1. ¿Jamüsü naaʼin chi aluwataaushikai Pablo namüin na neʼipajanakana na laülaashiikana?

 NA NEʼIPAJANAKANA na laülaashiikana, aʼyataashii naya sünain akaalinjaa na wawalayuukana. Kojutushii wawalayuukana naainnua nümüin chi aluwataaushikai Pablo. Wanaa sümaa nüshajüin wanee karaloʼuta namüin na anoujashii chajanakana Filipos, nasaküin na neʼipajanakana na laülaashiikana namaʼaleeya na laülaashiikana (Filip. 1:1).

2. ¿Jamüsü nünüiki Luis sutuma neʼipajachin nia na laülaashiikana?

² Wainma na wawalayuu neʼipajanakana na laülaashiikana talatakana aaʼin sünain aaʼinraa tü naʼyataakalü anain jaʼitainna laülaayuuin jee nnojoliin laülaayuuin naya. Jamüshijaʼa chi wawalakai Devan, 18 nuuyase wanaa sümaa nüneekünüin süpüla neʼipajachin nia na laülaashiikana. Akaajasaʼa Luis alatüsü suulia 50 nuuyase wanaa sümaa nüneekünüin süpüla neʼipajachin nia na laülaashiikana. Anuu nünüiki: «Talatüshi maʼin taya süka taʼyataain napüleerua na wawalayuukana. Sükajee alin maʼin taya napüla aishiʼiya naya tapüla».

3. ¿Kasa wekirajaajeetka anain sünain ekirajaayakat tüü?

³ Woutiisale pia, ¿aʼyataweeshiche pia süchiirua neʼipajachin pia na laülaashiikana? ¿Jamüsü keeʼireeinjatkaʼa paaʼin piʼyataain süchiirua tia? ¿Kasa paaʼinrajatka saashin tü Bibliakat süpüla puuntuin tia? Wekirajaweerü anain tia sünain ekirajaayakat tüü. Wekirajaa palajana süchiki tü naaʼinrakat wanee wawala neʼipajachire nia na laülaashiikana.

 NAAʼINRAKA NAYA WAWALAYUUKANA

4. ¿Kasa aʼyatawaa naaʼinraka na neʼipajanakana na laülaashiikana? (Piirakaa sümüin tü ayaakuaakat).

⁴ Sükajee tü nüpülainkat Maleiwa, aneekünüshii na neʼipajanakana na laülaashiikana süpüla nakaalinjain naya sünain aaʼinraa waneirua kasa napüleerua na wawalayuukana. Eeshii na neʼipajanakana na laülaashiikana aapaka namüin na wawalayuukana tü karaloʼuta naküjainjatkalü aka pütchi otta jalainjanain naya aküjain pütchi. Eeshii na epitajakana tü Piichi Outkajaaleekat otta akumajakana tü kasa amojujaakat suluʼu. Eeshii na aʼyataakana sünain audio otta video soʼunnaa tü outkajawaakat. Wayuu kanoulashii na aʼyataakana neʼipajee na laülaashiikana, aishi Jehová napüla otta pansaasü nakuwaʼipa wanaapünaa sümaa tü nümakat. Aishii maʼin napüla na nawalayuukana (Mat. 22:37-39). ¿Kasa naaʼinrajatka wanee wawala woutiisakai neʼipajaneere nia na laülaashiikana?

5. ¿Kasa naaʼinrajatka wanee wawala neʼipajaneere nia na laülaashiikana?

⁵ Süküjain tü Bibliakat tü kasa naaʼinrajatkat wanee wawala neʼipajaneere nia na laülaashiikana (1 Tim. 3:8-10, 12, 13). ¿Kasa paaʼinrajatka süpüla neʼipajanain pia na laülaashiikana? Pikirajaa palajana sünain tü paaʼinrajatkat saashin tü Bibliakat jee paaʼinra shia. Jülüjainjatpejeʼe paaʼin jamüin neʼipajaneeka pia na laülaashiikana.

¿JAMÜSHI NEʼIPAJANEEKAʼA PIA NA LAÜLAASHIIKANA?

6. ¿Kasa piʼyataainjatka aaʼujee namüin na wawalayuukana? (Mateo 20:28; piirakaa sümüin tü ayaakuaakat).

