1. ¿Jamüshi niainjachika Jeʼwaa alanaʼaleein ojutü wamüin?

NIAINJACHI Jeʼwaa alanaʼaleeka ojutü wamüin süka nukumajalain waya (Alat. Map. 4:11). Kapüleepejeʼe tia. Mayaainjeʼe alin wapüla Jeʼwaa jee kojutuin nia wamüin, eesü sülanaʼaleere sujutü waneirua kasa wamüin nuulialeʼeya niakai. Watüjawee aaʼu jamüin sülataka tia. Wekirajaa palajana sünain tü waaʼinrakat niale Jeʼwaa alanaʼaleein ojutü wamüin.

2. Saashin Éxodo 34:14, ¿kasa nnojoleetka waaʼinrüin niale Jeʼwaa alanaʼaleein ojutü wamüin?

² Aire maʼin wapüla Jeʼwaa saashin tü Wiwüliakat alanaʼaleejeeria nujutü wamüin otta nieechi waʼwaajakai neʼe nümüiwaʼa. Nnojotsü alanaʼaleeinjatüin sujutü wamüin waneirua kasa nuulialeʼeya Jeʼwaa (paashajeʼera Éxodo 34:14).

3. ¿Kasa alanaʼaleeka atuma nujutü Jeʼwaa wamüin?

³ Alanaʼaleesia wamüin nujutü Jeʼwaa sutuma wekirajaain nüchiki. Kojutusü wamüin tü nukuwaʼipakat. Anashiisü wamüin tü kasa anashiikat nümüin jee walerajüin tü kasa nülerajakat. Watüjaa aaʼu nücheküin Jeʼwaa wapüleerua talatüinjatüin waaʼin waneepia, müsüjeseʼe waaʼinrüin tü nümakat wamüin. Talatüsü waaʼin sutuma aleewain waya nümaa (Sal. 25:14). Arütkaashii waya nünainmüin sutuma wekirajaain nüchiki (Sant. 4:8).

4. (1) ¿Kasa nimeejeeka aka waya chi Yolujaakai süpüla nnojoluinjatüin sülanaʼaleein nujutü Jeʼwaa wamüin? (2) ¿Kasa wekirajaainjatka anain sünain ekirajaayakat tüü?

⁴ Nimeejeein waya chi Yolujaakai sükajee tü kasa mojusü keejiakat sümüin wayuu manoujainsat. Müsü sukuwaʼipa nutuma süpüla waaʼinrüin tü kasa mojusü suchuntaakat waaʼin (Éf. 2:1-3; 1 Juan 5:19). Keeʼireesü naaʼin sülanaʼaleeinjatüin sujutü wamüin  waneirua kasa nuulialeʼeya Jeʼwaa. Wekirajaa sünain piamasü kasa nimeejeekalü aka waya. Tü palajatkat shia sükajee kachiiruain waaʼin tü washirüükat jee tü piamakat shia sükajee tü kasa waapajakat, washaitakat jee tü wanajakat.

5. ¿Jamüsü eejüinjatka waaʼin suulia sülanaʼaleein sujutü wamüin tü washirüükat?

⁵ Nnojotsü mojuin wainmale eküülü wamaʼana, wainmale washeʼin jee kepiale waya. Eejüinjatpejeʼe waaʼin suulia shiain alanaʼaleein ojutü wamüin tü nneetkat. Maaʼulu yaa, wainma na wayuu kachiiruakana aaʼin tü washirüükat (2 Tim. 3:2). Nütüjaa aaʼu Jesuu eein süpüla suchuntaain naaʼin washirüü na nikirajüinkana. Anuujeseʼe nünüiki namüin: «Maa aka kojutaʼatüle piamashii laama nütüma chi aʼyataaikai sünain alin nüpüla wane je sünain maalin nüpüla chi waneʼe, meechi aka Maleiwa jütüma müleka shiale kachiiruain jaaʼin tü washirüükat nuulialeʼeya» (Mat. 6:24). Wayuu eekai nuʼwaajüin Maleiwa sümaa kachiiruain naaʼin tü washirüükat, müshi niʼyataakai aaʼin namüin piamashii laama. Nnojoishi niain Jeʼwaa alanaʼaleein ojutü nümüin.

