1, 2. (1) ¿Jamüsü katsüinjatka wanoula saashin Éfeso 6:16? (2) ¿Kasa wekirajaainjatka anain?

¿MÜSÜCHE wanoula maʼaka saaʼin tü taapüla sülüʼüjapuʼukat surulaat sümaiwa sünain atkawaa? (Paashajeʼera Éfeso 6:16). Jamüsaʼa shia. Miyoʼu tü taapüla najapuluʼukat wanee surulaat otta nnojotpuʼusü alatüin najatüin na nüʼünüükana nünainmüin. Akaataajaʼa katsüinre wanoula, nnojoleena waya aʼluwajiraain wakuwaʼipa sümaa wayuu nnojotka waʼwayuusein, nnojoleena mojulaain waya jee nnojoleerü waaʼinrüin kasa eekai mojushiin noʼuluʼu Maleiwa.

² Süka sülüʼülüin sükalia süpüla sajaʼttüin kasakat süpüshuaʼa, ayateerü ooʼulakünüin waaʼin sünain anoujaa (2 Tim. 3:1). ¿Jamüsü süpüla watüjaain saaʼu katsüinre wanoula? ¿Kasa waaʼinrajatka süpüla ayatüin katsüin wanoula? Wekirajaa sünain tia.

3. ¿Kasa naaʼinrapuʼuka na surulaatkana süpüla anainjatüin maʼin tü taapüla natkaayakat? ¿Jamüsü naaʼinrapuʼuka tia?

³ Eʼitaanapuʼusü paaʼata sünain tü taapüla sütkaayakat surulaat sümaiwa. Nashulejapuʼuin na surulaatkana grasa sünain tia taapülakat suulia sututuuin tü paaʼatakat jee suulia kachaʼain tü kachueera sünainkat. Niʼrüle wanee surulaat sumojujaain tü taapüla nütkaayakat, nunoutamaatüin shia süpüla yapainjachin nia süpüla atkawaa. ¿Jamüsü sünainpünaaka tia tü wanoulakat?

4. (1) ¿Jamüsü jülüjainjatka waaʼin waneepia tü wanoulakat? (2) ¿Jamüsü süpüla watüjaain saaʼu anale wanoula?

⁴ Jülüjainjatü waaʼin waneepia tü wanoulakat jee wanouteʼeramaatüinjatü shia süpüla katsüinjatüin shia. Nnojotsü jaralüinjatüin aaʼinrüin tia wooʼopünaa. Icheere wanoula maʼaka ichein wanee taapüla sütkaayaka surulaat, yapeena waya süpüla eejirawaa sümaa tü yolujaakalüirua (Éf. 6:10-12). ¿Jamüsü süpüla pütüjaain saaʼu yapale pia  süpüla eejirawaa sümaa tü ooʼulakünakalü aka paaʼin? Achuntajachi pia kaalinwaa nümüin Jeʼwaa. Jee müsia, pikirajaainjatü anain tü Wiwüliakat süpüla piyaawatüinjatüin saaʼu anale punoula noʼuluʼu Jeʼwaa (Heb. 4:12). Anuu sünüiki tü Wiwüliakat: «Piʼitaa maʼin paaʼin nünain Jeʼwaa, nnojo piʼitaain paaʼin sünain tü pütüjaakalü aaʼu» (Prov. 3:5, 6). ¿Eesia paaʼinrüin tü sümakat pütchikat tüü? Piʼrüichire müliaa saaʼu manneetsein pia, ¿eesia sotuin paaʼin tü nümakat Jeʼwaa suluʼu Hebreokana 13:5? Müsü sünüiki tia wetsiikulokot: «Nnojoleechi taya oʼunüin jümaʼanajee. Nnojoleena tapütüin jia jümüiwa». ¿Jülüjasüche paaʼin sutuma pütchikat tüü nükaalinjeechin pia Jeʼwaa? Müle shia, shiimainjaʼa maʼin katsüin punoula.

5. ¿Kasa eeka süpüla piyaawatüin sünainjee punoula?

