SÜPÜLA shiyaawatünüin aaʼu sülüʼülaain wanee wawai, eeshi wanee wayuu jülüjakai aaʼin tü ayaakuaa ojuʼitakat suluʼu wanee maakina, niʼrapa sülüʼülaain wanee wawai, nüchajaain sukuwaʼipa süpüla naapiramaatüin wayuu. Naaʼinrüin tia süka kachipünaain naaʼin sukuwaʼipa.

Müsia neʼe tü naaʼinrakat Jeʼwaa, naapirüin na wayuukana sülüʼülaain maʼin wanee «wawai». Keemasü maʼin tia otta alanaʼaleesia suulialeʼeya tü nüküjakalü achiki chi wayuu süpüʼüyakai sukuwaʼipa wawai. ¿Kasa naaʼinraka Jeʼwaa süpüla naapirüin wayuu? ¿Jamüsü watüjaaka saaʼu naapirüin naya Jeʼwaa kakalia paala süpüla nayaawajaain suulia naainjala?

Sümaiwa paala, kojuyatua naapirüin Jeʼwaa na wayuu aaʼinrakana kasa mojusü sümaa natüjaain saaʼu mojuin shia. Nüküjain namüin süsalainjanain naya nutuma (Prov. 10:25; Jer. 30:23). Naapirüin naya Jeʼwaa kakalia paala otta nüküjain namüin tü naaʼinrajatkat süpüla anain nakuwaʼipa noʼuluʼu (2 Rey. 17:12-15; Neh. 9:29, 30). Nuluwataain Jeʼwaa na nünüikimaajanakana süpüla naküjain namüin na wayuukana süsalainjanain naya naainjala. Naaʼinrüin tia süpüla neeʼiratamaatüin nakuwaʼipa (Amós 3:7).

Wanee wayuu nuluwataaka Jeʼwaa nia Noé. Kakaliashi nia sünain aapiraa wayuu süpüla shiyaawajaain suulia saainjala. Yarüttüsü maʼin nakuwaʼipa otta eʼrülii maʼin wayumüin. Nüküjain Noé namüin süʼitajatüin wanee Juya miyoʼushaata (Gén. 6:9-13, 17). Nüküjain namüin tü naaʼinrajatkat süpüla noʼttaainjanain süchikumüin tia. Naaʼinmaasü maʼin Noé tü aküjaakat pütchi, müshijeseʼe «aküjai süchiki tü kasa lotokat noʼuluʼu Maleiwa» nümünüin (2 Ped. 2:5, TNM).

Mayaainjeʼe naapirüin Noé naya wayuukana, nnojoishii jaa müin naya sümüin tü nümakat Maleiwa, manoulasalii naya, müshiijeseʼe wüinsirüin naya napüshuaʼaleʼeya (Mat. 24:39 TNM; Heb. 11:7). «Nnojotsüjeʼe müin wakuwaʼipa waapinnatüjüliire», nnojoishii müinjanain naya wayuukana, jama naapiratüjüliin naya Maleiwa.

Eeshii naapirüle Jeʼwaa na wayuukana süpülapünaa süsalain naya naainjala nutuma. Naapirüin naya Jeʼwaa kakalia paala süpüla nayaawajaain suulia naainjala. Jamüsüjaʼa wanaa sümaa nüntirüin poloosü kasa mojusü saaʼu Egipto, naapittüjüliʼiya naya. Aluwataanüshi Moisés nümaa Aarón nutuma Jeʼwaa süpüla naapirüin faraón namaʼaleʼeya na aʼyataashiikana nümüin. Nüküjainjatü namüin nüʼitirajatüin Jeʼwaa wanee juya sümaa kayeeloin shia. Waneemüinjatü kaʼi nüʼitirüin tia, müsüjeseʼe eein süpüla nachajaain eeinjanale naya süpüleerua tia juyakat. Anuu tü sümakat tü Wiwüliakat süchiki tia: «Na aapaakana sümaa tü nümakat Jeʼwaa, paülüʼüshii natuma na nachepchiakana sümaʼaleʼeya namüʼlüin suulia jamajüin naya. Nayasaʼa na nnojoliikana aapaain sümaa tü nümakat Jeʼwaa, nooʼulaain anuuipaʼa na nachepchiakana sümaʼaleʼeya namüʼlüin» (Éx. 9:18-21). Naapiratüjüliʼiya naya Jeʼwaa, müshiijeseʼe eein na aaʼinramaatakana wanee kasa suulia jamajüin naya. Akanasaʼa na nnojoliikana jaa müin, müliashii maʼin naya.

