1, 2 (1) ¿Kasa naküjeetka achiki na sülaülashiikana mma? (2) ¿Jarat tü pütchi wasouteetkalü eʼipajee?

JÜLÜJATAA paaʼin eeitpain «anaa akuaippa» otta jimataa aaʼin naashin na sülaülashiikana mma. Eesüjaʼa yaleteerüle naaʼin saaʼujee tia. Nemeejeerü waaʼin shiiʼiree wanoujain sünain nayain neʼe atüjain süpüleerua anouteʼeraa tü kasa mojusü alatakat sainküin mmakat. Iseetpejeʼe nachiki nataʼülüin sukuwaʼipa tü alatajatkat süchikijee tia. ¿Jamüsü iseetka shia nachiki? Anuu sünüiki tü Wiwüliakat: «Anta meeria wane müliaa miyoʼushaata nanainmüin sünain süsaleenain naya tü naainjalakat». Ajaʼttinneena naya nutuma Maleiwa (1 Tes. 5:3).

² Süka sülatajatüin tia, eesü waneirua kasa watüjaweekalü aaʼu. ¿Kaseerü alataka soʼunnaa tü «müliaa miyoʼusükat»? ¿Kasa waaʼinrüinjatka naashin Jeʼwaa? ¿Kasa waaʼinrüinjatka maaʼulu süpüla waneepiain waya nümaa Jeʼwaa soʼunnaa tü müliaa miyoʼusükat? (Mat. 24:21).

3. Saashin Alateetkat Mapeena 17:5, 15-18, ¿kaseerü naaʼinraka Maleiwa najaʼttirajatpa «Babilonia tü Miyoʼusükat»?

³ (Paashajeʼera Alateetkat Mapeena 17:5, 15-18). Ajaʼttinneerü «Babilonia tü Miyoʼusükat». Iseerü nachiki na sülaülashiikana mma nataʼülüin sukuwaʼipa tü alatajatkat. ¿Jamüsü iseetka nachiki? Süka nikeraajeerüin Maleiwa tü naaʼinrüinjatkat nakajee naya wayuukana. Najaʼttirüinjatü süpüshuaʼa tü iküleesia ekirajakalü alawaa jee müshiʼiya na anoujakana nünain Cristo naküjainruʼu. Nikeraajeerü Maleiwa tü naaʼinrüinjatkat  nakajee «na polooshiikana aluwataashii», naya napüshuaʼa na sülaülashiikana mma. Wanaawasü naaʼin nümaa chi wanülüükai, kayaawaseka tü kanüliakat Naciones Unidas (Alat. Map. 17:3, 11-13; 18:8). Oʼtteerü tü müliaa miyoʼusükat nashutapa na sülaülashiikana mma saaʼu tü iküleesia ekirajakalü alawaa. Alatalaʼa meerü tia sainküin tü mmakat jee keemeerü maʼin shia.

4. (1) ¿Kaseetche nashutaka anainjee na sülaülashiikana mma saaʼu tü iküleesia ekirajakalü alawaa? (2) ¿Kaseetche naaʼinraka noʼutku na suluʼupuʼukana tü iküleesiakalüirua?

⁴ Nnojotsü watüjaain aaʼu kaseerüin nashutüin anainjee na sülaülashiikana mma saaʼu Babilonia tü Miyoʼusükat. Eesüjaʼa shieerüle sutuma nnojoluin eein jimataa aaʼin sünainjee tü iküleesiakalüirua naashin otta sutuma sünainpünaain shia poliitika. Jee müsia, sutuma washirüin shia jee wainmain kasa sümaʼana (Alat. Map. 18:3, 7). Eeshiijaʼa nnojoleenale najaʼttinnüin napüshuaʼa na wayuu suluʼukana tü iküleesiakalüirua. Shieerü ajaʼttinnaka tü iküleesiakalüirua. Sajaʼttinnapa süpüshuaʼa tü iküleesiakalüirua, nayaawateerü aaʼu na wayuu anoujakana suluʼu nemeejünüin natuma na nekiipüʼükana paala, eeshiijaʼa nakayalaweenale suulia.

5. (1) ¿Kasa nüküjaka Jeʼwaa süchiki tü müliaa miyoʼusükat? (2) ¿Jamüsü naaʼinreetka tia?

