Tü jülüjakat naaʼin na wayuukana süchiki tü oʼuraajaakat
«Mojupa taaʼin jee müliapa taya, tatüjaa aaʼulu nükaalinjain taya Maleiwa toʼuraajapa» (MARÍA).
«Poloo apünüin juya tü taʼwayuusekat sünain ayuulin sutuma kanset, outaka shia mapa. Oʼuraajüshi taya nümüin Maleiwa weinshi jee tatüjaa aaʼulu naapajüin tanüiki jee jimatüsü taaʼin nutuma» (RAÚL).
«Kojutusü maʼin tamüin toʼuraajüin nümüin Maleiwa» (ARNE).
Kojutusü maʼin sümüin María, Raúl, Arne jee waneinnua wayuu oʼuraajaa nümüin Maleiwa. Jamüshiijaʼa noʼuraajapa, aashajaashii nümaa Maleiwa, naapüin analuʼut nümüin otta achuntushii naya kaalinwaa nümüin. Pansaasü tü namakat sümaa tü sümakat tü Bibliakat süchiki oʼuraajaa nümüin Maleiwa: «Nnojotsü mmoluwaain waaʼin sünain achuntaa nümüin Maleiwa, jaʼitasü kasain wachuntuin nümüin wanaapünaa sümaa tü nüchekakalü achiki, naapeeriaʼaya wanüiki» (1 Juan 5:14).
Kapüleesü namüin waneinnua wayuu nanoujain sünain naapüin Maleiwa nanüiki noʼuraajapa nümüin, anuu tü nümakat Steve: «Soʼu 17 touyase outushii aapünüshii taʼaleewainyuu, wanee pasiruwaashi jee piamashii wüinsitshii naya». ¿Kasa naaʼinraka Steve? Anuu nünüiki: «Oʼuraajüshi taya nümüin Maleiwa süpüla tatüjaainjatüin saaʼu jamüin sülataka tia. Müshi nnojoikai nusoutuin tamüin Maleiwa, tasakiraka taaʼin: ¿Jamüshi toʼuraajüinjachikai sümaa nnojoluin nusoutuin tamüin?». Wainma na wayuu makana aka naaʼin Steve jee nasakirüin naaʼin jamüin ayatüinjanaka noʼuraajüin sümaa nnojoluin nusoutuin Maleiwa namüin.
Eesü waneirua kasa jülüjaka atuma naaʼin na wayuukana nnojoluin choʼujaain oʼuraajaa nümüin Maleiwa, süka jamüin, naashin nayakana nütüjaa aaʼu Maleiwa tü alatakat wamüin jee tü choʼujaakat wamüin, ¿jamaka waküjainjatka shia nümüin?
Eeshii na wayuu anoujakana sünain nnojoluin naapajüin Maleiwa nanüiki süka naainjapuʼuin kasa mojusü. Anuu tü sümakat Jenny: «Jülüjasü taaʼin nnojoluin kasain anain apüla taya süka taainjapuʼuin kasa mojusü, müsüjeseʼe nnojoleerüin naapajüin Maleiwa tanüiki taaʼinruʼu».
¿Jama piakai jülüjeetche paaʼin tia? ¿Eesüche wainmajüle paaʼin naapeerüle pünüiki Maleiwa puʼuraajapa? Pütüjaweerü aaʼu tia sutuma tü sümakat tü Bibliakat. Eesü süpüla punoujain sünain tü sümakat tü Bibliakat süchiki tü oʼuraajaakat. a Anuu waneirua pütchi pütüjaweetka aaʼu sükajee tü sümakat tü Bibliakat:
-
¿Naapüinche Maleiwa pünüiki puʼuraajapa?
-
¿Naapüinche Maleiwa sünüiki wayuu süpüshuaʼa suʼuraajapa?
-
¿Kasa paaʼinrajatka süpüla naapüin Maleiwa pünüiki?
-
¿Kasa piʼreetka puʼuraajüle nümüin Maleiwa?
a Puusüteerü anain suluʼu tü Bibliakat nachiki waneinnua wayuu aʼyataakana nümüin Maleiwa. Oʼuraajapuʼushii nümüin maʼaka naainjain shia Jesús. Jamüsüjaʼa suluʼu tü Ashajuushikat suluʼu hebreo, eesü wainma pütchi namaka na aʼyataapuʼukana nümüin Maleiwa oʼuraajakana nümüin.
Eesüjaʼa kamalainjeerüle pümüin aashajeʼeraa tüü
SUSOUTAKA EʼIPAJEE TÜ BIBLIAKAT
¿Naapüinche wanüiki Maleiwa?
Süpüla naapüin Maleiwa pünüiki, eeinjatü waneirua kasa paaʼinraka.
NATÜJAWEEKA AAʼU JIMAʼALII OTTA MAJAYÜNNÜÜ
¿Jamüsü choʼujaaka maʼin woʼuraajüin?
¿Oʼuraajüinjana waya süpüla anainjatüin waaʼin neʼe?
AAPIRIA WAYUU
¿Jamüshii woʼuraajüinjanaka?
Nnojoishi Maleiwa aainjüin kasa pülasü süpüla naapüinjatüin wanüiki.
