Nükaalinjeechi pia Maleiwa otta nümülialeerü paaʼin
AKÜJÜNÜSÜ sünain tü pütchi paashajeʼerüitpakat wainmain tü kasa yüülakalü atuma saaʼin wayuu. Eesüjaʼa yüülale paaʼin sünainjee tü alatakat pümüin otta sutuma müin nnojoikai kasajachin pia sümüin wayuu. Soteepejeʼe paaʼin kojutuin pia nümüin Maleiwa otta mojuin naaʼin sutuma müliain pia niʼrüin.
Anuu tü nümakat nümüin Maleiwa chi kashajalakai Salmo 86, müshi nia: «Pieechi tachuntaka amüin müliapa taaʼin, tatüjaa aaʼu pusouteechin tamüin» (Salmo 86:7). Eepejeʼe süpüla müin pünüiki: «¿Kasache naaʼinraka Maleiwa süpüla nusoutuin wamüin?».
Nnojoleerü nunoutamaatüin Jeʼwaa sukuwaʼipa tü kasa mojusü alatakat wamüin. Nüküjapejeʼe wamüin naapeerüin wanee anaa süpüla eejiraain waya sümaa tü alatakat wamüin. Anuu nünüiki: «Nnojo jüshapataain aaʼin sooʼopünaa wane kasa. Shia jaaʼinra achuntaa nümüin Maleiwa sooʼopünaa kasa süpüshua. Jüküja nümüin tü shapaakat atüma jaaʼin. Otta nnojo motüin jaaʼin aapaa analuʼut nümüin saaʼu tü anasü naaʼinrakat jümüin. Müleka masütaajule jia sünain achuntaa nümüin Maleiwa, aapüneerü wane anaa jümüin nütüma. Isasü wachiki wayaawatüin saaʼu tia anaa naapakat wamüin, saaʼu wayuuin neʼe waya. [...] Jutateena waya suulia shapawaa aaʼin je suulia jülüjaa aaʼin kasa mojusü wanaa sümaa anain waya nütüma» (Filipos 4:6, 7). Piyaawateerü aaʼu kachipünaain pia naaʼin Maleiwa pikirajaale sünain tü pütchi aküjünajatkalü achiki jooluʼu.
Kachipünaashi pia naaʼin Maleiwa
Nütüjaa aaʼu Maleiwa jamüle nukuwaʼipa wanee wüchii gorrión, «kojutuleeshiʼiya jia suulia wainma gorrión» (Lucas 12:6, 7, TNM).
JÜLÜJATAA PAAʼIN TÜÜ: Kachipünaasü naaʼin Jeʼwaa tü wüchiikalüirua, kojutuleepejeʼe maʼin waya nümüin suulialeʼeya tü wüchiikalüirua. Kojutuleeshiʼiya waya nümüin Jeʼwaa süka nukumalain waya maʼaka saaʼin nukuwaʼipa (Génesis 1:26, 27).
«Jeʼwaakalee, pünaʼlüin süpüshuaʼa tü takuwaʼipakat otta piʼraajüin maʼin shia [...]. Pütüjaa aaʼu tü jülüjakat taaʼin [...]. Pünaʼlaa sümüin tü kasa shapaakalü atuma taaʼin» (Salmo 139:1, 2, 23).
JÜLÜJATAA PAAʼIN TÜÜ: Niʼraajüin pia Maleiwa. Nütüjaa aaʼu tü shapaakalü atuma paaʼin otta jamüin paaʼin. Eesü süpüla nnojoluin shiyaawatüin maʼin aaʼu wayuu tü alatakat pümüin. Kachipünaapejeʼe pia naaʼin Maleiwa otta nükaalinjeein pia. Müsüjeseʼe nnojoluin anain yüülale paaʼin.
