Paul: Nowienpüroʼu soʼu tü juyakat 1985, oʼunajana waya eere wajütünüin chayaa Liberia, África Occidental. «Talatüshii maʼin waya sutuma tia. Ashaʼwalaasü tü katünasükat Senegal, «choʼujaasü neʼe palitchon oora süpüla wantüinjanain Liberiamüin», sümaka Anne. Süküjünaka namüin na wayuu suluʼukana tü katünasükat nashakatüinjanain yala süka eein atkawaa natuma waneinnua wayuu eʼrülii wayumüin nümüin chi sülaülashikai tia mmakat. Makataka waya poloo kaʼi Senegal namaa waneinnua misioneero. Waapajaka notiisia süchiki kemion ejitünaka aluʼu watta saalii outusü. Apülajünüsü noulia na wayuukana nojuʼitüin aipa suluʼujee nepia, nojuʼitüle oʼutuneena aaʼin naya.

Anne: Aaʼinmajiraashii maʼin wakuwaʼipa, mmoleʼetüjülia taya jintuluiwaʼaya taya. Jamüsüjaʼa maaʼulu, ayatayülia taya mmoluin talatapa wanee karateerü. Mayaainjeʼe mmoluin waya, wekeraajeein tü waʼyataainkat nümüin Jehová chajatka Liberia.

Paul: Joʼuujiraashi taya sümaa Anne suluʼu wanee pueulo chakat wüinpümüin sünain Inglaterra. Pejesü shipia Anne tanain, eetaasü maʼaka mekiisat kilómetro. Natütüleʼerüin maʼin waaʼin na kachonniikana taya jee müsia tü shiikat Anne süpüla pürekutsooliin waya. Shiasaʼa kettaapa watuma tü koleejiakat pürekutsootshii waya, talatüshii maʼin naya süka wakooʼomüinrüin waʼyataain nümüin Jehová. Wanaa sümaa 19 touyase ounejaanüshi taya süpüla taʼyataainjachin suluʼu Weteet. Shiasaʼa soʼu 1982 kasaatshi taya sümaa Anne jee makataka waya Weteet.

Anne: Kamalainsü maʼin wamüin waʼyataain suluʼu Weteet, keeʼireepejeʼe waaʼin woʼunuin eere palitchon Aküjalii pütchi. Süka waʼyataajiraain namaa waneinnua wawalayuu suluʼu Weteet misioneeropuʼukana jee waapajüin süchiki anain maʼin nakuwaʼipa, keeʼireesü waaʼin waʼyataain nümüin Jehová sünain misioneeroin waya. Oʼuraajüshii waya nümüin Jehová sümaa waküjain süchiki tia soʼunnaa apünüin juya. Talatüshii maʼin waya süka wounejaanüin sünain tü Ekirajaaleekat Galaad sünain tü ekirajawaakat 79 soʼu tü juyakat 1985. Wajütünaka Liberiamüin tü chakat África Occidental.

Paul: Woʼunaka suluʼu tü palajatkat katünasü chainjatka Liberiamüin. Ayatüsia apülajünüin noulia na wayuukana nojuʼitüin aipa suluʼujee nepia. Naapapa na wayuukana emetuluin shipisana wanee kasa, aʼwaatüshii naya sümaa napantajaain süka mmoluin maʼin naya. Süpüla jimatüin waaʼin waashajeʼerawalin aipaʼa waneirua pütchi suluʼuka Salmos. Kamalainpejeʼe maʼin  wamüin tü waʼyataainkat nümüin Jehová chaʼaya. Aküjasü pütchi Anne waneepia otta tayakai aʼyataashi suluʼu Weteet nümaa John Charuk. a Wainma tü kasa tatüjakat nünainjee chia wawalakai. Süka kakaliaichin nia kepiain chaa Liberia, niʼraajashaatain tü kasa kapüleesü nalatitkat na wawalayuukana chayaa.

Anne: Kiʼramaatüshii waya chaa Liberia süka alin maʼin waya napüla na wawalayuukana. Paaʼinwashii waya namaa sümaa aleewain waya namaa, müshii naya maʼaka saaʼin wapüshi wamüin, natütüleʼerüin waaʼin. Talatüshii maʼin waya sünain aküjaa pütchi süka kamalain namüin na wayuukana jee nnojotsü keeʼireein naaʼin woʼunamaatüin yalejee. Yootopa na wayuukana namaa na waneinnua, aashajaashii naya süchiki tü Bibliakat. Müsüjeseʼe mapüleein wamüin waküjain pütchi namüin. Wainma na wayuu ekirajaakana wamaa sünain tü Bibliakat, kapüleesü wamüin wekirajüin napüshuaʼaleʼeya. Anasü maʼin aküjaa pütchi suluʼu tia mmakat.

