¿Shiache jülüjaka paaʼin tü jülüjakat naaʼin Jeʼwaa?
«Nnojo jülüjüin jaaʼin maa aka tü jülüjakat naaʼin nayakana» (ROMA 12:2).
JAYEECHI: 56, 123
1, 2. ¿Kaseerü wayaawataka aaʼu weʼraajapa maʼin nukuwaʼipa Jeʼwaa? Püküja wanee shiyaawase.
JÜLÜJATAA paaʼin nüsülajüin wanee wayuu sümaa nuʼwayuuse wanee kasa nümüin chi nachonkai. Jee naapapa shia nümüin, müshii naya nümüin: «¿Jamüinjatü pünüiki süsülajünüle pümüin wanee kasa?». Nümaka chi jintüichonkai: «Anayaawatsü». Nüküjain chi jintüichonkai tia, mayaapejeʼe nnojoluin sujuʼitüin suluʼujee naaʼin. Miyoʼupa nia, niyaawateerü aaʼu jamüin kojutuka maʼin nümüin chi nüshikai jee sümüin tü niikat naapüin analuʼut saaʼu wanee kasa. Nnojoleerü choʼujaain nümüin «paapa analuʼut saaʼu tia» nümünüinjachin, jama naaʼinreerüin tia süka naaʼin nümüiwaʼa otta süka nüshatüin shia nünainjee chi nüshikai jee sünainjee tü niikat.
2 Müsia neʼe wakuwaʼipa woʼttaiwaʼaya sünain ekirajawaa sünain tü Wiwüliakat, wayaawata aaʼu jamüin choʼujaaka waaʼinrüin tü nuluwataakalü anain Jeʼwaa. Shiasaʼa mapa, weʼraajapa maʼin nukuwaʼipa Jeʼwaa, wayaawata aaʼu tü anakat jee tü mojukat nümüin otta kasain jülüjain naaʼin süchiki waneirua kasa. Wanaawale tü jülüjakat waaʼin sümaa tü jülüjakat naaʼin Jeʼwaa, waaʼinreerü otta waneekeerü tü anakat noʼuluʼu.
3. ¿Jamüsü kapüleʼewaika wamüin wanaawain tü jülüjakat waaʼin sümaa tü jülüjakat naaʼin Jeʼwaa?
3 Talatüsü waaʼin sünainjee wayaawatüin saaʼu tü jülüjakat naaʼin Jeʼwaa, kapüleepejeʼe aaʼinraa tia süka nnojoluin lotuin wakuwaʼipa. Eesüjaʼa watüjaale saaʼu nnojoluin anain noʼuluʼu Jeʼwaa wamaʼüjiraale wakuwaʼipa, kachiiruale waaʼin kamaʼanaa wainma korolo, weʼiteʼerüle isha wanain. Otta eesü watüjaale saaʼu jamüin waküjainjanaka pütchi. Mayaapejeʼe watüjain saaʼu tia, eesü kapüleere wamüin wanaawainjatüin tü jülüjakat waaʼin sümaa tü jülüjakat naaʼin Jeʼwaa süchiki tia. ¿Kasaka waaʼinrajatüin süpüla wanaawain maʼin tü jülüjakat waaʼin sümaa tü jülüjakat naaʼin Jeʼwaa? ¿Jamüsü aneetka sukuwaʼipa tü kasa waneekakat maaʼulu jee mapeena jülüjale waaʼin tü jülüjakat naaʼin Jeʼwaa?
TÜ WAAʼINRAJATKAT SÜPÜLA WASHATÜIN TÜ JÜLÜJAKAT NAAʼIN JEʼWAA
4. ¿Kasa waaʼinrajatka süpüla weeʼiratüin sukuwaʼipa tü kasa jülüjakat waaʼin?
4 Suluʼu Roma 12:2 (paashajeʼera), nüküjain chi aluwataaushikai Pablo tü waaʼinrajatkat süpüla wanaawainjatüin tü jülüjakat waaʼin sümaa tü jülüjakat naaʼin Jeʼwaa. Suluʼu tü ekirajaayakat pienchi, wekirajaa anainrü nnojoluinjatüin washatüin nakuwaʼipa na manoujainsaliikana jee wayoutajatüin tü alawaa naküjakat süpüla nnojoluin wanaawain waaʼin namaa. Naashin Pablo, choʼujaasü weeʼiratüin sukuwaʼipa tü kasa jülüjakat waaʼin. Müshiijeseʼe wekirajaainjanain sünain tü Wiwüliakat süpüla wayaawatüin saaʼu tü jülüjakat naaʼin Jeʼwaa, wasakireʼerüinjatü waaʼin sünain tia otta jülüjainjatü waaʼin tü jülüjakat naaʼin Jeʼwaa.
