1-3. (1) ¿Kasa wanaaweemataka amaa tü shiimainkat? Püküja wanee shiyaawase (piirakaa sümüin tü ayaakuaakat). (2) ¿Jarat tü pütchi wasoutüinjatkat eʼipajee sünain ekirajaayakat tüü?

MAAʼULU yaa, wainma na wayuu ayaʼlajakana wanee kasa sümaa neiteʼerüin shia süchikijee. Shia eiteʼennaka maʼin tü ayaʼlajünakat suluʼupünaa Internet. Eesüjaʼa neiteʼerüle shia sünainjee nnojoluin shiain tü keeʼireekat naaʼin, mojule shia jee shiale sünainjee mamalainpain shia namüin. Neiteʼerüin shia süpüla suʼwanajaanüin namüin jee shiale süpüla shiiteʼennüin nanneetse.

² Nnojotpejeʼe müinjatüin sukuwaʼipa watuma tü shiimain suluʼukat tü Wiwüliakat. Jamüshiijaʼa wekirajaapa sünain tü shiimainkat, müsü wayaʼlajakai saaʼin otta nnojoleerü woiküin shia, ayateerü wanoujain sünain waneepia (paashajeʼera Proverbios 23:23; 1 Tim. 2:4). Sünain tü palajatkat ekirajaaya, wekirajaa anainrü wainmain kaʼi walatiraka sünain ekirajawaa süpüla wayaawatüin saaʼu tü shiimainkat. Eeshii na ooʼulaakana wanee aʼyatawaa walaaka maʼin jee eeshii na mojujiraakana sümaa napüshi jee naʼaleewainyuu saaʼujee naaʼinrüin tü sümakat tü Wiwüliakat. Eetaashii na eeʼiratakana nakuwaʼipa jee tü kasa mojusü jülüjapuʼukat naaʼin  otta tü kasa mojusü naaʼinrapuʼukat. Watüjaapejeʼe saaʼu alanaʼaleein maʼin tü kasa anasü weʼrakat sünainjee wayaawatüin saaʼu tü shiimainkat suulialeʼeya tü kasa wooʼulaakat süpüleerua.

³ Nüküjain Jesuu nüchiki wanee wayuu achajaakai süchiki kaaʼürülairua eekai anasüin. Jee nüntapa sünain tü kaaʼürüla anasükat maʼin jee kojutuka maʼin, nuiküin «süpüshuaʼa tü kasa eejatkat nümaʼana» süpüla niyaʼlajüin shia (Mat. 13:45, 46). Müsia neʼe wakuwaʼipa wayaawatapa saaʼu tü shiimainkat süchiki Nuluwataaya Maleiwa jee süchiki tü shikirajakat tü Wiwüliakat, wainma kasa wooʼulaaka süpüleerua. Kojutule wamüin tü shiimainkat, ayateena waya anoujain sünain. Eepejeʼe na wayuu nnojoliikana kojutuin amüin tü shiimainkat jee ooʼulaashii suulia anoujaa sünain. Nnojo waaʼinrüin tia. Saashin tü Wiwüliakat shia waaʼinrüinjatka tü nüchekakat chi Maleiwakai wapüleerua (paashajeʼera 3 Juan 2-4). Müsüjeseʼe kojutuinjatüin wamüin tü shiimainkat jee weʼitaainjatüin shia suluʼu wakuwaʼipa. Sünain ekirajaayakat tüü, asouteena waya shiʼipajee pütchikat tüü: ¿Jamüshii eeka na wayuu oikakana tü shiimainkat? ¿Jamüsü naaʼinraka tia? ¿Kasa waaʼinrajatka süpüla nnojoluin wooʼulaain suulia anoujaa sünain tü shiimainkat? ¿Kasa waaʼinrajatka süpüla ayatüin waaʼinrüin tü nüchekakat Jeʼwaa?

4. ¿Jamüshii nooʼulaaka suulia anoujaa sünain tü shiimainkat waneinnua nikirajüin Jesuu?

