1, 2. ¿Kasa tü müliakat maʼin atuma wayuu? ¿Jarai kasitka tia?

MAPÜLEESAT wamüin aaʼinraa wainma kasa sutuma waneirua kasa sukumajaka wayuu maʼaka saaʼin tü teleeponokot, tü kemionkat jee tü neweerakat. Otta müsia, eesü waneirua kasa sukumajaka wayuu mojuka maʼin maʼaka saaʼin tü riwootkat, wonpa masaʼaleeka atuma wayuu, sikariia jee bomba atómica. Eepejeʼe wanee kasa mülialeeka atuma wayuu sainküin mmakat otta eetüjülia süpülapünaa sukumajünüin tia kasakalüirua, shia tü alawaakat. Tia shia tü aküjünakat süpüla shiʼikeʼennüin wayuu. Naashin Jesuu, nia Satanaa «kanainjeejachikaʼaya tü alawaakat» (paashajeʼera Juan 8:44). ¿Joujachi oʼttüin nia sünain aküjaa naʼalain?

² Chajachi nia aküjain alawaa suluʼu tü apainkat Edén otta kakaliashaatairü tia. Soʼu tia, anasü maʼin nukuwaʼipa Adán sümaa Eva suluʼu tü apain niʼitaakalü aluʼu naya Jeʼwaa. Jee aashajaatüjüiya Jeʼwaa namaa süpüla nnojoluinjatüin neküin «süchon tü wunuʼu atüjaweetkat atüma wayuu saaʼu tü anasükat je saaʼu tü mojusükat». Neküle shia, outajana naya naashin Jeʼwaa. Mayaapejeʼe nütüjaain aaʼu Satanaa tia, nüküjain naʼalain  sümüin Eva sükajee wanee wüi, oʼttüshi nia soʼujee tia sünain aküjaa alawaa. Müshi nia: «Nnojoleena jia ouktüin. [...] Kekiijeena maʼi jia süpüla kasa süpüshua. Meena aka jia Maleiwakai sünain jiyaawatüin saaʼu tü anasükat je tü mojusükat. Müsüjeseʼe niyouktüin süpuleerua jiküinjatüin suchon tü wunuʼukot» (Gén. 2:15-17; 3:1-5).

3. (1) ¿Jamüsü mojushaataka tü naaʼinrakat Satanaa? (2) ¿Jamüsü sukuwaʼipa wayuu sutuma tia alawaakat?

³ Mojushaatasü tü naaʼinrakat Satanaa süka nüküjain alawaa sümüin Eva sümaa nütüjaain saaʼu outeerüin shia sunoujale nünüiki otta shiküle süchon tia wunuʼu apülajuushikat suulia. Jee shiaʼaya saaʼinraka Eva tia. Moonooinsat shia otta müshia Adán nümüin Jeʼwaa, outaka naya mapa (Gén. 3:6; 5:5). Sutuma tia, outusü wayuu süpüshuaʼa saaʼujee naainjala Adán sümaa Eva, «ouktüshiʼiya neʼe waneepia napüshuaʼaleʼeya» mayaapejeʼe nnojoliin kaainjalain naya maʼaka naaʼin Adán (Roma 5:12-14). Shiasaʼa saaliijee tia, nnojotsü anain maʼin wayuu maʼaka naaʼin Adán nukumajaiwaʼaya nia Jeʼwaa otta nnojotsü katüin soʼu süpüla kaʼikat süpüshuaʼa. Eesü wayuu eekai süsaʼwatüin neʼe 70 jee 80 juya suuyase. Akaʼaya shia, wainma kasa oʼttaaka namüin (Sal. 90:10). Mojukatche maʼin tia. Nia kasitka Satanaa süpüla müinjatüin sukuwaʼipa wayuu mayaa süka nüküjain alawaa.

4. (1) ¿Kasa tü watüjaainjatkalü aaʼu? (2) ¿Jaralii na eekana süpüla aleewain nümaa Jeʼwaa saashin Salmo 15:1, 2?

