1, 2. (1) ¿Kasache eeka süpüla jülüjain naaʼin wanee anoujashi suʼwanajaʼalaa sümüle nukuwaʼipa? (Piirakaa sümüin tü ayaakuaakat). (2) ¿Kasa eeka süpüla jimatüin atuma waaʼin saashin Salmos 131?

ALATÜSÜ suulia 25 juya niʼyataain suluʼu Weteet Lloyd sümaa Alexandra, tü nuʼwayuusekat. Shiasaʼa süküjünapa namüin pürekutsooliinjanain naya, mojusü maʼin naaʼin süka suʼwanajaain tü naʼyataainkat nümüin Jeʼwaa. Müshi Lloyd süchiki tia: «Kojutushaatasü tamüin tü taʼyataainkat suluʼu Weteet, müsüjeseʼe kapüleein tamüin ooʼulawaa suulia. Mayaapejeʼe tatüjaain saaʼu jamüin choʼujaaka wojuʼitüinjanain, kakalia jülüjakuʼu müin taaʼin taʼleejünüin chejee. Eesü anale maʼin tü kasa jülüjakat taaʼin, shiasaʼa yaaulerü süchikijee, mojumaatüsü taaʼin».

² Suʼwanajaʼalaa sümüle wakuwaʼipa, eesü shapaale maʼin waaʼin saaʼujee tia (Prov. 12:25). Otta eesü kapüleere wamüin wekiʼralaain sünain tia. ¿Kasa waaʼinrajatka süpüla nnojoluin shapaain maʼin waaʼin suʼwanajaʼalaa sümüle wakuwaʼipa?  (Paashajeʼera Salmo 131:1-3). Wekirajaa sünain tü naaʼinrapuʼukat waneinnua wayuu namaiwajana aʼyataakana nümüin Jeʼwaa jee süchiki tü naaʼinrakat waneinnua wayuu maaʼulu yaa süpüla jimatüin naaʼin suʼwanajaʼalaa sümüle nakuwaʼipa.

3. Püküja süchiki tü alatakat nümüin José.

³ Jülüja waaʼin tü alatakat nümüin José. Süka aishaatain maʼin José nüpüla Jacob, nachumulashi nia na nuwalayuukana, noiküinjeseʼe nia wanaa sümaa 17 nuuyase süpüla achepchieeinjachin nia (Gén. 37:1-4, 23-28). Müliasü maʼin naaʼin José suʼunnaa 13 juya süka achepchieein nia otta püreesain nia mapa. Kapüleekajasaʼa maʼin nümüin wattain nia nuulia chi nüshikai süka alin maʼin nia nüpüla. Nnojotpejeʼe shapaain jee üttakuʼu müin naaʼin José sünainjee tü alatakat nümüin. ¿Kasache naaʼinraka süpüla nuuntüin tia?

4. (1) ¿Kasa jülüjaka naaʼin José wanaa sümaa püreesain nia? (2) ¿Kasa nusoutaka akajee Jeʼwaa shiʼipajee tü nuchuntakat José nümüin?

⁴ Suʼunnaa püreesain José, jülüjakajasaʼa naaʼin tü kasa nükaalinjakalü akajee nia Jeʼwaa (Gén. 39:21; Sal. 105:17-19). Niʼitaakajasaʼa maʼin naaʼin nünain Jeʼwaa sutuma tü nüʼlapüjaakalü amaa jintüliiwaʼaya naaʼin (Gén. 37:5-11). Eeshijaʼa nuʼuraajüle kojuyatua nümüin Jeʼwaa süpüla nüküjain nümüin tü suluʼukat naaʼin (Sal. 145:18). Asoutushi Jeʼwaa shiʼipajee tü nümakat José nümüin, müsüjeseʼe niyaawatüin saaʼu eejeechin Jeʼwaa nümaa waneepia (Aluw. 7:9, 10). *

5. ¿Jamüshii ayateenaka waya aʼyataain nümüin Jeʼwaa sutuma tü anaa naapakat wamüin?