Paul: Soʼunnaa pienchi juya jimatüsü tü mmapaʼakat, shiasaʼa soʼu 1989 eejaʼalaa sümaka wanee atkawaa. Na wayuu eʼrüliikana wayumüin ashutushii naya naaʼu chi sülaülashikai tia mmakat, alatüsü tia juulioʼu 2 soʼu 1990. Soʼunnaa apünüin kashi, nnojoishii waya aashajaain namaa na wapüshikana otta sümaa tü Weteet eejeere sukumajünüin tü waʼyataainkat. Eesü atkawaa, aisü jamü jee wainma na wayuu ataüjaanakana. Müliashii maʼin na wayuukana soʼunnaa 14 juya suluʼu tia mmakat.

Anne: Atkaajiraashii jee oʼuniraashii naaʼin wayuu naatakana eʼiruku. Kaʼapülashii na wayuu mojulaashiikana, keemasü tü nasheʼinkat otta naʼluwajüin tü kasa eejatkat suluʼu tü miichikalüirua. «Oʼutaa saaʼin wayuu müsü aka saaʼin oʼutaa saaʼin kaliina», müshii naya. Pachaʼawashii natuma na wayuu noʼutakana aaʼin sotpünaa tü wopukot eejanale naya sünain aʼatapajaa na wayuu alatakana. Pejeepünaasü tia sünain Weteet. Noʼuta aaʼinchi waneinnua wawalayuu, namaʼaleeya piamashii misioneero.

Mayaainjeʼe eein süpüla jamajüin atumawaa na wawalayuukana, nounjuluin na anoujashii naatakana eʼiruku, na achajaanakana süpüla noʼutünüin aaʼin. Müsia neʼe sukuwaʼipa natuma na misioneerokana jee na weteliitakana. Waneinnua wawalayuu aʼluwataakana, antüshii naya Weteetmüin, makatüshii naya yala. Suluʼu tü kuatta eere watunkuin, eejana akaratshishii wawalayuu kepiakana wamaa.

Paul: Ekeroteeshii na wayuu mojulaashiikana suluʼu Weteet, naaʼinruʼu nayakana wounjulajüin wayuu yala. Eejana pienchishii wawalayuu aneekünakana süpüla naapiramaatüin sülatüle wanee kasa. Piamashii  na eʼrajakana suluʼupünaa wentaana otta na wane yalashii soʼuluʼu tü puettoʼukot. Nayalerüle najapü na wawalayuu yalajanakana soʼuluʼu tü puettoʼukot, wayaawata aaʼu sünainjee tia nnojoluin jashichin na mojulaashiikana. Shiasaʼa neʼitaale tü najapükat nasapoʼujee wayaawata aaʼu sünainjee tia jashichin na mojulaashiikana. Nayasaʼa na anajakana suluʼu tü wentaanakat, nounjulaamaatüin na wawalayuukana.

Anne: Shiasaʼa soʼu wanee kaʼi nekerojooka na mojulaashiikana. Tounjutpünaaka wanee wawala suluʼumüin tü bañokat eejatüle wanee escaparate eere suunjulaain wayuu. Oʼunushii na mojulaashiikana tachiirua sümaa naʼapüla. Nasheʼetaka tü puettoʼukot sümaa emetuluin maʼin shipisana natuma. Nümaka chi taʼwayuusekai namüin: «Na tü taʼwayuusekat suluʼu tü bañokot». Kepisanasü tatuma tü escaparatekat wanaa sümaa tasürülüin shia. Kamaʼasü taya sünain anaataa waneirua kasa suulia nayaawatüin saaʼu eein wayuu yala. Kutkuttusü neʼe taya süka mmoluin maʼin taya. Süka nnojoluinjatüin jaʼyain taaʼu mmoluin taya toʼuraajaka nümüin Jehová, jimatüinjatüin taaʼin nutuma. Tajutatka tü puettoʼukot sümaa nnojoluin shapaain taaʼin, tasakaka naya. Nikeroloko waneeshia sümaa nujutuin tachiki, nüliikajaaka jee nnojotka kasain nüntüin anain. Nujuʼitaka yalejee jee noʼunaka namaa na waneinnua sünain achajawaa suluʼu tü kuattakalüirua, nnojotpejeʼe kasain nantüin anain.

