EKIRAJAAYA 44
JAYEECHI 33 Wachunta kaalinwaa nümüin Maleiwa
Waaʼinrajatka soʼu müliain waya atumawaa
«Jaainja kasa eekai anain jaʼitasü saaʼinnüin kasa mojusü jümüin» (ROMA 12:21).
TÜ WATÜJEETKAT
Wekirajaajeerü anain tü waaʼinrajatkat suulia waaʼinrajüin wanee kasa eekai mojuin soʼu müliain waya atumawaa.
1, 2. ¿Kasa alatawaika wamüin müliaka atuma waya?
AASHAJAASHI Jesús süchiki wanee wayuu outa aʼwayuuset achuntaka kaalinwaa nümüin wanee laülaashi sükajee müliain shia atumawaa. Suchuntuin maʼin nümüin nunouteʼerüinjatüin sukuwaʼipa tü kasa alatakat sümüin. Nayaawata aaʼu na nikirajüinkana Jesús jamüin saaʼin tia wayuukat, jama wattain naalii na wayuu müliakana atumawaa soʼu tia (Luc. 18:1-5). Wayaawatüinña saaʼu tü alatakat sümüin tia wayuukat süka sülatüirüin wamüin tü alatakat sümüin.
2 Wainma na alerajakana wayuu maaʼulu yaa, na müliakana atuma wayuu otta na kamaʼaneekana kasa nnojotka nakoroloin, müsüjeseʼe watüjaain saaʼu mülieenain waya atumawaa (Ecl. 5:8). Eepejeʼe müliale waya sutuma tü naaʼinrakat wamüin wanee wawala. Nnojotsü naaʼinrüin tia wamüin sünainjee wanoujain, shia sutuma nüleʼeruʼuin tü kaainjalaakat. Watüjaajeerü aaʼu tü waaʼinrajatkat sünainjee tü naaʼinrakat Jesús soʼu müliain nia atumawaa. Nnojoishii waya aashichijaain namüin na manoujainsalii müliakana atuma waya. Nayaleekajaʼa waashichijaamaateein amüin na wawalayuukana. ¿Jamüsüche naaʼin Jehová niʼrüle müliain waya natuma na manoujainsaliikana jee sutuma naaʼinrüin kasa mojusü wamüin wanee wawala? ¿Kachipünaasüche naaʼin tü alatakat wamüin?
3. ¿Jamüsü watüjaakaʼa saaʼu kachipünaain naaʼin Jehová tü alatakat wamüin?
3 Kachipünaasü naaʼin Jehová tü alatakat wamüin. Niʼreein anain wakuwaʼipa süka anain nümüin lotuin sukuwaʼipa wanee kasa (Sal. 37:28). Nüküjain Jesús wamüin nunoutamaateerüin Jehová sukuwaʼipa tü alatakat wamüin, kettaaitpa nutuma tü kaʼi naaʼinrajatkalü oʼu tia (Luc. 18:7, 8). Choʼujaʼalaʼa neʼe palitchon kaʼi najaʼttirüinjatkalü oʼu Jehová tü kasa müliakalü atuma waya, müinnaka nnojoliin müliain waya (Sal. 72:1, 2).
4. ¿Kasa nükaalinjaka aka waya Jehová maaʼulu?
4 Waʼatapajüinjatü tü kaʼi najaʼttirajatkalü oʼu Jehová süpüshuaʼa tü kasa mojusükat. Nükaalinjapejeʼe waya maaʼulu süpüla wachecherüin waaʼin müliale waya atumawaa (2 Ped. 3:13). Nikirajüin waya sünain tü waaʼinrajatkat suulia waaʼinrajüin wanee kasa eekai mojuin soʼu müliain waya atumawaa. Nüküjain wamüin suluʼu tü Bibliakat tü naaʼinrakat Jesús soʼu müliain nia atumawaa. Nüküjainña wamüin Jehová watta saalii pütchi suluʼujee tü Bibliakat atütüleʼereetkat waaʼin soʼunnaa müliain waya atumawaa.
TÜ EEJÜINJATKALÜ OULIA WAAʼIN SOʼU MÜLIAIN WAYA ATUMAWAA
5. ¿Kasa eejüinjatka oulia waaʼin soʼu müliain waya atumawaa?