⁴ Nükalioʼu Jesuu, wainma na wayuu aapaakana sümaa tü shiimainkat, nnojoliipejeʼe kakaliain naya sünain anoujaa sünain. Jamüsüjaʼa süchikijee naaʼinrüin Jesuu wanee kasa pülasü nutuma Maleiwa süpüla nikirüin watta saalii wayuu, oʼunüsü tia wayuukalüirua nüchiirua waneemüin saʼata tü palaa chajatkat Galilea. Nüküjaka Jesuu wanee pütchi moʼooka atuma naya: «Müleka nnojorule jiküin tü teʼirukukat tayakai, chi Shipayakai Wayuu, je müleka nnojorule jüsüin tü tashakat, shiimüin sünain nnojoleerüin katüin joʼu». Eetaayaai nasakirüin Jesuu süchiki jamaluʼuluin tü nümakat, jashichijaashii neʼe naya nümüin jee namaka: «Mojuluʼut maʼin pütchikat tüü; ¿jaratkai aapajeeyaaka shia?». Sünainjee tia, watta maʼin naalii na nikirajüinkana Jesuu akatalaakana nuulia jee ouyantakana sünainmüin tü kasa napütakat paalainka süpüleerua anoujaa (Juan 6:53-66).

5, 6. (1) ¿Jamüshii nooʼulaaka waneinnua wayuu suulia anoujaa sünain tü shiimainkat maaʼulu yaa? (2) ¿Jamüsü sukuwaʼipa süpüla nooʼulaain suulia anoujaa sünain tü shiimainkat waneinnua wayuu?

⁵ Jaʼitakajeʼe neʼe maaʼulu yaa, eeshii na ooʼulaakana suulia anoujaa sünain tü shiimainkat. Eeshii na akaaʼinjaakana suulia anoujaa sünainjee süpansaajünüin wanee pütchi suluʼujeejatü tü Wiwüliakat otta shiale sünainjee tü naaʼinrakat jee tü nümakat wanee wawala. Eetaashii na jashichijaakana sünainjee nachiaanüin jee shiale sünainjee mojujiraain naya nümaa wanee wawala. Otta eeshii na wanaawakana aaʼin namaa na ooʼulaakana Jeʼwaa süpüla nekirajüin alawaa nüchiki otta süchiki nupueulose. Tüü, shia soʼutku tü kasa nakayalaakalü atuma waneinnua wayuu nuulia Jeʼwaa jee suulia tü nupueulosekat (Heb. 3:12-14). Anasüjeʼe shiale nashatüin nukuwaʼipa chi aluwataaushikai Pedro. Süchikijee nakatalaain waneinnua nikirajüin Jesuu nuulia sünainjee tü nümakat, nüsakirüin Jesuu na nikirajüinkana sünain maa: «Jama jiakana, ¿jamüinjatü jukuaippa? ¿Oʼuneeshii jia tamaʼanajeʼeya?». Nusoutakalaka Pedro nümüin: «Senyotkalee, nnojotsü wayuu eekai müin aka pia woʼunüinjachikai anainmüin,  süka shiimüin sünain shiiʼiranajaaitpain waaʼin sütüma pünüiki süpüla [katüinjatüin woʼu waneepia, TNM]» (Juan 6:67-69).

⁶ Eeshii na ooʼulaakana suulia anoujaa sünain tü shiimainkat süka seemiajaain nanoula shiʼipaʼaya. Saashin tü Wiwüliakat, nakuwaʼipa naya wayuukana müsü aka saaʼin wanee anuwa oʼunajaka sotpaʼajee palaa sutuma tü sümünakat (Heb. 2:1). Wayuukana naainnua, nnojoishiiyaaje ooʼulaweein suulia anoujaa sünain tü shiimainkat, eemiajaapejeʼe naalin Jeʼwaa napüla jee mapa maalinsai nia napüla. ¿Kasa waaʼinrajatka süpüla nnojoluin sülatüin tia wamüin?