Paul: Mayaainjeʼe palitchon tü eküülü eekat wamaʼana, naapüin Jehová wamüin waneirua kasa akatsüinraka atuma wanoula maʼaka saaʼin aʼwaajaa Maleiwa wattaʼa maalü suluʼu Weteet. Sünainjee tia wachecherüin waaʼin soʼunnaa tü kasa kapüleesü alatakat wamüin.

Woʼunuinjanale süka nnojoluitpa eküülü otta wüin, nnojoishiije süpüla waaʼinmajüin na wawalayuu ounjulaakana, eeshiijaʼa noʼutünüle aaʼin. Ponusü maʼin waaʼin naapüin Jehová wamüin tü kasa choʼujaakat wamüin weinshi. Nükaalinjain waya süpüla jimatüinjatüin waaʼin.

Keemasü maʼin tü kasa alatakat suluʼu tia mmakat soʼu tia. Anapejeʼe waaʼin süka watüjaain saaʼu tü shiimainkat nüchiki Maleiwa. Wainma na wawalayuu aʼluwataakana süpüla nnojoluin suʼutunüin naaʼin, akatsüinraapejeʼe maʼin nanoula otta jimatüsü naaʼin soʼunnaa tü kasa alatakat namüin. Eeshii wawalayuu makana: «Sutuma tü kasa alatakat wamüin, yapashii waya süpüla tü kaʼi shiʼreetkat maʼin oʼu wayuu müliaa». Na laülaashiikana suluʼu tü outkajaaleekat jee na jimaʼaliikana, nakaalinjain na wane wawalayuukana. Na wawalayuu aʼluwataakana jee oʼunakana wünaʼapü, aküjashii naya pütchi otta outkajaashii saʼaka mojuui. Naainjain wanee «Piichi Outkajaalee» sükajee tü kasa nantakalü anain saʼaka tü mojuuikat. Soʼunnaa tia kasa kapüleekat, akatsüinraasü maʼin naaʼin na wawalayuukana süka noutkajaain jee naküjain pütchi sümüin wayuu. Wanaa sümaa shiʼikajaanüin namüin na wawalayuukana tü kasa choʼujaakat namüin, ponusü maʼin waaʼin süka nachuntuin wanee kattoʼui suulia kuluulu nasheʼinjatkat, tü kattoʼuikat süpülajatü nalüʼüjain tü karaloʼutakat naküjaka aka pütchi. Wainma na wayuu eʼrakana kasa keemasü sünain tü atkawaakat, naapajeein maʼin süchiki tü pütchi anakat maʼin.  Ponusü maʼin naaʼin na wayuukana süka aijiraain na Aküjaliikana pütchi jee talatüin maʼin naaʼin mayaainjeʼe nalatirüin kasa kapüleesü (Mat. 5:14-16). Süka yalayalain maʼin naaʼin na wawalayuukana sünain aküjaa pütchi, noʼutku na wayuu mojulaashiikana anoujashii naya mapa nünain Jehová.

Paul: Oʼunushii waya yalejee kojuyatua. Jülüjasü taaʼin tü sümakat wanee wawala misioneero: «Ekirajünüshii waya Galaad sünain waʼyataainjanain süka süpüshuaʼa waaʼin, shiaʼaya waaʼinraka tia. Kapüleepejeʼe maʼin wamüin wapütüin na wawalayuukana soʼunnaa tü kasa kapüleekat maʼin namüin, mojushaatasü waaʼin sutuma tia», müsiaʼaya waaʼin maʼaka saaʼin tü wawalakat. Talatapejeʼe maʼin waaʼin süka waʼyataain napüleerua na wawalayuukana suluʼujee waneirua mma pejeka sünain Liberia.

Anne: Maayoʼu soʼu 1996, oʼunushii waya suluʼu wanee kemion sukoroloka Weteet jee walüʼüjain wainma karaloʼuta eere süküjain süchiki tü aküjaakat pütchi chayaa Liberia. Oʼunushii waya maʼaka 16 kilómetro yalejee eere nnojoluin jouluin na wayuu mojulaashiikana. Shiasaʼa sushutunaka aaʼu eejanale waya. Na mojulaashiikana aʼitüshii naya iipünaamüin. Ayuʼnnushii apünüinshii wawalayuu suluʼujee tü kemionkat. Namaaka tü kemionkat nümaa Paul, shiʼyoujaaka maʼin waaʼin. Shiasaʼa weʼrala wamaka Paul naʼaka na wayuukana, seshi wanainmüin sümaa isharuttüin niʼipoʼu, aʼitünayaashi waaʼinruʼu. Isharuttsü niʼipoʼunain süka nujutünüin suluʼujee tü kemionkat nutuma wanee mojulaashi.

