SÜKÜJAIN tü Pütchi aapünakat nümüin Moisés, eein süpüla napansaajüin nanüiki na israeliitakana. Eeshii eekai namüin: «Pansaasü tanüiki pümüin saaʼu nünülia Jeʼwaa». Nükalioʼu Jesuu, napansaajapuʼuin na judíokana süpüshuaʼa tü namakat shiiʼiree sunoujünüin nanüiki. Naaʼinrapuʼuin tia süpüla sütüjaanüin aaʼu shiimain tü namakat naashin. Mojupejeʼe maʼin aaʼinraa tia naashin Jesuu, anuujeseʼe nünüiki: «Paaʼinrüinjatüle wane kasa, ‹Aa› meeshi neʼe pia. Je müleka nnojolüinjatüle paaʼinrüin shia, ‹Nnojo› meeshi neʼe pia» (Mat. 5:33-37; 23:16-22).

Saashin wanee diccionario aashajaaka süchiki tü Wiwüliakat, kiʼrashaanashii na judíokana sünain apansaajaa süpüshuaʼa tü namakat süpüla sunoujünüin nanüiki. Watüjaa aaʼu tia sutuma tü sümakat tü kanüliakat Talmud. Süküjain tia karaloʼutakat jaralüin tü pütchi nekeraajüinjatkat na judíokana jee tü nnojoluinjatkat nekeraajüin saʼakajee tü napansaajakat.

Nnojoipejeʼe niain neʼe Jesuu mojushiin amüin süpansaajüle wayuu süpüshuaʼa tü sümakat. Naashin Flavio Josefo, wanee judío ashajüi süchiki kasa sümaiwajatü, eejana waneinnua wayuu anoujashii namaiwajannuu nnojoliikana apansaajüin tü namakat süka mojuleein maʼin tia suulia aküjaa alawaa naashin. «Chi wayuu nnojoikai anoujünüin anüiki sutuma nnojoluin nüpansaajüin shia saaʼu nünülia Maleiwa, süsalainjachi nia», müshii naya. Tia meematüsü aka saaʼin sünüiki wanee karaloʼuta nashajala na judíokana, tü kanüliakat Eclesiástico (Sabiduría de Jesús Ben Sirá, münüsü shiaya). Saashin tia karaloʼutakat, «chi wayuu eekai nüpansaajüin nünüiki pejeewa, kaainjaraleeshia maʼin» (23:11). Tü mojushiikat nümüin Jesuu shia nüpansaajüle nünüiki wanee wayuu saaʼu kasa eeka eein. Kiʼrale waya sünain aküjaa tü shiimainkat waneepia, nnojoleerü choʼujaain wapansaajüin wanüiki süpüla sunoujünüin.