JÜLÜJATAA PAAʼIN puʼunuin suluʼumüin wanee museo eere wainmain kasa sümaiwajatü. Eesü eekai jotooijüin, mooloin otta eeka sajaʼlajuuin. Eesü eekai isain shiʼipa. Shiasaʼa eeka wanee anayütkalia, nnojotsü ajaʼttüin, ayatüsia neʼe maʼakaajüle. Püsakitka chi eeʼiyajakai pümüin tia kasakalüirua: «¿Jeketü tüü suulia tü waneirua?». Nusoutaka pümüin: «Nnojo, kakaliairü. Nnojotpejeʼe shia amojujaairüin». Pümaka nümüin: «¿Jamüsü? ¿Katatüsü eere sünaajünüin?». Nusoutaka chi wayuukai: «Nnojo, süpülapuʼusü shia joutai otta juya. Akaʼaya shia, watta naalii na wayuu achajaakana sukuwaʼipa süpüla najaʼttirüin shia». «¿Kasache aainjünaka aka shia?», maa müsü paaʼin.

Tü Wiwüliakat müsü aka saaʼin tia kasa sümaiwajatkat anayütkalia, kakaliaitka maʼin ashajünüin. Shiimain wattain saalii karaloʼuta ashajuushika sümaiwa, akatsaʼa ajaʼlajuuin shia. Akaʼaya shia, nnojotsü pansaain tü sümakat süchiki ciencia sümaa tü münakat maaʼutpünaa. Jee müsia tü anakat süpüla shipinasein wayuu saashin, nnojotsü anain maʼin, eesü süpüla outuin wayuu sutuma. Apütaalaasü neʼe maaʼulu shiʼipa soʼutku tia karaloʼutakalüirua süka machikin saʼatairua otta amojujaasü shia.

Naatajatshaana maʼin tü Wiwüliakat suulia tü wane karaloʼutakalüirua. Alatüsü suulia 3.500 juya süchikijee süshajünüin otta nnojotsü shia aʼwanajaain. Ayatüsia eein shia mayaapejeʼe sajaʼlajeʼenneein, saʼajünüin, süpülajünüin suulia wayuu otta mojuin pütchi süchiki. Akaʼaya shia, pansaasü maʼin tü sümakat sümaa tü namakat na cientiificokana, wainma kasa süküjatüjütkalia nnojotpuʼuka sütüjaain aaʼu wayuu (paashajeʼera tü pütchikat «¿Nnojoluitpache choʼujaain wamüin tü sümakat tü Wiwüliakat?»).

Eeshijaʼa püsakireʼerüle paaʼin: «¿Jalouisüche sümüin wayuu maaʼulu tü sümakat tü Wiwüliakat?». Süpüla pütüjaain saaʼu tia, jülüja paaʼin tü alatakat sümüin wayuu sainküin Mmakat. ¿Jetsüche tü mojuleekat maʼin? Eesüjaʼa jülüjale paaʼin shiain tü atkawaakat, sumojujunüin tü Mmakat, tü mojulawaakat  jee sükajee wainmain na keejiakana amüin aapawaa sünneetse wayuu. Paashajeʼera jooluʼu süchiki tü sümakat tü Wiwüliakat otta püsakireʼera paaʼin: «¿Aneetche tü mmapaʼakat soonoole wayuu süpüshuaʼa sümaa pütchikat tüü?».

ANAJIRAAINJANA WAYA SÜMAA WAYUU

«Anataʼaleeshiijaʼa maʼi jia akaaliijakana na juwalayuukana süpüla anajiraainjanain naya, süka jiʼnnaajüneenain sünain nüchooin jia Maleiwa» (Mateo 5:9). «Anakaja müleka kamaneere jia sümüin wayuu süpüshua suulia paʼürülaawajirawaa» (Roma 12:18).

AMÜLIAJAA WAYUU SÜMAA MOTUIN WAAʼIN SAAINJALA

«Anataʼaleeshiijaʼa maʼi jia amüliajüliikana wayuu, süka jümüliajüneenain» (Mateo 5:7). «Jaaʼinra tü anasükat shiʼipajee eekai shiʼrülüin wayumüin jümüin, sümaa motüin jaaʼin saainjala maa aka naaʼin chi Senyotkai [Jeʼwaa] * motüin naaʼin jaainjala» (Colosas 3:13).

PAAʼINWAJIRAWAA SÜMAA WAYUU NAATAKA EʼIRUKU

«Nünainjee waneeshia wayuu, naainjüin [Maleiwa] tü wayuukalüirua süpüshuaʼa, tü wattakat saalin shiʼipapaʼa sainküin mmakat, süpüla eeinjatüin shia süpaʼa» (Aluwataaushikana [Hechos] 17:26). «Tayaawatüitpa aaʼu sünain shiimain nnojolüin koʼuin nükuaippa Maleiwakai sümüin wayuu. Wayuu eekai eein suluʼu mmakat süpüshua, kojutkat atüma Maleiwakai otta aaʼinrakat tü anasükat, nnojoleerü nüjütaain amaa shia» (Aluwataaushikana 10:34, 35).

KOJUTUINJATÜ WAMÜIN TÜ MMAKAT

«Eʼitaanüshi chi wayuukai nütüma Jehová, chi Maleiwakai, suluʼu tü apainkat süpüla naaʼinmajüinjatüin tü pünajütkat» (Génesis 2:15). Najaʼlajeʼereena Maleiwa na «na amojujakana tü mmakat» (Alateetkat Mapeena [Apocalipsis] 11:18, TNM).