Yalajatü wanee kemion seʼejena surulaat wotusü wayuu, wakachenajaaka sünain. Nuwateʼeraka maʼin chi chupeetkai süka mmoluin nia, ojutuutainejeʼe waya. Wachuntuinñaje nümüin nüshaʼwaleerüinjatüin tü kemionkat, nnojotpejeʼe naapüin wanüiki. Ichesü maʼin wajapü sünain, nnojoliika wojutuuin. Wantaka mapa, kutkuttaʼatshii neʼe waya süka mmoluin jee mapüsajüshii maʼin waya.

Paul: Weeʼirakaajiraapa, weʼrüin yarüttüin jee chachatuain washeʼin. Ponusü maʼin waaʼin tia süka nnojoluin jamajüin waya. Watunkaka anooipaʼa süʼütpaʼa wanee katünasü ajaʼttaka maʼin sutuma shiʼinaʼannüin. Woʼunaka mapa suluʼu tia katünasükat chaa Sierra Leonamüin. Anasü waaʼin süka katüin woʼu, shapaapejeʼe waaʼin naaʼu na wawalayuu wapütakana chayaa.

Anne: Anasü waaʼin wantapa suluʼu tü Weteet chakat Freetown, Sierra Leona, naaʼinmajüin waya na wawalayuukana. Süntalaa sümaka tekiiruʼu waneirua kasa keemasü teʼrapuʼuka chaa Liberia. Mmoluwaasü taaʼin waneepia jee jülüjasü taaʼin sülatüinjatüin kasa mojusü wamüin. Achijiraʼawaisü taya saʼwai sümaa kutkuttüin taya sutuma mmoluin taya. Jülüjasü taaʼin sülateerüin kasa mojusü. Eesü isale tachiki tasanalaain, akoʼojooshi tanain chi taʼwayuusekai, nuʼuraajaka jee weeʼirajaka wanee jayeechi nümüin Maleiwa, jimatüsü taaʼin sutuma tia. Mamainnayaasü taya taaʼinruʼu, «¿ayuʼnneetche taya suulia misioneeroo?» maa müsü taaʼin.

Eepejeʼe wanee kasa anaka maʼin alataka soʼu semaanakat tia. Aapünüsü wamüin tü karaloʼutakat Eeja Waaʼin ojuʼitaka juunioʼu 8 soʼu 1996. Anuu wanee pütchi eejatka suluʼu: «¿Kasa paaʼinrajatkat shapaale maʼin paaʼin?». Tayaawata saaʼu tü alatakat tamüin sutuma taashajeʼerüin shia. Otta tü wane karaloʼuta aapünakat wamüin shia Aapiria Wayuu ojuʼitaka maayoʼu 15 soʼu 1996. Anuu wanee pütchi eejatka suluʼu: «¿Jamüsü katsüinkaʼa saaʼin?». Jaʼyasü shiyaakua wanee julirü awataka sümaa sajaʼttüin wanee sütüna. Aküjünüsü suluʼu tia karaloʼutakat eein süpüla ayatüin suwatüin wanee julirü sümaa sajaʼttüin wanee sütüna. Tia müsia aka saaʼin mojule maʼin waaʼin sutuma wanee kasa, nükatsüinrüin waaʼin Jehová süpüla wakaalinjain na waneinnua. Nükatsüinrüin taaʼin Jehová sükajee tü sümakat tia piamasükat rewiisütakat (Mat. 24:45). Wane kasa taainjaka shia tachajaain waneirua rewiisüta, aashajaaka süchiki tü kasa makalü aka saaʼin tü alatakat tamüin. Anasü taaʼin taashajeʼerapa shia.

Paul: Talatüshii maʼin waya woʼunawaitpa Liberiamüin. Sülüʼülapa süpüla sajaʼttüin tü juyakat 2004, alüʼütshii waya süpüla ekeraajaa 20 juya sünain tü aʼyatawaa aapünakat wamüin. Ajaʼttüsü tü atkawaakat chayaa jee anoutunuinjatü tü Weteetkat. Süküjünalaʼa sümünaka wamüin saapünüinjatüin wamüin wanee aʼyatawaa.

