1, 2. ¿Kasa aʼyatawaa naaʼinraka na laülaashiikana?

 KAKALIAICHIRE pia neʼipajachin na laülaashiikana, eeshijaʼa kettaajüle pia süpüla laülaashin napüleerua na wawalayuukana. ¿Aʼyataweeshiche pia sünain tü kasa naʼyataakalü anain na laülaashiikana? (1 Tim. 3:1).

² ¿Kasa naʼyataaka anain na laülaashiikana? Aküjashii maʼin naya pütchi, alapalaashii naya naaʼu na wawalayuukana, nekirajüin na wawalayuukana otta natütüleʼerüin naaʼin suluʼu tü outkajaaleekat. Naaʼinrüin tia sükajee tü namakat otta sükajee tü naaʼinrakat, müshii nüsülajakai wamüin Maleiwa naya wawalayuukana (Éf. 4:8).

3. ¿Kasa naaʼinrajatka wanee wawala süpüla laülaashinjachin nia? (1 Timoteo 3:1-7; Tito 1:5-9).

³ ¿Kasa naaʼinrajatka wanee wawala süpüla laülaashinjachin nia? Nnojoishi aneekünüin wanee wawala süpüla laülaashin nia sutuma tü kasa nütüjakat apüleerua. Nnojotsü müin aka saaʼin wanee aʼyatawaa. Jamüshijaʼa wanee wayuu nütüjale süpüleerua wanee aʼyatawaa, aneekünüshi nia süpüla saapünüin tia aʼyatawaakat nümüin. Süpüla laülaashin wanee wawala nnojoishi atüjainjachin neʼe süpüleerua aküjaa pütchi otta süpüleerua ekirajaa, naaʼinrajatü tü aküjünakat suluʼu 1 Timoteo 3:1-7 otta Tito 1:5-9 (paashajeʼera). Sünain ekirajaayakat tüü wekirajaajeerü anain apünüinsü kasa naaʼinrajatka na laülaashiikana. Anainjatüin nanüiki na wawalayuukana nüchiki otta nanüiki na manoujainsaliikana nüchiki. Anainjatüin sukuwaʼipa tü kasa naaʼinrakat napüleerua na nipialujunakana otta aʼyataweeinjatü naaʼin süpüla nakaalinjain na wawalayuukana.

ANAINJATÜ PÜTCHI NÜCHIKI

4. ¿Kasa nnojoluinjatka niyoujunuin aaʼujee wanee wawala?

⁴ Süpüla laülaashin wanee wawala, nnojotsü «ayoujunuinjatüin nukuwaʼipa saaʼu wanee kasa» jee müsia «anainjatü nanüiki na manoujainsaliikana nüchiki». Eesü mojeerüle nanüiki na manoujainsaliikana  süchiki tü kasa nunoujakalü anain, nnojoipejeʼe süpüla nayoujain nia saaʼujee nnojoluin lotuin nukuwaʼipa jee saaʼujee nnojoluin anamiain nia (Dan. 6:4, 5). Püsakira paaʼin sünain tüü: «¿Anasüche nanüiki na tawalayuukana tachiki jee nanüiki na manoujainsaliikana?».

5. ¿Kasa naaʼinrajatka wanee laülaashi süpüla naaʼinrüin wanee kasa eekai anain?

⁵ «Aaʼinrajachi wanee kasa eekai anain». Tü naaʼinrajatkat maʼin shia jülüjainjatüin naaʼin tü kasa anasü naaʼinrakat na waneinnua otta nütütüleʼerüinjatü naaʼin saaʼujee anain nakuwaʼipa. Talatüinjatü naaʼin sünain aaʼinraa kasa napüleerua na waneinnua jee naaʼinrajatü waneirua kasa nnojotka naʼatapajüin na waneinnua (1 Tes. 2:8). ¿Jamüsü talatüinjatkaʼa naaʼin na laülaashiikana sünain aaʼinraa tia? Shia süka nalapalaainjanain naaʼu wawalayuukana otta naaʼinrajatüin tü aʼyatawaa aapünakat namüin (1 Ped. 5:1-3). Mayaainjeʼe aʼyatawaain maʼin tia talateerü naaʼin sünain akaalinjaa na wawalayuukana (Aluw. 20:35).

