«Shiiʼiyataakalaka tamüin chaa iipünaa wane einasee süpülajatü aluwatawaa, je eeshi chi Maleiwakai joyotüin saaʼu. Chinatüshi nia maa aka saaʼin tü kakuuna kanüliakat ‹jaspe› ooʼulaka ‹cornalina›. Je tü niinasekat, pasanainsü shia sünain wane kaspolüin jorottüsü maʼi, müsü aka saaʼin tü kakuuna kanüliakat ‹esmeralda›» (Alateetkat Mapeena 4:2, 3).

«Jorottoshootosü eejachire nia, müsü aka saaʼin wanee kasüpolüin ojuʼitaka juyapoʼu süʼütpaʼa wanee siruma. Müsü aka saaʼin wanee luusa warattuuika. Tia müsü aka saaʼin tü nüpülainkat Jeʼwaa» (Ezequiel 1:27, 28, TNM).

Tia niʼrakat Juan otta tü niʼrakat Ezequiel, shiiʼiyatüin pülashaatain Jeʼwaa. Aashajaashii naya süchiki kakuuna anasü maʼin, süchiki kasüpolüin otta süchiki niinase wanee aluwataai, nnojotsüjeseʼe kapüleein ayaawataa saaʼu tia. Naashin Juan nümaa Ezequiel, anachonsü maʼin shiyolojo eere Jeʼwaa, anasü naaʼin wayuu otta jimatüsü naaʼin sutuma.

Pansaasü tia sümaa tü nümakat chi salmistakai, müshi nia: «Jeʼwaa nia chi miyoʼushikai maʼin otta nia neʼe aʼwaajünüinjachika nümüiwaʼa. Nia chi miyoʼushikai noulia na wanee maleiwakana. Süpüshuaʼa tü sümaleiwasekalüirua wayuu, nnojotsü kasain anain apüla, aluʼujasaʼa Jeʼwaa, nia kakumainka süpüshuaʼa tü kasairua chakat iipünaa. Anashaatasü sümaa warattuuin eere nia; shia jaʼyaka nüpülain sümaa anachoin maʼin eere joyotuin nia» (Salmo 96:4-6, TNM).

Mayaapejeʼe niain Jeʼwaa chi Miyoʼushikai maʼin, nuchuntüin wamüin warütkaain nünainmüin sükajee woʼuraajüin nümüin. Jee nüküjüin naapajeerüin wanüiki woʼuraajapa (Salmo 65:2). Aipürai wayuu Jeʼwaa otta jülüjashii waya naaʼin, müshijeseʼe nümüin chi aluwataaushikai Juan: «Aipürai maʼin wayuu Maleiwa» (1 Juan 4:8, TNM).

«Je Esteban, sütüma niain katsüin chi Naaʼinkai Maleiwa naaʼu otta sünain chain chüntüin noʼu iipünaamüin, niʼrakalaka chi Maleiwakai sünain anashantain maʼi nia otta Jesús shaʼwatüin nikialuʼujee Maleiwakai. Nümakalaka namüin na wayuukana: ‹¡Jiirakaa! Teʼrüin jutatüin tü sirumakat otta chi Shipayakai Wayuu shaʼwatüin nikialuʼujee Maleiwa sünain laülawaa naʼatoʼujee›» (Aluwataaushikana 7:55, 56).

Maʼaka jeʼra kaʼi süpülapünaa niʼrüin Esteban tü kasairua chakat iipünaa eere chi Maleiwakai, oʼutüna aaʼinchi Jesuu natuma noʼutku na laülaakana napüleerua na fariseokana yalajanaka sünain aapajaa nünüiki Esteban. Tü niʼrakat Esteban, shiiʼiyatüin sünain katüin noʼu Jesuu, süsoʼireʼennüin naaʼin sümaa kojutüin nia atumawaa. Müshi Pablo süchiki tia: «Nüsoʼireʼerüin [Maleiwa] naaʼin Cristo süchikijee ouktüin süpüla nüikkaleʼerüin chamüin nikialuʼujee süpüla aluwatawaa wanaa nümaa chaa iipünaa eere nuluwataain. Otta Cristo, kojutshi maʼi nütüma chi Maleiwakai suulialeʼeya tü aapieekalüirua süpüshua nümaajatkat chaa iipünaa sirumaluʼu,  je suulialeʼeya tü yolujaakalüirua süpüshua, je noulialeʼeya na laülaayuukana napüshua yaa mmoluʼu, noulialeʼeya naya napüshua, na eekai naluwataain maaʼulu yaa je na eekai naluwataajeenain mapeena» (Éfeso 1:19-21).

