Mayaainjeʼe nnojoluin shiain tü Bibliakat wanee karaloʼuta aashajaaka süchiki shipinase wayuu, anasü maʼin tü sümakat namüin na wayuu nnojoliikana anain suluʼu nekii. Waashajaa süchiki waneirua wetsiikulo anaka maʼin.

«Nnojotsü choʼujaain niʼrajeʼerüin wanee wayuu anale nia. Akaajasaʼa ayuuire nia, oʼunushi nümaʼanamüin wanee tottoot» (MATEO 9:12, TNM).

Süküjain tü Bibliakat anain niʼrajeʼerüle wanee wayuu nnojoire anain nia. Wainma na wayuu nnojoliikana anain suluʼu nekii anakana aaʼin nayaawatapa saaʼu tü ayuulii nanainkat otta noʼunule nümaʼanamüin wanee tottoot atüjakai süpüleerua nakuwaʼipa na wayuu nnojoliikana anain suluʼu nekii.

«Eesü tü kasa anakalü apüla aainjaa ejercicio» (1 TIMOTEO 4:8, TNM).

Anasü wakatarüle kaʼi süpüla waainjain tü kasa aneetkalü atuma wakuwaʼipa. Aainjawalinjana waya ejercicio, eküinjana waya eküülü eekai anain otta nnojoliinjana waya eisalaain kaʼlepa aikat.

«Talatüle naaʼin wanee wayuu, aneechi nia. Akatsaʼa mojule naaʼin, ayuuijeechi» (PROVERBIOS 17:22).

Aneerü waaʼin waashajeʼerüle suluʼujee tü Bibliakat pütchi atütüleʼereetka waaʼin otta waʼyataale süchiirua kasa eekai süpüla wountuin. Jülüjale waaʼin kasa eekai anain otta tü kasa anasü eejeetkat  mapeena, mapüleejeerü wamüin wachecherüin waaʼin suulia tü kasa mojukalü atuma waaʼin wanaa sümaa nnojoluin anain waya suluʼu wekii.

«Kekiishi chi wayuu nnojoikai yaletüin aaʼin» (PROVERBIOS 11:2).

Eeshii choʼujaale pümüin na waneinnua süpüla nakaalinjain pia. Pücheka nakaalinjain pia. Eeshii nakaalinjeere pia na paʼaleewainyuukana jee na püpüshikana, shiajaʼa neʼe nnojoluin natüjaain saaʼu tü naaʼinrajatkat püpüleerua. Anasü püküjale namüin kasain choʼujaain pümüin. Kamaneeinjachipejeʼe pia namüin jee paapüinjatü tü analuʼutkat namüin saaʼujee nakaalinjain pia.

Anuu sünüiki Nicole a: «Süka nnojoluin müin anakai taaʼin, oʼunusü taya sümaʼanamüin wanee tottoot. Süküjaka tamüin tü tottootkat ayuulin taya jee süküjainña tamüin jamüin makaʼa taaʼin. Süküjainña tamüin tü tratamiento anakat tapüla» (ayuuisü shia sutuma tü trastorno bipolar münakat).

Anuu nünüiki Peter: «Anasü taaʼin sutuma taashajeʼerüin tü Bibliakat soʼukaiwai sümaa tü taʼwayuusekat. Sutuma tia, taaʼinmaasü kasa eekai anain wattaʼa maalü. Sushutapa maʼin taaʼu tü mojuukalü aaʼin, taashajeʼerawalin wanee wetsiikulo atütüleʼeraka taaʼin» (ayuuishi nia sutuma tü depresión münakat).

Anuu sünüiki Yong-hi: «Japüipuʼusü taya taküjain namüin na waneinnua süchiki tü alatakat tamüin. Sükatsüinrapejeʼe taaʼin wanee taʼaleewain amüliajaka taaʼin jee aika apüla taya. Suluʼujee tia, tayaawata aaʼu nnojoluin tamüiwaʼain taya» (ekaashaatasü shia sutuma tü shapawaakalü aaʼin).

Anuu nünüiki Timothy: «Sutuma taaʼinrüin tü sümakat tü Bibliakat, anasü taaʼin süka tayaawatüin saaʼu tü takuwaʼipainjatkat sünain aʼyatawaa otta eemeraashi taya. Sutuma anain maʼin tü sümakat, tatüjaa aaʼu tü taaʼinrajatkat süpüla ayatüinjatüin tachecherüin taaʼin soʼunnaa tü mojaakalü aaʼin» (ayuuishi nia sutuma tü transtorno obsesivo compulsivo münakat).