6. ¿Kasa naaʼinraka wanee wayuu kapürale naaʼin nakuwaʼipa na waneinnua? (Hebreokana 13:2, 16; piirakaa sümüin tü ayaakuaakat).

⁶ «Kapülainjatü naaʼin nakuwaʼipa na waneinnua». Kapürale naaʼin wanee wawala nakuwaʼipa na waneinnua, nnojoishii nayain neʼe naaʼinrüin apüleerua kasa anasü naʼaleewainyuu (1 Ped. 4:9). Saashin wanee karaloʼuta aashajaaka süchiki wanee wetsiikulo suluʼujeejatü tü Bibliakat, kapürale naaʼin wanee wayuu nakuwaʼipa na waneinnua kamaneeshi nia namüin otta namüin na wayuu nnojoliikana niʼraajüin. Püsakira paaʼin sünain tüü: «¿Kamaneeshiche taya namüin na wayuu awaraijaakana taaʼu?» (paashajeʼera Hebreokana 13:2, 16). Chi wayuu kapülakai aaʼin nakuwaʼipa na waneinnua, nikiraain tü kasa eekat nümaʼanain namaa na wayuu awaraijaakana naaʼu, namaa na maʼletsekana otta namaa na aʼyataakana maʼin napüleerua na wawalayuukana maʼaka naaʼin na wawalayuu alapalaakana waaʼu otta na antakana wattajee sünain ekirajaa (Gén. 18:2-8; Prov. 3:27; Luc. 14:13, 14; Aluw. 16:15; Roma 12:13).

7. ¿Kasa naaʼinraka wanee laülaashi nnojoika alanaʼaleein atuma sujutu tü nneetkat?

⁷ «Nnojotsü alanaʼaleeinjatüin sujutu nneerü nümüin». Nnojotsü naaʼinmaainjatüin wainmain kasa nümaʼana jaʼitaichi washirüin jee maʼletsein nia, shiainjatü naaʼinmaaka tü niʼyataainkat nümüin Maleiwa (Mat. 6:33). Akatalüinjachi kaʼi süpüla niʼyataain nümüin Maleiwa otta nükatalüinjatü waneirua kasa eeka nümaʼana süpüla nüsülajüin nümüin Jehová, naapüinjatü tü kasa choʼujaakat sümüin nüpüshi  otta nükaalinjainjana na wawalayuukana (Mat. 6:24; 1 Juan 2:15-17). Püsakira paaʼin sünain tüü: «¿Alanaʼaleesüche tamüin sujutu tü nneetkat? ¿Talatüsüche taaʼin sümaa tü kasa eeka tamaʼanakat? ¿Shiache taaʼinmaaka maʼin wainmainjatüin nneerü tamaʼana jee wainmainjatüin kasa tamaʼana?» (1 Tim. 6:6, 17-19).

8. ¿Kasa naaʼinraka wanee wayuu niisattüle nukuwaʼipa jee nütüjale achecheraa naaʼin?

⁸ «Niisattüinjatü nukuwaʼipa» otta «atüjainjachi nia achecheraa naaʼin». Nnojoishi niainjachin wanee wayuu kasa aleʼechi otta nnojoishi niainjachin wanee wayuu asüi, anainjatü sukuwaʼipa nüsheʼin otta anainjatü naʼanaaya. Anainjatü süneekia nutuma tü kasa nüshaitajatkat, tü nünajüinjatkat jee tü naapajüinjatkat. Nnojotsü nüshatüinjatüin nakuwaʼipa na manoujainsaliikana (Luc. 21:34; Sant. 4:4). Nnojoishi nia aashichijaamaatüinjachin jaʼitaichi aashichijünüin nia. Wanee wayuu eekai laülaashin «nnojoishi [nia] epeʼrülinjachin». Püsakira paaʼin sünain tüü: «¿Teisattüinche takuwaʼipa jee atüjashiche taya achecheraa taaʼin?».

9. ¿Kasa naaʼinraka wanee wawala laülaale naaʼin jee lotule sukuwaʼipa tü kasa naainjakat?