Nnojotsü shiain neʼe süküjüin tü Wiwüliakat kojutüin maʼin Jesuu nutuma Jeʼwaa, süküjüinya jülüjashaatain wayuu naaʼin Jesuu. Jamüshijaʼa yaaiwaʼaya nia yaa mmapaʼa, niiyajüin eekai ayuulin otta nüsoʼireʼerüin naaʼin na ouktüshiikana. Aapajiraashi nia nikii süka alin maʼin Jeʼwaa nüpüla otta alin wayuu nüpüla (Éfeso 2:4, 5). Maaʼulu, chashi Jesuu nikialuʼujee Maleiwa otta alüʼütshi süpüla aluwatawaa saaʼu mmakat jee aneena nutuma napüshuaʼa na oonookana nümaa.

«Teʼrakalaka shiʼitaanüin niinase wanee aluwataai, nüikkalaaka chi Laülaa Eetüjüikaʼaya nümaiwa [...]. Eejana wattashaata maʼin naalii aʼyataakana nümüin otta wattashaata maʼin naalii na shaʼwatakana nümülatuʼu» (Daniel 7:9, 10, TNM).

Wattashaata maʼin naalii na aapiee niʼrakana Daniel chaa iipünaa. Anashaatasü maʼin tü niʼrakat. Anapüijüshii maʼin na aapieekana, kekiishii maʼin naya otta pülashii maʼin naya. Noʼutku na aapieekana serafines otta querubines münüshii. Alatüsü suulia 250 sukua suchuntünüin nanülia na aapieekana suluʼu tü Wiwüliakat.

Nnojoipuʼushii wayuuin na aapieekana namaiwa. Nukumajatüjülia naya Maleiwa süpülapünaa nukumajüin chi palajachikai wayuu. Soʼu nukumajüin Maleiwa tü mmakat, eejana naya sünain ananajaa otta aʼwatüshii naya najapü sutuma talatüin maʼin naya (Job 38:4-7).

Wanee kasa naʼyataaka anain na aapieekana nümüin Maleiwa shia nakaaliinjain maaʼulu sünain tü aküjaakat pütchi süchiki Nuluwataaya Maleiwa (Mateo 24:14). Niʼrüin Juan tü naaʼinrakat na aapieekana, müshi nia: «Teʼrakalaka wane aapiee waawatüin iipünaa sirumatuʼupünaa. Eʼitaaushi nia süpüla aküjaa sümüin wayuu nünüiki chi Maleiwakai, tü pütchi shiimüinkat süpüla kaʼikat süpüshua. Nüküjainjatü shia sümüin eʼirukuukat süpüshua sainküin mmakat süpüshua» (Alateetkat Mapeena 14:6). Mayaapejeʼe nnojoluin naashajaain na aapieekana sümaa wayuu maaʼulu maʼaka saaʼin sümaiwa, nakaaliinjain na aküjakana tü pütchi anasükat süpüla nantüin nanain na wayuu anamiakana.

«Eesü wane atkawaa chaʼaya iipünaa eere chi Maleiwakai. Chi aapiee müleʼoshikai kanüliakai Miguel je na aapiee nümaajanakana nütüma Maleiwa, atkaashii naya nümaa chi kayuushikai je sümaa tü aapiee nümaajatkalüirua. Otta nayakana, eejiraashii naya nümaa Miguel. Otta chi kayuushikai je na nümaajanakana, ayamüluushi nütüma Miguel. Nujutüin naya chajee  iipünaajee. Maleʼejüinreesalii naya chamüin. Chi kayuushi miyoʼushaata ojutünakai nümaʼanajee Maleiwa, nia chi wüi nümaiwajaikai, chi sülaülakai yolujaa kanüliakai Satanás, chi eʼikeʼerakai wayuu sainküin mmakat süpüshua. Ojutünüichipa nia yaa mmaluʼumüin namaa na aapiee nümaajanakana» (Alateetkat Mapeena 12:7-9).

