1, 2. (1) ¿Kasa tü kojutukat maʼin wamüin? (2) Püküja süchiki tü kasa anasü nikirajakalü anain waya Jeʼwaa otta jamüin kojutuinjatka shia wamüin. (Piirakaa sümüin tü ayaakuaakat).

¿KASA tü kojutukat maʼin wamüin? Tü kojutukat maʼin wamüin, shia tü aleewaakat nümaa Jeʼwaa otta nnojotsü eein wanee kasa kojutuleekat maʼin wamüin. Jee kojutusü maʼin wamüin tü sümakat tü Wiwüliakat süka shiain aleewain atuma waya nümaa Jeʼwaa (Col. 1:9, 10).

² Jülüja waaʼin tü kasa anasü nikirajakalü anain waya Jeʼwaa sükajee tü Wiwüliakat. Nüküjain wamüin suluʼu tü Wiwüliakat kasaichin nünülia, jamaluʼuluin shia jee jamüin maʼin nukuwaʼipa. Nüküjain wamüin alin maʼin waya nüpüla, naapüinjeseʼe chi Nüchonkai süpüla outajachin nia saaʼu waainjala. Nüküjain wamüin süchiki Nuluwataaya chi Mesíaskai, nachiki na anoujashii chainjanakana iipünaa otta na «wane anneerüiruayaʼa» waneejannuu kepiainjanakana yaa saaʼu tü Mmakat Paʼaraiisüpa shia (Juan 10:16). Nikirajüin waya Jeʼwaa sünain tü waaʼinrajatkat süpüla  anain wakuwaʼipa. Kojutusü maʼin wamüin tü nikirajakalü anain waya süka eein süpüla warütkaain nünainmüin chi Kakumalakai waya otta wayaawatüin saaʼu kasapülajanain nukumajaka waya.

3. ¿Achuntushiche Jeʼwaa nneerü wamüin süpüla nikirajüin waya sünain tü shiimainkat?

³ Asülajüi maʼin Jeʼwaa, naapüinjeseʼe chi Nüchonkai süpüla outajachin nia saaʼu waainjala. Nüchajaale maʼin wanee wayuu sukuwaʼipa süpüla nütüjaainjatüin saaʼu tü shiimainkat, nükaalinjeechi nia Jeʼwaa süpüla niyaawatüin saaʼu. Nnojoishi Jeʼwaa achuntuin nneerü wamüin süpüla nikirajüin waya sünain tü shiimainkat. Eejachi wanee wayuu Simón münüshi, aküjashi nia süchiki nneerü namüin na aluwataaushiikana süpüla saapünajatüin pülaa nümüin süpüla nüntajachin chi naaʼinkai Maleiwa nutuma suluʼumüin saaʼin wayuu. Nümakalaka Pedro nümüin: «¡Amülouijiraa pümata [...] sümaa tü pünneetsekat saaʼu suwataain pikiiruʼumüin piyalajeein tü kasa nüsülajakat Maleiwakai wamüin, tü wainkakat aka waaʼinrüin kasa eekai müin aka tüü!» (Aluw. 8:18-20). ¿Jamaluʼutka ayaʼlajaa tü shiimainkat?

4. ¿Kasa wekirajaainjatka anain sünain ekirajaayakat tüü süchiki tü shiimainkat?

⁴ (Paashajeʼera Proverbios 23:23). Wachajaainjatü maʼin sukuwaʼipa süpüla wayaawatüin saaʼu tü sümakat tü Wiwüliakat. Süpüla wountüin tia, wainmainjatü kasa wooʼulaaka süpüleerua. Wayaawatapa saaʼu tü shiimainkat, eejüinjatü waaʼin suulia woikajayaain shia, wooʼulaain suulia. Wekirajaajeerü anain ¿Jamaluʼuluin ayaʼlajaa tü shiimainkat otta jeʼrainjatüin wawalaajüin süpüla wantüin sünain? Watüjaapa saaʼu tia, kojuteerü maʼin wamüin tü shiimainkat otta nnojoleerü woiküin shia. Wayaawateerü aaʼu kojutuin maʼin tü shiimain nümaʼanajeejatkat Jeʼwaa suulialeʼeya kasa eeka eein.

