Shiʼraiwaʼaya wanee jintutchon kaittüin iipünaamüin sümüsain wanee fábrica, shiayaa saaʼinruʼu eere sukumajünüin tü sirumakalüirua süka müin aka saaʼin siruma tü kaittakat. Asirajüshi wayuu naapüle tia. Eepejeʼe waneeirua kasa mojeetka atuma wakuwaʼipa nnojorüle wayaawatüin saaʼu kasain wayuu shia. Maʼaka saaʼin tü karaloukta sünainkat süta wanee wunuʼu wepinase, nnojorüle wayaawatüin saaʼu kasain wayuu tü saʼakakat, eeshii süpüla jamüin waya sutuma.

Shiapejeʼe mojuleein maʼin nnojorüle wayaawatüin saaʼu wanee kasa nümaka Maleiwa. Jamüsüjaʼa sümaiwa, eejana waneeinnua wayuu nnojoliikana ayaawatüin saaʼu tü nikirajakalü anain Jesuu (Juan 6:48-68). Nnojoliipejeʼe naya ekirajaweein sooʼomüin, nayouktüin süpüshuaʼa tü nikirajakalü anain Jesuu. Aluʼutaʼaleeshiijaʼa maka naya.

¿Eesia paashajeʼerüin tü Wiwüliakat süpüla pütüjaain saaʼu tü anakat süpüla paaʼinrüin? Paaʼinrüle shia, anashaatasü maʼin. Eepejeʼe wainma wayuu nnojoliikana ayaawatüin saaʼu tü naashajeʼerakat, waneejatü neʼe tü nayaawatakalü aaʼu. Wekirajaa sünain apünüinsü kasa nnojotka nayaawatüin aaʼu.

• Eeshii wayuu eekai nnojoluin ayaawatüin saaʼu jamaluʼuluin tü sümakat tü Wiwüliakat süchiki «mmoluwaainjanain» waya neema Maleiwa. Naaʼinruʼu nayakana, mmoluinjana waya neema Maleiwa (Eclesiastés 12:13). Nnojotpejeʼe keeʼireein naaʼin Maleiwa mmoluinjanain na wayuu aʼwaajakana nia. Müshi nia: «Nnojo piyoʼujaain aaʼin, anii taya pümaa. Nnojo shapaain paaʼin, taya chi Pümaleiwasekai. Shiimain katsüinjeerüin paaʼin tatuma. Shiimainshaata maʼin takaaliinjeechin pia. Ayateechi takaaliinjüin pia süka tü tajapü tekiakat» (Isaías 41:10, TNM). Tü mmoluwaakat neema Maleiwa shia kojutüle maʼin nia wamüin.

• Eetaashii na nnojoliikana ayaawatüin maʼin saaʼu pütchikat tüü: «Eesü kaʼi süpüla kasa süpüshuaʼa, [...] eesü kaʼi süpüla jemein wayuu otta kaʼi süpüla ouktüin wayuu» (Eclesiastés 3:1, 2). Naaʼinruʼu naya wayuukana, niʼitaain Maleiwa tü sükaliakat süpüla ouktüinjachin wanee wayuu. Nnojotpejeʼe shiain süküjeein tia tü wetsiikulokot. Shia süküjaka achiki nukuwaʼipa wanee wayuu otta süchiki nnojoluin jaralüin isain süchiki tü ouktaakat. Jee müsia süküjüin tü Wiwüliakat eein süpüla kakaliain wayuu anale tü nüneekakat süpüla naaʼinrüin. Jamüshijaʼa chi eekai mmoluwaain neema Maleiwa, kakalieechi (Proverbios 10:27; Salmo 90:10; Isaías 55:3). ¿Suluʼu jamüin? Chi wayuu eekai kojutüin amüin Maleiwa, nnojoleechi aaʼinrüin kasa mojusü maʼaka saaʼin nipeʼrüin jee nümaʼüjiraain nukuwaʼipa sümaa wayuu nnojotka nuʼwayuusein (1 Corinto 6:9, 10).