6. ¿Kasa watüjaka sünainjee tü nümakat Jesuu namüin na anoujashii chajanakana Laodicea?

⁶ Jamüshiijaʼa na anoujashii chajanakana Laodicea, aʼwaataashii naya suluʼu nawashirüin, nnojotsü kasain choʼujaain namüin naashin. Wayuu müliashii naya noʼuluʼu Jeʼwaa jee noʼuluʼu Jesuu, müshii aka saaʼin wayuu eekai maʼletsein, eekai moʼuin jee eekai masheʼin. Nnojoliipejeʼe nüchiaain naya Jesuu sünainjee washirüin naya, nüchiaain naya sünainjee sülanaʼaleein sujutü tü washirüükat namüin suulialeʼeya aleewaa nümaa Jeʼwaa (Alat. Map. 3:14-17). Sukumajaale suluʼu waaʼin wainmeein kasa wamaʼana, wanoutamaata sukuwaʼipa tia (1 Tim. 6:7, 8). Nnojorüle müin shia watuma, alanaʼaleejeeria wamüin sujutü tü washirüükat jee nnojoleerü kasain saamüin noʼuluʼu Jeʼwaa tü  waapakat nümüin, jama nuchuntuin sülanaʼaleeinjatüin nujutü sümüin wayuu suulialeʼeya waneirua kasa (Deut. 4:24). ¿Kasache eeka süpüla sülanaʼaleein atuma wamüin sujutü tü washirüükat?

7-9. ¿Kasa watüjaka sünainjee tü naaʼinrakat chi wawalakai David?

⁷ Anuu tü alatakat nümüin David, laülaashi nia napüleerua na wawalayuukana, kepiashi nia chaa Estados Unidos. Wayuu tütüshi maʼin sünain aʼyatawaa. Naapüin chi nülaamainkai nümüin wanee aʼyatawaa walaaka maʼin suulialeʼeya tü niʼyataapuʼukalü anain, eʼnnaajünüshi suluʼu nütüjain maʼin süpüleerua tü niʼyataainkat. «Nia Jeʼwaa anaka atuma sukuwaʼipa tü taʼyataainkat», müshi nia. ¿Shiimainchejeʼe tia nümakat?

⁸ Niyaawata aaʼu David mapa sumojujaweein nukuwaʼipa nümaa Jeʼwaa. Anuu nünüiki: «Sünainpa taya tü outkajawaakat jee taküjapa pütchi, shia neʼe jülüjaka taaʼin tü alatakat sünain tü taʼyataainkat. Wainma nneerü takanajaka, shapaapejeʼe taaʼin jee amojujaweesü takuwaʼipa sümaa taʼwayuuse».

⁹ Niyaawata aaʼu David naatain neʼe tü kasa alanaʼaleekalü ojutü nümüin. «Tanouteʼerüin tia alatakat tamüin», müshi nia. Nüshajaka David tü oora niʼyataainjatkalü oʼu otta nüküjaka shia nümüin chi nülaamainkai. Nujutunaka suluʼujee niʼyataain sünainjee tia. ¿Kasache naaʼinraka süchikijee tia? Anuu nünüiki: «Waneemüin kaʼi süchikijee tia, tepirajaka tü karaloʼuta süpülajatkat pürekutsoolinjachin aaʼusiliaat taya waneepia». Süpüla nuusütüin sünain tü nipijaainjatkalü aaʼu sümaa nuʼwayuuse, aʼyataajiraashi nia sümaa sünain epitajaa. Pürekutsootshi rekulaat nia jee pürekutsootka rekulaat mapa tü nuʼwayuusekat. Aʼyataashii naya sünain wanee kasa mamalainka sümüin wayuu. Nnojotpejeʼe jülüjain naaʼin tia. Mayaainjeʼe palitchoin tü nneerü nakanajakat suulialeʼeya paala, nnojoishii naya alatirüin müliaa, eesü waneepia  namaʼana sülia tü kasa choʼujaakat namüin. Shia keeʼireeka naaʼin niainjachin Jeʼwaa alanaʼaleein ojutü namüin. Neʼrüin sünain nükaalinjain Jeʼwaa na wayuu aʼyataakana maʼin nümüin (Mat. 6:31-33, TNM).