⁴ Anuu nünüiki Jesuu nüchiki Satanaa: «Niyouktüin tü shiimüinkat, shia jülüjaka naaʼin tü alawaakat waneepia». Ayatüsia müin nukuwaʼipa Satanaa maaʼulu, niʼikeʼerüin wayuu «sainküin mmakat süpüshua» sükajee alawaa (Alat. Map. 12:9). Nnojotpejeʼe keeʼireein waaʼin nimeejüin waya Satanaa, müsüjeseʼe anain watüjaale saaʼu tüü: ¿Kasa naaʼinraka Satanaa süpüla niʼikeʼerüin wayuu? ¿Jamüsü keejiaka sümüin wayuu aküjaa alawaa? ¿Kasa waaʼinrajatka süpüla waküjain waneepia tü shiimainkat jee nnojoluin sumojujaain wakuwaʼipa nümaa Jeʼwaa maʼaka naaʼin Adán sümaa Eva? (Paashajeʼera Salmo 15:1, 2).

5. ¿Kasa naaʼinraka Satanaa süpüla niʼikeʼerüin wayuu?

⁵ Eeshii süpüla nnojoluin wemeejünüin nutuma Satanaa. Naashin Pablo, watüjaa aaʼu «tü mojusü naaʼinreekat Satanás» (2 Cor. 2:11). Watüjaa aaʼu niain Satanaa laülaain saaʼu süpüshuaʼa tü manoujainsatkalüirua, nia shikiishika tü iküleesiairua ekirajaka sünain alawaa, nekiipüʼü nia na sülaülashii mma emeejakana wayuu jee nia aluwataaka saaʼu sukuwaʼipa oikawaa jee ayaʼlajaa kasa sainküin mmakat (1 Juan 5:19). Satanaa otta tü yolujaakalüirua, nootuin na wayuu kapülainkana sümüin wayuu süpüla naküjain alawaa (1 Tim. 4:1, 2). Jamüshijaʼa na oikaaliikana, eeshii naküjale alawaa shiiʼiree keejiain tü noikainkat jaʼitairü mojuin shia sümüin wayuu, süka jamüin, shiain keeʼireein naaʼin sünneetse wayuu.

6, 7. (1) ¿Jamüsü mojuka maʼin naainjala na shikiipüʼükana tü iküleesiakalüirua? (2) ¿Kasa tü alawaa paapüitkat natuma na shikiipüʼükana tü iküleesiakalüirua?

⁶ Nayapejeʼe mojuin maʼin aainjala na shikiipüʼükana tü iküleesiakalüirua, süka jamüin, nnojoleenain katüin oʼu süpüla kaʼikat süpüshuaʼa na anoujakana sünain tü namakat otta na aaʼinrakana tü mojukat noʼuluʼu Maleiwa (Os. 4:9). Nütüjaa aaʼu Jesuu shimeejünüin wayuu natuma  na karaloʼutamaajanakana jee na fariseokana, müshijeseʼe nümüin: «Jia piamakana oʼupünaa, ‹Aishaʼajaa› meena jia, süka kasalajaneerüin jümüin tü mojusü jaaʼinrakat. Oʼunüshii jia sainküinpünaa mmakat süpüshua süpüla jimeʼejüin saaʼin wayuu wainma shiiʼiree süshatüin sukuaippa tü jünoulakat. Je chi eekai nüshatüin jukuaippa, alanaʼaleeshia sünain süsaleechin nia juulia chamüin [suluʼu Gehena, müichiamaʼale nia, TNM]» (Mat. 23:15). Nüküjain Jesuu namüin na karaloʼutamaajanakana jee na fariseokana müin nakuwaʼipa maʼaka naaʼin Satanaa, chi nashikai. Jee Satanaa uwomuyuu nia (Juan 8:44).

⁷ Müsia neʼe nakuwaʼipa na shikiipüʼükana iküleesia maaʼulu yaa, ekirajüshii sünain alawaa. Eeshii eekana pastoot otta padre namünüin. Nnojotpejeʼe nekirajüin wayuu sünain tü shiimainkat nüchiki Maleiwa jee nayoutuin tü shiimainkat süpüleerua nanoujain tü alawaakat (Roma 1:18, 25). Ekirajüshii naya sünain müliain wayuu nutuma Maleiwa saʼaka siki, ayatüin tü saaʼinkat wayuu süchikijee outuin shia otta ekirajüshii naya sünain nnojoluin mojuin nümüin Maleiwa jaleerüle wanee wayuu jee kasaarüle wanee toolo nümaa toolo otta wanee jierü sümaa wanee jierü.

8. (1) ¿Kasa alawaa alüʼütka süpüla naküjain na poliitikokana? (2) ¿Kasa waaʼinrajatka naküjapa tia alawaakat?