Kojutushi pia nümüin Maleiwa
«Jeʼwaakalee paapa tanüiki, kasataalejeseʼe süntüin tanüiki pümaʼanamüin. [...] Paapa tanüiki soʼu tü kaʼi tachuntakalü oʼu kaalinwaa pümüin. Pükaalinjamaata taya». Naapeerü Jeʼwaa «nanüiki na wayuu müliakana aaʼin atumawaa» (Salmo 102:1, 2, 17).
JÜLÜJATAA PAAʼIN TÜÜ: Nütüjaa aaʼu Maleiwa naʼyalajüin na wayuukana saalinjee tü müliaa neʼrakat (Salmo 56:8). Otta nütüjaa aaʼu piʼyalajüle saalinjee tü kasa alatakat pümüin, süka jamüin, kojutuin pia nümüin.
«Nnojo shapaain paaʼin, taya chi Pümaleiwasekai. Shiimain katsüinjeerüin paaʼin tatuma. Shiimainshaata maʼin takaalinjeechin pia. [...] Tayakai Jeʼwaa, taya chi Pümaleiwasekai, [...] anuu tanüiki pümüin: ‹Nnojo mmoluin pia. Shiimain maʼin takaalinjeechin pia›» (Isaías 41:10, 13).
JÜLÜJATAA PAAʼIN TÜÜ: Nükaalinjeein pia Maleiwa. Nümülialeechi pia yüülale paaʼin sünainjee tü alatakat pümüin.
Eʼreena waya anaa
«Süka alin maʼin nüpüla Maleiwa na wayuukana, naapüin nikii chi waneeshikai Nüchon süpüla nnojoliinjanain outuin na eʼitaakana naaʼin nünain otta süpüla katüinjatüin noʼu waneepia» (Juan 3:16, TNM).
JÜLÜJATAA PAAʼIN TÜÜ: Aishi maʼin pia nüpüla Maleiwa müshijeseʼe naapüin nikii Jesuu paaʼu. Sünainjee naaʼinrüin tia püpüleerua, eesü süpüla talatüin paaʼin otta eʼreechi pia anaa. *
Mayaainjeʼe yüülain jee shapaain paaʼin sünainjee tü alatakat pümüin, püchajaa sukuwaʼipa süpüla pikirajaain sünain tü Wiwüliakat. Otta kanoula pia sünain tü naaʼinrajatkat Maleiwa. Müle shia putuma, talateerü paaʼin jee nnojoleerü yüülain paaʼin.
^ Pütüjeere sooʼomüin süchiki tü kasa anasü piʼreetkat sünainjee naapajiraain nikii Jesuu, pünaja tü videokot Puutkajaa wamaa süpüla sotuin waaʼin ouktüin Jesuu, suluʼusü www.pr418.com. (Pünaʼla suluʼu WACHIKI > TÜ OUTKAJAWAAKAT EERE SOTUIN WAAʼIN OUTUIN JESÚS).
Eesüjaʼa kamalainjeerüle pümüin aashajeʼeraa tüü
WACHIKI
¿Jamüshii wekirajaainjanaka sünain tü Bibliakat?
Talatüsü maʼin naaʼin watta naalii wayuu sainküin mmaka süka nekirajaain sünain tü Bibliakat, yala, ekirajaashii sünain tü kasa natüjaweekat maʼin aaʼu na wayuukana. Pikirajaa sünain tü Bibliakat.
AAPIRIA WAYUU
Aneerü pukuwaʼipa sükajee alin pia nüpüla Maleiwa
Wekirajaale sünain tü Wiwüliakat watüjaajeerü aaʼu tü naaʼinrüinjatkat Maleiwa wapüleerua.
AAPIRIA WAYUU
Anasü maʼin tia naapakat Maleiwa, ¿jamüsü anaka maʼin shia?
¿Kasa kojutüka anainjee wanee asülajuushi? Jülüjale waaʼin tia, sükaaliinjeena waya süpüla kojutüin wamüin naapajiraain nikii Jesuu.