5. ¿Jamüinjatü sukuwaʼipa watuma wekirajaapa sünain wanee pütchi?
5 Wanaa sümaa wekirajaain, nnojotsü neʼe waashajeʼerüin wanee pütchi sümaa wejeettüin susoutia tü asakinnakalü anain. Wekirajaa anainrü jamüin sünüiki tü pütchikat nüchiki Jeʼwaa, süchiki tü jülüjakat naaʼin otta jamüin naaʼinraka wanee kasa. Wachajaain sukuwaʼipa süpüla wayaawatüin saaʼu jamüin nuluwataaka waya Jeʼwaa sünain aaʼinraa wanee kasa otta jamüin nüpülajaka waneirua kasa woulia. Jee jülüjasü waaʼin tü kasa weeʼiratajatkat sünain wakuwaʼipa jee sünain tü jülüjakat waaʼin. Kapüleepejeʼe wamüin wasakireʼerüin waaʼin sünain süpüshuaʼa tia wekirajaapa sünain wanee pütchi. Anapejeʼe wasakireʼerüle waaʼin motsomüin sünain tü waashajeʼerakat. Jamüshiijaʼa wekirajaale maʼaka wanee oora, eeshii süpüla wasakireʼerüin waaʼin soʼu 30 minuuto (Sal. 119:97; 1 Tim. 4:15, TNM).
6. ¿Kaseerü watüjaaka aaʼu wasakireʼerüle waaʼin sünain nünüiki Maleiwa?
6 Kiʼrale waya sünain asakireʼeraa waaʼin sünain tü sümakat tü Nünüikikat Maleiwa, watüjaajeerü aaʼu pansaain maʼin tü jülüjakat naaʼin Jeʼwaa. Otta müsia wayaawateerü aaʼu kasain jülüjain naaʼin Jeʼwaa süchiki wanee kasa jee wanaaweerü waaʼin nümaa. Weeʼiratüle sukuwaʼipa tü kasa jülüjakat waaʼin, wanaaweerü shia sümaa tü jülüjakat naaʼin Jeʼwaa.
TÜ JÜLÜJAKAT WAAʼIN SÜNAINPÜNAASÜ TÜ KASA WAAʼINRAKAT
7, 8. (1) ¿Kasa jülüjaka naaʼin Jeʼwaa süchiki kamaʼanaa wainma korolo? (Piirakaa sümüin tü ayaakuaa suluʼukat süpana 27). (2) ¿Kasa kojutuinjatka maʼin wamüin wanaawale tü jülüjakat waaʼin sümaa tü jülüjakat naaʼin Jeʼwaa?
7 Tü jülüjakat waaʼin sünainpünaasü shia tü kasa waaʼinrakat (Mar. 7:21-23; Sant. 2:17). Süpüla wayaawatüin saaʼu tia, wekirajaa süchiki waneirua kasa. Wekirajaa palajana sünain tü jülüjakat naaʼin Jeʼwaa süchiki kamaʼanaa wainma korolo. Jamüshijaʼa Jeʼwaa nüneeküin José sümaa María süpüla nepijüin chi Nüchonkai mayaapejeʼe nütüjaain saaʼu maʼletsein naya (Lev. 12:8; Luc. 2:24). Saashin tü Wiwüliakat wanaa sümaa joʼuuin Jesuu, shiisaleʼerüin nia María suluʼu wanee shiitain mürüt süka wotuin atunkülee noulia (Luc. 2:6, 7). Müleka keeʼireeyürüle naaʼin Jeʼwaa, joʼuushije Jesuu nutuma suluʼu wanee piichi eka anain. Shiapejeʼe keeʼireein naaʼin Jeʼwaa nipijünajachin chi Nüchonkai natuma wayuu kojutukai amüin aʼwaajaa Jeʼwaa.
8 Sutuma tü alatakat soʼu joʼuuin Jesuu, wayaawata aaʼu tü jülüjakat naaʼin Jeʼwaa süchiki kamaʼanaa wainma korolo. Eeshii na wayuu aapakana wainma kasa namüin nachonnii, jaʼitairü sumojujaain nakuwaʼipa nümaa Jeʼwaa sutuma tia. Shiapejeʼe kojutuin maʼin nümüin Jeʼwaa tü wakuwaʼipakat nümaa. ¿Wanaawasüche tü jülüjakat waaʼin sümaa tü jülüjakat naaʼin Jeʼwaa? ¿Kasa weeʼiyataka sükajee tü kasa waaʼinrakat? (Paashajeʼera Hebreokana 13:5).