⁹ «Laülaainjatü naaʼin» chi wawala laülaashikai suluʼu tü outkajaaleekat. Jülüjainjatü naaʼin tü sümakat tü Bibliakat süchiki wanee kasa alatakat. Sükajee jülüjain naaʼin tü sümakat tü Bibliakat, niyaawata aaʼu tü alatakat otta anasü sukuwaʼipa tü kasa nüneekakat. Nnojoishi nia asounnajaain süpülapünaa nütüjaain saaʼu tü alatakat (Prov. 18:13). Sünainjee müin sukuwaʼipa nutuma, anasü sukuwaʼipa tü kasa nüneekakat. Pansaasü wanaapünaa sümaa tü nümakat Jehová jee müshia nia «lotuinjatü sukuwaʼipa tü kasa naainjakat». Atüjaana aaʼuchi nia naaʼinrüin tü aʼyatawaa aapünakat nümüin otta naaʼinrüin tü sümakat tü karaloʼuta aapünakat nümüin. Sükajee müin nukuwaʼipa anasü pütchi nüchiki. Wekirajaa jooluʼu süchiki tü naaʼinrajatkat süpüla anainjatüin sukuwaʼipa tü kasa naaʼinrakat napüleerua na nipialujunakana.

ANAINJATÜ SUKUWAʼIPA TÜ KASA NAAʼINRAKAT NAPÜLEERUA NA NIPIALUJUNAKANA

10. ¿Kasa naaʼinraka wanee wayuu anale sukuwaʼipa «tü kasa naaʼinrakat napüleerua na nipialujunakana»?

¹⁰ Süpüla laülaashin wanee wawala eekai kaʼwayuusein jee kachooin, anainjatü pütchi süchiki nüpüshi. «Anainjatüin sukuwaʼipa tü kasa naaʼinrakat napüleerua na nipialujunakana», alinjana naya nüpüla otta naapüinjatü tü kasa choʼujaakat namüin. Niainjachi oʼuniraka sukuwaʼipa tü kasa naaʼinrakat sünain aʼwaajaa Maleiwa. ¿Jamüsü naaʼinrajatkaʼa tia? Anuu nünüiki chi aluwataaushikai Pablo: «Isale nüchiki wanee wayuu anain sukuwaʼipa nutuma tü kasa naaʼinrakat napüleerua na nipialujunakana, ¿jamataalainjatü sukuwaʼipa nutuma süpüla naaʼinmajüinjanain na anoujakana nünain Maleiwa?» (1 Tim. 3:5).

11, 12. ¿Jamüsü anainjatkaʼa nakuwaʼipa nüchonnii wanee wawala süpüla laülaashin nia? (Piirakaa sümüin tü ayaakuaakat).

¹¹ Nnojorüle 18 nouyase nüchonnii wanee wawala, «jüüjüüinjana na nüchonniikana nümüin sümaa laülaain naaʼin». Nikirajüinjana naya süka anakalü akuwaʼipa. Kamalainsü namüin na tepichikana nashaitüin, nikirajüinjanapejeʼe naya süpüla noonooin sümaa nünüiki, kojutuin nia namüin otta anain nakuwaʼipa. Nikirajüinjana naya süpüla aleewain naya nümaa Jehová. Pansaainjatüin tü nakuwaʼipakat wanaapünaa sümaa tü sümakat tü Bibliakat otta nükaaliijainjana naya süpüla woutiisainjanain naya.

¹² «Anoujainjana nüchonnii, nnojotsü maaʼinñaainjatüin naaʼin na nüchonniikana jee nnojoishii naya eʼrüliinjanain wayumüin». Jamüshijaʼa kaainjarale wanee jintüi woutiisakai jee alüʼütkai süpüla woutiisaa, nakumajeerü na laülaashiikana sukuwaʼipa süpüla natüjaain saaʼu ayatüinjachire neʼipajanain na laülaashiikana jee laülaashin chi nüshikai. Nnojoire nikirajünapuʼuin chi jintüikai jee nnojoipuʼule nüchiaanüin nutuma chi nüshikai, nnojoleechijaʼamata  nia ayatüin laülaashin suluʼu tü outkajaaleekat (paashajeʼera Aapiraa Wayuu ojuʼitaka oʼutuupüroʼu 15, 1996, süpana 21, pütchi 6, 7 [alijunaikiruʼusü]).