5, 6. (1) ¿Kasa waaʼinrajatka süpüla wayaʼlajüin tü shiimainkat sümaa nnojoluin waapüin nneerü saaʼu? Püküja wanee shiyaawase. (2) ¿Kasa anasü weʼreetka sünainjee tü shiimain nümaʼanajeejatkat Jeʼwaa?

⁵ Waapüle süchiki süsülajünüin wanee kasa, eesüjaʼa jülüjale waaʼin eeinjatüin wanee kasa waaʼinrajatka jee waapajatka saaʼu. Tü pütchikat «piyaʼlaja» makat suluʼu Proverbios 23:23, «antaa sünain wanee kasa» maluʼulu suluʼu hebreo. Tia sünainpünaasü achajawaa sukuwaʼipa süpüla eeinjatüin wamaʼana wanee kasa. Weʼitaa wanee shiyaawase: jamüsüjaʼa piʼrüle jee paapüle süchiki süsülajünüin pülaʼana chaa metkaaraluʼu. ¿Eeʼeraa meetche neʼe tia pülaʼanakat wepialuʼu? Nnojo, jaʼitayaain süsülajünüin, choʼujaasü woʼunüin metkaaraluʼumüin süpüla wasaajüin shia. Müsia neʼe sukuwaʼipa süpüla wayaʼlajüin tü shiimainkat, choʼujaasü waaʼinrüin waneirua kasa.

⁶ (Paashajeʼera Isaías 55:1-3). Sükajee tü nüküjakat Jeʼwaa wamüin suluʼu pütchikat tüü, wayaawata aaʼu jamaluʼuluin ayaʼlajaa tü shiimainkat otta jamüin aneetka wakuwaʼipa sutuma. Nüküjain Jeʼwaa yala müin tü nünüikikat maʼaka saaʼin wüin, leechi jee wiino. Tü shiimain nümaʼanajeejatkat Jeʼwaa müsü aka saaʼin tü wüin saamatüsü nüsakat wanee wayuu miyaasükai maʼin. Jee müsü shia aka tü leechi miyoʼukat jee katsüinkai atuma wanee joʼuu. Müsia neʼe sukuwaʼipa tü Wiwüliakat wamüin akooʼomüinraasü maʼin wanoula nünain Jeʼwaa sutuma. ¿Jamüsü maka aka saaʼin wiino tü nünüikikat Jeʼwaa? Saashin tü Wiwüliakat, tü wiinokot sünainpünaasü talataa aaʼin (Sal. 104:15). Müsüjeseʼe wanaa sümaa naashajaain Jeʼwaa süchiki ayaʼlajaa wiino, shia nüküjeeka achiki wamüin shiain neʼe talatüin atuma waaʼin waaʼinrüle tü nümakat wamüin (Sal. 19:8). Nüküjain Jeʼwaa wamüin müin aka saaʼin  wüin, leechi jee wiino tü Nünüikikat. Tia süpülajatü watüjaain saaʼu aneerüin neʼe wakuwaʼipa wayaawatüle saaʼu tü shiimainkat jee waaʼinrüle tü nümakat wamüin. Wekirajaajeerü süchiki jaʼraisü kasa wooʼulaainjatka süpüla wountüin wayaʼlajüin tü shiimainkat.

7, 8. (1) ¿Kasa waaʼinrajatka süpüla wayaawatüin saaʼu tü shiimainkat? (2) ¿Kasa saaʼinraka wanee majayüt süpüla shiyaawatüin saaʼu tü shiimainkat? ¿Kasa anasü shiʼraka sünainjee?