9, 10. Wanaawale tü jülüjakat waaʼin sümaa tü jülüjakat naaʼin Jeʼwaa süchiki mojuin maʼin kaainjarale wanee wawala watuma, ¿kaseerü waaʼinraka?
9 Wanee kasa wekirajaainjatka anain shia süchiki kasain jülüjain naaʼin Jeʼwaa nüchiki chi wayuu kaainjalakai atuma wanee wawala otta ooʼuleʼetkai nia suulia aʼyatawaa nümüin Jeʼwaa. Müshi Jesuu süchiki tia: «Müleka kaainjarale sütüma wayuu wane anoujashi, maa aka jiakana, anashi müleka nujutinnüle chia wayuukai shirokumüin tü palaakat sünain kanutpünaainjachin nia wane ipa miyoʼu süpüla wattainjachin nia shiinaluʼumüin» (Mar. 9:42). Nnojotsü shaitaain tü nümakat Jesuu. Süka wanaawain naaʼin Jesuu nümaa chi Nüshikai, watüjaa aaʼu mojushaatain maʼin noʼuluʼu Jeʼwaa kaainjarale atumawaa na wayuu oushikajaakana süchiirua nukuwaʼipa Jesuu (Juan 14:9).
10 ¿Mojusüche maʼin wamüin tia maʼaka mojuin shia nümüin Jeʼwaa otta nümüin Jesuu? ¿Kasa weeʼiyataka sükajee tü kasa waaʼinrakat? Jamüsüjaʼa waapüle süchiki mojushiin namüin waneinnua wawalayuu tü waʼanaayakat jee yarüttüle nekiiruʼujutü sutuma tia, ¿kaseetche waaʼinraka? ¿Weeʼirateetche sukuwaʼipa waʼanaaya sükajee alin wapüla na wawalayuukana jee jaʼitasü kamalain washeʼin wamüin? (1 Tim. 2:9, 10).
11, 12. ¿Jamüsü wachechereetka waaʼin suulia aaʼinraa kasa mojusü wanaawale tü jülüjakat waaʼin sümaa tü jülüjakat naaʼin Jeʼwaa?
11 Wanee kasaʼaya wekirajaainjatka anain shia nüʼürülain Jeʼwaa tü kasa nnojotkat lotuin akuwaʼipa jee tü kaainjalaakat (Isa. 61:8). Mayaapejeʼe nütüjaain saaʼu Jeʼwaa suchuntawalin waaʼin aaʼinraa kasa mojusü süka nnojoluin lotuin wakuwaʼipa, keeʼireesü naaʼin wayoutuin tü kasa mojusü nüʼürülakat (paashajeʼera Salmo 97:10). Wasakireʼerüle waaʼin sünain jamüin nüʼürülaka Jeʼwaa tü kasa mojusükat, wanaaweerü tü jülüjakat waaʼin sümaa tü jülüjakat naaʼin süchiki tia jee naapeerü watsüin süpüla nnojoluin waaʼinrüin kasa mojusü.
Eesü waneirua kasa nnojotka anain mayaapejeʼe nnojoluin süküjünüin achiki suluʼu tü Wiwüliakat
12 Waʼürülale tü kasa mojusükat, watüjaajeerü aaʼu eein waneirua kasa nnojotka anain mayaapejeʼe nnojoluin süküjünüin achiki suluʼu tü Wiwüliakat. Jamüsüjaʼa maaʼulu, eesü wanee sukuwaʼipa oyonnojoo sünainpünaaka amaʼüjirawaa akuwaʼipa, lap dance münüsü. Naashin waneinnua wayuu, nnojotsü amaʼüjirawaain akuwaʼipa tia, müsüjeseʼe nnojoluin mojuin shia * ¿Müsüche tü jülüjakat naaʼin Jeʼwaa süchiki tia? Soto waaʼin nüʼürülain Jeʼwaa süpüshuaʼa tü kasa mojusükat. Müsüjeseʼe wachecherüinjatüin waaʼin suulia aaʼinraa kasa mojusü otta wayoutuinjatü tü kasa nüʼürülakat Jeʼwaa (Roma 12:9).
naashin.JÜLÜJATÜJÜLÜINJATÜ PAAʼIN TÜ PAAʼINRAJATKAT
13. ¿Jamüsü jülüjatüjülinjatka waaʼin tü jülüjakat naaʼin Jeʼwaa süchiki wanee kasa?