Nnojotpuʼusü eein jimataa aaʼin chaa iipünaa. Yaaiwaʼaya neʼe Adán sümaa Eva yaa mmapaʼa, eʼrüijaashi wayumüin wanee aapiee nümüin Maleiwa, keeʼireesü naaʼin nuʼwaajünüin. Satanaa münüshi nia süka «Nüʼünüüin» nia Maleiwa. Mapa, eʼrüliijaashii wayumüin waneeinnua aapiee wanaa nümaa Satanaa, yolujaa münüshii soʼujeʼereʼeya tia. Eʼrünnüü maʼin wayumüin nümüin Jeʼwaa otta naainjirüin wayuu kasa mojusü.

Mojulaashaatashi Satanaa otta tü yolujaakalüirua. Naʼünüü naya na wayuukana otta müliashii naya natuma. Jamüshijaʼa Satanaa, nuʼuta aaʼinrü nümüʼlüin Job otta na aʼyataashiikana nümüin. Süchikijee, nuʼuta aaʼinnaa na polooshiikana nüchonnii Job sükajee wanee «jouktai miyoʼu» ojuttiraka piichi naaʼu. Mapa, ayuuishi Job nutuma Satanaa, «ourulajüsü sümaa kajüin nüta, nuuʼuinainjee sünainmüinreʼeya nikii» (Job 1:7-19; 2:7).

Alüʼütshi maʼin süpüla najaʼlajeʼennüin Satanaa. Soʼujeʼereʼeya nujutünüin yaa mmapaʼamüin, nütüjaa aaʼu sünain «sülüʼülüin nükalia» (Alateetkat Mapeena 12:12). Ajaʼttinnajachi waneepia Satanaa, tia shia wanee pütchi anasü maʼin.

«Puʼtteʼerüin wayuu suulia saainjala saʼakajee eʼirukuukat süpüshua sainküinjee mmakat süpüshua, süpüla shiajiraainjatüin sünain aʼyatawaa nümüin chi Wamaleiwasekai, maa aka na sacerdote judíokana sünain naʼyataapüʼüin nümüin. Je na oʼttaashiikana, sülaüleena naya wayuu pütüma sainküin mmakat» (Alateetkat Mapeena 5:9, 10).

Maʼaka süsoʼireʼennüin naaʼin Jesuu süpüla kepiaa chaa iipünaa, müinjana waneeinnua anoujashii. Müshi Jesuu namüin na aluwataaushii waneepiakana nümaa: «Oʼuneechi taya jooluʼu chamüin [iipünaamüin] jüpüleerua süpüla yapainjatüin tatüma tü paükalüirua jüpüla [...]. Aleʼejeechi taya jooʼomüin süpüla tasaajüin jia süpüla chainjanain jia eere taya» (Juan 14:2, 3).

Na anoujashii chainjanakana chaa iipünaa, chainjana naya sünain aluwatawaa wanaa nümaa Jesuu, aluwataainjana naaʼu na wayuu kepiainjanakana yaa mmapaʼa otta aneena naya natuma. Tia Aluwataayakat shia tü nachuntajatkat na nikirajüinkana Jesuu naashin, müshi nia: «Taata Maleiwa chakai sirumatuʼu, wule putuma tü pünüliakat. Püntira tü puluwataayakat. Saainjüna tü keeʼireekat paaʼin yaa mmapaʼa maʼaka saainjünüin chaa iipünaa» (Mateo 6:9, 10, TNM).

«Taapakalaka joo wane pütchi eejee tü einaseekat sünain emetuluin maʼi sünain maa: ‹Eejeechi jooluʼu chi Maleiwakai sümaa wayuu je kepiainjachi nia namaa [...]. Nümülialeena naya. Müiria nnojolüin ouktaa, mojuu aaʼin, aʼyalajaa, je saalii ayuulii, süka sülatüitpain süpüshuaʼale makat aka tia›» (Alateetkat Mapeena 21:3, 4).

Tü niʼrakat Juan, ekeraajeerü sükajee Nuluwataaya Maleiwa. Najaʼttireerü Jesuu jee na chainjanakana chaa iipünaa tü nuluwataayakat Satanaa. Otta paʼaraiiseerü tü mmakat natuma. Ajaʼtteerü süpüshuaʼa tü kasairua müliakalü atuma wayuu sainküin mmakat, akaʼaya neʼe tü ouktaakat, ajaʼtteerü.

¿Jameenaka na wayuu ouktüinnapakana, na nnojoliinjanakana chain chaa iipünaa? Asoʼireʼennüinjana aaʼin otta eeshii süpüla kepiain naya süpüla kaʼikat süpüshuaʼa yaa mmapaʼa paʼaraiisüpa shia (Lucas 23:43, TNM).