10. ¿Kasa waaʼinrüinjatka süpüla nnojoluin shimeejüin waya tü waaʼinkat?

¹⁰ Jaʼitaina kaʼletsein jee maʼletsein waya, eejüinjatü waaʼin suulia shimeejüin waya tü waaʼinkat. Wanee kasa waaʼinrüinjatka shia nnojoluinjatüin sülanaʼaleein watuma sujutü wanee aʼyatawaa suulialeʼeya tü waʼyataainkat nümüin Jeʼwaa. Müsüjeseʼe anain wasakireʼerüle waaʼin sünain tüü: «Sünainpa taya tü outkajawaakat jee taküjapa pütchi, ¿jülüjasüche taaʼin waneepia tü taʼyataainkat? ¿Shapaasüche taaʼin waneepia saaʼu tü tepijaainjatkalü aaʼu mapeena? ¿Amojujaasüche takuwaʼipa sümaa taʼwayuuse sünainjee kachiiruain taaʼin tü nneetkat jee kamaʼanaa wainma korolo? ¿Taapaajeetche wanee aʼyatawaa eekai mamalain sümüin wayuu süpüleerua takooʼomüinrüin taʼyataain nümüin Jeʼwaa?» (1 Tim. 6:9-12). Wasakireʼerapa tia suluʼu waaʼin, soteesü waaʼin alin waya nüpüla Jeʼwaa. Anuujeseʼe nünüiki namüin na aʼyataakana nümüin süka süpüshuaʼa naaʼin: «Nnojoleechi taya oʼunüin jümaʼanajee. Nnojoleena tapütüin jia jümüiwa». Shiajaʼa nümaka anainjee Pablo tüü: «Anakaja müleka nnojoliire keeʼireein jaaʼin washirüü» (Heb. 13:5, 6).

11. ¿Kasa alateetka wamüin waapajüle, washaitüle jee wanajüle kasa eekai mojuin?

¹¹ Niʼreein waya Jeʼwaa sünain talatüin waaʼin, müsüjeseʼe eein süpüla waapajüin, washaitüin jee wanajüin wanee kasa süpüla talatüin waaʼin. Saashin tü Wiwüliakat, «anashaatasü maʼin nümüin wanee wayuu niküle, nüsüle otta naaʼinrüle wanee kasa talateetka atuma naaʼin süka niʼyataashaatain süchiirua» (Ecl. 2:24). Maaʼulu yaa, wainma tü kasa mojusü aapajünakat, ashaitünakat jee tü anajünakat. Waaʼinrüle tia, yarütteerü wakuwaʼipa sutuma jee sooteena waya sünain aaʼinraa tü kasa mojukat noʼuluʼu Jeʼwaa.

12. Saashin 1 Corinto 10:21, 22, ¿jamüsü anainjatka tü kasa waapajakat, tü washaitakat jee tü wanajakat?

¹² Niainjachi Jeʼwaa alanaʼaleeka ojutü wamüin, makalaka nnojoliinjanain waya ekaain sümaa tü yolujaakalüirua jee wekaataain nümaa Jeʼwaa (paashajeʼera 1 Corinto 10:21, 22, TNM). Wekaale nümaa wanee wayuu shia süka aleewain waya nümaa. Müleka waapajüle jee wanajüle wanee kasa sünainpünaaka atkawaa, ooʼulakiraa, aʼluwajirawaa akuwaʼipaa jee waneirua kasa mojusü suchuntaaka waaʼin, müshii wekaakai aaʼin namaa na nüʼünüükana  Maleiwa jee müsü wekakai saaʼin tü notsekat. Waaʼinrüle tia, nnojoleena waya eʼrüin kasa anasü otta amojujaajeerü wakuwaʼipa nümaa Jeʼwaa.