⁵ Eesüjaʼa sülatüle kasa mojusü wamüin. Müle wakuwaʼipa, eesü süpüla jimatüin waaʼin sutuma tü anaa naapakat Maleiwa (paashajeʼera Filipos 4:6, 7). Müsüjeseʼe wachuntüinjanain kaalinwaa nümüin shapaale maʼin waaʼin saaʼujee tü alatakat wamüin. Akatchinraajeerü waaʼin sutuma tü anaa naapakat Jeʼwaa wamüin süpüla ayatüin waya sünain aʼyatawaa nümüin. Wekirajaa joo süchiki tü naaʼinrakat waneinnua wawalayuu alataka amüin tia.

6, 7. ¿Jamüsü jimateetka waaʼin woʼuraajüle nümüin Jeʼwaa? Püküja tü alatakat nümüin Ryan sümaa Juliette.

⁶ Mojushaatasü maʼin naaʼin Ryan sümaa Juliette wanaa sümaa sajaʼttüin napüleerua tü naʼyataainkat sünain pürekutsooliin pesiaat naya suʼunnaa jeʼra kashi. Anuu tü nümakat Ryan süchiki tia: «Watüjaa aaʼu weeʼiyatüinjatüin sükajee wakuwaʼipa weʼitaain maʼin waaʼin nünain Jeʼwaa. Müshiijeseʼe wachuntüin kaalinwaa nümüin Jeʼwaa süpüla katsüin wanoula nutuma. Wainma na wawalayuu jekenakana sünain anoujaa, müsüjeseʼe aneein sukuwaʼipa wanoula napüleerua».

⁷ ¿Kasaka nusoutuin akajee Jeʼwaa namüin? Müshi Ryan: «Süchikijee woʼuraajüin, nnojoluitpa shapaain maʼin waaʼin otta nnojoluitpa jülüjakuʼu müin waaʼin kasa mojusü. Jimatüsü waaʼin jee jülüjasü waaʼin kasa anasü sutuma tü anaa naapakat Jeʼwaa wamüin. Jülüjasü waaʼin jalouijeenain waya nümüin Jeʼwaa müleka anale tü jülüjakat waaʼin».

8-10. (1) ¿Kasa eeka süpüla nükaalinjain akajee waya chi naaʼinkai Maleiwa shapaale maʼin waaʼin? (2) ¿Kasa nükaaliijeenaka akajee waya Jeʼwaa shiale waaʼinmaain waneepia tü waʼyataainkat nümüin?

 ⁸ Jimatüsü waaʼin nutuma chi naaʼinkai Maleiwa otta eeshii süpüla nükaalinjain waya süpüla jülüjain waaʼin pütchi suluʼujeejatkat tü Wiwüliakat akaalinjeenaka waya süpüla ayatüin waya sünain aʼyatawaa nümüin Jeʼwaa (paashajeʼera Juan 14:26, 27). Jülüja waaʼin tü alatakat nümüin Philip sümaa Mary, tü nuʼwayuusekat. Kakaliashii naya aʼyataain suluʼu Weteet, eetaashi maʼaka saaʼin 25 juya suluʼu. Sünaajaaka shii Mary jee müsia nii Philip nümaʼaleʼeya wanee kasa nünain. Sülatapa namüin tia, ojuʼitüshii naya suluʼujee Weteet süpüla naaʼinmajüinjachin süshi Mary, ayuuisü nikii, nnojotsü niyaawatüin wayuu sünainjee tia.

⁹ Müshi Philip: «Müsü pansaakai saaʼin sukuwaʼipa tü kasa waaʼinrakat taaʼinruʼu, eepejeʼe wanee kasa choʼujaaka süpüla taaʼinrüin. Soʼu wanee kaʼi, wanaa sümaa taashajeʼerüin Aapiria Wayuu, tantiraʼale amaalü tü sümakat Colosas 1:11. Achechetshi taya taaʼin, taaʼinrapejeʼe neʼe tia sooʼopünaa taaʼin. Tayaawatüin sünainjee pütchikat tia, choʼujaain maʼin tachecherüin taaʼin sümaa kaʼatapalain taya jee talatüin taaʼin. Sotusü taaʼin sutuma tiaʼaya, nnojoluin shiain talatüin atuma taaʼin anale takuwaʼipa, talatüsü taaʼin süka jüüjüüin taya nümüin chi naaʼinkai Maleiwa».