⁶ Jülüja paaʼin tü nukuwaʼipakat Jesús. Aʼyataashi nia namüin na waneinnua süka alin naya nüpüla otta alin nüpüla chi Nüshikai (paashajeʼera Mateo 20:28; Juan 13:5, 14, 15). Aire püpüla Jehová otta na wawalayuukana nükaalinjeechi pia Jehová süpüla neʼipajachin pia na laülaashiikana (1 Cor. 16:14; 1 Ped. 5:5).

7. ¿Jamüsü nnojotkaʼa yaletayaainjatüin naaʼin wanee wawala?

⁷ Jamüsüjaʼa maaʼulu yaa, nia aneekünaka natuma na manoujainsaliikana wanee wayuu eekai nütüjaain maʼin süpüleerua waneirua kasa. Nnojotpejeʼe müin sukuwaʼipa nüneekünapa wanee wawala süpüla neʼipajachin nia na laülaashiikana. Wanee wawala eekai aipüralii maʼin wayuu maʼaka naaʼinrüin shia Jesús, nnojotsü nüchajaain maʼin nuluwataweeinjachin naaʼu na waneinnua. Nüneekünüle wanee wayuu eekai keeʼireein maʼin naaʼin nuluwataweein naaʼu  na waneinnua, eesüjaʼa nnojoleerüle naaʼinrüin waneirua aʼyatawaa choʼujaaka maʼin namüin na wawalayuukana. Eesüjaʼa jülüjeerüle naaʼin nnojoluin nüpülajatüin tia aʼyatawaakat (Juan 10:12). Nnojoleechi nükaalinjain Jehová wanee wayuu eekai yaletayaain naaʼin jee eekai keeʼireein maʼin naaʼin nuluwataain naaʼu na waneinnua (1 Cor. 10:24, 33; 13:4, 5).

8. ¿Jamüsü nünüiki Jesús namüin na aluwataaushikana?

⁸ Jamüshiijaʼa waneinnua naʼaleewainyuu Jesús, nachuntuin nümüin Jesús naluwataainjanain nümaa. Nachuntuin tia sutuma keeʼireein naaʼin naluwataainjanain naaʼu na waneinnua. Jülüja waaʼin tü naaʼinrakat Santiago nümaa Juan. Achuntushii naya nümüin Jesús naluwataainjanain nümaa nuluwataapeena nutuma Maleiwa. Anuujeseʼe nünüiki Jesús namüin na polookana piamamüin aluwataaushi: «Chi wayuu miyoʼuweekai jaʼakajee aʼyataainjachi napüleerua na waneinnua. Chi wayuu eekai kojuteein jaʼakajee niainjachi jüchepchiaka» (Mar. 10:35-37, 43, 44). Anasü nakuwaʼipa na wawalayuukana sünainjee eein wawalayuu aʼyataweekana süchiirua neʼipajanain na laülaashiikana süpüla nakaalinjain naya (1 Tes. 2:8).

PAAʼINRAJATKA SÜPÜLA KEEʼIREEIN PAAʼIN PÜKAALINJAIN NA WANEINNUA

9. ¿Kasa paaʼinrajatka süpüla keeʼireeinjatüin paaʼin pükaalinjain na wawalayuukana?

⁹ Aishi Jehová püpüla otta pükaalinjeein na wawalayuukana. Eepejeʼe nnojorüle paaʼinreein tü aʼyatawaa naaʼinrakat na neʼipajanakana na laülaashiikana. ¿Kasakaʼa paaʼinrüinjatüin süpüla keeʼireeinjatüin paaʼin pükaalinjain na wawalayuukana? Jülüja paaʼin talateerüin maʼin paaʼin paaʼinrüle kasa napüleerua na wawalayuukana. Anuu nünüiki Jesús: «Talataleesia maʼin waaʼin wasülajüle wanee kasa suulialeʼeya süsülajünapa wamüin» (Aluw. 20:35). Naaʼinrüin Jesús tü sümakat tia pütchikat. Talatüshi maʼin nia sutuma naaʼinrüin kasa napüleerua na waneinnua. Eesia süpüla müin shia putuma.

10. ¿Kasa naaʼinraka Jesús wayaawataka anainjee talatüin naaʼin sünainjee nikirajüin na waneinnua? (Marcos 6:31-34).