AʼYATAAINJACHIN NAPÜLEERUA NA WAWALAYUUKANA

13. ¿Kasa naaʼinraka wanee wayuu nnojoire ichein nia süchiirua nünüiki jee nnojoire nia macheʼein süchiirua wanee kasa?

¹³ Jalouishii maʼin namüin na wawalayuukana na wawalayuu anakana akuwaʼipa. Chi wawala nnojoikai ichein süchiirua nünüiki, anajiraashi nia namaa na waneinnua. Nnojorüle meein pukuwaʼipa, jülüjainjatü paaʼin tü namakat na waneinnua otta kojutuinjatü pümüin tü namakat. Jamüshijaʼa puutkajaapa namaa na laülaashiikana müleka naneeküle wanee kasa nnojotka mojuin saashin tü Bibliakat, ¿aneetche shia pümüin mayaainjeʼe müin nnojoikai anain shia saaʼin pümüin? Chi laülaashikai napüleerua na wawalayuukana, «nnojoishi nia macheʼinjachin süchiirua wanee kasa». Kojutusü nümüin tü namakat na wane laülaashiikana, nütüjaa aaʼu aneerüin sukuwaʼipa wanee kasa wainmale wayuu asakinnaka süchiirua (Gén. 13:8, 9; Prov. 15:22). «Nnojoishi katkaaralinjachin», «nnojoishi nia aashichijaamaatüinjachin». Kamaneeshi nia otta kemeʼeriasü nünüiki. Süka wayuuin anamia nia, nukumajüinjatü sukuwaʼipa süpüla nnojoliin mojujiraain na waneinnua (Sant. 3:17, 18). Kamaneeinjachi nia naashajaapa namaa na eekana jashichin, jaʼitakajaʼa namüin na nnojoliikana acheküin tü wanoujakalü anain, kamaneeinjachin nia namüin (Juec. 8:1-3; Prov. 20:3; 25:15; Mat. 5:23, 24).

14. (1) ¿Jamüshi nnojolinjachikaʼa laülaashin wanee wayuu jekechikai sünain anoujaa? (2) ¿Kasa naaʼinrajatka süpüla niainjachin nuʼwaajüin Maleiwa?

¹⁴ «Nnojoishi laülaashinjachin wanee wayuu jekechikai sünain anoujaa». Nnojotsü choʼujaain wainmainjatüin juya woutiisaka oʼu wanee wayuu süpüla laülaashin nia, tü choʼujaakat nümüin shia laülaainjatüin naaʼin sünain anoujaa otta nütüjaainjatüin apüleerua tü sümakat tü Bibliakat nüneekajatpa wanee kasa. Süpülapünaa nüneekünüin, nnojotsü yaletayaainjatüin naaʼin maʼaka nnojoluin yaletayaain naaʼin Jesús, nnojolinjachi ashapajaain aaʼin otta naʼatapajüinjatü niainjachin Jehová aapaka aʼyatawaa nümüin (Mat.  20:23; Filip. 2:5-8). Jee müsia «niainjachi nuʼwaajaka Maleiwa», naaʼinrüin tia wanaa sümaa noonooin sümaa tü nümakat Jehová otta sümaa tü namakat na wawalayuukana suluʼu tü karaloʼuta naluwataakat namüin na laülaashiikana (1 Tim. 4:15).

15. ¿Choʼujaasüche maʼin nütüjainjachin maʼin wanee wawala ekirajaa süpüla laülaashin nia?

¹⁵ «Atüjainjachi nia ekirajaa». ¿Shiache aküjüneeka yala nütüjainjachin maʼin ekirajaa wanee wawala suluʼu tü outkajaaleekat süpüla laülaashin nia? Nnojo, eeshii laülaashii atüjakana maʼin ekirajaa sünain aküjaa pütchi otta sünain alapalawaa naaʼu na wawalayuukana (anasü paashajeʼerüle 1 Corinto 12:28, 29 otta Éfeso 4:11). Mayaainjeʼe nnojoluin choʼujaain pütüjainjachin maʼin ekirajaa suluʼu tü outkajaaleekat, püchajaainjatü sukuwaʼipa süpüla pütüjain ekirajaa. Müleka keeʼireere paaʼin laülaashin pia, ¿kasa paaʼinrajatka süpüla puuntuin tia?

