Süpüla piyaawatüin sooʼomüin süchiki tü pikirajaakalü anain pümüiwaʼa, jülüjeesü paaʼin tü pikirajaakalü anain. Anuu waneirua kasa paaʼinrajatkat süpüla puuntuin tia.

• Pikirajaa eere anashiin pümüin. Pikirajaa eere nnojoluin walakatüin kasa otta eere nnojoluin kojoin piʼyuushi. Pikirajaa saaʼu wanee escritorio, saaʼu wanee meesa jee shiale pikirajaain chayaa anooipaʼa eere anashiin pümüin.

• Pikirajaa eere yüütüülin. Jamüshijaʼa Jesús, atamaashi nia eeiwaʼaya aikat nuʼunaka sünain oʼuraajaa suluʼumüin wanee mma yüütüüisü (Mar. 1:35). Yalale na püpüshikana püʼütpünaa, pümaa namüin nnojoluin nasakirüin pia süka pikirajaainjachin.

• Sümaʼainruʼu pikirajaain, nnojo paaʼinrüin wanee kasa nnojoleetka jülüjain atuma paaʼin shia. Pikirajaale sükajee serulaat jee shiale wanee tableta, anasü meʼirale shia putuma suulia shikeʼejüin paaʼin. Sotojoole paaʼin wanee kasa paaʼinrajatka sümaʼainruʼu pikirajaain, anasü püshajüle shia süpüla paaʼinrüin mapeena. Kapüleere pümüin jülüjain paaʼin tü pikirajaakalü anain, püshaʼwalaa motsoʼo süpüla puwaraʼiraain jee shiale süpüla piyurulain.