¹⁰ Nüchajaain maʼin sukuwaʼipa Philip sümaa Mary süpüla shiain naaʼinmaain maʼin tü naʼyataainkat nümüin Jeʼwaa otta wainmain kasa anasü neʼraka nutuma Jeʼwaa sünainjee tia. Jamüshiijaʼa, süchikijee nojuʼitüin suluʼujee Weteet, nanta anainrü wayuu ekirajaweeka sünain tü Wiwüliakat kojuyatua süpüla semaanaka jee anoutakana nakuwaʼipa. Müsü Mary: «Talatüsü maʼin waaʼin natuma jee niiʼiyatüin Jeʼwaa wamüin aneerüin wakuwaʼipa».

11, 12. (1) ¿Kasa naaʼinraka José süpüla anakuwaʼipalinjachin nia nutuma Jeʼwaa? (2) ¿Kasa anasü niʼraka José nutuma Jeʼwaa sünainjee nüchecherüin naaʼin?

¹¹ Eesüjaʼa shapaale maʼin waaʼin jee mmoluwaale waaʼin saaʼu jameerüin wakuwaʼipa watta kaʼi, suʼwanajaʼalaa sümüle wakuwaʼipa. Eesüjaʼa müle tü alatakat nümüin José. Nüchajaapejeʼe sukuwaʼipa süpüla naaʼinrüin wanee kasa anakuwaʼipalüinjatka nutuma Jeʼwaa. Jamüshijaʼa nia, wanaa sümaa niʼyataain nümüin Potifar,  anasü sukuwaʼipa tü niʼyataainkat nutuma jee müsia neʼe nutuma tü aʼyatawaa aapünakat nümüin nutuma chi sülaülashikai tü kaatsetkat, anashaatasü nutuma (Gén. 39:21-23).

¹² Soʼu wanee kaʼi, aluwataanüshi José süpüla naaʼinmajüinjanain piamashii wayuu püreesashii aʼyataapuʼukana nümüin Faraón. Sükajee kamaneein José namüin naya wayuukana, naküjain nümüin tü shapaakalü atuma naaʼin jee naküjain nümüin shapaain maʼin naaʼin saaʼujee wanee kasa naʼlapüjaaka amaa (Gén. 40:5-8). Nnojotsü nütüjaain aaʼu José sunoutaainjatüin nukuwaʼipa sutuma tü namakat naya wayuukana nümüin jee taashinjachin nia suulia püreesaa. Alatüsü piama juya süchikijee tia, shiasaʼa soʼuleʼeya tü kaʼi nujuʼitakalü oʼu José sünainjee püreesaa, aneekünüshi nia süpüla niʼipajanainjachin Faraón sünain aluwatawaa saaʼu Egipto (Gén. 41:1, 14-16, 39-41).

13. ¿Kasa waaʼinrajatka süpüla anain wakuwaʼipa nutuma Jeʼwaa mayaapejeʼe eein tü alatakat wamüin?

¹³ Eesüjaʼa kapüleere maʼin tü alatakat wamüin maʼaka sülatüin nümüin José otta isale wachiki wanouteʼerüin shia. Aneetpajaʼa wakuwaʼipa nutuma Jeʼwaa wachajaale maʼin sukuwaʼipa süpüla waaʼinrüin tü anakat nümüin jee nnojorüle süshapalaain waaʼin (Sal. 37:5). Eesüjaʼa nnojorüle watüjain saaʼu kasainjatüin waaʼinrüin, nnojotpejeʼe mepin tü alatakat wamüin (2 Cor. 4:8, TNM). Süka eejeechin Jeʼwaa wamaa, shia waaʼinmaa maʼin tü waʼyataainkat nümüin.