• Eeshii eekai nanoujain sünain najaʼlajeʼerüinjatüin Maleiwa tü Mmakat; nanoujain tia sutuma süküjüin tü Wiwüliakat «naʼajüinjatüin» Maleiwa tü Mmakat sümaa tü kasairua chakat iipünaa (2 Pedro 3:7, TNM). Nüküjapejeʼe Maleiwa nnojoluinjatüin najaʼlajeʼerüin tü Mmakat. «Nia kakumalaka tü Mmakat jee tü kasa eekat saaʼu otta nnojotsü jaralüinjatüin ajaʼttirüin shia, eeinjatü shia süpüla kaʼikat süpüshuaʼa», müsü tü Wiwüliakat (Salmo 104:5, TNM; Isaías 45:18). Shiainjatü ajaʼlajeʼennaka tü kasa mojusü eekat yaa mmapaʼa, meerü saʼajünakai aaʼin. Nnojotsü shiainjatüin ajaʼlajeʼennüin tü Mmakat. Akaʼaya tü kasairua chakat chaa iipünaa, shia tü sirumatuʼukat eere Maleiwa, tia nnojotsü ajaʼttinnüinjatüin.

Wekirajaaitpa anain eein wayuu eekai nnojoluin shiyaawatüin maʼin saaʼu tü sümakat tü Wiwüliakat. ¿Jamüsüche nuuʼulaaka Maleiwa sülatüin tia? Eeshijaʼa eekai nümüin: «Nütüjaale saaʼu Maleiwa kasa süpüshuaʼa otta kekiire maʼin nia, ¿jamakaʼa nnojotka nüshajirüin tü Wiwüliakat süpüla shiyaawatüin wayuu süpüshuaʼa tü sünüikikat?». Wekirajaa sünain apünüinsü kasa nnojotka shiyaawatüin aaʼujee wayuu tü sümakat tü Wiwüliakat.

1. Tü Wiwüliakat süpülajatü nayaawatüin saaʼu na wayuu nnojoliikana yaletüin aaʼin jee na atüjaweekana saaʼu. Müshi Jesuu nümüin chi Nüshikai: «Taataa, taʼwaajüin pia, pia Aluwataashikai chaʼaya iipünaa ooʼulaka yaʼaya mmoluʼu. Tü paaʼinrüinjatkat, nnojotsü piiʼiyatüin sümüin wayuu eekai kekiin saashin, piiʼiyatüitpa  namüin na wayuu kamaneekana pümüin» (Lucas 10:21). Ashajünüsü tü Wiwüliakat süpüla nayainjanain neʼe ayaawatüin saaʼu sünüiki na wayuu nnojoliikana yaletüin aaʼin. Na eekana kekiin naashin, yaleta aaʼinchii naya otta nnojotsü nayaawatüin saaʼu sünüiki tü Wiwüliakat, waneejatü neʼe tü nayaawatakalü aaʼu. Aluʼujasaʼa na nnojoliikana yaletüin aaʼin, nayaawata aaʼu tü nümakat Maleiwa süka naashajeʼerüin tü Wiwüliakat sümaa natüjaweein saaʼu tü sümakat. Anashaatasü maʼin sukumajia tü Wiwüliakat nutuma Maleiwa.

2. Tü Wiwüliakat napülajatü na keeʼireekana aaʼin nükaaliinjain naya Maleiwa sünain ayaawataa saaʼu nünüiki. Naashin Jesuu, choʼujaasü sükaaliinjünüin wayuu süpüla shiyaawatüin saaʼu tü nikirajakalü anain. ¿Jamüinjatü sükaaliinjia wayuu naashin Jesuu? Müshi nia: «Chi Naaʼinkai Maleiwa, chi Akaaliijüikai, ajütüneechi jünainmüin nütüma chi Tashikai sünainjee tapüshin jia. Nikirajeena jia sünain kasa süpüshua nooʼopünaa Maleiwa je nüsoʼireerü jaaʼin sünain süpüshua tü tamapüʼükat jümüin» (Juan 14:26). Nükaaliinjain wayuu Maleiwa nükajee chi naaʼinkai süpüla shiyaawatüin saaʼu tü sümakat tü Wiwüliakat. Nnojoipejeʼe naapüin chi naaʼinkai nümüin chi eekai nnojoluin choʼujaain amüin nükaaliinjünüin nüküjainruʼu, müsüjeseʼe kapüleein nümüin niyaawatüin saaʼu sünüiki tü Wiwüliakat. Chi naaʼinkai Maleiwa, nia oʼunitka na anoujashiikana namaʼanamüin na wayuu atüjaweekana saaʼu sünüiki tü Wiwüliakat (Aluwataaushikana 8:26-35).