13 Wekirajaapa sünain tü Wiwüliakat wamüiwaʼa, jülüjeesü waaʼin kasain jülüjain naaʼin Jeʼwaa süchiki wanee kasa. Jülüjatüjürüle waaʼin tia, aneerü sukuwaʼipa tü kasa waneekakat. Otta nnojoleerü shapaakuʼu müin waaʼin saaʼu kasainjatüin waaʼinrüin waneekajatpa wanee kasa (Prov. 22:3). Wekirajaa jooluʼu nachiki waneinnua wayuu süküjakana achiki tü Wiwüliakat.
14. ¿Kasa watüjaka sünainjee tü nümakat José sümüin tü nuʼwayuusekat Potifar?
14 Wanaa sümaa süinkaweein tü nuʼwayuusekat Potifar nümaa José, niyoutamaatüin shia. Naaʼinrüin tia süka nütüjaain saaʼu tü jülüjakat naaʼin Jeʼwaa süchiki sukuwaʼipa kaʼwayuusee (paashajeʼera Génesis 39:8, 9). Müshi José sümüin nuʼwayuuse Potifar: «¿Jamataalainjachikalaka taya süpüla taaʼinrüinjatüin wane kasa eekai mojuin maʼi, wane kaainjalaa nuʼupalapünaa Maleiwakai?». Wayaawata aaʼu wanaawain tü jülüjakat naaʼin José sümaa tü jülüjakat naaʼin Jeʼwaa. ¿Jama wayale alatüin amüin tia? Jamüsüjaʼa saʼalaajaale woʼupalapünaa wanee wayuu aʼyataajiraaka wamaa jee suluwataanüle wamüin wanee mensaaje eere eein wanee ayaakuaa kashüülakat maʼin, * mapüleejeerü wamüin waneepiaa nümaa Jeʼwaa wayaawatüle saaʼu kasain jülüjain naaʼin süchiki tia otta pansaatüjürüle watuma tü waaʼinrajatkat.
15. ¿Kasa waaʼinrajatka süpüla waneepiain waya nümaa Jeʼwaa maʼaka naaʼinrüin shia na apünüinshiikana hebreo?
15 Wekirajaa sünain tü alatakat namüin na apünüinshi jimaʼalii hebreokana, Sadrac, Mesac otta Abednego. Wanaa sümaa nuluwataain Nabucodonosor süpüla suʼwaajüinjatüin wayuu süpüshuaʼa tü ayaakuaa nükümajitkat süka ooro, nnojotsü naʼwaajüin tia naya jimaʼaliikana. Sükajee tü namakat nümüin chi aluwataaikai, wayaawata aaʼu jülüjain naaʼin waneepiainjanain naya nümaa Jeʼwaa (Éx. 20:4, 5; Dan. 3:4-6, 12, 16-18). Jülüjataa waaʼin nüküjale chi walaamainkai wamüin wasülajüinjanain nneerü süpüla wanee miʼiraa saaʼinrajatka tü iküleesia nnojotkat shiimain. ¿Kaseerü waaʼinraka? Nnojo waʼatapajüin sülatüin tia wamüin süpüla yapain waya. Wasakireʼera waaʼin maaʼulu yaa sünain tü jülüjakat naaʼin Jeʼwaa süchiki tia. Müle shia watuma, mapüleejeerü wamüin aaʼinraa jee aküjaa tü anasükat maʼaka naaʼinrüin shia na apünüinshiikana hebreo.
¿Ekirajaashiche pia sünain tü pütchi aashajaakat süchiki jamüin nnojoluinjatka piʼiteʼerüin isha pünain, pipirajüinche tü karaloʼuta eere püküjain tia otta eeichi pia aashajaain nümaa chi tottootkai? (Paashajeʼera tü pütchikat 16).
16. ¿Jamüshii yapeenaka waya watüjaale saaʼu tü jülüjakat naaʼin Jeʼwaa süchiki tü ishakat?