⁵ Nnojotsü süküjain tü Wiwüliakat jeʼrainjatüin kaʼi sajaʼttinnajatkalü oʼu Babilonia tü Miyoʼusükat, motsoʼojeetpejeʼe sümaʼa (Alat. Map. 18:10, 21). Nüküjain Jeʼwaa «naawaleʼereerüin» tü müliaa miyoʼusükat. Naaʼinreerü tia süpüla noʼttaainjanain «na aneekuushikana» nutuma otta tü iküleesia ekirajakat tü shiimainkat (Mar. 13:19, 20). ¿Kasa waaʼinrüinjatka naashin Jeʼwaa suʼttianainjee tü müliaa miyoʼusükat otta Armagedón?

6. ¿Kasa niyoutaka Jeʼwaa wapüleerua?

⁶ Wekirajaaitpa anain sünain ekirajaaya 40, niyoutuin Jeʼwaa wapüleerua sünainpünaain waya tü saaʼinrakat Babilonia tü Miyoʼusükat. Eepejeʼe sooʼomüin tü kasa waaʼinrüinjatkat. Ayatüinjanaʼaya waya sünain aʼyatawaa nümüin Maleiwa. Wekirajaa sünain piamasü kasa waaʼinrüinjatka.

7. (1) ¿Kasa waaʼinrüinjatka süpüla wulein wakuwaʼipa maʼaka nuluwataain shia Jeʼwaa? (2) Saashin Hebreokana 10:24, 25, ¿jamüsü choʼujaaka maʼin woutkajaain maaʼutpünaa?

 ⁷ Tü palajatkat shia wuleinjatüin wakuwaʼipa maʼaka nuluwataain shia Jeʼwaa. Nnojotsü anashiinjatüin wamüin nakuwaʼipa na manoujainsaliikana. Nnojotsü anashiinjatüin wamüin tü aʼluwajirawaakalü akuwaʼipaa. Süpüshi tia, shia kasaarüle wanee toolo nümaa wanee toolo, wanee jierü sümaa wanee jierü otta waneirua kasa sünainpünaaka nakuwaʼipa na jaleetshiikana (Mat. 19:4, 5; Roma 1:26, 27). Tü wane kasa waaʼinrüinjatkat shia waʼwaajüinjachin Maleiwa waneepia namaa na wawalayuukana. Waneepiainjana waya outkajaain, jaʼitaina waya outkajaain nepialuʼu na wawalayuukana jee woutkajaain ojuunaa süpülajünüle woulia. Jaʼitairü kasain alatüin, ayatüinjanaʼaya waya outkajaain süpüla waʼwaajüin Maleiwa. Shialeekajaʼa maaʼulu «süka sülüʼülüin nükalia chi Senyotkai» (paashajeʼera Hebreokana 10:24, 25).

8. ¿Kasa naateetka aluʼu tü pütchi waküjeetkat namüin na wayuukana?

⁸ Eesü naateerüle sümüin tü pütchi waküjeetkat namüin na wayuukana soʼunnaa tü müliaa miyoʼusükat. Maaʼulu yaa, aküjashii waya pütchi süchiki nukuwaʼipa Maleiwa sünain aluwatawaa otta wachajaain sukuwaʼipa süpüla wekirajüin wayuu. Naateerü sukuwaʼipa tia mapa, eesüjaʼa lotoleejeerüle wanüiki, meerü aka saaʼin shiyeeloin tü juyakat saashin tü Wiwüliakat (Alat. Map. 16:21). Eesüjaʼa waküjeerüle süchiki najaʼttinnajanain na wayuu wanaawakana aaʼin nümaa Satanaa. Watüjaajeerü aaʼu mapa tü pütchi waküjainjatkat otta jameerüin sukuwaʼipa watuma. ¿Macheʼejeenache waya süchiirua tü sukuwaʼipapuʼukat aküjaa pütchi watuma? ¿Waaʼinrataajeetpa tü aküjüneetkat wamüin? Watüjaajeerü aaʼu tü waaʼinrajatkat süküjünapa wamüin. Choʼujaajeetpejeʼe meimmoluin waya süpüla waküjain sümüin wayuu tü alatajateetkat sümüin (Ezeq. 2:3-5).

9. (1) ¿Kasa eejeetka süpüla naaʼinrüin na sülaülashiikana mma sünainjee tü pütchi waküjeetkat? (2) ¿Kasa tü watüjaakalü aaʼu?