5 Eesüjaʼa shapaajeerüle maʼin waaʼin otta aijeerüle maʼin wamüin müliain waya atumawaa (Ecl. 7:7). Müsia naaʼin na anoujashiikana nünain Jehová, na müliakana atumawaa sümaiwa paala maʼaka naaʼin Job otta Habacuc (Job 6:2, 3; Hab. 1:1-3). Mayaainjeʼe shapaajeerüin waaʼin jee aijeerüin wamüin tü aainjünakat, eejüinjatü waaʼin suulia waaʼinrajüin wanee kasa eekai mojuin.
6. ¿Kasa watüjaka sünainjee tü naaʼinrakat Absalón? (Piirakaa sümüin tü ayaakuaakat).
6 Müliale waya atumawaa jee niale müliain atumawaa wanee wayuu aikai wapüla, eeshiijaʼa wachuntule pasalaawaa, nnojotpejeʼe anain waaʼinrüle tia. Alateerü kasa mojusü sünainjee tia maʼaka saaʼin tü alatakat wanaa sümaa sütaüjaanüin Tamar tü nushunuukat Absalón. Ataüjaanüsü shia nutuma Amnón, chi suwalaichikai, aisü maʼin nümüin Absalón tia. Saashin tü Pütchi Aapünakat nümüin Moisés, outajachin Amnón sünainjee tia kasa mojusü naaʼinrakat (Lev. 20:17). Jashichinjachijaʼaya Absalón sünainjee tia alatakat, nnojotpejeʼe anain tü naaʼinrakat, achuntushi pasalaawaa jee nuʼutuin naaʼin Amnón (2 Sam. 13:20-23, 28, 29).
Wanaa sümaa sütaüjaanüin Tamar, tü nushunuukat Absalón, nnojotsü nüchecherüin naaʼin, aashichijaashi nia. (Paashajeʼera tü pütchikat 6).
7. ¿Kasa alataka nümüin chi salmistakai sutuma niʼrüin müliain maʼin na waneinnua atumawaa?
7 Weʼrüle nnojoluin jamajüin atumawaa na müliakana atuma na waneinnua, eesüjaʼa jülüjeerüle waaʼin amülain neʼe waaʼinrüin tü kasa anasükat. Alatüsü tia nümüin wanee salmista aʼyataapuʼukai nümüin Jehová. Niʼrüin anain maʼin nakuwaʼipa na wayuu müliakana atuma na wayuu anamiakana. Anuujeseʼe nünüiki nachiki: «Aleʼeya na mojulaashiikana, anakuwaʼipaliishii maʼin naya» (Sal. 73:12). Akaʼaya sutuma niʼrüin müliain maʼin na waneinnua atumawaa, jashichishi nia otta jülüjasü naaʼin amülain neʼe niʼyataain nümüin Jehová. Anuu nünüiki süchiki tia: «Shapaasü taaʼin sutuma kapüleein maʼin tamüin tayaawatüin saaʼu» (Sal. 73:14, 16). Anuu sooʼomüin nünüiki: «Ojunujaataairüjeʼe tü tooʼuikat asiranajaataairüjeʼe shia» (Sal. 73:2). Alatüsü tia nümüin wanee wawala Alberto wameechikai amüin. a
8. ¿Kasa alataka nümüin wanee wawala sutuma jashichin maʼin nia sünainjee saainjünüin kasa mojusü nümüin?
8 Eeshii waneinnua wawalayuu alirajaka Alberto sümaa nuʼluwajüin tü nneerü ejitünakat suluʼu tü kojonchonkot suluʼu tü outkajaaleekat. Sünainjee tia nnojolitchipa nia laülaashin suluʼu tü outkajaaleekat otta nnojolitchipa nia kojutuin natuma na wawalayuu atüjaakana saaʼu tia. Anuu nünüiki süchiki tü alatakat nümüin: «Jashichishi maʼin taya jee mojusü maʼin taaʼin soʼu tia». Sünainjee jashichin maʼin nia, eemiajaasü nunoula nünain Jehová, jaʼrai juya nia nnojolin nüküjain pütchi jee nnojolin nuʼunuin sünain tü outkajawaakat. Eesüjaʼa sülateerüle wamüin tia, jashichire maʼin waya sünainjee müliain waya atumawaa.
WASHATA NUKUWAʼIPA JESÚS
9. ¿Kasa mojusü aainjünakat nümüin Jesús? (Piirakaa sümüin tü ayaakuaakat).