16 Wasakireʼettüjürüle waaʼin sünain jamüin waneepiainjanaka waya nümaa Jeʼwaa, jalouijeerü tia wamüin wawateʼennüle pitaaraluʼumüin. Aluw. 15:28, 29). Eepejeʼe waneirua kasa sünainpünaaka tü ishakat aaʼinnaka sümüin wayuu sünaʼnnapa sutuma tottoolu. Süpülapünaa nüneeküin wanee anoujashi tü naaʼinrajatkat, nütüjaainjatü aaʼu tü sümakat tü Wiwüliakat süchiki tia. Nnojotpejeʼe naaʼinrajatüin tia chapa nia mayeein pitaaraluʼu jee nüpüleeruanapa aaʼin süpüla nüneeküin tü naaʼinrajatkat. Wekirajaa süchiki tia maaʼulu yaa, wepiraja tü karaloʼuta eere waküjain wayoutuin shiʼitaanüin isha wanain otta waashajaa nümaa chi tottootkai. *
Watüjaa aaʼu wayoutajatüin shiʼitaanüin isha wanain jee shiale tü pienchisükat kasa ayuʼnnaka sünainjee tü ishakat (17-19. ¿Jamüsü wanaawainjatka maaʼulu tü jülüjakat waaʼin sümaa tü jülüjakat naaʼin Jeʼwaa? Püküja wanee shiyaawase.
17 Wekirajaa sünain tü nümakat Jesuu nümüin Pedro wanaa sümaa nümüin nümüin: «Senyotkalee, jalia pia suulia sülanüin pümüin tüü». Sünainjee tü nümakat Jesuu niʼipajee Pedro wayaawata aaʼu nütüjaatüjülin aaʼu Jesuu tü keeʼireekat naaʼin Jeʼwaa nüpüleerua. Eesüjaʼa süpüla jülüjain naaʼin tü pütchi aküjakat süchiki tü kasa naaʼinrajatkat jee süchiki outajachin nia. Sutuma nütüjaain Jesuu saaʼu tia, akatsüinraasü naaʼin süpüla waneepiainjachin nia nümaa Jeʼwaa otta süpüla naapajiraain nikii süpüla outaa saaʼu wayuu (paashajeʼera Mateo 16:21-23).
18 Maaʼulu yaa, keeʼireesü maʼin naaʼin Jeʼwaa aleewain waya nümaa otta waküjain maʼin pütchi (Mat. 6:33; 28:19, 20; Sant. 4:8). Eepejeʼe na wayuu makana aka saaʼin nukuwaʼipa Pedro, achiaakana waya suulia aaʼinraa tia, nnojotpejeʼe naaʼinrüin tia süka mojeein wakuwaʼipa natuma. Jülüja paaʼin tüü: jamüshijaʼa nümüle pümüin chi pülaamainkai saapünajatüin pümüin wanee aʼyatawaa jeketü otta wainmainjatüin nneerü pükanajaka, akaisaʼa piʼyataainjachin waneepia. Pütüjaa aaʼu kapüleejeerüin pümüin oʼunaa sünain tü outkajawaakat jee sünain aküjaa pütchi. Müleka jimaʼaire pia otta pükaalinjünüinjachire süpüla pikirajaain sünain wanee kasa sümaa puʼunajachin wattamüin sünain ekirajawaa, pütüjaatüjülinjatü aaʼu tü nümakat Jeʼwaa süchiki tia otta wanaawainjatü tü jülüjakat paaʼin sümaa tü jülüjakat naaʼin Jeʼwaa. Pikirajaa maaʼulu sünain tia. Nnojo paʼatapüin sülatüin pümüin tia süpüla puʼuraajüin nümüin Jeʼwaa, paashajeʼerüin tü karaloʼuta aashajaakat süchiki tia, paashajaain sümaa püpüshi otta puchuntüin kaalinwaa namüin na laülaashiikana suluʼu tü outkajaaleekat. Pütüjaatüjürüle saaʼu tü paaʼinrajatkat, mapüleejeerü pümüin ayoutaa tü ooʼulakünakalü akajee paaʼin, süka jamüin, shiain jülüjain paaʼin aʼyatawaa nümüin Jeʼwaa otta müsia paaʼinreerü tü anasükat.
