Eesü kojutüle wamüin wanee asülajuushi naapüle shia wamüin wanee wayuu eekai kapülain amüinyüü jee niale wanee wayuu kojutükai wamüin. Eesü kojutüle shia wamüin süka nüsülajalain shia wanee wapüshi eekai alin wapüla jee niale wanee waʼaleewain, kojutüsü wamüin tia jaʼitairü nnojoluin jeʼrain sülia napüleerua. Müsia neʼe sukuwaʼipa tü nüsülajakat Russell nümüin Jordan. ¿Jamüsü wanaaweemataka shia sümaa tü nüsülajakat Maleiwa wamüin?

Palajana: saashin tü Wiwüliakat, «niiʼiyatüin chi Maleiwakai sünain alin waya nüpüla, nuluwataainjeseʼe chi waneeshikai Nüchon süpüla katüinjatüin woʼu nünainjee» (1 Juan 4:9, TNM). Sutuma nümaʼanajeejatüin Maleiwa tia asülajuushikat, kojutüshaanasü shia wamüin. Malaaka joo nnojoluin jaralin kojutüleein nuulia Maleiwa. Anuu nünüiki wanee wayuu hebreo ashajakai salmo: «Piain neʼe pümüiwaʼa chi Miyoʼushikai saaʼu tü mmakat süpüshuaʼa, piakai chi kanüliakai Jeʼwaa» * (Salmo 83:18, TNM). Anaʼleesia maʼin tia asülajuushikat süka niain kaapajalain shia wamüin Maleiwa.

Piama: Maleiwa nia Washikai (Isaías 63:16). ¿Jamüsü watüjaaka saaʼu tia? Nia aapakaʼaya wamüin kataa oʼu. Akaʼaya nia, naaʼinmajüin waya otta jülüjashii waya naaʼin maʼaka naaʼin wayuu aikai apüla nüchonnii. Sümaiwa paala, Efraín münapuʼusü süpüshi nupueulose Maleiwa. Anuu nünüiki Maleiwa süchiki: «¿Nnojoishisaʼa kojutüin maʼin tamüin Efraín, chi tachonkai, chi tasipajakai? [...]. Aishi maʼin nia tapüla. Shiimainshaata sümülialaajeerüin taaʼin naalin» (Jeremías 31:20, TNM). Müsia neʼe nukuwaʼipa Maleiwa maaʼulu namüin na aʼwaajakana nia. Nnojoishii neʼe nukumajüin waya, Washi nia otta Waʼaleewain nia. Sünainjee tia, kojutüsü maʼin wamüin süpüshuaʼa tü kasa nüsülajakat wamüin.

Eesü asülajuushi eekai kojutüin wamüin süka saapünüin wamüin saaʼu alin waya apülaa, nnojotsü aapünüin wamüin mojusheeka. Chi eekai asülajülin, nnojoishi aʼatapajüin keeʼirakainjatüin tü nüsülainkat.

Naapüin Maleiwa chi Nüchonkai waaʼu saaʼu alin waya nüpüla. Saashin tü Wiwüliakat, «niiʼiyatüin chi Maleiwakai sünain alin waya nüpüla, nuluwataainjeseʼe chi waneeshikai Nüchon süpüla katüinjatüin woʼu nünainjee» (1 Juan 4:9, TNM). Nnojoishi jaralüin aluwataain Maleiwa süpüla naaʼinrüinjatüin tia. Naapüin Maleiwa nikii chi Nüchonkai süpüla ouktüin nia waaʼu «saaʼujee anamiain maʼi nia» (Roma 3:24).

¿Jamüsü niiʼiyataka Maleiwa sünain anamiain maʼin nia saaʼujee naapüin chi Nüchonkai waaʼu? Anuu sünüiki tü Wiwüliakat: «Niiʼiyatüin Maleiwa sünain alin waya nüpüla saaʼujee ouktüin Kürisüto waaʼu mayaapejeʼe kaainjaraliin waya» (Roma 5:8, TNM). Sutuma alin waya nüpüla chi Maleiwakai, nükaaliinjain waya süka maaʼinmajuuin waya wamaiwa sümaa waleʼeruʼuin tü kaainjalaakat. Nnojoliipejeʼe alin waya nüpüla Maleiwa saaʼu wanee kasa waaʼinraka otta müiria nnojoluin süpüla wawalaajüin tia nümüin. Nnojotsü kasain antapünaain sünain tü nüsülajakat wamüin Maleiwa saaʼujee alin maʼin waya nüpüla.

Eesü asülajuushi eekai kojutüin maʼin wamüin saaʼujee tü naaʼinrakat chi asülajakai shia wamüin. Nüsülajüle wanee wayuu wamüin wanee kasa kojutüka nümüin, kojutüleesia wamüin tü nüsülainkat.