3. Eesü pütchi suluʼuka tü Wiwüliakat ayaawatünaka aaʼu keraapa sükalia nutuma Maleiwa. Jamüshijaʼa Daniel, wanee nünüikimaajachi Maleiwa, ashajinnüshi wanee pütchi nutuma Maleiwa ekeraajüinjatka mapeena. Müshi wanee aapiee nümüin Daniel: «Daniel, matüjaajuinjatü aaʼu putuma tü pütchi püshajakat suluʼu tü karalouktakat otta kepekia shia putuma waneʼereʼeya sülüʼütpa sükalia sajaʼlajaainjatka oʼu kasakat süpüshuaʼa». Kakaliairü maʼin wayuu sünain aashajeʼeraa tü nüshajakat Daniel sümaa nnojoluin shiyaawatüin saaʼu jamaluʼuluin tü nüshajakat. Jaʼitakajeʼe Daniel, nnojotsü niyaawatüin saaʼu süpüshuaʼa tü pütchi nüshajakat, müshijeseʼe nümüin: «Taapüin tü pütchikat, nnojotpejeʼe tayaawatüin saaʼu». Antajatü sükalia süpüla shiyaawatüin wayuu saaʼu tia pütchikat, niapejeʼe Maleiwa aneeküinjachika sükalia tia. Anuu sooʼomüin nünüiki chi aapieekai nümüin Daniel: «Anakajaʼa puʼunüle Daniel, nnojoleerü jaralüin ayaawatüin saaʼu tü pütchikat waneʼereʼeya sülüʼütpa sükalia sajaʼlajaainjatka oʼu kasakat süpüshuaʼa [...]. Nnojoleerü nayaawatüin aaʼu tü pütchikat na mojulaashiikana; aluʼujasaʼa na kekiikana, nayaawateerü aaʼu tü pütchikat» (Daniel 12:4, 8-10, TNM). Watüjaa aaʼu sutuma tia eein waneeirua pütchi suluʼu tü Wiwüliakat nnojotka ayaawatünüin aaʼu waneʼereʼeya süntüin sükalia nutuma Maleiwa.

¿Eeiria woʼtchejaain amaa wanee pütchi wayakana aküjüliikana pütchi nüchiki Jeʼwaa? Jamüsaʼa. Wanoukteʼerapajaʼa tü wanoujakalü anain wanaapünaa sümaa tü wayaawataka aaʼu nutuma Maleiwa suluʼujee tü Wiwüliakat. Sükajee tia, washatüin nakuwaʼipa na nikirajüinkana Jesuu, nnojotsü yaletüin naaʼin otta nanoukteʼerüin tü jülüjakat naaʼin wanaa sümaa nikirajüin naya Jesuu (Aluwataaushikana 1:6, 7).

Nnojotsü sirumain tü shiʼrakat tü jintut waküjakalü achiki paala, suʼtchejaa amaalü tia. Nnojoluinjatpejeʼe woʼtchejaain amaa tü sümakat tü Wiwüliakat. Choʼujaashaatasü maʼin wamüin tü pütchi suluʼukat, müsüjeseʼe nnojoluin anain wachajaale sukuwaʼipa süpüla wayaawatüin saaʼu sünüiki tü Wiwüliakat wayakana wamüiwaʼa. Müsüjeseʼe anain puchuntüle kaaliinwaa süpüla piyaawatüin saaʼu tü paashajeʼerakat suluʼu tü Wiwüliakat. Puchunta kaaliinwaa namüin na ekirajaakana sünain tü Wiwüliakat sümaa nnojoluin yaletüin naaʼin, na achuntakana chi naaʼinkai Maleiwa nümüin jee na anoujakana sünain keeʼireein naaʼin Maleiwa nayaawatüin saaʼu nünüiki maaʼulu yaa. Anale saaʼin pümüin, paashajaa namaa na aküjüliikana pütchi nüchiki Jeʼwaa jee shiale paashajeʼerüin tü pütchi pansaasü nekirajaakalü anain suluʼujee tü Wiwüliakat, tü suluʼukat jw.org. Müsü tü Wiwüliakat: «Puchuntüle maʼin atüjawaa saaʼu wanee kasa [...,] pütüjaajeerü saaʼu tü nütüjaakalü aaʼu Maleiwa» (Proverbios 2:3-5, TNM).