9 Anasü washatüle nukuwaʼipa Jesús soʼu saainjünüin kasa mojusü wamüin. Wainma na wayuu müliakana atuma Jesús, müliashia nia natuma na nüpüshi manoujainkana. «Mamainnashi», müshii naya nümüin. Akaʼaya naashin na nekiipüʼükana na sacerdotekana, aainjashi nia kasa pülasü nakajee na yolujaakana. Meeʼerapalashi nia natuma na surulaat chejeʼewaliikana Roma, aʼyaajünüshi jee oʼutunaa aaʼinchi nia (Mar. 3:21, 22; 14:55; 15:16-20, 35-37). Nüchechetpejeʼe naaʼin Jesús soʼunnaa saainjünüin kasa mojusü nümüin, nnojoishi nia achuntuin pasalaawaa. ¿Kasa watüjaka sünainjee tü kasa naaʼinrakat?
Washatüinjatü nukuwaʼipa Jesús soʼu müliain waya atumawaa. (Paashajeʼera tü pütchikat 9 otta 10).
10. ¿Kasa naaʼinraka Jesús soʼu müliain nia atumawaa? (1 Pedro 2:21-23).
10 (Paashajeʼera 1 Pedro 2:21-23). b Anasü maʼin süpüla washatüin nukuwaʼipa Jesús soʼu müliain waya atumawaa. Jamüshijaʼa nia, nnojoishi asoutuin soʼu nüsakiijünüin shiiʼiree nimeejünüin (Mat. 26:62-64). Akaʼaya soʼu süküjünüin alawaa nüchiki, koʼutushi neʼe nia (Mat. 11:19). Akaʼaya soʼu nusoutuin, nnojoishi nia peʼipaain namaa na airuʼutkana anüiki nümüin. «Nnojotsü nüküjain namüin na müliakana atuma nia neʼreenain noʼukajatü» sünainjee tia. Nüchecherüin naaʼin Jesús süka «nuuʼulaain tia najapuluʼu [Jehová] chi laülaashi lotokoi atuma sukuwaʼipa wanee kasa süsalajatpa saainjala wayuu nutuma». Nütüjaa aaʼu Jesús niʼrüin Jehová müliain nia sünainjee naaʼinrüin tü kasa anasü nüchekakat. Nunouja anainrü kettaaitpain nutuma Jehová tü kaʼi najaʼttirajatkalü oʼu tü kasa mojusükat.
11. ¿Kasa waaʼinrajatka süpüla wachecherüin waaʼin suulia airuʼuluin wanüiki? (Piirakaa sümüin tü ayaakuaakat).
11 Müliale waya atumawaa, washata nukuwaʼipa Jesús, wachechera waaʼin suulia airuʼuluin wanüiki. Eesü nnojorüle choʼujaain wasoutuinjanain jee waaʼinrüinjanain wanee kasa süka nnojoluin mojuin maʼin tü kasa aaʼinnakat wamüin. Eepejeʼe süpüla koʼutuin neʼe waya suulia joo sülatajüin kasa mojusü sünainjee (Ecl. 3:7; Sant. 1:19, 20). Eeshiijaʼa wasouteenale soʼu weʼrüin müliain maʼin wanee wayuu atumawaa jee wasoutuin saaʼu tü wanoujakalü anain (Aluw. 6:1, 2). Wasoutajanapa saaʼu wanee kasa, anamiainjana waya jee kojutuinjatü wayuu watuma (1 Ped. 3:15). c
Soʼu müliain waya atumawaa, washata tü naaʼinrakat Jesús, jülüjainjatü waaʼin joujain anain süpüla wasoutuin otta jamüinjatüin sukuwaʼipa wanüiki. (Paashajeʼera tü pütchikat 11 otta 12).
12. ¿Kasa wooʼulaainjatka «najapuluʼu chi laülaashi lotokoi atuma sukuwaʼipa wanee kasa süsalajatpa saainjala wayuu nutuma»?