⁸ Emeejünüsü wayuu natuma na poliitikokanaʼaya. Alüʼütsü süpüla naküjain naʼalain «süchiki anaa akuaippa», antalaʼa meetpejeʼe «wane müliaa miyoʼushaata nanainmüin sünain süsaleenain naya tü naainjalakat». Jalia wanoujaʼalayaai tü namakat na poliitikokana; anoutaajeerü tü mmapaʼakat naashin. Watüjaapejeʼe saaʼu süntalaʼa sümeerüin tü kaʼi najaʼlajeʼerüinjatkalü oʼu Jeʼwaa süpüshuaʼa tü kasa mojusükat (1 Tes. 5:1-4).

9, 10. (1) ¿Jamüsü süküjaka wayuu alawaa? (2) ¿Kasa eeka sünainjee tü aküjaakat alawaa? (3) ¿Kasa tü sotuinjatkat waaʼin süchiki nukuwaʼipa Jeʼwaa?

⁹ Maaʼulu yaa, wainma wayuu aküjaka alawaa, nnojoishii nayain neʼe na kapülainkana sümüin wayuu. Sünain wanee karaloʼuta eʼnnaajünaka maʼin, eesü wanee pütchi kanüliaka «¿Jamüshii waküjaka alawaa?». Müsü tia karaloʼutakat süchiki tia: «Tü aküjaakat alawaa shia wanee kasa icheka sünain sukuwaʼipa wayuu». Jee müsia, aküjünüsü sünain tia karaloʼutakat jamüin sünüiki wayuu süchiki tia. Saashin wayuu, eeshii eekai naküjain alawaa süpüla nounjulajüin süchiki naainjala, süpüla saapünüin wanee aʼyatawaa namüin, süpüla kanneetsein naya jee süpüla anakuwaʼipalüin naya. Saashin tia karaloʼutakat, mapüleesat sümüin wayuu aküjaa alawaa sümüin eekai nnojoluin shiʼraajüin, sümüin sukonpainyeetse sünain aʼyatawaa, saʼaleewainyuu jee süpüshi.

¹⁰ ¿Kasa eeka sünainjee tü aküjaakat alawaa? Nnojotsü anoujünüin nünüiki chi aküjakai alawaa otta amojujaasü nukuwaʼipa namaa na waneinnua sünainjee tia. Jamüshijaʼa wanee wayuu eekai nütüjaain saaʼu kawalaʼatain nia sutuma nuʼwayuuse sümaa suunjulajüin shia nuulia, mojushaatasü maʼin naaʼin saaliijee tia. Eetaashii na anamiayaakana sümüin naʼwayuuse otta nachonnii suʼupala wayuu, shiasaʼa namüiwaʼapa naya, müliasü maʼin saaʼin naʼwayuuse otta nachonnii natuma. Wayuukana naainnua, nnojotsü süpüla nounjulajüin tia nuulia Jeʼwaa. Saashin tü Wiwüliakat, «nnojotsü eein saʼaka tü nukumajalakat  chi Maleiwakai eekai sunujulaain nuulia» (Heb. 4:13).

11. ¿Kasa watüjaka sünainjee tü naaʼinrakat Ananías otta Safira? (Piirakaa sümüin tü ayaakuaa suluʼukat süpana 3).

¹¹ Suluʼu tü Wiwüliakat aküjünüsü nüchiki wanee wayuu Ananías nünülia otta Safira sünülia nuʼwayuuse, nootuin naya Satanaa süpüla naküjain alawaa nümüin Maleiwa. Jamüshiijaʼa naya, noiküin wanee mma namaʼanajatü otta naapaka süpüshi sülia tü mmakat namüin na aluwataaushiikana, naashin nayakana, naapüin süpüshuaʼa tü nneetkat. Tü keeʼireekat naaʼin shia anainjatüin nanüiki na wane anoujashiikana nachiki otta süpüla «asülajüliikanache maʼin» namünüinjanain. Niʼrapejeʼe Jeʼwaa tü naaʼinrakat naya wayuukana otta süsalashii naya nutuma (Aluw. 5:1-10).

12. ¿Kaseerü alataka namüin na wayuu aküjakana alawaa sümaa nnojoluin nayaawajaain suulia otta jamüsü sülateetka tia namüin?

