Maaʼulu yaa, aküjünüsü maʼin sainküin mmaka süpüshuaʼa tü pütchi anasükat, tü süchikikat nukuwaʼipa Maleiwa sünain aluwatawaa maʼaka nüküjain shia Jesuu (Mateo 24:14). Saashin tü karaloʼuta nüshajalakat Daniel, nümaʼanajeejatü Maleiwa tia Aluwataayakat. Suluʼu tü karaloʼutakat Daniel kapiitulo 2, süküjain pachikuatüinjatüin waneirua aluwataaya miyoʼuyuu. Tü palajatkat aluwataaya shia Babilonia otta kojuyasü aluwataaya shiiʼirakaka sünainmüinreʼeya maaʼutpünaa. Suluʼu wetsiikulo 44, aküjünüsü süchiki tü alatajatkat mapeena:

«Niʼitaajeerü chi Maleiwa sirumatuʼujeʼewaikai wanee aluwataaya matüjainka ajaʼttaa. Nnojoleerü alatinnüin tia aluwataayakat suluʼumüin wanee mma. Sajaʼttireerü süpüshuaʼa tü aluwataayakalüirua otta shiainjatü eeka waneepia».

Pütchikat tüü otta waneirua pütchi suluʼuka tü Wiwüliakat, aküjasü süchiki shiainjatüin neʼe aluwataain Nuluwataaya Maleiwa otta sajaʼttireerüin naluwataaya na wayuukana. Sunouteʼereerü tü kasa mojusü eekat  saaʼu tü Mmakat otta aneerü sukuwaʼipa wayuu sutuma. ¿Jameetche wakuwaʼipa suluwataapa tia Aluwataayakat? Wekirajaa sünain waneirua kasa ekeraajüinjatka mapeena.

• NNOJOLEERÜ ATKAWAA

  Salmo 46:⁠9. «Najaʼlajeʼerüin [Maleiwa] tü atkawaakat sainküin tü mmakat. Nüshataain tü uraichikat, shiimainshaana niʼyülüjaain tü jatü miyoʼukat otta naʼajüin tü kemion atkaayakat».

  ¿Jamüsüjeʼe tü mmapaʼakat müleka saapaanüle tü nneerü akumajünakalü aka saʼapüla surulaat sainküin mmaka süpüla sükaaliinjünüin wayuu? ¿Jamüsüjeʼe sukuwaʼipa tü mmapaʼakat müleka sükaaliinjünüle wayuu sükajee tü natüjakalü apüleerua na akumajüliikana saʼapüla surulaat? Nnojoleerü atkawaa suluwataapa Nuluwataaya Maleiwa.

• NNOJOLEERÜ AYUULII

  Isaías 33:24. «Nnojoleechi eein wanee wayuu eekai ‹ayuuishi taya› nümeechin».

  Jülüjataa paaʼin wanee mma eere nnojoluin ayuulin tü saaʼinkat wayuu, eere nnojoluin kanserüin wayuu, eere nnojoluin suukalain nasha otta eere nnojoluin alin nanain wanee kasa. Nnojotsüjeʼe choʼujaain pitaalü otta wunuʼu shipinase ayuulii suluʼu wanee mma eekai müin aka saaʼin tia. Meerü sukuwaʼipa tü Mmakat mapeena: Nnojoleerü ayuulii.

• NNOJOLEERÜ JAMÜ

  Salmo 72:16. «Wainmeerü süchon pünajüt saaʼu tü mmakat; wainmaleejeeria shia saaʼupünaa tü uuchikalüirua».

  Wainmeerü maʼin süchon pünajüt süpüla shiküin wayuu süpüshuaʼa. Nnojoleerü jamü otta nnojoleerü ayuulin wayuu sutuma jamü.

• NNOJOLEERÜ OUTAA, MOJUU AAʼIN JEE AʼYALAJAA

  Alateetkat Mapeena (Apocalipsis) 21:4. «Nümülialeena naya [Maleiwa]. Müiria nnojolüin ouktaa, mojuu aaʼin, aʼyalajaa, je saalii ayuulii, süka sülatüitpain süpüshuaʼale makat aka tia».

  Loteerü maʼin nakuwaʼipa na wayuukana kepiapa naya suluʼu tü Paʼaraiisükat yaa saaʼu tü Mmakat. Müinjatü wakuwaʼipa naashin Jeʼwaa chi Kakumalakai waya.

¿Shiimainche maʼin eera tia? Mayaapejeʼe eein na wayuu kamalainkana amüin tü sümakat tü Wiwüliakat, eeshii na nnojoliikana anoujain sünain eein süpüla katüin noʼu waneepia. Jama nnojoluin neʼrüichin wanee wayuu eekai isain süchiki tü outaakat.

Kakaliainna na wayuukana süchepchiain tü kaainjalakat jee tü outakat. Müshiijeseʼe eein na makana anüiki: «Akumajünüshii waya süpüla müliain jee outuin waya, aleinjatia neʼe tia». Nnojotpejeʼe shiain keeʼireein tia naaʼin Maleiwa nukumajaiwaʼaya wayuu.

Süpüla weʼitaain waaʼin sünain tü nümakat Maleiwa wamüin, müshi nia: «Meeria sukuwaʼipa tü tanüiki tojuʼitirakat, nnojoleerü aleʼejüin shia süchikuaʼa sümaa nnojoluin shikeraajüin tü keeʼireekat taaʼin. Shiimainshaata shikeraajeerüin tü tamakat» (Isaías 55:11).

Saashin tü Wiwüliakat, «nnojoishi süpüla nüküjain alawaa» Maleiwa (Tito 1:2). Sutuma niain aküjain wamüin süchiki süpüshuaʼa tü kasa naaʼinrajatkat, wasakireʼera waaʼin sünain tüü: ¿Eeshiiche süpüla kepiain waya waneepia suluʼu wanee Paʼaraiisü yaa saaʼu tü Mmakat? ¿Kasa waaʼinrajatka süpüla naapüin Maleiwa wamüin tü kasa anasü nüküjakalü achiki? Wekirajaajeerü anain tia suluʼu tü piamasükat ekirajaaya sajaʼttiamüinka karaloʼutakat tüü.