⁷ Tü kaʼi waaʼinrajatkalü oʼu wanee kasa. Choʼujaasü wooʼulaain motsomüin suulia aaʼinraa waneirua kasa süpüla wayaawatüin saaʼu tü shiimainkat. Wainma tü kasa waaʼinrawaikat waneʼewai wakua, choʼujaapejeʼe wachajaain sukuwaʼipa süpüla waapajüin tü pütchi anasükat süchiki Nuluwataaya Maleiwa, waashajeʼerüin otta wekirajaain sünain tü Wiwüliakat jee tü karaloʼutairua ayuʼnnakat suluʼujee. Jee müsia yapainjanain waya süpüla tü outkajawaakat. Süpüla wountüin waaʼinrüin tia, nnojoluinjatü waaʼinrüin waneirua kasa nnojotka choʼujaain maʼin (paashajeʼera Éfeso 5:15, 16, TNM). ¿Jeʼrache kashi niyaawataka amaa wanee wayuu tü kasa mapüleekat suluʼujee tü Wiwüliakat? Oʼunüsü tia süchiirua nukuwaʼipa wanee wayuu. Nnojoishi süpüla eein wanee wayuu ayaawatakai maʼin saaʼu tü kasa nütüjaakalü aaʼu Jeʼwaa, tü nukuwaʼipakat jee tü kasa nukumalakat (Roma 11:33). Suluʼu tü palajatkat maʼin Aapiria Wayuu ojuʼitaka suluʼu inkülee suʼwanaajireʼerüin tü shiimainkat sümaa wanee süsii wunuʼu, sümaka süchiki: «Nnojo anain neʼe paaʼin sümaa waneesia süsii wunuʼu. Müleka anainjatüle neʼe paaʼin sümaa waneesia, nnojotsüjeʼe soʼuyaa sümüin nutuma Maleiwa wanaa sümaa nukumajüin shia. Ayata pia sünain atpajaa, ayata püchajaain süchiki». Wasakireʼera waaʼin sünain tüü: «¿Teʼraajüinche maʼin nukuwaʼipa Jeʼwaa?». Jaʼitakajeʼe neʼe katapa woʼu süpüla kaʼikat süpüshuaʼa ayateeria neʼe choʼujaain wamüin weʼrajüin maʼin nukuwaʼipa Jeʼwaa. Choʼujaasü maʼin maaʼulu wajayatüin kaʼi süpüla wayaawatüin saaʼu tü shiimainkat. Wekirajaa süchiki wanee wayuu ayaawateeka saaʼu tü shiimainkat.

⁸ Saori, * shia wanee majayüt chejeʼewat Japón jee akolojokot Nueva Yorkmüin (Estados Unidos) süpüla koleejiain shia chamüin. Soʼu wanee kaʼi, antüsü wanee wawala pürekutsoot shipialuʼumüin Saori jee süküjaka pütchi sümüin. Saori anoujasü suluʼu wanee iküleesia eere wainmain na chejeʼewaliikana Japón wanaa sümaa. Sükajee anain maʼin sümüin Saori tü kasa shikirajaakalü anain suluʼujee tü Wiwüliakat, suchuntuin sümüin tü wawalakat shikirajaiwa shia piantua süpüla semaanaka. Mayaapejeʼe koleejiain jee shiʼyataain Saori, süchajaain sukuwaʼipa süpüla suʼunüin sünain tü outkajawaakat. Ooʼulaasü shia suulia aaʼinraa waneirua kasa nnojotka choʼujaain maʼin, süpüla shikirajaain maʼin sünain tü shiimainkat. Sükajee saaʼinrüin tia, akooʼomüinraasü maʼin sunoula. Woutiisasü shia nnojoluiwaʼaya waneein juya süchikijee suʼttüin sünain ekirajawaa sünain tü Wiwüliakat. Soʼu 2006, aipirua kashi süchikijee woutiisain shia, pürekutsootsü shia jee ayatayülia shia sünain.