12 Washata nukuwaʼipa Jesús, wooʼulaa tü alatakat wamüin «najapuluʼu chi laülaashi lotokoi atuma sukuwaʼipa wanee kasa süsalajatpa saainjala wayuu nutuma». Süküjünüle alawaa wachiki jee müliale waya atumawaa, wooʼulaa tia nüpüla Jehová süka niain atüjaain saaʼu tü alatakat wamüin. Sükajee watüjaain saaʼu nunouteʼereerüin Jehová süpüshuaʼa tü kasa mojusükat, wachechereerü waaʼin soʼunnaa müliain waya atumawaa. Wanoujale maʼin nünain Jehová, waʼatapajeerü nunouteʼerüin süpüshuaʼa tü kasa mojusükat. Nnojoliinjana waya jashichikuʼu müin jee üttakuʼu müin waaʼin nanain na waneinnua. Müleka jashichikuʼu wamüle namüin na waneinnua, eeshiijaʼa waainjeenale kasa eekai mojuin, nnojoleerü talatüin waaʼin jee amojujaajeerü wakuwaʼipa nümaa Jehová (Sal. 37:8).
13. ¿Kasa akaalinjeenaka waya süpüla wachecherüin waaʼin soʼu müliain waya atumawaa?
13 Eesüjaʼa nnojoleerüle ayatüin maʼin watuma nukuwaʼipa Jesús, jama waleʼeruʼuin süchiki kaainjalaa. Eejeerü tü kasa mojukat watuma otta eejeerü wojuʼitirüin pütchi eekai mojuluʼuluin (Sant. 3:2). Eesüjaʼa mojeerüle waaʼin jee shapaajeerüle maʼin waaʼin waneepia sutuma müliain maʼin waya atumawaa. Sülatüle wamüin tia soto waaʼin nütüjaain saaʼu Jehová müliain waya sünainjee waaʼinrüin tü kasa nüchekakat otta nütüjaa aaʼu Jesús jamüin mojuka maʼin waaʼin, jama sülatüirüin nümüin tia (Heb. 4:15, 16). Nüshajirüin wamüin Jehová tü nukuwaʼipakat Jesús jee müsia nüküjain wamüin pütchi suluʼu tü Bibliakat akatchinreetka waaʼin soʼu müliain waya atumawaa. Wekirajaa süchiki piamasü wetsiikulo suluʼujeejatü tü karaloʼutakat Roma akaalinjeenaka waya soʼu tia.
«JUUʼULAA TIA NÜPÜLA MALEIWA»
14. ¿Kasa wooʼulaainjatka naaʼinrüin Jehová wapüleerua? (Roma 12:19).
14 (Paashajeʼera Roma 12:19). Nüküjain chi aluwataaushikai Pablo namüin na anoujashiikana nooʼulaainjatüin nüpüla Maleiwa tü kasa alatakat namüin. Wooʼulaain nüpüla Jehová nüneeküin tü kaʼi najaʼttirajatkalü oʼu tü kasa mojusü aainjünakat wamüin. Eeshi wanee wawala kanüliakai John, müliashi nia nutuma wanee wawala. Anuu nünüiki: «Suulia taaʼinrajüin wanee kasa eekai mojuin, tachecherüin taaʼin wanaa sümaa jashichin maʼin taya, kapüleesü tamüin taaʼinrüin tia. Sükaalinjapejeʼe taya tü sümakat Roma 12:19, tooʼulaainjatüin nüpüla Jehová tü alatakat tamüin».
15. Püküja jamüin anaka wooʼulaale nüpüla Jehová tü kasa mojusü alatakat wamüin.
15 Anasü wakuwaʼipa wooʼulaale nüpüla Jehová nunouteʼerüin tü alatakat wamüin. Müle shia watuma nnojoleerü shapaain waaʼin otta nnojoleerü mojukuʼu müin waaʼin sünainjee isain wachiki wanouteʼerüin shia süka waaʼin wamüiwaʼa. Nüküjain wamüin Jehová nükaalinjeenain waya. «Juuʼulaa tapüla tü alatakat jümüin, tayeechi pasalaaka atuma», müshi nümakaijaʼa wamüin. Wanoujale sünain tü nümakat Jehová wamüin, nnojoleena waya jashichikuʼu müin süka watüjaain saaʼu nunouteʼereerüin shia. Shiaʼaya nunoujakalü anain tia chi wawalakai John. Anuu nünüiki: «Tooʼulaale nüpüla Jehová tü alatakat tamüin, aneerü maʼin tü kasa naaʼinrakat tapüleerua suulia tü taaʼinrakat süpüla tanouteʼerüin shia».