⁹ Eesüjaʼa mojushiijeerüle namüin na sülaülashiikana mma tü pütchi waküjeetkat. Sünainjee tia, nachajaajeerü sukuwaʼipa süpüla nooʼuleʼerüin waya suulia aküjaa pütchi. Weʼitaajeetpejeʼe waaʼin nünain Jeʼwaa soʼu tia maʼaka weʼitaain waaʼin nünain maaʼulu. Watüjaa aaʼu nükatchinreerü waaʼin süpüla wekeraajüin tü keeʼireekat naaʼin (Miq. 3:8).

10. Saashin Lucas 21:25-28, ¿jameerü saaʼin wayuu shiʼrapa tü alatajatkat soʼu tü müliaa miyoʼusükat?

¹⁰ (Paashajeʼera Lucas 21:25-28). Ayoʼujaajeerü naaʼin na wayuukana neʼrapa sajaʼttinnüin tü kasa sünainpünaakat poliitika, sukuwaʼipa oikawaa otta waneirua kasa neʼitaapuʼuka anain naaʼin. «Mülieerü maʼin naaʼin» otta ayoʼujaajeerü naaʼin süka neʼreerüin tü outaakat nooʼomüin (Sof. 1:14, 15). Eeshiijaʼa weʼreenale maʼin wamüliala. Eeshiijaʼa mülieenale waya sutuma nnojolin waya sünainpünaain tü kasa naaʼinrakat na manoujainsaliikana. Eesüjaʼa kapüleejeerüle wamüin wousütüin sünain weküin, washeʼin otta waneirua kasa choʼujaajeetka maʼin wamüin.

11. (1) ¿Jamüshii kanainjeenaka waya saaʼin wayuu? (2) ¿Jamüsü nnojoluinjatka shiyoʼujaain waaʼin süpüleerua tü müliaa miyoʼusükat?

¹¹ Kanainjeena waya naaʼin na wayuu suluʼupuʼukana tü waneirua iküleesia ajaʼttinnakat, jama shieerüin eein neʼe tü iküleesia kaluʼukat na aküjaliikana pütchi nüchiki Jeʼwaa. Aapüneerü achiki tia sainküin Mmakat otta aküjüneerü shia suluʼupünaa Internet. Naʼürüleena waya na sülaülashiikana mma otta Satanaa, jama shieerüin eein neʼe sümüiwaʼa tü iküleesia kaluʼukat waya. Iseerü nachiki najaʼttirüin  süpüshuaʼa tü iküleesia eekat saaʼu tü Mmakat, makalaka kanainjeenain waya naaʼin. Ashuteena waaʼu na sülaülashiikana mma, na kanüliakana Gog chi chejeʼewaikai Magog. * Akotchojiraajeena naya palajana shiiʼiree najaʼttirüin nupueulose Jeʼwaa (Ezeq. 38:2, 14-16). Eesü shapaale waaʼin sutuma jülüjain waaʼin tü alateetkat, jama nnojoluin watüjaain saaʼu jameerüin sukuwaʼipa. Nnojotpejeʼe ayoʼujaainjatüin waaʼin süpüleerua tü müliaa miyoʼusükat, jama nüküjeerüin wamüin Jeʼwaa tü waaʼinrüinjatkat süpüla woʼttaainjanain soʼu tia (Sal. 34:19). Nnojotsü mojuinjatüin waaʼin, taasheena waya jee oʼtteʼenneena waya nutuma Jeʼwaa. *

12. ¿Jamüsü sukuwaʼipa nutuma «chi achepchiee oonookai otta kekiikai maʼin» süpüla eejüinjatüin waaʼin?

¹² Nikirajüin waya «chi achepchiee oonookai otta kekiikai maʼin» süpüla waneepiainjanain waya nümaa Jeʼwaa soʼunnaa tü müliaa miyoʼusükat (Mat. 24:45). Wainma sukuwaʼipa nutuma süpüla eejüinjatüin waaʼin. Jamüsüjaʼa sünain tü outkajawaakat miyoʼu apünüinka kaʼi eejatka soʼu juyakat 2016 sünainmüin 2018, aküjünüsü wamüin tü wakuwaʼipainjatkat sümaʼinruʼu sülüʼülaain tü nükaliakat Jeʼwaa. Wekirajaa sünain süpüshi tia pütchikat.

13. (1) ¿Kasa waaʼinrüinjatka süpüla waneepiain waya nümaa Jeʼwaa? (2) ¿Jamüsü waaʼinrüinjatka tia?