9, 10. (1) ¿Jamüsü nnojotka kachiiruain waaʼin kamaʼanaa wainma korolo wayaawatapa saaʼu tü shiimainkat? (2) ¿Kasa suuʼulaaka wanee majayüt shiyaawatapa saaʼu tü shiimainkat otta jamüsü saaʼin sutuma tü saaʼinrakat?

⁹ Kamaʼanaa wainma korolo. Süpüla wayaawatüin maʼin saaʼu tü shiimainkat eeshiijaʼa wooʼulaale suulia wanee aʼyatawaa eeka walaain maʼin jee eʼnnaajünaka anainjee waya sutuma wayuu. Jülüja waaʼin tü naaʼinrakat piamashii  wayuu olojulii jime, naya wayuukana nia Pedro otta Andrés. Wanaa sümaa nuunejaain naya Jesuu süpüla nümaatalainjanain naya sünain okotchojoo wayuu süpüla saapajüinjatüin nünüiki, napüta namüsüjaʼa tü nakusuinkat süpüla oʼunaa nümaa (Mat. 4:18-20). Nnojotpajaʼa maluʼuluin tia nuuʼulaainjachin wanee wayuu suulia niʼyataain sükajee niyaawatüin saaʼu tü shiimainkat. Choʼujaasü niʼyataainjachin wanee wayuu süpüla naapüin tü choʼujaakat sümüin nüpüshi (1 Tim. 5:8). Niyaawatüinjatpejeʼe saaʼu nnojoluinjatüin kachiiruain naaʼin kamaʼanaa wainma korolo. Nüküjain Jesuu nnojoluinjatüin kachiiruain waaʼin wainmainjatüin kasa wamaʼana yaa saaʼu tü Mmakat shia jülüjainjatka waaʼin waneepia anainjatüin wakuwaʼipa noʼuluʼu Jeʼwaa (Mat. 6:19, 20). Jülüja waaʼin tü alatakat sümüin wanee majayüt María sünülia.

¹⁰ Atüjatüjülia María ashaitaa golf motsoyuluiwaʼaya shia. Sünainjee sütüjain maʼin, aapünüsü wanee beca sümüin süpüla shikirajaain suluʼu wanee eʼikülee miyoʼu. Nnojotpuʼusü eein wanee kasa alanaʼaleeka ojutu sümüin María suulialeʼeya ashaitaa golf. Kachiiruasü saaʼin María shiainjatüin wanee ashaitüt eʼnnaajünaka maʼin sutuma wayuu jee wainmainjatüin nneerü sükanajüin. Suʼttaka María sünain ekirajawaa sünain tü Wiwüliakat. Kojutusü maʼin sümüin María tü kasa anasü sütüjakat jee shiʼitaain shia sünain sukuwaʼipa. Müsü shia: «Talatüsü maʼin taaʼin shiʼipaʼaya teeʼiratüin takuwaʼipa wanaapünaa sümaa tü sümakat tü Wiwüliakat». Shiyaawata aaʼu María kapüleejeerüin sümüin aleewaa nümaa Jeʼwaa otta ayatüinya shia sünain ashaitaa golf (Mat. 6:24). Suuʼulaaka María suulia tü keeʼireekat saaʼin maʼaka saaʼin shiainjatüin wanee ashaitüt eʼnnaajünaka maʼin sutuma wayuu jee wainmainjatüin nneerü sükanajüin. Maaʼulu yaa, pürekutsoot María otta talatashaatasü maʼin saaʼin saashin.

11. ¿Jameerü wakuwaʼipa namaa wapüshi jee waʼaleewainyuu sünainjee wayaawatüin saaʼu tü shiimainkat?