Naapüin Maleiwa chi Nüchonkai waaʼu, «chi waneeshikai Nüchoin» (Juan 3:16). Niajaʼa naapaka waaʼu chi aikai maʼin nüpüla. Suʼunnaa nukumajüin Maleiwa tü kasakalüirua süpüshuaʼa soʼu watta saalii juya, eejachi Jesuu nümaa sünain akaaliinjaa nia otta aishaatashi maʼin Jesuu nüpüla (Proverbios 8:30). Jesuu nia chi Nüchonkai Maleiwa aishikai maʼin nüpüla otta «wanaawasü nükuaippa nümaa Maleiwa» (Colosas 1:13-15). Nnojotsü jaralüirüin müin akuwaʼipa maʼaka naaʼin nayakana, paaʼinwashii maʼin naya.

Nnojoipejeʼe naʼalijirüin Maleiwa chi Nüchonkai, naapüin nia waaʼu (Roma 8:32). Naapüin wamüin tü kojutüleekat maʼin nümüin. Naaʼinrüin shia, eerejeʼe kapüleein maʼin aaʼinraa tia.

Eetaasü tü asülajuushi eekat kojutüin maʼin wamüin süka choʼujaain shia wamüin. Jamüsüjaʼa choʼujaale maʼin pümüin wanee tratamiento otta nnojorüle nneerü pümaʼana süpüla puwalaajüin shia, ¿aashin talateechin maʼin pia eere wanee wayuu awalaajakai sülia tü tratamientokot? Talateechi pia sümaa tia nüsülajakat pümüin.

«Soto jaaʼin nüchiki Adán [...]. Ouktüshi nia saaliijee naainjala. Maleeirümaʼaka ouktüin wayuu süpüshua saaʼu saainjala maa aka naaʼin. Otta nünainjee Cristo, suuntüin jooluʼu wayuu katüin soʼu» (1 Corinto 15:21, 22). Saaʼu nüchonniin waya Adán, ayuuishii jee ouktüshii waya. Akaʼaya waya, isasü wachiki anajiraain waya nümaa Maleiwa sümaa maainjalain waya nuʼupala. Nnojotsü süpüla wasoʼireʼerüin saaʼin wayuu eeka ouktüin süka wayuuin neʼe waya. Müsü tü Wiwüliakat: «Isaleesia nüchiki wanee wayuu naakajirüinjachin wanee nuwala jee naapüin nümüin Maleiwa wanee kasa niiʼirakaluʼu [...]. Nnojotsü jaralüin ountüin tia» (Salmo 49:7, 8, TNM). Choʼujaashaatasü wamüin wakaaliinjünüin süka isain wachiki wawalaajüin tü choʼujaakat süpüla waakajinnüin. Jaʼitairü wachajaain sukuwaʼipa tia wayakana wamüiwaʼa, iseerü wachiki.

Süka aipüralin wayuu Jeʼwaa, nuwalaajüin tü tratamiento choʼujaakat wamüin süpüla katüinjatüin woʼu, naaʼinrüin tia nükajee Jesuu. ¿Jamüsü kateetka woʼu waneepia sükajee naapajiraain nikii Jesuu? «Oʼlojüneerü süpüshua tü waainjalakat woulia sükajee amülain nüsha Jesucristo». Weʼitaainjatü waaʼin sünain  moteerüin naaʼin Maleiwa tü waainjalakat otta kateerüin woʼu nutuma süpüla kaʼikat süpüshuaʼa sükajee amülain nüsha Jesuu (1 Juan 1:7; 1 Juan 5:13, TNM). Aneerüya nakuwaʼipa na wapüshi ouktüinnakana sutuma naapajiraain nikii Jesuu waaʼu. Saashin tü Wiwüliakat, ouktüsü wayuu süpüshuaʼa nünainjee waneeshia wayuu otta asoʼiraajeerü saaʼin wayuu nünainjee neʼe waneeshia wayuu, chia nia Jesuu (1 Corinto 15:21, 22). *

Tü asülajuushi kojutüleekat maʼin sünainjee süpüshuaʼa tü aapünakat wamüin shia naapüin Maleiwa nikii chi Nüchonkai waaʼu. Naaʼinrüin tia saaʼujee muloʼuin maʼin tü waalinkat nüpüla. Nnojoishi jaralüin aaʼinrüin wapüleerua wanee kasa eekai müin aka saaʼin tü naaʼinrakat Jeʼwaa, chi Maleiwakai. Shia neʼe tü eekat süpüla asünneʼerüin woulia tü kaainjalaakat jee tü ouktaakat. Müsüjeseʼe nnojoluin eein wanee asülajuushi eekai müin aka saaʼin tü naapakat Maleiwa wamüin.