¹⁰ Jülüja waaʼin talatüin maʼin naaʼin Jesús sutuma naaʼinrüin kasa napüleerua na waneinnua (paashajeʼera Marcos 6:31-34). Soʼu wanee kaʼi oʼunushi nia namaa na nikirajüinkana suluʼumüin wanee mma wattasü yalejee süpüla neemeraain. Süntayaa sümaka watta saalii wayuu nünainmüin Jesús. Najütüinjeʼe na wayuukana nachikuaʼa süchikijee naküjain namüin maʼaka jeʼrasü pütchi neʼe, jama nnojoluin süpütaain kaʼi napüla süpüla neküinjanain. Sükajee sümülialaain naaʼin Jesús naalin naya wayuukana, nikirajaka naya sünain watta saalii kasa. Ayatüshiʼiya nikirajüin naya motsoleepa tü kaʼikat (Mar. 6:35). Nnojotsü naaʼinrüin Jesús tia mojusheeka. Naaʼinrüin shia süka sümülialaain naaʼin naalin naya wayuukana. Nikirajeein naya süka alin naya nüpüla. Talatüsü maʼin naaʼin Jesús sünainjee nükaalinjain na waneinnua.

11. ¿Kasa naaʼinraka Jesús napüleerua na waneinnua? (Piirakaa sümüin tü ayaakuaakat).

¹¹ Nnojoishii neʼe nikirajüin Jesús na wayuukana, aaʼinrüshi nia kasa anasü napüleerua. Nikirüin naya jee nuchuntuin namüin na nikirajüinkana neitajüinjatüin tü eküütkat namüin na wayuu antapaatakana (Mar. 6:41). Sükajee tü naaʼinrakat Jesús nikirajüin na nikirajüinkana sünain tü naaʼinrajatkat süpüla naʼyataain napüleerua na waneinnua. Müsia sukuwaʼipa tü aʼyatawaa naaʼinrakat na neʼipajanakana na laülaashiikana. Aaʼinrüshii naya kasa napüleerua na wawalayuukana. Talatakajasaʼa maʼin naaʼin na nikirajüinkana Jesús sünainjee nakaalinjain na wayuukana: neitajüin eküülü namüin jee emirakalaka napüshuaʼa na wayuukana soʼu tia (Mar. 6:42). Nnojoishii nükaalinjain neʼe Jesús uwatua na wayuukana. Aʼyataashi nia waneepia nümüin Maleiwa süpüla nükaalinjain naya (Mat. 4:23; 8:16). Talatüsü maʼin naaʼin Jesús sünainjee nikirajüin  na waneinnua otta sünainjee naapüin tü choʼujaakat namüin. Eesia süpüla müinña shia putuma: talateerüin maʼin paaʼin neʼipajanale pia na laülaashiikana süpüla pükaalinjain na waneinnua.

12. ¿Jamüsü nnojoluinjatkaʼa jülüjain waaʼin nnojoluin kasain watüjain apüleerua?

¹² ¿Jama nnojorüle kasain pütüjain apüleerua saaʼin pümüin? Nnojo mojuin paaʼin. Eesia tü kasa pütüjakalü apüleerua eeka süpüla pükaalinjain anain na wawalayuukana. Wanee kasa anaka süpüla paaʼinrüin shia puchuntuin nümüin Jehová jee paashajeʼerüin 1 Corinto 12:12-30. Nüküjain Pablo yala kojutuin maʼin pia nümüin Jehová maʼaka naaʼin na waneinnua. Choʼujaashi pia namüin na wawalayuukana, makalaka nnojoluinjatüin yüülain paaʼin nnojorüle kettaajüin pia süpüla neʼipajachin pia na laülaashiikana. Shia jülüjain paaʼin piʼyataain nümüin Jehová süka süpüshuaʼa paaʼin jee pükaalinjain na wawalayuukana. Jülüjeerü naaʼin na laülaashiikana tü kasa pütüjakalü apüleerua süpülapünaa naapüin pümüin wanee aʼyatawaa suluʼu tü outkajaaleekat (Roma 12:4-8).

13. ¿Kasa jülüjainjatka waaʼin süchiki tü nakuwaʼipainjatkat na neʼipajanakana na laülaashiikana?

¹³ Anasü jülüjale paaʼin tüü: tü nakuwaʼipainjatkat na neʼipajanakana na laülaashiikana shiaʼaya neʼe tü nakuwaʼipainjatkat napüshuaʼa na wawalayuukana saashin tü Bibliakat. Jamüshiijaʼa napüshuaʼa na wawalayuukana aleewainjana naya nümaa Jehová, talatüinjatü naaʼin sünain nakaalinjain na waneinnua otta pansaainjatü nakuwaʼipa wanaapünaa sümaa tü nüchekakat Maleiwa napüleerua. ¿Kasakaʼa naaʼinrajatüin maʼin wanee wawala süpüla neʼipajanainjachin nia na laülaashiikana?