¹¹ Wakuwaʼipa namaa wapüshi otta waʼaleewainyuu. Eeshii mojujiraale waya namaa wapüshi jee waʼaleewainyuu saaʼujee waaʼinrüin tü sümakat tü Wiwüliakat. Wayaawata aaʼu tia, sünainjee tü nuchuntakat Jesuu nümüin Jeʼwaa nooʼopünaa na nikirajüinkana, müshi nia: «Anakaja müleka pükatarüle naya pünainmüin sütümajee tü pünüiki shiimüinkat» (Juan 17:17). Tü pütchikat «pükatala» süküjain nnojoluin wanaawain wakuwaʼipa namaa na manoujainsaliikana wayaawatapa saaʼu tü shiimainkat. Waneejatü wakuwaʼipa noulia süka woʼunuin süchiirua tü sümakat tü Wiwüliakat. Eeshii wapüleeruaanüle aaʼin saaʼujee wanoula natuma na kasayuukana wanain jee shiale natuma na waʼaleewainyuukana otta eeshii nakayalaale woulia. Nnojotsü ponuin waaʼin tia, jama nümüin Jesuu: «Suluʼu wane miichi, aʼülüjiraweena na apüshiikana maa aka natkaain wayuu eekai paʼünüüwajiraain» (Mat. 10:36). Nüküjapejeʼe Jesuu wainmeerüin maʼin tü kasa anasü aapüneetkat wamüin suulialeʼeya tü kasa wapütakat süpüleerua anoujaa (paashajeʼera Marcos 10:28-30, TNM).

12. ¿Kasa nuuʼulaaka wanee wayuu judío niyaawatapa saaʼu tü shiimainkat?

¹² Eeshi wanee wayuu judío Aarón nünülia, ekirajünüshi nia jintüliiwaʼaya sünain mojuin achuntaa nünülia Maleiwa. Mayaapejeʼe müin tia, nütüjawee aaʼu tü shiimainkat nüchiki Maleiwa. Soʼu wanee kaʼi, nüküjain wanee wawala nümüin eein süpüla suchuntunuin nünülia Maleiwa, maʼaka shiʼitaanüle waneirua wokaale sünain, «Jeʼwaa» sümeetka. Talatashaatashi maʼin Aarón sutuma tia, müshijeseʼe nuʼunüin eemüin tü ekirajüleekat judío süpüla nüküjainjatüin namüin na ekirajüliikana judío sünain eein süpüla suchuntunuin nünülia Maleiwa.  Nnojotpejeʼe anashin tia namüin. Eetaayaai talatüin naya nümaa sükajee nütüjaaitpain saaʼu kasaichin nünülia Maleiwa, ejenaana aaʼuchi neʼe nia natuma jee naʼleejüin nia. Jaʼitakajeʼe neʼe na nüpüshikana, jashichishii nümüin, nnojoipejeʼe ooʼulaain Aarón sutuma tia, ayatüshia nia ekirajaain nüchiki Jeʼwaa. Woutiisashi nia mapa jee aʼyataashi nia waneepia nümüin Jeʼwaa nünaajaaleepa. Maʼaka naaʼin Aarón, eesü süpüla sumojujaain wakuwaʼipa namaa na wapüshikana jee namaa na waneinnua wayaawatapa saaʼu tü shiimainkat.

13, 14. ¿Kasa waaʼinrajatka süpüla weeʼiratüin wakuwaʼipa jee tü jülüjakat waaʼin? Püküja süchiki tü naaʼinrakat Devynn sümaa Jasmine.