⁵ Eesüjaʼa poneerüle paaʼin pütüjaapa saaʼu jamüin maʼin punoula. Eesüjaʼa piyaawateerüle saaʼu eein tü amatsüinjaakalü atuma punoula maʼaka saaʼin shapaale maʼin paaʼin waneepia, shiale sünainjee tü alawaa aküjünakat nüchiki Jeʼwaa jee mojule maʼin paaʼin. Sülatüle tia pümüin, ¿kasa eeka süpüla paaʼinrüin suulia sümatsüinjaʼaleein punoula?

6. ¿Kasa shapaʼawaika atuma waaʼin?

⁶ Nnojotsiaajeʼe mojuin shapaale waaʼin saaʼu waneirua kasa. Eesü shapaale waaʼin süka keeʼireein waaʼin talatüin naaʼin Jeʼwaa otta Jesuu wamaa (1 Cor. 7:32). Jamüshiijaʼa kaainjarale waya, shapaasü waaʼin süka aneein wakuwaʼipa wachikuaʼa nümaa Jeʼwaa (Sal. 38:18). Eesü shapaale waaʼin süka keeʼireein waaʼin talatüin saaʼin waʼwayuuse watuma; shapaʼawaisü waaʼin süka weʼreein anain sukuwaʼipa otta nakuwaʼipa na wachonniikana jee shiale shapaain atuma waaʼin anainjanain na wawalayuukana weʼrüin (1 Cor. 7:33; 2 Cor. 11:28).

7. (1) ¿Jamüsü sümatsüinjaajeetka wanoula shapaale waaʼin waneepia? (2) ¿Jamüshii nnojoluinjanaka waya eimmolojooin seema wayuu saashin Proverbios 29:25?

⁷ Eesü süpüla sümatsüinjaain wanoula shapaale waaʼin waneepia. Jamüsüjaʼa jülüjale waaʼin waneepia choʼujaain nneerü wamüin süpüla wayaʼlajüin washeʼin otta weküin, shapaajeerü maʼin waaʼin (Mat. 6:31, 32). Shiasaʼa suluʼujee tia, eesü süpüla kachiiruain neʼe waaʼin tü nneetkat otta kamaʼanaa wainma kasa. Amatsüinjaajeerü wanoula jee amojujaajeerü wakuwaʼipa nümaa Jeʼwaa sutuma tia (Mar. 4:19; 1 Tim. 6:10). Wane kasa eeka süpüla shapaain maʼin atuma waaʼin shia aneein sünüiki wayuu wachiki. Kachiiruale waaʼin tia, nnojoleerü waaʼinmaain talatüinjachin Jeʼwaa wamaa. Mmoleena neʼe waya seema shimeeʼerainpalaa wayuu otta seema müliain waya atumawaa saaʼujee wanoula. Süpüla nnojoluinjatüin müin wakuwaʼipa mayaa, achuntajana waya nümüin Jeʼwaa süpüla nükatsüinrüin wanoula otta yalayalain waaʼin nutuma (paashajeʼera Proverbios 29:25; Luc. 17:5).

8. ¿Kasa waaʼinrajatka süküjeere wayuu wamüin alawaa nüchiki Jeʼwaa jee nachiki na wawalayuukana?

⁸ Satanaa «nia kanainjeejachikaʼaya tü alawaakat» otta aküjashi maʼin nia alawaa nüchiki Jeʼwaa jee nachiki na wawalayuukana nakajee na nuluwataakana aaʼu (Juan 8:44). Jamüshiijaʼa na ekirajüliikana sünain alawaa, süchikijee naʼyataapuʼuin nümüin Jeʼwaa mojusü nanüiki süchiki nupueulose Jeʼwaa suluʼupünaa Internet, telewisoot, raawia jee waneirua. Tia süpüshi tü makalü aka saaʼin jatü chuwatüsü nujutaka Satanaa wooʼomüin (Éf. 6:16). ¿Kasa waaʼinrajatka süküjeere wayuu wamüin alawaa nüchiki Jeʼwaa jee nachiki na wawalayuukana? Nnojoishii waya kacheʼejüinjanain sümüin tia, süka jamüin, kanoulain waya nünain Jeʼwaa otta watüjaain saaʼu anamiain na wawalayuukana. Akaʼaya waya, nnojoishii waya aashajaain namaa na akatalaakana nuulia Jeʼwaa süpüla nekirajüin alawaa nüchiki. Nnojoishii waya aʼülüjiraain namaʼaya jee nnojotsü wachajaain sukuwaʼipa süpüla watüjaainjatüin saaʼu kasain nekirajüin anain.