Kapüleesü maʼin wamüin wapütüin na wawalayuukana süka alin maʼin wapüla naya. Müshii naya maʼaka saaʼin wapüshi wamüin. Wapütüin paala na wapüshikana süpüla woʼunuin sünain tü Ekirajawaakat Galaad otta weʼrüin nükaalinjain waya Jehová saaʼu  weʼitaain waaʼin nünain. Wachekaka tü aʼyatawaa aapünakat wamüin jee wakolojooka suluʼumüin tü mmakat Ghana.

Anne: Mojusü maʼin waaʼin wanaa sümaa woʼunuin Liberiajee, eepejeʼe wanee kasa ponoko maʼin waaʼin. Shia tü nümakat chi wawalakai Frank, wanee wawala laülaa jee kekiikai maʼin. «Nnojo jülüjain waya jaaʼin, watüjaa aaʼu nnojoleenain motoleein waya jaaʼin. Jaaʼinmaa tü aʼyatawaa aapünakat jümüin. Naapajala shia Jehová jümüin. Ai maʼin jüpüla na wawalayuu chakana Ghana». Atütülaasü waaʼin sutuma tü nümakat chi wawalakai süka jekenain waya suluʼu tia mmakat jee nnojoliin weʼnnaajünüin.

Paul: Kiʼramaatüshii waya namaa na wawalayuu chakana Ghana jee aishii naya wapüla. Wainma wawalayuu chayaa jee eesü tü kasa watüjakat nanainjee süka katsüin maʼin nanoula jee waneepiain naya nümaa Jehová. 13 juya waya chayaa Ghana, süküjünalaʼa sümünaka wamüin woʼunuinjanain suluʼumüin tü Weteet chakat Kenia. Ponusü waaʼin tia mayaainjeʼe wasukajüin na wawalayuu chakana Ghana otta Liberia. Kiʼramaatüshii waya namaa na wawalayuu yaakana Kenia. Anayüliʼiya waya aʼyataain nümüin Jehová yaa Kenia eere choʼujaain maʼin Aküjalii pütchi.

Anne: Wainma kasa kapüleesü alataka tamüin mmotka atuma taaʼin. Kepiale waya suluʼu wanee mma eere keemain maʼin, shapaajeerü waaʼin jee ayuuijeena waya. Tatüjaa aaʼulu nnojoleerüin naainjain Jehová kasa pülasü süpüla naaʼinmajüin waya maaʼulu. Taapapa shipisana kousula, mmotsü maʼin taya jee saamatajaasü tataluʼupünaa. Mayaainjeʼe müin tia, wainma tü kasa naainjakat Jehová wapüleerua süpüla nükaalinjain waya nakajee na wawalayuukana. Tayaawata aaʼulu taashajeʼerüle tü Bibliakat, toʼuraajüle, toutkajaale jee taküjale pütchi, ayateerüin taya sünain tü aʼyatawaa naapakat Jehová tamüin.

Paul: Eeshii wawalayuu asakirakana waya müleka kamalainre wamüin tü mmakat eere waʼyataain nümüin Jehová. Mayaainjeʼe eein mma anaka maʼin, eesü sülatalaʼa sümüle wanee kasa keemasü suluʼu. Nnojotsü kojutuin wamüin tü kasa eekat suluʼu wanee mma, naya kojutuka wamüin na wawalayuukana, naya wapüshikaʼaya. Mayaainjeʼe naatain wakuwaʼipa, woumain, wachajaain sukuwaʼipa süpüla wanaawain waaʼin sümaa tü jülüjakat naaʼin Jehová. Waya neʼe akatsüinnaka anoula natuma na wawalayuukana mayaainjeʼe wayain ajütünüin süpüla wakatsüinrüin nanoula. Jaʼitainna jalain waya, aneerü waaʼin namaa na wawalayuukana süka naapajalain naya Jehová wamüin.

Woutkajaapa namaa na wawalayuukana, anasü maʼin waaʼin namaa otta müshii naya maʼaka saaʼin wapüshi wamüin. Watüjaa aaʼu weʼitaale waaʼin nünain Jehová, katsüinjeerü waaʼin nutuma jaʼitairü kasain alatüin wamüin (Filip. 4:13).