¹³ Tü kasa mojusü waaʼinrakat jee jülüjaka waaʼin. Wayaawatapa saaʼu tü shiimainkat jülüjasü waaʼin woʼunirüinjatüin wakuwaʼipa sükajee tü sümakat tü Wiwüliakat, müsüjeseʼe weeʼiratüinjatüin wakuwaʼipa jee tü jülüjakat waaʼin. Müshi chi aluwataaushikai Pedro süchiki tia: «Joonoo jümaala sümaa nünüiki Maleiwa saaʼu nüchooinapain jia. Nnojo jüshatüin tü jukuaippakat paala nnojolüiwaʼaya jütüjaain saaʼu nüchiki chi Oʼtteʼerüikai, wanaa sümaa kaainjalapüʼüin jia». Jee müshi nia: «Anakajaʼa müleka wulere jukuwaʼipa waneepia» (1 Ped. 1:14; 1 Ped. 1:15, TNM). Yarüttüsü maʼin nakuwaʼipa na wayuu chajanakana Corinto, müsüjeseʼe neeʼiratüinjatüin nakuwaʼipa na aʼyataweekana nümüin Jeʼwaa (1 Cor. 6:9-11). Müsia neʼe maaʼulu, watta naalii na wayuu eeʼiratakana nakuwaʼipa nayaawatapa saaʼu tü shiimainkat. Otta müshi Pedro namüin na anoujashii eejanakana nükalioʼu: «Kakaʼiya maʼi jia paalainka sünain juuʼulaküin tü mojusükot wanaa namaa na manoujainsaliikana. Juuʼulaa jumaala suulia kasa müin aka tia, maa aka jümaʼüjaain sümaa wayuu nnojotkat juʼwayuusein, maa aka jiperüin sümaa maaʼin jaaʼin sünain emiʼijaa, je maa aka aaʼinraa kasa mojushaatain sükajee jüüjüüin jia namüin na maleiwayaashiikana» (1 Ped. 4:3).

¹⁴ Devynn sümaa Jasmine asüliipuʼushii maʼin naya. Aʼyataai Devynn sünain ayaawajaa nneerü nnojoipejeʼe nia kakaliawalin sünain aʼyatawaa süka nipeʼrüin waneepia. Eʼnnaajünüsü maʼin Jasmine sünainjee jashichin maʼin shia. Soʼu wanee kaʼi, wanaa sümaa unatüin Jasmine süpaʼapünaa tü karateetkat sümaa shipeʼrüin, antiraasü shia nümaa wanee wawala misioneerokai sümaa nuʼwayuuse. Naküjaka na wawalayuukana sümüin nanteenain shipialuʼumüin tü wane semaanakat süpüla nekirajaain sümaa sünain tü Wiwüliakat. Shiasaʼa nantapa na wawalayuukana nipialuʼumüin Devynn sümaa Jasmine, epeʼtshii naya napüla. Eetaayaai süntapünaain suluʼu nekii nantajanain na wawalayuukana nepialuʼumüin. Naatapejeʼe tü neʼrakat na wawalayuukana piantuapa nakua namaʼanamüin. Nütüjawee aaʼulu Devynn sümaa Jasmine tü sümakat tü Wiwüliakat jee neʼitaamaatüin suluʼu nakuwaʼipa tü natüjakat sünainjee. Süpülapünaa apünüin kashi, nooʼulaain tü asüüshikat jee süchikijee tia, nachajaain sukuwaʼipa süpüla kasaalüinjanain naya. Saapa achikit wayuu maʼleekalia suluʼu tia pueulokot süchiki tü naaʼinrakat Devynn sümaa Jasmine. Otta watta naalii na wayuu ekirajaweekana sünain tü Wiwüliakat sünainjee tia.

15. ¿Kasa tü kapüleekat maʼin wamüin süpüla wooʼulaain wayaawatapa saaʼu tü shiimainkat? ¿Jamüsü kapüleeka ooʼulawaa tia?