9. ¿Jameena waya mojule waaʼin waneepia?

⁹ Eesü süpüla sümatsüinjaain wanoula mojule maʼin waaʼin. Mojuwaisü waaʼin sutuma tü  alatawaikat wamüin. Wachajaainjatpejeʼe sukuwaʼipa süpüla wanoutuin tü eekai sülatüin wamüin. Shiajaʼa neʼe nnojoluinjatüin jülüjakuʼu müin waaʼin waneepia tia suulia joo motuin waaʼin süpüshuaʼa tü kasa anasü naaʼinrajatkat Jeʼwaa soʼu palit kaʼi (Alat. Map. 21:3, 4). Mojule naaʼin wanee wayuu waneepia matsüinjeerü naaʼin otta eeshi nuuʼulaajeechire suulia aʼyatawaa nümüin Jeʼwaa (Prov. 24:10). Eejüinjatü waaʼin suulia sülatüin tia wamüin.

10. ¿Kasa wayaawataka aaʼu sünainjee tü sümakat wanee wawala?

¹⁰ Eesü wanee wawala chaa Estados Unidos aaʼinmajaka suʼwayuuse süka ayuulin maʼin nia; süchajaapejeʼe sukuwaʼipa tü wawalakat süpüla ayatüinjatüin katsüin sunoula. Anuu sünüiki suluʼu wanee karaloʼuta suluwataaka chaa Warwick: «Shapaʼawaisü waaʼin jee mojuwaisü waaʼin sutuma müin wakuwaʼipa, ayatapejeʼe weʼitaain maʼin waaʼin sünain nikeraajeerüin Jeʼwaa süpüshuaʼa tü nümakat. Anashaatasü saaʼin tamüin tü pütchi ekirajünakalü aka waya süpüla katsüinjatüin wanoula otta wachecherüinjatüin waaʼin. Anasü maʼin waaʼin sutuma tia pütchikat. Ayatüshii waya kanoulain sutuma otta wachecherüin waaʼin soʼunnaa tü nuuʼulakakalü aka waaʼin Satanaa». Sünainjee tü sümakat tü wawalakat, wayaawata aaʼu eein süpüla wachecherüin waaʼin suulia mojuin waaʼin waneepia. ¿Jamüinjatü sukuwaʼipa tia watuma? Jülüjeesü waaʼin najayateein Satanaa tü kasa mojusü alatakat wamüin süpüla nümalajeʼerüin wanoula; soteesü waaʼin nümülialeerüin waaʼin Jeʼwaa soʼunnaa tia otta kojutuinjatü wamüin tü pütchi nümaʼanajeejatkat.

11. ¿Kasa wasakirüinjatka anain waaʼin süpüla wayaawatüin saaʼu katsüinre wanoula?

¹¹ ¿Choʼujaasüche pükatsüinrüin punoula? Süpüla pütüjaain saaʼu katsüinre punoula püsakira paaʼin sünain tüü: «¿Tachajaainche sukuwaʼipa süpüla nnojoluin shapaain maʼin taaʼin saaʼu wanee kasa? ¿Tayoutuinche aapajaa tü namakat na ekirajüliikana sünain alawaa? ¿Nnojoluitpache mojuin maʼin taaʼin waneepia mayaapejeʼe sülatüin kasa mojusü tamüin?». Müle pukuwaʼipa, anasüjaʼa mata punoula. Eejüinjatpejeʼe paaʼin suulia waneirua kasa nuuʼulakaka akajee waaʼin Satanaa. Wekirajaa süchiki tia.

12. ¿Kasa eeka süpüla sülatüin wamüin waʼyataale maʼin süchiirua wainmain korolo wamaʼana?