ANUU TÜ PAAʼINRAJATKAT

14. ¿Kasa aküjüneeka achiki sükajee tü pütchikat «laülaainjatüin naaʼin»? (1 Timoteo 3:8-10, 12).

¹⁴ Ashajünüsü süpüshi tü naaʼinrajatkat na wawalayuu neʼipajaneekana na laülaashiikana suluʼu 1 Timoteo 3:8-10, 12 (paashajeʼera). «Laülaainjatü naaʼin» na wawalayuu neʼipajanakana na laülaashiikana. Tü aküjüneekalü achiki yala nnojotsü shiain nnojoluinjachin nasirajüin (Ecl. 3:1, 4). Naaʼinrüinjatpejeʼe süpüshuaʼa tü aʼyatawaa aapünakat namüin. Müle shia natuma, kojuteena naya namüin napüshuaʼa na wawalayuukana.

15. ¿Kasa aküjüneeka sükajee tü pütchikat «nnojotsü piamainjatüin noʼupünaa» otta «nnojotsü kachiiruainjatüin maʼin naaʼin washirüü jee akanajaa nneerü»?

¹⁵ «Nnojotsü piamainjatüin noʼupünaa». Tü aküjüneekalü achiki yala shia naküjainjatüin waneepia tü shiimainkat, lotuinjatüin nakuwaʼipa otta naaʼinrüinjatüin tü aluwataanakalü anain naya. Naaʼinrüinjatü tü namakat otta nnojoishii  nemeejüinjanain na waneinnua (Prov. 3:32). «Nnojotsü kachiiruainjatüin maʼin naaʼin washirüü jee akanajaa nneerü». Tü aküjüneekalü achiki yala shia lotuinjatüin nakuwaʼipa sünain naʼyataain otta nnojoluinjatüin naapaain nneerü nnojotka nakoroloin. Nnojotsü nachajaainjatüin aleewain maʼin naya namaa na wawalayuukana shiiʼiree nakanajüin nneerü suluʼujee tia.

16. (1) ¿Kasa aküjüneeka sükajee tü pütchikat «nnojoishii asüliinjanain maʼin wiino»? (2) ¿Kasa aküjüneeka sükajee tü pütchikat «wuleinjatüin naaʼin»?

¹⁶ «Nnojoishii asüliinjanain maʼin wiino». Tü aküjüneekalü achiki yala shia nnojoliinjanain nepeʼrüliin jee nnojoliinjanain neʼnnaajünüin suluʼu nasüliin maʼin. Wuleinjatü naaʼin, tü aküjüneekalü achiki yala shia pansaainjatüin nakuwaʼipa wanaapünaa sümaa tü nüchekakat Jehová. Eepejeʼe süpüla jimatüin naaʼin anale nakuwaʼipa nümaa Maleiwa mayaainjeʼe nnojoluin lotuin maʼin tü nakuwaʼipakat.

17. ¿Kasa aküjüneeka sükajee tü pütchikat «atüjaanajatü aaʼu palajana keraale naya süpüla tia aʼyatawaakat»? (1 Timoteo 3:10; piirakaa sümüin tü ayaakuaakat).

¹⁷ «Atüjaanajatü aaʼu palajana keraale naya süpüla tia aʼyatawaakat». Tü aküjüneekat sükajee tia pütchikat shia naaʼinrüle tü aʼyatawaa aapünakat namüin natuma na laülaashiikana. Saapünapa wanee aʼyatawaa namüin naaʼinrajatü tü namakat na laülaashiikana otta tü sümakat tü karaloʼuta nashajakat na wawalayuukana. Natüjaainjatü aaʼu naya wawalayuukana tü naaʼinrajatkat otta joujainjatüin najaʼttiraka shia. Naaʼinrüle tü aʼyatawaa aapünakat namüin nayaawateerü aaʼu na wawalayuukana sükooʼomüinraain tü nanoulakat. Jiakana laülaashiikana, jikiraja na wawalayuu woutiisakana eekana süpüla neʼipajanain na laülaashiikana (paashajeʼera 1 Timoteo 3:10). ¿Eeshiiche jaʼaka tepichi woutiisaka polookana nouyase sünainmüin poloo pienchimüin? ¿Ekirajaashiiche naya namüiwaʼa sünain tü Bibliakat? ¿Asoutawaishiiche naya shiʼipajee tü asakinnakalü anain sünain tü outkajawaakat? ¿Aküjawaishiiche naya pütchi? Naaʼinrüle tia, jaapaa wanee aʼyatawaa namüin pansaaka sümaa tü nakuwaʼipakat jee sümaa tü nouyasekat. Müle shia jutuma, jütüjaajeerü aaʼu keraale naya süpüla tia aʼyatawaakat. Shiasaʼa poloopa aipiruamüin nouyase sünainmüin poloo mekietsatmüin, eeshiijaʼa süpüla jüneeküin naya süpüla neʼipajanain naya na laülaashiikana.