7. ¿Kasa waaʼinrajatka süpüla nnojoluin wooʼulaain suulia anoujaa sünain tü shiimainkat?

⁷ Süpüla ayatüin waaʼinrüin tü nüchekakat Jeʼwaa, waapaainjatü amaa tü nümakat wamüin jee oonooinjana waya sümaa süpüshuaʼa tü kasa nuluwataakalü anain waya. Shia kojutuinjatka maʼin wamüin tü sümakat tü Wiwüliakat jee woʼunirüinjatü wakuwaʼipa süka. Müshinka David nümüin Jeʼwaa sünain oʼuraajaa: «Oʼuneechi taya süchiirua tü shiimainkat» (Sal. 86:11). Naaʼinrüin David waneepia tü nüchekakat Jeʼwaa nüpüleerua. Washata nukuwaʼipa, nnojorüle müin shia watuma, iseerü waaʼin süchiirua tü kasa wooʼulaakat süpüleerua anoujaa jee keeʼireejeerü waaʼin weiteʼerüin shia süchikuaʼa. Nnojotpejeʼe süpüla waneeküin jaralin tü pütchi waapaainjatkalü amaa jee tü wayoutuinjatkat, jama waaʼinrüinjatüin süpüshuaʼa tü nüchekakat Jeʼwaa (Juan 16:13). Sünain tü palajatkat ekirajaaya, wekirajaa anainrü jaʼraisü kasa wooʼulaainjatka süpüleerua wekirajaain sünain tü shiimainkat. Wekirajaa joo sünain tü waaʼinrajatkat süpüla nnojoluin isain waaʼin süchiirua tü kasa wooʼulaakat süpüleerua anoujaa (Mat. 6:19).

8. ¿Jamüshii eeka süpüla wooʼulaain suulia anoujaa sünain tü shiimainkat nnojorüle eejüin waaʼin? Püküja tü alatakat sümüin Emma.

⁸ Tü kaʼi waaʼinrajatkalü oʼu wanee kasa. Süpüla nnojoluin wooʼulaain suulia anoujaa sünain tü shiimainkat, wajayatüinjatü tü kaʼikat. Nnojorüle eejüin waaʼin sünain tia, eesü süpüla walatirüin wainma oora sünain ashaitaa, sünain aapajaa wanee kasa, sünain aaʼinraa tü kasa kamalainkat wamüin jee shiale sünain anajaa wanee kasa suluʼu Internet jee suluʼu telewisoot. Mayaapejeʼe nnojoluin mojuin tia, eeshii kamaʼale waya sünain jee nnojoleerü apütaayain kaʼi süpüla wekirajaain sünain tü Wiwüliakat jee süpüla waküjain pütchi. Tia, shia tü alatakat sümüin wanee wawala Emma sünülia. * Jintuluiwaʼaya shia, kamalainsü maʼin sümüin amoʼuwaa jee süchajaain maʼin sukuwaʼipa süpüla saaʼinrüin tia. Nnojotpejeʼe talatüin saaʼin süka waneepiain shia sünain aaʼinraa tia jee süchajaaka sukuwaʼipa süpüla suʼwanajaain tia. Jee saaʼinraleein maʼin tia sünainjee tü süküjakat tü wawalakat Cory Wells, wawalakat tia, ashaitapuʼusü sukuwoʼu ama suʼupala wainma wayuu. * Maaʼulu yaa, aʼyataasü maʼin Emma nümüin Jeʼwaa jee apütaasü kaʼi süpüla kottüin shia namaa na süpüshikana jee namaa  na saʼaleewainyuukana. Aleewasü maʼin shia nümaa Jeʼwaa jee anasü maʼin saaʼin süka sütüjaain saaʼu sajayatüin tü kaʼikat süpüla shiʼyataain maʼin nümüin Jeʼwaa.