¹² ¿Anashisüche nümüin Jeʼwaa süküjünüle alawaa? Napüshuaʼale na wayuu aküjakana alawaa sümaa nnojoluin nayaawajaain suulia tia, ojutuneena saʼaka «tü sikikat makat aka saaʼin laa» wanaajiraa nümaa Satanaa. Müinamaʼaleeya naya (Alat. Map. 20:10; Alat. Map. 21:8, TNM; Sal. 5:6). Nümüin Jeʼwaa müshii naya aka saaʼin erü süka kiʼrain naya sünain aaʼinraa tü kasa yarüttakat maʼin noʼuluʼu (Alat. Map. 22:15).

13. ¿Kasa watüjaaka aaʼu nüchiki Jeʼwaa? ¿Kasa waaʼinrüinjatka sutuma watüjaain saaʼu tia?

¹³ Watüjaa aaʼu matüjain Jeʼwaa aküjaa alawaa, nnojoishi nia wayuuin süpüla nüküjainjachin alawaa (Núm. 23:19; Heb. 6:18). Saashin tü Wiwüliakat, üttüsü naaʼin Jeʼwaa sünain tü alawaakat (Prov. 6:16, 17). Süpüla talatüinjachin Jeʼwaa wamaa, waaʼinrüinjatü tü nümakat wamüin otta waküjainjatü tü shiimainkat waneepia. Oonooinjana waya sümaa pütchikat tüü: «Nnojo jüküjiraain alawaa» (Col. 3:9).

14. (1) ¿Kasa naataka aluʼu nakuwaʼipa na anoujashii shiimainshiikana noulia na ekirajüliikana sünain alawaa? (2) ¿Kasa süküjeeka achiki Lucas 6:45?

¹⁴ ¿Kasa naataka aluʼu nakuwaʼipa na anoujashii shiimainshiikana noulia na ekirajüliikana sünain alawaa? Waküjain tü shiimainkat waashajaapa (paashajeʼera Zacarías 8:16, 17). Anuu tü nümakat Pablo: «Sünain süpüshuaʼa tü kasa waaʼinrakat weeʼiyatüin waʼyataain nümüin Maleiwa» (2 Cor. 6:4, TNM; 2 Cor. 6:7). Otta naashin Jesuu, tü saashajaakat wanee wayuu, shia tü ojuʼitakat suluʼujee saaʼin (Luc. 6:45). Müleka anale tü kasa suluʼukat waaʼin, waküjeerü waneepia tü shiimainkat. Nnojoishii waya aküjain alawaa, waküjain waneepia tü shiimainkat namüin na wayuu nnojoliikana weʼraajüin, na waʼyataajiraakana amaa, na waʼaleewainkana jee namüin na wapüshikana. Wekiraja sünain waneirua kasa pansaainjatka anain wakuwaʼipa jee waküjainjatka anain tü shiimainkat.

15. (1) ¿Jamüsü nnojotka anain paaʼinrüle kasa mojusü ojuunaa? (2) ¿Kasa paaʼinrajatka püpüleeruaanüle aaʼin süpüla paaʼinrüin kasa mojusü? (Paashajeʼera tü nootakat)

¹⁵ Jimaʼaire pia, keeʼireesü paaʼin aleewaa namaa napüshuaʼa na pukonpainyeetsekana. Wainmapejeʼe jimaʼalii otta majayünnüü aainjakana kasa mojusü ojuunaa sutuma kachiiruain naaʼin tia. Jamüshiijaʼa naya, anamiayaashii suʼupala napüshi otta noʼupala na wawalayuukana, shiasaʼa namaapa naya nakonpainyeetse jee sünainpa naya redes sociales, naatajatshaana nakuwaʼipa, kashüülasü nanüiki, wanaawasü nasheʼinpala namaa na manoujainsaliikana, aapajüshii muusika kashüülasü, onoʼotushii naya yootshi, akaijüshii naya yüi, kamüraajüinshii naya ojuunaa otta eeshii eekai keemaleein naaʼinrala. Aküjashii naya naʼalain nümüin nashi, nei, namüin na wawalayuukana otta nümüin Jeʼwaa (Sal. 26:4, 5). Nütüjaapejeʼe aaʼu Jeʼwaa kojutuyaale neʼe nia watuma sükajee wanüiki sümaa waaʼinrüin tü mojusükat (Mar. 7:6). Shia anaka aluʼu paaʼinrüle tü sümakat Proverbios, müsü mayaa: «Nnojo suchuntaain paaʼin tü kasa mojusü keejiakat namüin na manoujainsaliikana; mmoluwaa pia neema Jeʼwaa waneepia» (Prov. 23:17). *

16. ¿Kasa waaʼinrajatka wepirajapa wanee karaloʼuta süpülajatka waneepiain waya sünain aʼyatawaa nümüin Jeʼwaa?