¹² Eesü süpüla sümatsüinjaain wanoula waʼyataale  maʼin süchiirua wainmain korolo wamaʼana. Jamüshijaʼa wanee surulaat naashin chi aluwataaushikai Pablo, «nnojoishi aaʼinraʼain müin wane kasa naatajatü suulia tü niʼyataainkat, süka naaʼinreein tü talatakat atüma naaʼin chi nülaülashikai» (2 Tim. 2:4). Apülajünapuʼusü noulia na surulaat romajeʼewaliikana naʼyataainjanain sünain wanee kasa naata suulia tü naʼyataainkat. ¿Kasa eeka süpüla sülatüin nümüin wanee surulaat macheʼere nia süchiirua tia?

13. ¿Jamüsü nnojoluinjatka jülüjain naaʼin wanee surulaat wanee kasa naata suulia tü niʼyataainkat?

¹³ Jülüjataa waaʼin tüü: wainma surulaat ekirajaakana watta maalü sünain atkawaa süka chajaruuta süpüla natüjainjanain maʼin süpüleerua. Nnojoipejeʼe wanee namaajachi, chajachi pueulopaʼa süpüla nuikaainjachin eküülü metkaaraluʼu. Shiasaʼa aliikapa kaʼikat, nanaʼlüin jee nanoutuin na surulaatkana tü taapüla natkaayainjatkat otta naasajüin nachajaruutse. Nnojotpejeʼe naaʼinrüin tia chi surulaat chajachikai pueulopaʼa, shia neʼe naaʼinmaaka aʼlakajawaa tü nuikaainjatkat waneemüin kaʼi. Shiasaʼa waneemüin kaʼi süchikijee tia, ashutuna aaʼuchii naya natuma na naʼünüükana. Saaʼin pümüin, ¿jaraiche chi surulaat yapakai süpüla atkawaa jee talateechika atuma naaʼin chi nalaülashikai? Jama chale pia soʼunnaa tia atkawaakat, ¿jaraiche chi surulaat anakai süpüla pümawa? ¿Nayache noʼutku na ekirajaakana maʼin süpüla tia atkawaakat, niataapa chi chajachikai pueulopaʼa sünain oikawaa?

14. ¿Kasa alanaʼaleeka maʼin ojutu wamüin waya nusurulaatsekana Kürisüto?

¹⁴ Maʼaka naaʼin wanee surulaat, shia waaʼinmaainjatka maʼin talatüinjachin wamaa Jeʼwaa nümaa Kürisüto, na walaülajanakana. Tia, alanaʼaleesia maʼin sujutü suulialeʼeya tü naʼyataakat maʼin achiirua na manoujainsaliikana. Müsüjeseʼe waaʼinmaainjatüin tü waʼyataainkat nümüin Jeʼwaa, tü wanoulakat otta tü korolo naapakat wamüin süpüla watkaayain nümaa Satanaa.

15. (1) ¿Jamüsü nünüiki chi aluwataaushikai Pablo süchiki tü kachiiruakat aaʼin washirüü? (2) ¿Kasa eeka süpüla sülatüin wamüin kachiiruale waaʼin washirüü?

¹⁵ Eejüinjatü maʼin waaʼin waneepia. ¿Jamüsü eejüinjatka waaʼin? Naashin chi aluwataaushikai Pablo, na wayuu kachiiruakana aaʼin washirüü «akatalaashii naya suulia anoujaa sutuma tia» (1 Tim. 6:9, 10, TNM). Sünainjee tü pütchi «akatalaashii» makat, wayaawata aaʼu wakayalaweenain suulia anoujaa waʼyataale maʼin süchiirua wainmain korolo wamaʼana sümaa nnojoluin choʼujaain  shia wamüin. Müle wakuwaʼipa, suchuntaajeerü waaʼin aaʼinraa kasa mojusü. Wayoutajatü tia. Soteesü waaʼin najayatüin Satanaa tü kasa mojusü suchuntaakat waaʼin süpüla nümalajeʼerüin wanoula.