9. ¿Kaseerü alataka wamüin shiale waaʼinmaain kamaʼanaa wainma korolo?

⁹ Kamaʼanaa wainma korolo. Süpüla ayatüin waaʼinrüin tü nüchekakat Jeʼwaa, nnojotsü kachiiruainjatüin waaʼin kamaʼanaa wainma korolo. Wanaa sümaa wayaawatüin saaʼu tü shiimainkat, watüjaa aaʼu kojutuleein maʼin aʼyatawaa nümüin Jeʼwaa suulialeʼeya kamaʼanaa wainma kasa. Jee wainma kasa wooʼulaaka süpüleerua tü shiimainkat. Shiasaʼa mapa, weʼrapa nayaʼlajüin na waneinnua wanee serulaat, wanee tableta jeketkat ojutüin jee wainmale kasa namaʼana, eesüjaʼa süchunjale waaʼin sünainjee tia. Nnojorüle anain neʼe waaʼin sümaa tü kasa eekat wamaʼana, waaʼinmaajeerü neʼe kamaʼanaa wainma korolo suulialeʼeya aʼyatawaa nümüin Jeʼwaa. Tia shia tü alatakat nümüin Demas. Süka shiain kachiiruain naaʼin tü washirüükat akatalaashi nia nuulia Pablo jee ooʼulaashi suulia aʼyatawaa nümüin Jeʼwaa (2 Tim. 4:10). Eesüjaʼa shiale kojutuleein maʼin nümüin Demas kamaʼanaa wainma korolo suulialeʼeya tü niʼyataainkat nümüin Jeʼwaa. Otta eesüjaʼa isale naaʼin süchiirua tü kasa nuuʼulaakat süpüleerua niʼyataajiraainjachin nümaa Pablo. ¿Kasa watüjaka sünainjee tü alatakat nümüin Demas? Shia nnojoluinjatüin suchuntaain waaʼin kamaʼanaa süchikuaʼa tü korolo wooʼulaakat paalainka süpüleerua tü shiimainkat. Shiale waaʼinmaain maʼin tia, mojuteerü wamüin tü shiimainkat.

10. ¿Kasa tü nnojoluinjatkat waaʼinrüin süpüla ayatüin waaʼinrüin waneepia tü nüchekakat Jeʼwaa?

¹⁰ Wakuwaʼipa sümaa wapüshi otta waʼaleewainyuu. Süpüla waaʼinrüin waneepia tü nüchekakat Jeʼwaa, nnojoluinjatü waaʼinrüin tü namakat na waneinnua wamüin sükajee napüleeruain waaʼin. Woʼttaiwaʼaya sünain anoujaa, aʼwanajaasü wakuwaʼipa namaa wapüshi jee waʼaleewainyuu, eeshii na nnojoliikana ojutaain wamaa sünainjee wanoujain, eepejeʼe na ayoutaleekana süchiki tia (1 Ped. 4:4). Wachajaain maʼin sukuwaʼipa süpüla anajiraain waya sümaa wapüshi jee waʼaleewainyuu, eejapejeʼe waaʼin suulia joo waaʼinrüin wanee kasa nnojotka anain nümüin Jeʼwaa shiiʼiree neʼe aneein wakuwaʼipa sümaa wapüshi jee waʼaleewainyuu. Nnojo aleewain waya namaa na mojutkana amüin Jeʼwaa, shia waaʼinra tü sümakat 1 Corinto 15:33, (TNM), naya neʼe aleewainjanakana amaa waya na wayuu aikana apüla Jeʼwaa.

11. ¿Kasa waaʼinrajatka süpüla wulein wakuwaʼipa?

