Meʼrujusalii na aapieekana maʼaka meʼrujuin chi Maleiwakai. Nnojoishii keʼirukuin jee keimsein naya. Na aapieekana jüüjüükana waneepia nümüin Maleiwa, chashii chaa iipünaa nümaa otta neʼrüin nia (Lucas 24:39; Mateo 18:10; Juan 4:24).

Kojuyatua wayuujaain na aapieekana namaiwa süpüla naaʼinrüin tü nuluwataakalü anain naya Maleiwa yaa Mmapaʼa. Kettaapa tia natuma, eeʼiranajaashii suluʼu meʼrujuin nachikuaʼa (Jueces 6:11-23; 13:15-20).

Na aapieekana, nnojoliishii tooloyuuin jee jieyuuin naya, süka jamüin, nnojoluin wayuuin naya. Mayaapejeʼe neeʼiyataain sümaiwa sümüin wayuu suluʼu tooloyuuin naya, naata sümüin tü nakuwaʼipakat suulia sukuwaʼipa wayuu. Akaʼaya naya, maʼwayuusesalii jee machonsalii naya. Na aapieekana, nnojoishii nayain na tepichicheein otta na wayuu miyoʼuyuu outakana. Nukumajatüjülii naya Maleiwa suluʼu meʼrujuin naya, nüchonnii naya Maleiwa (Job 1:6; Salmo 148:2, 5).

Saashin tü Wiwüliakat, kanüikishii na aapieekana maʼaka kanüikin wayuu. Shiajaʼa neʼe naatain nanüikipala. Kojuyatua naashajaain Maleiwa sümaiwa sümaa wayuu nakajee na aapieekana; nnojotpejeʼe anain nümüin waʼwaajüle na aapieekana otta wachuntule namüin (1 Corinto 13:1; Alateetkat Mapeena [Apocalipsis] 22:8, 9).

Wattashaatasü maʼin saalii miyoone aapiee (Daniel 7:10; Alateetkat Mapeena 5:11).

Pülashaatashii na aapieekana otta atüjaleeshiʼiya naya woulia. Akaʼaya naya, kawachiraleeshiʼiya suulia shiyaa juya (Salmo 103:20; Daniel 9:20-23).

Mayaapejeʼe natüjashaatain na aapieekana sümaa katsüin maʼin naya, eesü tü kasa isakat nachiki otta tü nnojotkat natüjaain aaʼu (Mateo 24:36; 1 Pedro 1:12).

Naatawaisü nakuwaʼipa na aapieekana waneʼewai nakua sümaa ayatüin nukuwaʼipa Maleiwa natuma. Otta eeshii süpüla naneeküin süka naaʼin namüiwaʼa naaʼinrüinjatüle tü anasükat jee tü mojusükat. Müshiijeseʼe eein na aapiee eʼrüliijaakana wayumüin nümüin Maleiwa (Judas 6).