16. ¿Kasa naaʼinrajatka wanee laülaashi süpüla anain nakuwaʼipa na wawalayuukana sünainjee tü nikirajakalü anain? (Piirakaa sümüin tü ayaakuaakat).

¹⁶ «Jüüjüüinjachi nia sümüin tü pütchi shiimainkat». Süpüla nütüjainjachin ekirajaa wanee laülaashi, nikirajüinjana na wawalayuukana otta nüchiaainjanain naya sükajee tü sümakat tü Bibliakat. Aneerü nakuwaʼipa na wawalayuukana müle sukuwaʼipa nutuma. Ekirajaainjachi nia sünain tü Bibliakat otta sünain tü karaloʼutakalüirua (Prov. 15:28; 16:23). Jülüjainjatü maʼin naaʼin tü süküjeekalü achiki tü wetsiikulo nikirajaakalü anain süpüla sütanalüin naaʼin na wawalayuukana tü nikirajakalü aka naya. Wane kasa naaʼinrajatka wanee laülaashi, shia nasakirüin na wane kakaliainnakana sünain laülaashin, naaʼinra nümeeria tia namaka nümüin (1 Tim. 5:17). Napüshuaʼa na laülaashiikana atüjainjana naya süpüleerua natütüleʼerüin naaʼin na wawalayuukana. Eepejeʼe nachiaajeenale naya choʼujaale shia namüin. Naaʼinrüinjatü tia sümaa kamaneein naya namüin. Kamaneere naya namüin na wawalayuukana soʼu nekirajüin naya jee naküjale tü sümakat tü Bibliakat namüin, atüjeena naya ekirajaa otta nashateerü nukuwaʼipa Jesús, chi Atüjakai maʼin Ekirajaa (Mat. 11:28-30; 2 Tim. 2:24).

 AYATAʼAYA PAAʼINRÜIN TÜ ACHUNTUNAKAT PÜMÜIN

17. (1) ¿Kasa sotuinjatka naaʼin na neʼipajanakana na laülaashiikana? (2) ¿Kasa jülüjainjatka naaʼin na laülaashiikana naneeküinjachipa wanee wawala süpüla neʼipajanain nia jee laülaashin nia? (Paashajeʼera tü pütchikat « Jiakana na laülaashiikana, nnojo jülüjain jaaʼin lotuinjatüin maʼin nukuwaʼipa chi wawala jüneeküinjachikai»).

¹⁷ Wekirajaaitpa anain tü naaʼinrajatkat wanee wawala süpüla laülaashin nia. Neʼipajachire pia na laülaashiikana, eesüjaʼa jülüjale paaʼin iseerüin püchiki laülaashin pia. Soteepejeʼe paaʼin tü jülüjakat naaʼin Jehová otta tü jülüjakat naaʼin na wawalayuukana. Nnojotsü jülüjain naaʼin lotuinjatüin maʼin pukuwaʼipa (1 Ped. 2:21). Naapeeria pümüin Jehová tü nüpülainkat süpüla laülaashin pia (Filip. 2:13). ¿Eesüche tü punouteʼerajatkat sünain pukuwaʼipa? Puchunta nümüin Jehová, pikirajaa süchiki tü punouteʼerajatkat sünain pukuwaʼipa otta puchunta kaalinwaa namüin na laülaashiikana.

18. ¿Kasa ayatüinjatka naaʼinrüin na neʼipajanakana na laülaashiikana?

¹⁸ Napüshuaʼaleʼeya na wawalayuu tooloyuukana otta na laülaashiikana, anasü ayatüle naaʼinrüin tü wekirajaaitpakalü anain sünain ekirajaayakat tüü (Filip. 3:16). Neʼipajachire pia na laülaashiikana ayataʼaya pikirajaain süpüla laülaashin pia suluʼu tü outkajaaleekat. Puchunta nümüin Jehová nikirajai pia, nunouteʼerai pukuwaʼipa, piʼyataai nümüin otta piʼyataai napüleerua na wawalayuukana (Is. 64:8). Nükaalinjeechi pia Jehová süpüla laülaashin pia suluʼu tü outkajaaleekat.