¹¹ Tü kasa mojusü waaʼinrakat jee jülüjaka waaʼin. Wuleinjatü nakuwaʼipa noʼuluʼu Jeʼwaa na wayuu aaʼinreekana waneepia tü nüchekakat (Isa. 35:8; paashajeʼera 1 Pedro 1:14-16). Wayaawatapa saaʼu tü shiimainkat, wainma kasa weeʼirataka sünain wakuwaʼipa. Eeshii na eeʼirataleekana nakuwaʼipa. Eejüinjatpejeʼe waaʼin wapüshuaʼa suulia wayarülajaain wakuwaʼipa. ¿Kasaka waaʼinrajatüin süpüla wountüin tia? Soteesü waaʼin naapüin Jeʼwaa chi Nüchonkai waaʼu süpüla wuleinjatüin wakuwaʼipa (1 Ped. 1:18, 19). Sotule waaʼin kojutuin maʼin tü naaʼinrakat Jesuu wapüleerua sükajee naapajiraain nikii waaʼu, wuleerü wakuwaʼipa noʼuluʼu Jeʼwaa.

12, 13. (1) ¿Jamüsü wanaawainjatka tü jülüjakat waaʼin sümaa tü jülüjakat naaʼin Jeʼwaa süchiki tü miʼiraa niyoutakat? (2) ¿Kasa wekirajaainjatka anain?

¹² Sukuwaʼipa wayuu niyoutaka Maleiwa. Eeshiijaʼa wounejaanüle sünain wanee miʼiraa natuma na wapüshikana jee natuma na waʼaleewainyuukana. ¿Kasa akaalinjeenaka waya süpüla nnojoluin woʼunüin sünain wanee miʼiraa niyoutaka Jeʼwaa? Soteesü maʼin waaʼin  jamüin niyoutaka Jeʼwaa wanee miʼiraa otta anasü waashajeʼerüle tü karaloʼutairua eekat wamaʼana aashajaaka süchiki jamakuwaʼipalüin shia. Jülüjeesü waaʼin tü pütchi sümakat tü Wiwüliakat süchiki jamüin nnojoliika waya sünainpünaain tü miʼiraa niyoutakat Jeʼwaa. Müle shia watuma, watüjaajeerü aaʼu suluʼuin waya tü wopu anakat nümüin Maleiwa (Éf. 5:10). Weʼitaale maʼin waaʼin nünain Jeʼwaa jee sünain tü nümakat wamüin, nnojoleena waya mmoluwaain seema jameerüin nanüiki na waneinnua wachiki (Prov. 29:25).

¹³ Keeʼireesü waaʼin waaʼinrüin waneepia tü nüchekakat Jeʼwaa. ¿Kasaka waaʼinrajatüin süpüla ayatüin waya sünain aaʼinraa tia? Wekirajaajeerü anain apünüinsü kasa waaʼinrajatka süpüla wountüin tia.

14. (1) ¿Jamüsü choʼujaaka wekirajaain maʼin sünain tü Wiwüliakat? (2) ¿Jamüshii kekiinjanaka maʼin waya, waapaainjatka sümaa tü sümakat tü Wiwüliakat jee wayaawatüinjatka saaʼu wanee kasa?

¹⁴ Tü palajatkat kasa waaʼinrajatka shia wakatalüin kaʼi süpüla wekirajaain sünain tü Wiwüliakat jee wasakireʼerüin waaʼin sünain tü waashajeʼerakat. Wekirajaale maʼin sünain tü Wiwüliakat, kojuteerü wamüin tü shiimainkat otta ayateerü wanoujain sünain. Saashin Proverbios 23:23, nnojotsü neʼe watüjaainjatüin saaʼu tü shiimainkat, kekiinjana maʼin waya, waaʼinrüinjatü tü sümakat tü Wiwüliakat jee wayaawatüinjatü saaʼu wanee kasa. Kekiire maʼin waya, waaʼinreerü tü anasükat. Wayaawatüle saaʼu wanee kasa eesü süpüla waʼwanaajireʼerüin shia sümaa tü watüjaatüjütkalia aaʼu. Eesüjaʼa süchiaale waya tü sümakat tü Wiwüliakat, süka jamüin, wayaawatüin saaʼu kasain wanoutajatüin sünain wakuwaʼipa. Waapaamaatüinjatü amaa tü süchiaakalü anain waya tü Wiwüliakat, jama kojutuleein maʼin tü sümakat suulialeʼeya pülaata (Prov. 8:10).