NNOJO KACHIIRUAIN WAAʼIN WASHIRÜÜ JEE WAYOUTA TÜ AʼLUWAJIRAWAAKALÜ AKUWAʼIPA

«Jalia jia suulia kachiiruaa aaʼin tü washirüükat. Tü talateetkat atüma jaaʼin, nnojolüinjatü shiain sükajee kooʼomüin jümüin tü jükorolokot» (Lucas 12:15). «Saaʼu jükataluushin suulia jaainjala süpüla nüchooinjanain jia chi Maleiwakai, juuʼulaa jümata suulia aʼluwajirawaa akuaippaa sümaa wayuu jierü otta wane jierü nümaa wanee toolo, suulia aaʼinraa kasa yarüttüsü, otta suulia keeʼireein jaaʼin washirüü» (Éfeso 5:3).

LOTUINJATÜ WAKUWAʼIPA OTTA AʼYATAAINJANA WAYA

«Keeʼireesü waaʼin lotuin wakuwaʼipa sünain süpüshuaʼaleʼeya kasa» (Hebreokana 13:18). «Chi eekai kaʼruwaralin, anakaja müleka nuuʼulaale jooluʼu suulia aʼluwajaa. Anashi müleka niʼyataale» (Éfeso 4:28).

WAKAALIINJA NA MÜLIAKANA

«Chi eekai shukulain, anakaja müleka jüchiajaale nia suulia. Je chi eekai japülin sünain aʼyatawaa nümüin chi Maleiwakai, anakaja müleka jimeʼejüle naaʼin. Je chi eekai matsüin naaʼin sünain anoujaa, anakaja müleka jüchecherüle naaʼin» (1 Tesalónica 5:14). Wakaaliinjainjana «na tepichi mooʼutshiikana ooʼulaka na jieyuu oukta aʼwayuusechiikana» (Santiago 1:27).

Shikirajüin waya tü Wiwüliakat süpüla kojutuinjatüin wamüin tü pütchi suluʼukat otta woonooinjanain sümaa. Wainmale wayuu aaʼinraka tü sümakat tü Wiwüliakat, nnojotsüje wainmain maʼin tü kasa mojusü alatakat sümüin wayuu sainküin tü mmakat. Choʼujaasü maʼin sümüin wayuu maaʼulu tü pütchi suluʼukat  tü Wiwüliakat. ¿Eesüche süpüla anain pukuwaʼipa sutuma?

Anuu nünüiki wanee wayuu kekiishi maʼin: «Anale tü kasa naainjakat wanee wayuu, atüjaana aaʼuchi sünain wayuuin kekiishi maʼin nia» (Mateo 11:19, TNM). Shiimain tia. Watüja aaʼu anain wanee pütchi weʼrüle anain wakuwaʼipa sükajee woonooin sümaa. Eeshijaʼa pümüle: «¿Anoutaajeetche takuwaʼipa sutuma tü pütchi suluʼukat tü Wiwüliakat? ¿Sükaaliinjeeiche taya süpüla eejiraain taya sümaa tü alatakat tamüin maaʼulu?». Wekirajaa sünain tü alatakat sümüin wanee wayuu.

Wainma kasa saainjapuʼuka Diana * otta talatapuʼusü saaʼin, shiasaʼa sülatalaa sümaka wainma kasa sümüin: outusü wanee süchon majayüt, ooʼulaashi chi suʼwayuusekai suulia otta alatitsü müliaa sutuma manneetsein shia. Anuu sünüiki Diana: «Mojushaatasü maʼin tü alatakat tamüin, machonsat taya, maʼwayuusesat taya, tamüiwaʼasü taya. Nnojotsü kasain eein tamaʼana, wayuʼulaa neʼe taya. Kasapülajatka katüin toʼu».

Shiyaawata aaʼu Diana mapa shiimain maʼin pütchikat tüü: «Wasaʼwatüin akaratshi shikii juya sünain katüin woʼu; kainchoulere waya, wasaʼwatüin mekiisat  shikii juya. Eʼrapajaʼa waya wamüliala suʼunnaa tia. Jee yüüʼülaa mamaatüshii waya» (Salmo 90:10, TNM).

Suʼunnaa tü kasa alatakat sümüin Diana, ekirajaasü shia sünain tü Wiwüliakat. Anashaatasü sukuwaʼipa sutuma tia. Sünain tü apünüinsükat pütchi süchikumüinjatka tüü, weʼreerü wainmain na wayuu eʼrakana kasa anasü sutuma naaʼinrüin tü sümakat tü Wiwüliakat. Nayaawata aaʼu müin tü Wiwüliakat maʼaka saaʼin tü kasa sümaiwajatkat waküjaka achiki suʼttiajee pütchikat tüü. Nnojotsü müin shia maʼaka saaʼin tü karaloʼutairua nnojoluitpakat kasain anain apüla sutuma kakaliairüin shia ashajuushin. ¿Shiache sutuma naatain tü Wiwüliakat suulia tü wane karaloʼutakalüirua? ¿Shiache ashajünaka nünüiki Maleiwa suluʼu tü Wiwüliakat suulia sünüiki wayuu? (1 Tesalónica 2:13).

Eesüjaʼa jülüjale paaʼin nnojoluin kakaliain katüin noʼu wanee wayuu otta wainmain nümüliala. ¿Jarai puchuntaka amüin kaaliinwaa süpüla nümülialüin paaʼin otta nükatsüinrüin paaʼin suʼunnaa piʼrüin müliaa?

Wekirajaa sünain apünüinsü kasa jalouika apüla pümüin tü sümakat tü Wiwüliakat.

1. Paaʼinmajiraain suulia mojuin pukuwaʼipa.

2. Punoutuin wanee kasa alataka pümüin.

3. Eejiraain pia sümaa tü kasa isakat püchiki punoutuin.

Wekirajaajeerü anain tia sünain tü wane pütchikalüirua.