¹³ Waneepia waya nümaa Jeʼwaa. Anuu sünülia tü outkajawaa miyoʼu eejatkat soʼu juyakat 2016: «Waneepiainjana waya nümaa Jeʼwaa». Aküjünüsü wamüin waneepieenain waya nümaa Jeʼwaa aleewale maʼin waya nümaa. Arütkaashii waya nünainmüin woʼuraajüle nümüin süka süpüshuaʼa waaʼin jee wekirajaale maʼin sünain tü Wiwüliakat. Waaʼinrüle tia, wachechereerü waaʼin soʼunnaa tü kasa mojusü alateetkat wamüin. Maaʼutpünaa yaa, sülüʼütpa maʼin tü müliaa miyoʼusükat, mülieena maʼin waya atumawaa süpüla nnojoliinjanain waneepiain waya nümaa Jeʼwaa. Eeshiijaʼa ayateenale waya meeʼerapalain (2 Ped. 3:3, 4). Meerü wakuwaʼipa atumawaa süka nnojoliin waya sünainpünaain tü kasa mojusü naaʼinrakat na wanaawakana aaʼin nümaa Satanaa. Waneepiainjana waya nümaa Jeʼwaa maaʼulu süpüla waneepiain waya nümaa soʼunnaa tü müliaa miyoʼusükat.

14. (1) ¿Kaseerü alataka namüin na wawalayuu oʼunirakana sukuwaʼipa nupueulose Jeʼwaa maaʼulu yaa? (2) ¿Jamüsü waaʼinrüinjatka tü müneetkat wamüin soʼu tia?

¹⁴ Soʼunnaa tü müliaa miyoʼusükat, ¿kaseerü alataka namüin na wawalayuu oʼunirakana sukuwaʼipa nupueulose Jeʼwaa maaʼulu yaa? Napüshuaʼa na wawalayuu chainjanakana iipünaa, na yaayüliikana saaʼu tü Mmakat, oʼuneena iipünaamüin süpüla natkaainjanain soʼunnaa Armagedón (Mat. 24:31; Alat. Map. 2:26, 27). Nnojoleena yaain wamaa na Laülaashii Jülüjakana Aaʼin na Aküjaliikana Pütchi sainküin Mma. Nnojoleetpejeʼe walakatüin tü nupueulosekat Jeʼwaa. Nayeena oʼuniraka sukuwaʼipa nupueulose Jeʼwaa na «wane anneerüiruayaʼa waneejannuu» sümakana amüin tü Wiwüliakat. Wakaalinjeena naya wawalayuukana otta waaʼinreerü tü namakat wamüin. Waaʼinrüle tia, waneepieena waya nümaa Jeʼwaa jee oʼttaajeena waya.

15. (1) ¿Kasa waaʼinrüinjatka süpüla wachecherüin waaʼin? (2) ¿Jamüsü wachecherüinjatka waaʼin maaʼulu yaa?

¹⁵ Wachechera waaʼin. Anuu sünülia tü outkajawaa miyoʼu eejatkat soʼu juyakat 2017:  «Ayataʼaya püchecherüin paaʼin». Sükaalinjain waya süpüla wachecherüin waaʼin soʼunnaa weʼrüin müliaa. Aküjünüsü wamüin wachechereerüin waaʼin weʼitaale waaʼin nünain Jeʼwaa, nnojotsü shiain sutuma süsünnaajeerüin woulia tü müliakalü atuma waaʼin (Roma 12:12). Nnojo motuin waaʼin tü nümakat Jesuu: «Chi eekai nüchecherüin naaʼin suʼunnaa tü müliaa niʼrakat, ayateechi oʼtteʼennüin» (Mat. 24:13). Wayaawata aaʼu waneepiainjanain waya nümaa Maleiwa jaʼitairü kasain alatüin wamüin. Wachecherüle waaʼin maaʼulu yaa, wachechereerü waaʼin soʼunnaa tü müliaa miyoʼusükat.

16. (1) ¿Kasa meimmoluinjeenaka atuma waya? (2) ¿Kasa waaʼinrüinjatka maaʼulu yaa süpüla meimmoluin waya?