14-16. ¿Kasa naaʼinraka Felipe mayaapejeʼe suʼwanajaʼalaa sümüin nukuwaʼipa?

¹⁴ Wanee wayuu anakai maʼin süpüla ashatünaa akuwaʼipa nia Felipe. Mayaapejeʼe suʼwanajaʼalaa sümüin nukuwaʼipa, ayatüshi nia sünain naaʼinmaain maʼin tü niʼyataainkat nümüin Jeʼwaa. Aapünüsü nümüin Felipe wane aʼyatawaa suluʼu tü outkajaaleekat chaa Jerusalén (Aluw. 6:1-6). Oʼutuna aaʼinchi Esteban wanaa maʼin sümaa tia otta müliashii maʼin atumawaa na anoujashiikana. Niʼrapa Felipe naʼwalakajaain na anoujashiikana suluʼujee Jerusalén, oʼunüshi nia Samariamüin sünain aküjaa pütchi namüin na wayuu chajanakana süka nnojoluin jaralin aküjain pütchi chayaa (Mat. 10:5; Aluw. 8:1, 5).

¹⁵ Oʼunüshi Felipe, eepünaale nuʼuninnüin nutuma chi naaʼinkai Maleiwa. Aküjashi pütchi Felipe nutuma Jeʼwaa suluʼupünaa mma eere nnojotpuʼuin saapüin wayuu tü pütchi anasükat nüchiki Maleiwa. Soʼu tia, mojutsalii na wayuu chejeʼewaliikana Samaria namüin na judíokana. Nnojoliipejeʼe mojutuin naya nümüin Felipe, müsüjeseʼe kapülain naaʼin naya wayuukana tü nüküjakat namüin (Aluw. 8:6-8).

¹⁶ Mapa, oʼuninnüshi nia yalejee nutuma chi naaʼinkai Maleiwa suluʼumüin piamasü  pueulo, Asdod otta Cesarea, eere wainmain wayuu nnojotka judíoin (Aluw. 8:39, 40). Suʼwanajaʼalaa sümaka nukuwaʼipa Felipe, kaʼwayuuseshi jee kachonshi nia. Mayaapejeʼe müin nukuwaʼipa, ayatüsü naaʼinmaain maʼin tü niʼyataainkat nümüin Jeʼwaa, müshijeseʼe niʼrüin kasa anasü sümaa nüpüshi nutuma Jeʼwaa (Aluw. 21:8, 9).

17, 18. ¿Kasa anasü weʼreetka waaʼinmaale tü waʼyataainkat nümüin Jeʼwaa suʼwanajaʼalaa sümüle wakuwaʼipa?

¹⁷ Naashin watta naalii wawalayuu waneepiakana sünain aʼyatawaa nümüin Jeʼwaa, talatüsü naaʼin jee anasü tü kasa jülüjakat naaʼin süka shiain naaʼinmaain maʼin tü naʼyataainkat nümüin Jeʼwaa, ayatüshii müin naya jaʼitairü suʼwanajaʼalaa sümüin nakuwaʼipa. Jülüja waaʼin tü alatakat nümüin Osborne jee sümüin Polite tü nuʼwayuusekat, chejeʼewalii naya Sudáfrica. Nojuʼitapa suluʼujee Weteet, nantamaatüinjatia anain naaʼinruʼu wanee aʼyatawaa süseʼeruʼupünaa kaʼi jee wanee piichi nepiainjatka. ¿Jamaka neʼe nakuwaʼipa? Müshi Osborne süchiki tia: «Wantamaatajatia anain waaʼinruʼu wanee aʼyatawaa, nnojotpejeʼe müin shia». Jee müsü Polite: «Apünüin maʼin kashi sümaa maʼyataain waya, nnojoishii waya kanaajaalain nneerü, kapüleeshaatasü maʼin tia».

