tü nupueulosekat. Karaloʼutaka tia, suluʼujeejatü tü Wiwüliakat otta sükaalinjeechi pia süpüla piyaawatüin saaʼu tü kasa anasükat jee tü kasa mojusükat (Heb. 5:13, 14). Paashajeʼerüle tia karaloʼutakalüirua piyaawateerü aaʼu anain maʼin aaʼinraa tü nuluwataakalü anain Jeʼwaa otta keeʼireejeerü paaʼin suluʼuin pia nupueulose.

16. ¿Kasa naaʼinraka Jeʼwaa süpüla nukumajüin sukuwaʼipa tü nupueulosekat?

¹⁶ Pikirajaa süchiki nupueulose Jeʼwaa jee piʼyataajiraa namaa na wawalayuukana. Nukumajüin Jeʼwaa sukuwaʼipa tü nupueulosekat. Nüneeküin Jesuu süpüla niainjachin nekiipüʼüin na anoujashiikana suluʼupünaa tü outkajaaleekalüirua (Éf. 1:22; 5:23, 24). Nüneeküin Jesuu napüshi na wayuu chainjanakana iipünaamüin süpüla noʼunirüin sukuwaʼipa nupueulose Jeʼwaa otta süpüla naaʼinrüin tü nüchekakat Jesuu. «Chi achepchiee oonookai otta kekiikai maʼin», münüshii naya nutuma Jesuu. Anoujashiikana naainnua nachajaain sukuwaʼipa süpüla nakaalinjain na nawalayuukana süpüla narütkaainjanain nünainmüin Maleiwa otta süpüla nnojoluinjatüin sumojujaain nakuwaʼipa nümaa (Mat. 24:45-47). Wane kasa naaʼinraka chi achepchieekai, shia nüchajaain sukuwaʼipa süpüla naneekünüin wawalayuu laülaashiinjanakana suluʼu tü outkajaaleekat (Is. 32:1, 2; Heb. 13:17; 1 Ped. 5:2, 3). Aʼyataashii maʼin naya wawalayuukana süpüla nakaalinjain waya, namülialüin waaʼin otta nakaalinjain waya süpüla warütkaain maʼin nünainmüin Jeʼwaa. Alanaʼaleepejeʼe tü naaʼinrakat süka nakaalinjain waya süpüla watüjainjanain ekirajaa wayuu nüchiki Jeʼwaa (Éf. 4:11-13).

17. ¿Jamüshii waküjaka pütchi nüchiki Jeʼwaa saashin Roma 10:10, 13, 14?

¹⁷ Pükaalinja na waneinnua süpüla alinjachin  Jeʼwaa napüla. Nüküjain Jesuu namüin na nikirajüinkana, nekirajüinjatüin wayuu nüchiki Jeʼwaa (Mat. 28:19, 20). Eesüjaʼa paaʼinrüle tia mojusheeka. Shiasaʼa kooʼomüinre naalin Jeʼwaa püpüla, meerü pünüiki maʼaka naaʼin chi aluwataaushikai Pedro otta Juan. Anuu tü namakat: «Nnojoliijaʼa süpüla wooʼulaainjanain suulia aashajawaa süchikü tü kasa weʼrakat otta tü waapakat» (Aluw. 4:20). Talateerü maʼin waaʼin wakaalinjale wayuu süpüla alinjachin Jeʼwaa süpüla. Talatakajasaʼa naaʼin Felipe süka nükaalinjain chi wayuu chejeʼewaikai Etiopía süpüla niyaawatüinjatüin saaʼu tü sümakat tü Ashajuushikat otta woutiisain nia. Püshatüle nukuwaʼipa Felipe otta püküjale pütchi maʼaka nuluwataain shia Jesuu, shiimainjaʼa piʼyataweein nümüin Jeʼwaa (paashajeʼera Roma 10:10, 13, 14, TNM). Eesüjaʼa meerüle pünüiki maʼaka naaʼin chi wayuu chejeʼewaikai Etiopía: «¿[Eesüche] wane kasa nnojotka woutiiseein aaʼujee taya?» (Aluw. 8:36).

18. ¿Kasa wekirajaajeetka anain sünain tü wane ekirajaayakat?

¹⁸ Alanaʼaleesia maʼin sujutu tü paaʼinrakat püneeküle woutiisainjachin pia. Nnojotpejeʼe ashaitaain tia. ¿Kasa pütüjaainjatka aaʼu süpülapünaa woutiisain pia? ¿Kasa paaʼinrajatka süpülapünaa jee süchikijee woutiisain pia? Wekirajaajeerü anain tia sünain tü wane ekirajaayakat.