¹⁵ Sukuwaʼipa wayuu niyoutaka Maleiwa. Eeshii na wayuu mapüleekana amüin ooʼulawaa suulia tü nakuwaʼipapuʼukat natuushinuu napüleerua jee tü ekirajünakalü anain naya sutuma napüshi nayaawatapa saaʼu mojuin tia nümüin Jeʼwaa. Eepejeʼe na kapüleekana amüin ooʼulawaa tia. Eesü shapaale naaʼin süka napüleeruaanüin aaʼin natuma napüshi,  na aʼyataajiraakana namaa jee nayale na naʼaleewainkana. Otta eesü kapüleere maʼin namüin ooʼulawaa suulia nakuwaʼipa sünainpünaale shia tü kasa naaʼinrawaikat nikiira wanee napüshi outuichikai (Deut. 14:1). ¿Kasa waaʼinrajatka süpüla weeʼiratüin wakuwaʼipa wanaapünaa sümaa tü keeʼireekat naaʼin Jeʼwaa wapüleerua? Shia watüjaale saaʼu tü naaʼinrüitkat waneinnua wawalayuu nayaawatapa saaʼu tü shiimainkat. Wekirajaa sünain tü naaʼinrakat na anoujashii chajanakana Éfeso süpüla neeʼiratüin nakuwaʼipa wanaapünaa sümaa tü keeʼireekat naaʼin Jeʼwaa.

16. ¿Kasa naaʼinraka waneinnua wayuu aapaakana sümaa tü shiimainkat?

¹⁶ Sümaiwa paala suluʼu tü pueulokot Éfeso aainjünapuʼusü maʼin sutuma wayuu tü naaʼinrakat na ouutshiikana. ¿Kasaka naaʼinrüin na wayuu aapaakana sümaa tü shiimainkat? Müsü tü Wiwüliakat süchiki tia: «Kojuyataajaʼa na eekai naʼyataapüʼüin sünain outsüü, nantirüin tü nakaralouktase sükuaippamaajatkat tü outsüükat. Nantirüin shia süpüla naʼajüinjatüin yala suʼupala süpüshuaʼa tü wayuukalüirua. Je shiyuʼnnakalaka jerain maʼi tü süliakat süpüshuaʼa. Eetaasüjaʼa ojuittüin 50.000 neerü pülaata tü süliakat. Je sükajee tüüirua, ayurulaasü maʼi tü nüchikükat chi Senyotkai Jesús. Otta shia, maapünaajuu amaalü maʼi» (Aluw. 19:19, 20). Naʼajüin naya anoujashiikana tü nakaraloʼusekat eereje wainmain maʼin nneerü sülia napüla, eʼrapejeʼe naya kasa anasü nutuma Jeʼwaa sünainjee naaʼinrüin tia.

17. (1) ¿Kasa wooʼulaaitka süpüleerua tü shiimainkat? (2) ¿Kasa wekirajaajeetka anain suluʼu tü wane ekirajaayakat?

¹⁷ Eesü tü kasa wooʼulaakat waneʼewai wakua süpüla wayaʼlajüin tü shiimainkat. Eeshii na ooʼulaakana suulia aaʼinraa waneirua kasa süpüla ekirajawaa sünain tü Wiwüliakat. Eeshii na ooʼulaakana suulia oʼunaa süchiirua washirü. Nnaʼaya na amojujaakana akuwaʼipa sümaa napüshi jee naʼaleewainyuu sutuma naaʼinrüin tü sümakat tü Wiwüliakat. Otta wainma na wawalayuu ooʼulaakana suulia tü kasa mojusü naaʼinrapuʼukat jee jülüjapuʼukat naaʼin otta na ooʼulaakana suulia tü sukuwaʼipa wayuu niyoutakat Jeʼwaa. Watüjaa aaʼu kojutuleʼeinyain maʼin tü shiimain suluʼukat tü Wiwüliakat suulialeʼeya tü kasa wooʼulaakat süpüleerua. Sutuma wayaawatüin saaʼu tü shiimainkat eeshi süpüla waʼaleewain Jeʼwaa jee nnojotsü eein wanee kasa kojutuka maʼin suulia tia. Jülüjale waaʼin tü kasa anasü eekat sünainjee watüjaain saaʼu tü shiimainkat, nnojoleerü antapünaain suluʼu wekii eein wayuu oikeeka tü shiimainkat. ¿Jamüsü naaʼinraka tia? ¿Kasa waaʼinrüinjatka süpüla nnojoluin woiküin tü shiimainkat? Wekirajaajeerü anain tia suluʼu tü wane ekirajaayakat.