19 Eesüjaʼa jülüjale waaʼin waneirua kasa eeka süpüla suuʼulakünüin akajee waaʼin süpüla nnojoluin waneepiain waya nümaa Jeʼwaa. Kapüleepejeʼe wamüin yapain waya süpüla süpüshuaʼa tü kasa eekat süpüla sülatüin wamüin. Wekirajaapa wamüiwaʼa sünain tü Wiwüliakat wasakireʼera waaʼin sünain kasain jülüjain naaʼin Jeʼwaa süchiki waneirua kasa. Eesü süpüla sotuin waaʼin tü kasa wekirajaakalü anain jee watüjaajeerü aaʼu kasainjatüin waaʼinrüin suuʼulakünapa waaʼin. Wachajaa maʼin sukuwaʼipa süpüla watüjaain saaʼu tü jülüjakat naaʼin Jeʼwaa süchiki wanee kasa, wanaawa tü jülüjakat waaʼin sümaa tü jülüjakat naaʼin otta jülüjaa waaʼin jamüin aneetka sukuwaʼipa tü kasa waneekakat maaʼulu jee mapeena.
TÜ JÜLÜJAKAT NAAʼIN JEʼWAA OTTA TÜ PUKUWAʼIPAINJATKAT MAPEENA
20, 21. (1) ¿Jamüsü nnojoleetka taashin maʼin wakuwaʼipa süpüla aaʼinraa tü waaʼinreekalü amüin suluʼupa waya tü mma jeketkat? (2) ¿Kasa waaʼinrajatka süpüla talatüin waaʼin maaʼulu yaa?
20 Keeʼireesü waaʼin wapüshuaʼa suluʼuin waya tü mma jeketkat. Wainmaleeshiʼiya waya aʼatapajakana kepiaa yaa saaʼu tü Mmakat Paʼaraiisüpa shia. Taasheena waya sutuma Nuluwataaya Maleiwa suulia tü kasa müliakalü atuma waya maaʼutpünaa. Jee ayateerü taashin wakuwaʼipa süpüla aneekaa tü kasa kamalainkat wamüin otta shieerü waneekaka waneepia tü anasükat.
21 Nnojotpejeʼe taashinjatüin wakuwaʼipa süpüla aaʼinraa tü waaʼinreekalü amüin. Waneekeerü müleka anale jee mojule wanee kasa süpüla waaʼinrüin sükajee tü nuluwataakalü anain Jeʼwaa jee sükajee tü kasa jülüjakat naaʼin. Otta talateerü jee jimateerü waaʼin sutuma tia (Sal. 37:11). Eepejeʼe süpüla talatüin maʼin waaʼin maaʼulu yaa wanaawale tü jülüjakat waaʼin sümaa tü jülüjakat naaʼin Jeʼwaa.
^ püt. 12 Tü Lap dancing münakat, shia wane sukuwaʼipa oyonnojoo eere masheʼin tü ayonnojutkat jee aikalaasü shia saaʼu nüpüʼü chi wayuu shiyonnojokoi amüin sümaa müin saainjiraakai saaʼin sukuwaʼipa nümaa. Süka naatawalin tü kasa aaʼinnakat sünain tia, eesü süpüla sünainpünaain shia amaʼüjirawaa akuwaʼipa otta eeshii süpüla naneekünüin apünüinshii laülaashii süpüla yootuin naya nümaa chi anoujashi eekai sünainpünaain tia. Jamüshijaʼa sünainpünaale tia wanee anoujashi, achuntajachi nia kaalinwaa namüin na laülaashiikana (Sant. 5:14, 15).
^ püt. 14 Tü sexteo (sexting) münakat, shia aluwatawaa suluʼupünaa teleepono wanee mensaaje kaluʼuka ayaakuaa jee video eere masheʼin wayuu otta eere sümaʼüjiraain sukuwaʼipa. Eeshii süpüla naneekünüin apünüinshii laülaashii süpüla yootuin naya nümaa chi eekai sünainpünaain tia. Otta eeinna na tepichi püreesakana atumawaa sünainjee tia. Pütüjeerü sooʼomüin süchiki tia eesü süpüla paashajeʼerüin tü pütchikat «¿Tiene algo de malo el sexteo?», suluʼusü shia jw.org (ENSEÑANZAS BÍBLICAS > JÓVENES > LOS JÓVENES PREGUNTAN) otta paashajeʼera tü pütchikat «Cómo advertirles sobre el sexteo», suluʼusü ¡Eeja Waaʼin! ojuʼitaka nowienpüroʼu soʼu 2013, süpana 4 otta 5 (alijunaikiruʼusü).
^ püt. 16 Pütüjeere sooʼomüin süchiki tü pütchi sümakat tü Wiwüliakat süchiki tia, eesü süpüla paashajeʼerüin tü karaloʼutakat Wayaawata waneepia waalin nüpüla Maleiwa süpana 246-249.