Watta naalii na wayuu ayaawatakana saaʼu eein waneirua kasa eekai mojuin, maʼaka saaʼin outaa saaʼin wayuu, ataüjawaa wayuu jee shiale tepichi. Anasü namüin lotule nukuwaʼipa wanee wayuu, kamaneere nia otta kapürale naaʼin nakuwaʼipa na waneinnua. ¿Kasa jülüjaka naaʼin süchiki naainjiraale nukuwaʼipa wanee wayuu sümaa nnojoluin kasaalüin nia? ¿Kasa jülüjaka naaʼin süchiki tü lotookalü akuwaʼipaa otta sukuwaʼipa shipijia tepichi? «Nnojotsü jaralüinjatüin aküjain tamüin kasain anain jee kasain mojuin süpüla taaʼinrüin», eeshii eekai namüin. Wainma na oʼunakana süchiirua tü anakat saaʼin namüin jee shiale tü anakat namüin na waneinnua. ¿Aneetche wakuwaʼipa woʼunule süchiirua tia waneepia?

Wayaawata aaʼu suluʼu waaʼin jee suluʼu wekii anale jee mojule wanee kasa watuma (Roma 2:14, 15). Akaʼaya na tepichikana nayaawata aaʼu kasain anain jee kasain mojuin, eesüjaʼa mojule naaʼin saalinjee wanee kasa mojuka natuma. Eesü wayaawatüle saaʼu kasain anain jee kasain mojuin nanainjee na wayuu kottiraakana amaa waya, nanainjee na wayuu kepiakana waʼütpünaa jee shiale sünainjee tü iküleesia kaluʼukat waya. Eesüjaʼa waneeküle wanee kasa sünainjee tü jülüjakat waaʼin süchiki kasain anain jee kasain mojuin.

Wayaawatüle saaʼu suluʼu waaʼin jee suluʼu wekii anale jee mojule wanee kasa watuma, eesüjaʼa kapürale waaʼin nakuwaʼipa na waneinnua, kamaneere waya, lotule wakuwaʼipa jee sümülialaale waaʼin naalin na waneinnua, eesüjaʼa nnojorüle waaʼinrüin wanee kasa mojeetka atuma naaʼin jee mojeetka atuma waaʼin.

¿Anasüche woʼunule waneepia süchiirua tü anakat saaʼin wamüin? Anuu nünüiki Garrick süchiki tü nukuwaʼipapuʼukat jintüliiwaʼaya nia: «Oʼunapuʼushi taya süchiirua tü anakat neʼe saaʼin tamüin». Niyaawatapejeʼe saaʼu nnojoluin anain nukuwaʼipa waneepia sünainjee nuʼunuin süchiirua tü anakat neʼe saaʼin nümüin. Müshi nia süchiki tü naaʼinrapuʼukat: «Müshi suluʼupünaakai taaʼin wanee wopu eere kojoin maʼin piʼyuushi süka yarüttüin maʼin takuwaʼipa, takaijülin yüi, tepeʼrülin jee teʼrülin wayumüin».

Eesü woʼunule süchiirua tü namakat na waneinnua, eesü anale wakuwaʼipa sünainjee kekiin naya. Kojuteena waya namüin na wapüshikana, namüin na waʼaleewainyuukana jee namüin na wayuu kepiakana waʼütpünaa waaʼinrüle tü anakat saaʼin namüin.

¿Anasüche woʼunule waneepia süchiirua tü namakat na waneinnua? Majayülüiwaʼaya Priscila aʼluwajiraasü sukuwaʼipa süka shiʼrüin saaʼinrüin tia na saʼaleewainyuukana. Shiyaawatapejeʼe saaʼu nnojoluin talatüin saaʼin sutuma saaʼinrüin tü anakat namüin na waneinnua. Müsü shia: «Nnojotsü anain taaʼin sutuma toʼunuin süchiirua tü namakat na waneinnua, eʼrüsü tamüliala sünainjee tia».

Anasiaajeʼe woʼunule süchiirua tü anakat saaʼin wamüin otta tü anakat namüin na waneinnua, nnojoleetpejeʼe anain wakuwaʼipa waneepia waaʼinrüle tia. Eesüjaʼa mojeerüle wakuwaʼipa jee mojeerüle nakuwaʼipa na waneinnua sutuma nnojoluin jülüjain waaʼin tü kasa eejeetkat sünainjee tü waneekakat (Proverbios 14:12). Eesü jülüjale waaʼin otta jülüjale naaʼin na waneinnua aneerüin wakuwaʼipa waneeküle wanee kasa, eepejeʼe süpüla mojuin wakuwaʼipa sünainjee tia. Eesüjaʼa weeʼiratüinjatüle tü jülüjakat waaʼin süchiki tia. Tü kasa mojupuʼukat sümüin wayuu sümaiwa anaitpa shia sümüin maaʼulu jee tü kasa anapuʼukat sümüin mojuitpa shia sümüin maaʼulu.

¿Jara woʼunuinjatka achiirua süpüla anainjatüin wakuwaʼipa waneepia?

Eesü wanee karaloʼuta aküjaka wamüin kasain anain jee kasain mojuin, pansaasü tü sümakat otta jalouisü shia sümüin wayuu maʼleekalia. Waashajaajeerü süchiki tia karaloʼutakat sünain tü wane pütchikat.