¹⁸ ¿Kasa naaʼinraka süpüla eejiraain naya sümaa tü alatakat namüin? Müshi Osborne: «Waaʼinmaasü maʼin tü waʼyataainkat nümüin Jeʼwaa jee jülüjasü waaʼin kasa anasü sükajee wojuʼitüin sünain aküjaa pütchi namaa na wawalayuukana. Nnojoishii waya jimaa müin neʼe wepialuʼu, aküjashii maʼin waya pütchi. Talatüsü maʼin waaʼin sutuma tia. Wattasü wakua süchiirua aʼyatawaa, wantapejeʼe sünain mapa».

19-21. (1) ¿Kasa jimateetka atuma waaʼin? (2) ¿Kasa anasü weʼreetka müleka wekiʼralaale sünain tü wakuwaʼipakat maaʼulu?

¹⁹ Maʼaka wamüitpain süchiki tü alatakat namüin na wawalayuukana, waaʼinrüle tü kasa anakat nümüin Jeʼwaa suʼunnaa tü alatakat wamüin jee weʼitaale waaʼin nünain jimateerü waaʼin (paashajeʼera Miqueas 7:7). Otta eeshii süpüla aleewain  maʼin waya nümaa Jeʼwaa wekiʼralaale sünain tü wakuwaʼipakat. Müsü Polite: «Wojuʼitapa suluʼujee Weteet, tayaawata aaʼu choʼujaain wamüin wakaalinjünüin waneepia nutuma Jeʼwaa, shialeekajaʼa nnojorüle müin sunoutaweekai aaʼin wakuwaʼipa. Aleewaitpa maʼin taya nümaa Jeʼwaa».

²⁰ Mary tü waküjakalü achiki suluʼu pütchi 8, ayatüshi saaʼinmajüin chi süshikai otta ayatüsü pürekutsoolüin shia. Müsü shia: «Tatüjaaitpa aaʼu tü taaʼinrüinjatkat shapaale maʼin taaʼin, oʼuraajüinjatü taya nümüin Jeʼwaa otta jimatüinjatü taaʼin. Tatüjaa aaʼu sünainjee tü alatakat tamüin, tooʼulaainjatüin najapuluʼu Jeʼwaa tü alatakat tamüin, choʼujaajeerü maʼin waaʼinrüin tiaʼaya mapeena».

²¹ Otta müshia Lloyd sümaa Alexandra, nayaawatüin saaʼu jamüin nanoula sükajee suʼwanajaʼalaa sümüin nakuwaʼipa. Müshii naya: «Sükajee tü alatakat wamüin wayaawata aaʼu müleka katsüinre wanoula süpüla wachecherüin waaʼin jee nnojoluin süshapalaain waaʼin weʼrüle müliaa. Anoutaasü wakuwaʼipa sükajee tü alatakat wamüin».

22. ¿Jameerü waaʼin waaʼinrüle tü eekat süpüla waaʼinrüin sünain tü aʼyatawaakat nümüin Jeʼwaa jaʼitairü kasain alatüin wamüin?

²² Suʼwanajaʼalaa sümüle wakuwaʼipa sutuma ayuulin waya, saapünüle wamüin wanee aʼyatawaa jeket suluʼu nupueulose Jeʼwaa, choʼujaale waaʼinmajüin washi jee shiale wei otta ipuorule waʼwayuuse, soteesü waaʼin naaʼinmajeenain waya Jeʼwaa jee nükaalinjeenain waya suʼunnaa tia (Heb. 4:16; 1 Ped. 5:6, 7). Jaʼitairü kasain alatüin wamüin, waaʼinra süpüshuaʼa tü eekat süpüla waaʼinrüin sünain tü aʼyatawaakat nümüin Jeʼwaa. Woʼuraajüle nümüin chi Washikai Jeʼwaa jee weʼitaale maʼin waaʼin nünain, jimateerü waaʼin nutuma jaʼitairü kasain alatüin wamüin.