MÜSHI Jesuu suluʼu Mateo 13:24-26: «Tü nuluwataayakat Maleiwa, müsü aka saaʼin sukuaippa wane yüüja eere nüpünajüin wane wayuu waüyee anasü kanüliasü ‹trigo›. Shiasa aipaʼapa wanaa sümaa natunküin na wayuukana, süntakalaka wane naʼünüü suluʼumüin tü yüüjakat sünain shijinain saʼaka tü trigokat wane süʼü mojuui keimsesü. Mayaainje wanaawain maʼi joʼuuiwaʼaya tü mojuuikat sümaa tü trigokat, süsotapa tü trigokat sümaa kachoin, atüjaana aaʼulu sünain eein tü mojuuikat saʼaka». Naashin waneeinnua wayuu ekirajaakana süchiirua tia nümakat Jesuu, nnojotpuʼusü saaʼinrüin wayuu tia. Eepajaʼa na apünajapüʼükana mojuui keipüsesü saʼaka nüpünajüin wanee wayuu. Aküjünüsü süchiki tia suluʼu waneeirua karaloukta süchikimaajatka tü naluwataakalü anain na romaanokana nükalioʼu Jesuu.

Saashin wanee diccionario süchikimaajatü tü Wiwüliakat, süsalashi natuma na romaanokana chi eekai nüpünajüin mojuui keipüsesü saʼaka apünajuushi shiiʼiree pasalaweein nia. Nnojorüle sülatüin tia sümaiwa, nnojotsüjeʼe nashajirüin shia na romaanokana. Naashin Alastair Kerr wanee atüjakai süpüleerua tü naluwataakalü anain na sülaülashiikana mma, kettaasü nutuma Justiniano chi aluwataaikai Roma wanee karaloukta Digesto sünülia. Soʼujatü juyakat 533 soʼu wakalia. Sünain tia karalouktakat, ashajünüsü tü naluwataakalü anain na romaanokana jee nanüiki na atüjakana süpüleerua tia soʼujee juyakat 100 sünainmüin juyakat 250 soʼu wakalia. Aküjünüsü suluʼu karalouktakat Digesto nüchiki Ulpiano, atüjashi nia süpüleerua tü naluwataakalü anain na romaanokana. Naashin Ulpiano eejachi wanee wayuu amojujeʼetkai wanee yüüja süka nüpünajüin mojuui keipüsesü saʼaka. Niasaʼa chi amojujeʼennakai aʼttiee, eeshi süpüla nüchekajüin nümüin chi kaainjaraikai.

Weʼrüitpa nnojoluin aküjalaain neʼe tü nümakat Jesuu süka sülatapuʼuin Roma tü naashajaakalü achiki.