Aküjünüsü nümüin faraón namaʼaleʼeya na aʼyataashiikana nümüin nüntirajatüin Jeʼwaa tü chiiruaajatkat kasa mojusü. Nnojotpejeʼe kasajatüin namüin tü nümakat Jeʼwaa (Éx. 4:22, 23). Makalaka oʼuwoʼuliin na neʼirumakana (Éx. 11:4-10; 12:29). Aapinnüshii na israeliitakana nutuma Moisés süchiki nüntirajatüin Maleiwa tü chiiruaajatkat kasa mojusü. Nüküjain namüin tü naaʼinrajatkat  süpüla suʼttaainjatüin napüshi (Éx. 12:21-28). Wainma na wayuu oonookana sümaa tü nümakat Jeʼwaa, eeshii apünüin miyoone süsapoʼumüin. Naʼaka na israeliitakana eejana eekai egipcioin otta eekai nnojolin israeliitain (Éx. 12:38).

Wayaawatüin sünainjee tü naaʼinrakat Jeʼwaa, naapirüin wayuu kakalia paala süpüla sütüjaain saaʼu tü naaʼinrajatkat (Deut. 32:4). ¿Jamüsüche makaʼa sukuwaʼipa tia nutuma? Naashin chi aluwataaushikai Pedro shia «süka nücheküin Maleiwa süpüleerua shiyaawajaainjatüin wayuu süpüshua suulia saainjala. Aʼatapajüshi nia süka nnojolüin nücheküin süpüleerua eeinjatüin wayuu eekai amüloulin saaliijee manoujain» (2 Ped. 3:9). Kachipünaasü naaʼin Jeʼwaa nakuwaʼipa na wayuukana. Nücheküin süpüleerua wayuu shiyaawajaain suulia saainjala otta sunoutuin sukuwaʼipa nnojoluiwaʼaya süsalain saainjala nutuma (Is. 48:17, 18; Roma 2:4).

Maaʼulu yaa, oonooinjatü wayuu sümaa wanee pütchi aapinnaka anain shia sainküin mmakat. Yaaiwaʼaya Jesuu saaʼu tü Mmakat, nüküjain sajaʼttajatüin tü kasa mojusükat sükajee wanee müliaa miyoʼu maʼin (Mat. 24:21). Nüküjain tü müliaa neʼrüinjatkat na wayuu oushikajaakana süchiirua nukuwaʼipa. Alatajatü tia sülüʼülaapa sükalia süpüla sajaʼttüin kasakat süpüshuaʼa. Nüküjain süchiki tü kasa alatakat maaʼulu sainküin mmakat (Mat. 24:3-12; Luc. 21:10-13).

Tü nüchekakat Jeʼwaa süpüleerua wayuu shia shiʼyataain nümüin otta soonooin sümaa nünüiki. Müsüjeseʼe nüküjain Jesuu tü kasa alatajatkat süpülapünaa sajaʼttüin kasakat süpüshuaʼa. Nücheküin Jeʼwaa anainjatüin nakuwaʼipa na wayuu oonookana sümaa nünüiki. Otta neʼrüinjanain kasa anasü paʼaraiisüpa tü mmakat (2 Ped. 3:13). Keeʼireesü naaʼin Jeʼwaa shiʼitaain saaʼin wayuu sünain tü naaʼinrajatkat mapeena, müsüjeseʼe nüküjain namüin «tü pütchi anasükat, tü süchikikat nukuaippa sünain aluwatawaa». Oʼttaweena naya naapaale sümaa tia pütchikat. Naashin Jesuu, aküjünüinjatü tia pütchikat «sainküin mmakat süpüshua süpüla saapünüinjatüin sütüma wayuu süpüshua» (Mat. 24:14). Nukumajüin Jeʼwaa sukuwaʼipa süpüla süküjünüinjatüin pütchi suluʼu 240 mma. Keeʼireesü naaʼin Jeʼwaa saapüinjatüin wayuu maʼleekalia süchiki süsalainjatüin saainjala nutuma. Naaʼinrüin tia süpüla suʼttaainjatüin soʼunnaa tü nükaliakat (Sof. 1:14, 15; 2:2, 3).

Watüjaa aaʼulu naapirüin Jeʼwaa wayuu kakalia paala süpülapünaa naaʼinrüin wanee kasa. Naaʼinrüin tia süpüla shiyaawajaain suulia saainjala. Shiapejeʼe jülüjeein waaʼin saapaajeerüle wayuu sümaa tü nümakat Jeʼwaa. Süka nünüikeʼejanain waya, waapira wayuu süpüla suʼttaain soʼunnaa sajaʼttüin kasakat süpüshuaʼa.