13, 14. (1) ¿Jamüsü makaʼa aka saaʼin sukuwaʼipa eküülü tü kasa waapajakat, tü washaitakat jee tü wanajakat? (2) Sünainjee tü sümakat Santiago 1:14, 15, ¿jamüsü nnojoluinjatka keeʼireein waaʼin waaʼinrüin kasa mojusü?

¹³ Tü kasa waapajakat, tü washaitakat jee tü wanajakat, müsü aka saaʼin sukuwaʼipa eküülü. Jamüshiijaʼa weküle, wayaawata aaʼu tü weküinjatkat. Shiasaʼa wemiralapa shia, nnojotsü süpüla waleʼejirüin shia süchikuaʼa, jama wemiralüitpain shia. Süchikijee tia, oʼunusü wataluʼupünaa, makalaka anain waya anale tü weküinkat otta ayuulin waya mojule tü weküinkat. Nnojoliipejeʼe anamaateenain jee ayuimaateenain waya sutuma.

¹⁴ Wanaa sümaa waapajüin, washaitüin jee wanajüin wanee kasa, nnojotsü wanajüin kasa eekai eein. Jamüsüjaʼa wanajüle kasa eekai mojuin, mojeerü tü jülüjakat waaʼin jee tü suluʼukat waaʼin. Anasü waaʼin sutuma tü kasa eekai anain jee mojusü wakuwaʼipa sutuma tü kasa eekai mojuin (paashajeʼera Santiago 1:14, 15). Nnojotpejeʼe amojujaamaateerüin wakuwaʼipa sutuma, mojeerü shia mapa. Anuujeseʼe sünüiki tü Wiwüliakat: «Nnojo jimeejiraain: nnojoishi süpüla meeʼerapalainjachin Maleiwa. Jamüshijaʼa nüpünajüle wanee wayuu, shia nütpajaka achon tü nüpünajakat. Akaataajaʼa chi jülüjakai aaʼin tü kasa mojusü suchuntaakat naaʼin, shieerü naaʼinraka tia mapa» (Gal. 6:7, 8, TNM). Makalaka nnojoluinjatüin wanajüin, washaitüin jee waapajüin tü kasa nülerajakat Jeʼwaa (Sal. 97:10).

15. ¿Kasa naapaka Jeʼwaa wamüin süpüla wanajüin?

¹⁵ Wainma na wawalayuu kamalainkana amüin nanajüin tü ojuʼitawaikat suluʼu JW Broadcasting^®, tü canal eekat suluʼu Internet natuma na wawalayuukana. Anuu sünüiki wanee wawala Marilyn sünülia: «Talatüsü taaʼin sutuma tü tanajakat, eesü süpüla tanajüin shia süpüshuaʼa süka nnojoluin mojuin shia. Mojule taaʼin, tanajüin tü ekirajünakalü anain wattaʼa maalü suluʼu Weteet jee shiale waneirua pütchi. Akatchinraasü taaʼin sutuma tia. Arütkaasü taya nünainmüin Jeʼwaa otta nanainmüin na wawalayuukana. Anasü maʼin takuwaʼipa sutuma tü tanajakat suluʼu JW Broadcasting». ¿Wanajüinche tü naapakat Jeʼwaa wamüin? Eesü süpüla waapajüin waneirua kasa eʼitaanakat maʼaka saaʼin tü jayeechikalüirua otta wanajüin waneirua video.

16, 17. (1) ¿Jamüsü jülüjainjatka waaʼin jetsüin wamaʼa sünain aapajaa, ashaitaa jee anajaa wanee kasa? (2) ¿Kasa waaʼinrüinjatka süpüla nnojoliinjanain kamaʼain waya sünain aapajaa, ashaitaa jee anajaa wanee kasa?