¹⁶ Meimmoluinjana waya. Anuu sünülia tü outkajawaa miyoʼu eejatkat soʼu juyakat 2018: «¡Meimmoluin pia!». Aküjünüsü wamüin meimmoluinjeenain waya weʼitaale waaʼin nünain Jeʼwaa, nnojotsü shiain sutuma watüjain maʼin süpüleerua wanee kasa. ¿Kasa waaʼinrüinjatka süpüla weʼitaain maʼin waaʼin nünain Jeʼwaa? Waashajeʼerüinjatü tü Wiwüliakat soʼukaiwai otta wasakireʼerüinjatü suluʼu waaʼin süchiki tü naaʼinrakat Jeʼwaa süpüleerua tü nupueulosekat sümaiwa paala (Sal. 68:20; 2 Ped. 2:9). Nashutapa waaʼu na sülaülashiikana mma, meimmoluinjana waya otta weʼitaainjatü maʼin waaʼin nünain Jeʼwaa (Sal. 112:7, 8; Heb. 13:6). Weʼitaale waaʼin nünain Jeʼwaa maaʼulu yaa, meimmoluinjeena waya nushutapa waaʼu Gog. *

17. ¿Jamüsü nnojoluinjatka shiyoʼujaain waaʼin süpüleerua Armagedón? (Piirakaa sümüin tü ayaakuaa sünainkat süta tü rewiisütakat).

¹⁷ Wekirajaa anainrü sünain ekirajaaya 40, eein wawalayuu joʼuukana süchikijee 1914, suʼttapa tü kaʼi sajaʼttajatkalü oʼu kasakat süpüshuaʼa. Shiapejeʼe waʼatapajüin woʼttaainjanain süchikumüin tü müliaa miyoʼusükat. Ajaʼttinneerü süpüshuaʼa tü kasa mojusükat soʼunnaa Armagedón. Nnojoliinjanapejeʼe waya ayoʼujaain aaʼin, jama niainjachin Maleiwa atkaain wapüleerua (Prov. 1:33; Ezeq. 38:18-20; Zac. 14:3). Kettaapa sükalia tia, anteechi Jesucristo süpüla atkawaa süka niain shikiipüʼüin nutuma Jeʼwaa. Eejeena nümaa na wayuu aneekuushikana  süpüla aluwatawaa wanaa nümaa otta eejeena watta naalii aapiee. Atkaajeena naya nümaa Satanaa, sümaa tü yolujaakalüirua otta namaa na wayuu wanaawakana aaʼin namaa (Dan. 12:1; Alat. Map. 6:2; 17:14).

18. (1) ¿Jarat tü pütchi nüpansaajakat Jeʼwaa wamüin? (2) ¿Jamüsü weʼitaainjatka waaʼin sünain woʼttaajeenain saashin Alateetkat Mapeena 7:9, 13-17?

¹⁸ Anuu wanee pütchi nüpansaajaka Jeʼwaa wamüin: «Jaʼitairü kasain maʼin aainjüneein pümüin, amalajaajeerü shia» (Is. 54:17). Watteena naalii na aʼyataaliikana nümüin Jeʼwaa oʼttaajeenaka süchikumüin tü müliaa miyoʼusükat otta ayateenaʼaya naya aʼyataain nümüin (paashajeʼera Alateetkat Mapeena 7:9, 13-17). Weʼitaainjatü waaʼin sünain woʼttaajeenain süka süküjain shia tü Wiwüliakat. Süküjain naaʼinmajüin Jeʼwaa chi wayuu waneepiakai nümaa (Sal. 31:23). Wapüshuaʼa wayakana aikana apüla Jeʼwaa jee kojutukana amüin nia, talateerü waaʼin weʼrapa kojutuin Jeʼwaa atumawaa (Ezeq. 38:23).

19. ¿Kasa weʼreetka ekeraajüin soʼu palitchon kaʼi?

¹⁹ Jülüjataa paaʼin jamüinjeʼe sünüiki 2 Timoteo 3:2-5 nachiki na wayuu kepiainjanakana suluʼu tü mma jeketkat, nnojoitpa eein chi Yolujaakai (paashajeʼera tü pütchikat « Sukuwaʼipeetka wayuu mapeena»). Anuu nünüiki chi wawalakai George Gangas, * niapuʼushi wanee wawala Jülüjakai Aaʼin na Aküjaliikana Pütchi: «¡Aneerü maʼin tü mmapaʼakat nayapa neʼe na wawalayuukana kepiain saaʼu! Alüʼütsiaajeʼe tia, kepieena naya suluʼu wanee mma jeketü. Eejeena naya süpüla kaʼikat süpüshuaʼa maʼaka eein Jeʼwaa waneepia». Anakatche maʼin tia, ¿aashimüin?