18. ¿Kasa aküjüneeka sükajee tü pütchikat nnojoluinjatüin «eein wanee kasa ayoujunaka aaʼujee naya»?

¹⁸ Na neʼipajanakana na laülaashiikana, nnojoluinjatü «eein wanee kasa ayoujunaka aaʼujee naya». Tü aküjüneekalü achiki yala, shia nnojoluinjatüin eein wanee kasa aküjünaka nüchiki maʼaka saaʼin wanee kasa mojusü jee kaainjalaa.  Eepejeʼe süküjünüle alawaa nüchiki wanee wawala. Alatüsia tia nümüin Jesús jee nüküjain sülatüinjatüin tia namüin na nikirajüinkana (Juan 15:20). Na wawalayuu anakana akuwaʼipa maʼaka anain nukuwaʼipa Jesús aneerü pütchi nachiki natuma na wawalayuukana (Mat. 11:19).

19. ¿Kasa aküjüneeka sükajee tü pütchikat «waneesüinjatü naʼwayuuse»?

¹⁹ Na wawalayuu kasaatkana neʼipajaneeka na laülaashiikana «waneesüinjatü naʼwayuuse». Kojutuinjatü namüin tü nümakat Jehová süchiki kaʼwayuusee. Shiainjatüin neʼe nuʼwayuuseka chi wayuukai wanee jierü (Mat. 19:3-9). Nnojotpejeʼe nukumajüinjatüin sukuwaʼipa süpüla nuʼluwajiraain nukuwaʼipa (Heb. 13:4). Eepejeʼe waneirua kasa naaʼinrajatka chi anoujashikai. Waneepiainjachi nia sümaa nuʼwayuuse, nnojotsü alaayaainjatüin naaʼin sooʼomüin waneirua jieyuu nnojotka nuʼwayuusein (Job 31:1).

20. ¿Kasa naaʼinraka wanee wawala anale nutuma tü «naaʼinrakat napüleerua nachonnii jee na nepialujunakana»?

²⁰ Na neʼipajanakana na laülaashiikana «anainjatü tü kasa naaʼinrakat napüleerua nachonnii jee napüleerua na nepialujunakana». Chi wawala laülaakai süpüleerua nüpüshi naaʼinrüinjatü tü nümakat Jehová nümüin, nuʼwaajawalinjachi Jehová sümaa nüpüshi semaanawai. Oʼunawalinjachi nia sünain aküjaa pütchi sümaa nüpüshi. Nikirajüinjana na nüchonniikana süpüla aleewain naya nümaa Jehová (Éf. 6:4). Chi wawala anakai atuma tü kasa naaʼinrakat süpüleerua nüchonnii jee na nepialujunakana, aneerü nutuma tü kasa naaʼinrakat napüleerua na wawalayuukana (anasü paashajeʼerüle 1 Timoteo 3:5).

21. ¿Kasa paaʼinrajatka nnojoiyüire neʼipajachin pia na laülaashiikana?

²¹ Nnojoiyüire neʼipajachin pia na laülaashiikana, puchunta shia nümüin Jehová jee pikirajaa tü ashajünakat suluʼu ekirajaayakat tüü. Pikirajaa tü naaʼinrajatkat na neʼipajaneekana na laülaashiikana otta paaʼinra shia. Jülüja paaʼin alin maʼin pia nüpüla Jehová otta alin maʼin püpüla na wawalayuukana. Pukumaja sukuwaʼipa süpüla keeʼireeinjatüin paaʼin piʼyataain napüleerua (1 Ped. 4:8, 10). Paaʼinrüle tia, talateerü paaʼin sünainjee pükaalinjain na wawalayuukana. Nükaalinjeechi pia Jehová süpüla neʼipajachin pia na laülaashiikana (Filip. 2:13).