¹⁶ Nnojotsü shiain neʼe jülüjainjatüin waaʼin tü kasa waapajakat, tü washaitakat jee tü wanajakat. Jülüjainjatü waaʼin jetsüin wamaʼa sünain aapajaa, ashaitaa jee anajaa wanee kasa. Nnojorüle jülüjain waaʼin tia, alanaʼaleejeeria sujutü wamüin tü waapajakat jee tü wanajakat suulialeʼeya tü waʼyataainkat nümüin Jeʼwaa. Wainma na wawalayuu kapüleekana amüin nanajüin motsomüin wanee kasa. Anuu sünüiki tü wawalakat Abigail, 18 suuyase: «Mapüsale maʼin taya süchikijee aʼyatawaa, anasü tamüin tanajüle telewisoot. Eepejeʼe kamaʼale taya sünain anajaa nnojorüle eejüin taaʼin». Anuutaa nünüiki wanee jimaʼai, Samuel nünülia: «Anajawaishi taya video motsoʼowaika amaʼa suluʼu Internet. Eeshi tanajüle waneesia palajana, süchikijee tanajüin waneʼeya, shiasaʼa mapa, talatira tamüsü apünüin jee pienchi oora sünain yalain taya sünain anajaa».

¹⁷ ¿Kasa waaʼinrüinjatka süpüla nnojoliinjanain kamaʼain waya sünain aapajaa, ashaitaa jee anajaa wanee kasa? Jülüjainjatü waaʼin jetsüin wamaʼa sünain anajaa. Eesü süpüla washajüin sünain karaloʼuta tü oora walatirakat sünain anajaa telewisoot, sünain anajaa suluʼupünaa  Internet jee sünain ashaitaa suluʼu serulaat soʼu wanee semaana. Wainmale tü oora walatirakat sünain tia, acheküsü wakumajüin sukuwaʼipa. Washaja palajana tü alanaʼaleekalü ojutü jee süchikijee, washaja tü waapajüinjatkat jee tü wanajüinjatkat. Wachunta nümüin Jeʼwaa süpüla waaʼinrüin tia washajakat. Müle shia watuma, eejeerü kaʼi süpüla wekirajaain sünain tü Wiwüliakat, süpüla waʼwaajüin Maleiwa sümaa wapüshi, woʼunuin sünain tü outkajawaakat, wojuʼitüin sünain aküjaa pütchi otta süpüla wekirajüin wayuu. Shiasaʼa waapajüinjanapa, washaitüinjanapa jee wanajüinjanapa wanee kasa, nnojoleerü mojuin waaʼin sutuma waaʼinrüin tia.

18, 19. ¿Kasa waaʼinrüinjatka süpüla niainjachin neʼe Jeʼwaa alanaʼaleeka ojutü wamüin?

¹⁸ Nüküjain chi aluwataaushikai Pedro najaʼlajeʼennüinjanain na nuluwataakana aaʼu Satanaa jee eeinjatüin wanee mma jeketü. Anuu nünüiki süchikijee nüküjain tia: «Tatünajutüirua, jia aishiikana tapüla, saaʼu eein jaaʼin sünain jaʼatapajüin tü kaʼi nüleʼejüinjatkat oʼu Cristo, anakaja müleka kachiiruale jaaʼin sünain wuleinjatüin jaaʼin sümaa lotüinjatüin jukuaippa noʼuluʼu Maleiwa sümaa wanaawajiraain jaaʼin nümaa» (2 Ped. 3:14). Waaʼinrüle tü nümakat Pedro, wulere wakuwaʼipa otta wanoula, alanaʼaleejeeria nujutü Jeʼwaa wamüin.

¹⁹ Ayateenaʼaya waya nimeejeein Satanaa süpüla kachiiruainjatüin waaʼin tü kasa kachiiruakat naaʼin na manoujainsaliikana. Müsü sukuwaʼipa nutuma süpüla mojutuin wamüin aʼyatawaa nümüin Jeʼwaa (Luc. 4:13). Jaʼitairü kasain alatüin wamüin, wachajaa sukuwaʼipa süpüla niainjachin Jeʼwaa waʼwaajüin nümüiwaʼa süka süpüshuaʼa waaʼin. Niainjachi neʼe nümüiwaʼa alanaʼaleeka ojutü wamüin suulialeʼeya waneirua kasa.