«JAAINJA KASA EEKAI ANAIN JAʼITASÜ SAAʼINNÜIN KASA MOJUSÜ JÜMÜIN»
16, 17. ¿Jamüshii ayatüinjanakaʼa woʼuraajüin süpüla waainjain kasa eekai anain jaʼitasü saaʼinnüin kasa mojusü wamüin? (Roma 12:21).
16 (Paashajeʼera Roma 12:21). Anuu tü naaʼinrajatkat na anoujashiikana naashin Pablo: «Jaainja kasa eekai anain jaʼitasü saaʼinnüin kasa mojusü jümüin». Anuukaʼa joo nünüiki Jesús: «Alinjana jüpüla na jüʼünüükana, achuntajana jia napüleerua na müliakana atuma jia» (Mat. 5:44). Shiaʼaya naaʼinraka Jesús tia. Eesüjaʼa jülüjale waaʼin müliain maʼin naaʼin Jesús wanaa sümaa nüchitünüin sünain tü wunuʼukat natuma na surulaat chejeʼewaliikana Roma, eʼrüshi japülii otta müliashi nia natuma. Nnojotsü wayaawatüin maʼin saaʼu tü müliaa nülatirakat Jesús.
17 Ayatüshia Jesús aipüraliin wayuu jee waneepiain nümaa Jehová mayaainjeʼe müliain nia atumawaa. Nnojoishi nia achuntuin süpüla müliainjanain nutuma Maleiwa na müliakana atuma nia. Anuu nünüiki napüleerua: «Tashikalee, moto paaʼin tü naaʼinrakat, nnojotsü nayaawatüin aaʼu tü naaʼinrakat» (Luc. 23:34). Wanaa sümaa wachuntuin nümüin Jehová napüleerua na müliakana atuma waya, jamaamasü waaʼin, nnojoishii waya jashichin. Waaʼinrüle tia, eesüjaʼa shiiʼirateerüle tü jülüjakat waaʼin nachiki na aaʼinrakana kasa mojusü wamüin.
18. ¿Kasa anasü niʼraka Alberto otta John sünainjee nachuntuin nümüin Jehová soʼunnaa müliain naya atumawaa?
18 Na wawalayuu wachuntuinnapakana anülia, nachecherüin naaʼin soʼunnaa müliain naya atumawaa sükajee nachuntuin nümüin Jehová. Anuu nünüiki Alberto: «Achuntushi taya napüleerua na wawalayuu alirajakana taya sünain aʼluwajaa nneerü. Kojuyatua tachuntuin nümüin Jehová nükaalinjainjachin taya süpüla motuinjatüin taaʼin tia alatakat». Aleʼejüshi nüchikuaʼa Alberto sünain aʼyatawaa nümüin Jehová. Anuu nünüiki John: «Kojuyatua toʼuraajüin nüpüleerua chi wawala müliakai atuma taya. Nükaalinjain taya Jehová süpüla nnojolin jashichin taya nümüin otta süpüla motuin taaʼin naainjala. Jimatüsü taaʼin sutuma toʼuraajüin nüpüleerua».
19. ¿Kasa waaʼinrajatka sümaʼainruʼu najaʼttirüin Jehová tü kasa mojusükat? (1 Pedro 3:8, 9).
19 Süpülapünaa süntüin tü nükaliakat Jehová nnojotsü watüjaain saaʼu tü kasa mojusü aainjüneekat wamüin. Ayataʼaya wachuntuin kaalinwaa nümüin Jehová, ayataʼaya washatüin tü naaʼinrakat Jesús otta tü naaʼinrakat na waneinnua soʼu müliain naya atumawaa. Ayataʼaya waaʼinrüin tü nümakat Jehová wamüin suluʼu tü Bibliakat. Waaʼinrüle tia naapeerü Jehová wamüin kasa anasü (paashajeʼera 1 Pedro 3:8, 9).
JAYEECHI 38 Naaʼinmajeein pia Jeʼwaa
a Aʼwanajaanüsü waneirua anüliee.
b Suluʼu 1 Pedro kapiitulo 2 otta 3, aashajaashi Pedro süchiki tü alatakat namüin na anoujashiikana soʼu müliain naya natuma na nalaamainkana otta müliain naya natuma na naʼwayuuse manoujainkana (1 Ped. 2:18-20; 3:1-6, 8, 9).
c Pünaja suluʼu jw.org tü videokot Anajiraajeena waya maʼaka aipüraliire waya.