¹⁶ Eesüjaʼa keeʼireere paaʼin pürekutsoolin rekulaat pia jee waneepieere pia sünain aʼyatawaa nümüin Jeʼwaa maʼaka saaʼin chaa Weteet. Choʼujaapejeʼe püshajüinjatüin tü shiimainkat pipirajapa tü karaloʼuta süpülajatkat tia. Pansaainjatü pünüiki püshajüinjatpa süchiki tü pünajawaikat, paapajawaika jee tü püshaitawaikat. Otta müsia, püshajüinjatü tü shiimainkat eere süsakinnüin kasain ayuulii pünainka jee wulere pukuwaʼipa (Heb. 13:18). Müleka paainjüle wanee kasa nnojotka anain noʼuluʼu Jeʼwaa, ¿püküjaitpa shia namüin na laülaashiikana? Nnojoyürüle püküjain shia namüin, anasü puchuntüle kaalinwaa namüin süpüla wuleinjatüin paaʼin sünain aʼyatawaa nümüin Jeʼwaa (Roma 9:1; Gal. 6:1).

17. ¿Kasa waaʼinrajatka wasakiijünüle süpüla waküjain nachiki na wawalayuukana?

¹⁷ Jülüjataa waaʼin jooluʼu napülajüle woulia na sülaülashiikana mma waʼyataainjanain nümüin Jeʼwaa sümaa nasakiijüin waya süpüla waküjain nachiki na wawalayuukana. ¿Waküjainjatche namüin  süpüshuaʼa tü nasakitkalü anain waya? Jülüja waaʼin tü naaʼinrakat Jesuu soʼu nüsakiijünüin nutuma Pilato, shia naaʼinraka tü sümakat pütchikat tüü: «Eesü kaʼi süpüla koʼutaa otta kaʼi süpüla aashajawaa», koʼutüshi neʼe Jesuu soʼu tia (Ecl. 3:1, 7; Mat. 27:11-14). Anasü maʼin washatüle nukuwaʼipa Jesuu suulia jamajüin na wawalayuukana atumawaa (Prov. 10:19; 11:12).

18. ¿Kasa paaʼinrajatka nasakirüle pia na laülaashiikana süchiirua naainjala wanee wawala?

¹⁸ Anuu wane kasa jülüjeeka waaʼinya. Jamüsüjaʼa pütüjaale saaʼu süchiki naainjala wanee wawala, ¿jameerü pünüiki namüin na laülaashiikana nasakirüle pia süchiki tia? ¿Püküjeetche tü shiimainkat namüin jaʼitaichi paʼaleewain jee püpüshin chi kaainjalashikai? Soteesü paaʼin nayain na laülaashiikana eʼitaanüin süpüla nakaalinjain na wawalayuukana süpüla nnojoluin shiyarülajaain nakuwaʼipa. Saashin tü Wiwüliakat, chi wayuu waneepiakai nümaa Jeʼwaa nüküjain tü shiimainkat (Prov. 12:17; 21:28). Püküjainjatü tü shiimainkat namüin na laülaashiikana nasakirüle pia süchiirua wanee kasa, nnojotsü puunjulajüinjatüin tia noulia. Choʼujaasü natüjaainjatüin saaʼu na laülaashiikana süchiki naainjala wanee wawala eekai kaainjalain süpüla nakaalinjain nia otta aleewain nia nüchikuaʼa nümaa Jeʼwaa (Sant. 5:14, 15).

19. ¿Kasa wekirajaainjatka anain sünain tü wane ekirajaayakat?

¹⁹ Anuu nünüiki David sünain oʼuraajaa nümüin Jeʼwaa: «Talatüshi maʼin pia sujuʼitüle suluʼujee naaʼin wanee wayuu aküjaa tü shiimainkat» (Sal. 51:6). Nütüjaa aaʼu David shiain kojutuin nümüin Jeʼwaa tü anasü suluʼukat waaʼin. Wayakana anoujashii shiimainshiikana, aküjiraashii waya tü shiimainkat waneepia. Süka naatain wakuwaʼipa noulia na suluʼukana tü iküleesia nnojotkat shiimain, wekirajüin wayuu sünain tü shiimainkat. Sünain tü wane ekirajaayakat, wekirajaajeerü anain jamüin sukuwaʼipa tia watuma.