16. Sünainjee tü sümakat Marcos 10:17-22, ¿jarat tü pütchi wasakireʼerüinjatkalü anain waaʼin?

¹⁶ Jülüjataa paaʼin wainmain nneerü pümaʼana süpüla piyaʼlajüin wainma kasa. ¿Mojusüche piyaʼlajüle tü kamalainkat pümüin sümaa pütüjaain saaʼu nnojoluin choʼujaain shia pümüin? Nnojotsiaajeʼe mojuin tia, wasakireʼerüinjatpejeʼe waaʼin sünain tüü: Eere tamaʼana süliapala wanee kasa otta tayaʼlajüle shia, ¿jalouijeetche shia tamüin? ¿Eejeetche kaʼi süpüla takumajirüin shia? ¿Alanaʼaleesüche maʼin sujutu tamüin tü kasa eekat tamaʼana suulialeʼeya taʼyataain nümüin Jeʼwaa? Sülanaʼaleere sujutü wamüin tü kasa eekat wamaʼana, ¿eesüche süpüla sülatüin wamüin tü alatakat nümüin chi jimaʼai washirü ayoutakai akooʼomüinra niʼyataain nümüin Jeʼwaa? (Paashajeʼera Marcos 10:17-22). Waʼyataa maʼin nümüin Jeʼwaa süka süpüshuaʼa waaʼin, jaʼitasü nnojoluin wainmain maʼin tü kasa eekat wamaʼana.

17. ¿Kasa soteeka waaʼin?

¹⁷ Sünainshii waya wanee atkawaa. Soteesü waaʼin niain watkaain amaa Satanaa otta sümaa tü yolujaakalüirua, müshiijeseʼe yapainjanain waya waneepia süpüla tia atkawaakat (Alat. Map.  12:17). Nnojoishii süpüla nayainjanain na wawalayuukana alüʼüjüin tü taapüla watkaayakat. Wayainjana alüʼüjaka shia waneʼewai wakua sümaa ichein wajapü sünain.

18. ¿Jamüsü icheinjatka maʼin najapü wanee surulaat sünain tü taapüla nütkaayakat?

¹⁸ Kojutushi maʼin atumawaa wanee surulaat eekai yalayalain sünain atkawaa. Eʼrapejeʼe japülii chi surulaat aleʼejaʼalaakai sümaa nnojoluin nümaʼana tü taapüla nütkaayakat. Anuu tü nümakat Tácito, wanee ashajüi süchiki kasa alataka sümaiwa: «Eʼrüshi maʼin japülii wanee surulaat nüleʼejaʼalaale neʼe sümaa nnojoluin nümaʼana tü taapüla nütkaayakat». Müsüjeseʼe ichein maʼin najapü wanee surulaat sünain tü taapüla nütkaayakat.

19. ¿Kasa waaʼinrüinjatka süpüla katsüinjatüin wanoula?

¹⁹ Süpüla katsüinjatüin wanoula oʼunüinjana waya sünain tü outkajawaakat jee müsia aküjainjana waya pütchi sümüin wayuu nüchiki Jeʼwaa otta süchiki tü nukuwaʼipakat sünain aluwatawaa (Heb. 10:23-25). Waneepiainjatü waashajeʼerüin tü Wiwüliakat otta achuntajana waya kaalinwaa nümüin Jeʼwaa süpüla waaʼinrüin waneepia tü nuluwataakalü anain waya (2 Tim. 3:16, 17). Müle shia watuma, weʼreerü tü kaʼi najaʼttireetkalü oʼu Jeʼwaa süpüshuaʼa tü kasa naaʼinrakat Satanaa wamüin (Is. 54:17). Aneerü wakuwaʼipa katsüinre wanoula. Paaʼinweena waya namaa na wawalayuukana sünain aʼyatawaa nümüin Jeʼwaa, alateena waya süchikumüin tü kasa mojusü oʼotokat wanainmüin. Süka nümaain waya Jesuu, talateerü maʼin waaʼin soʼu tü kaʼi niyamüleechikalü oʼu Satanaa otta na nümaajanakana (Alat. Map. 17:14; 20:10).