15. ¿Kasa saaʼinmajaka oulia waya tü shiimainkat?

¹⁵ Tü wane kasa waaʼinrajatkat shia weʼitaainjatüin suluʼu wakuwaʼipa tü shiimainkat. Saashin tü Wiwüliakat, tü shiimainkat müsü aka saaʼin tü siʼira naʼatapuʼukat na surulaat chajanakana Roma (Éf. 6:14). Sümaiwa paala, naʼatapuʼuin wanee surulaat tü nüsiʼirainkat süpüla nnojoluin jamajüin nia, ichere shia nünain, nnojoipuʼushi jamajüin. Tü pütchi suluʼukat tü Wiwüliakat müsü aka saaʼin tü siʼira naʼatakat wanee surulaat süpüla atkawaa, saaʼinmajüin waya suulia tü alawaa ekirajünakalü anain otta aneerü tü kasa waneekakat sutuma. Otta müsia sülatüle wamüin wanee kasa mojusü jee suuʼulakünüle waaʼin, icheena waya süchiirua aaʼinraa tü anasükat. Jamüshijaʼa wanee surulaat nnojoishi süpüla nuʼunüin sünain atkawaa sümaa nnojoluin nünain tü nüsiʼirainkat. Müinjatia  neʼe watuma, weʼitaainjatü suluʼu wakuwaʼipa tü sümakat tü Wiwüliakat. Eepuʼusü sünain tü siʼirakat wanee kachueera eeinjatüle nükacherüin nüchajaruutse wanee surulaat. Wekirajaa sünain wanee kasa meemataka aka saaʼin tia, ayateetka waaʼinrüin atuma tü nüchekakat Jeʼwaa.

16. ¿Jamüsü keeʼireejeetka waaʼin waaʼinrüin waneepia tü nüchekakat Jeʼwaa wekirajüle wayuu sünain tü Wiwüliakat?

¹⁶ Tü apünüinkat kasa waaʼinrajatka shia wekirajüin maʼin wayuu sünain tü sümakat tü Wiwüliakat. Tü Nünüikikat Maleiwa müsü aka saaʼin nüchajaruutse wanee surulaat icheka najapuluʼu. Müinjatia neʼe sukuwaʼipa nünüiki Maleiwa watuma (Éf. 6:17). Eesü süpüla wachajaain maʼin sukuwaʼipa süpüla anain shikirajia wayuu watuma sükajee tü Wiwüliakat (2 Tim. 2:15). Wekirajüle wayuu sünain tü Wiwüliakat, wayaawateerü maʼin saaʼu tü shiimainkat jee kojuteerü maʼin shia wamüin. Otta keeʼireejeerü waaʼin waaʼinrüin waneepia tü nüchekakat Jeʼwaa.

17. ¿Jamüsü kojutuka maʼin pümüin tü shiimainkat?

¹⁷ Nüsülajala Jeʼwaa wamüin tü shiimainkat. Sünainjee tia, eeshii süpüla aleewain waya nümaa chi Washi iipünaajachikai otta nnojotsü eein wanee kasa kojutuleeka maʼin suulia tia. Watta saalii kasa nikirajaka anain waya Jeʼwaa, choʼujaayütpejeʼe watüjain sooʼomüin. Nüküjain wamüin Jeʼwaa ayateenain waya nikirajüin waneepia. Tü shiimainkat müsü aka saaʼin wanee kaaʼürüla kojutuka maʼin. Wachajaa maʼin sukuwaʼipa süpüla wayaawatüin maʼin saaʼu jee nnojo wooʼulaain suulia anoujaa sünain. Müle shia watuma meena waya maʼaka naaʼin David sünain aaʼinraa waneepia tü nüchekakat Jeʼwaa (Sal. 86:11).