1, 2. (1) ¿Jarat tü aʼyatawaa naaʼinmaakat maʼin Jesuu otta jamüsü naaʼinmaaka shia? (2) ¿Kasa waaʼinrajatka süpüla anain tü waʼyataainkat nümüin Jeʼwaa?

AʼYATAAPUʼUSHI Jesuu sünain akumajaa kasa süka taapüla otta aküjashi tü pütchi anasükat (Mar. 6:3; Roma 15:8). Anashaatasü nutuma tia piamasükat kasa niʼyataakalü anain. Süka niʼyataalin sünain akumajaa kasa süka taapüla, atüjashi nia süpüleerua tü niʼyataayakat jee anasü maʼin tü kasairua nukumajakat süka. Otta müsia, süka nütüjain maʼin süpüleerua Nünüiki Maleiwa, nükaalinjain wayuu süpüla shiyaawatüinjatüin saaʼu tü shiimainkat (Mat. 7:28; Luc. 24:32, 45). Wanaa sümaa 30 nuuyase Jesuu, ooʼulaashi nia suulia aʼyatawaa süka taapüla süpüla waneepiainjachin nia sünain ekirajaa wayuu süchiki Nuluwataaya Maleiwa. Nütüjaa aaʼu shiain naaʼinmaainjatüin tia otta shiain nüjütüin apüla nia Maleiwa yaa mmapaʼamüin (Mat. 20:28; Luc. 3:23; 4:43). Shia jülüjaka naaʼin Jesuu waneepia aküjaa tü pütchi anasükat otta keeʼireesü naaʼin eeinjanain wayuu aaʼinrakana tia (Mat. 9:35-38).

² Nnojoishi aʼyataalin waya wapüshuaʼa sünain akumajaa kasa süka taapüla, aʼyataapejeʼe waya wapüshuaʼa sünain ekirajaa wayuu sünain tü pütchi anasükat. Jaʼitakajeʼe neʼe Maleiwa, aʼyataashi sünain  tia süka choʼujaashaatain shikirajünüin wayuu sünain tia pütchikat. Müshiijeseʼe waʼyataaliin «nümaa Maleiwa» saashin tü Wiwüliakat (1 Cor. 3:9, TNM; 2 Cor. 6:4). Watüjaa aaʼu shiain tü shiimainkat tü Nünüikikat Maleiwa (Sal. 119:159, 160). Müsüjeseʼe waaʼinmaain maʼin lotuin wakuwaʼipa «sünain ekirajaa tü shiimüinkat» (paashajeʼera 2 Timoteo 2:15). Süpüla wountuin tia, atüjainjana maʼin waya ekirajaa süka tü Wiwüliakat süka shiain wekirajüin maʼin aka wayuu nüchiki Jesuu, Jeʼwaa otta süchiki tü Nuluwataayakat. Süpüla anainjatüin wekirajia otta eeinjatüin wayuu aapaaka sümaa tü shiimainkat, eesü waneirua kasa saapaka wamüin nupueulose Jeʼwaa süpüla wekirajüin wayuu. Tüü, shia tü wekirajüinjatkalü aka wayuu. Watüjainjatü apüleerua jamüinjatüin shikirajia wayuu süka.

3. (1) ¿Kasa waaʼinmaainjatka maʼin suʼunnaa süntüin sükalia sajaʼttüinjatka oʼu kasaka süpüshuaʼa? (2) ¿Kasa waaʼinrajatka saashin Aluwataaushikana 13:48 süpüla wountüin tia?

³ Eeshiijaʼa wamüle: «¿Jamüsüche ‹tü wekirajüinjatkalü aka wayuu› sümünakat tia? ¿Jamakaʼa ‹tü waküjainjatkalü aka pütchi›, nnojotka sümünüin?». Shia süka naatain aküjaa pütchi suulia ekirajaa wayuu. Waküjale pütchi, yootushii neʼe waya süchiki tü sümakat tü Wiwüliakat. Eekajasaʼa wekirajapa wayuu, wachajaain sukuwaʼipa süpüla shiyaawatüinjatüin saaʼu tü pütchikat otta keeʼireeinjatüin saaʼin aaʼinraa tü shikirajaakalü anain. Suʼunnaa süntüin sükalia sajaʼttüinjatkat oʼu kasaka süpüshuaʼa, waaʼinmaa maʼin aküjaa pütchi otta ekirajaa wayuu sünain tü shiimainkat. Wachajaa maʼin sukuwaʼipa süpüla wekirajüin na wayuu kettaakana süpüla katüin oʼu waneepia otta na aʼyataweekana nümüin Jeʼwaa (paashajeʼera Aluwataaushikana 13:44-48, TNM).

4. ¿Kasa waaʼinrajatka süpüla wantüin nanain na wayuu kettaakana süpüla katüin oʼu waneepia?

⁴ ¿Kasa waaʼinrajatka süpüla wantüin nanain na wayuu kettaakana süpüla katüin oʼu waneepia? Washatüinjatü tü naaʼinrapuʼukat na anoujashii namaiwajanakana, aküjainjana waya pütchi. Woʼuna süchiirua tü nümakat Jesuu, müshi nia namüin na nikirajüinkana: «Jikerotapa suluʼu wanee pueulo jee wanee mma, jüchajaa jaralin acheküin tü pütchikat» (Mat. 10:11, TNM). Watüjaa aaʼu eejeerüin wayuu eekai nnojoluin sücheküin tü pütchi anasükat süka yaletüin saaʼin otta nnojoluin kasajatüin sümüin tü anoujaakat. Nayapejeʼe wachajaain na nnojoliikana yaletüin aaʼin otta na atüjaweekana saaʼu tü shiimainkat. Tü waʼyataainkat sünain aküjaa pütchi, müsü aka saaʼin tü niʼyataainkat Jesuu soʼu nukumajüin kasa süka taapüla. Jamüshijaʼa nia, süpülapünaa nukumajüin wanee kasa, nüchajaain palajana tü taapüla anaka süpüla akumajaa meesa, siiya, puettoʼu otta tü shipinjatkat wanee kasa. Shiasaʼa nüntapa sünain wanee taapüla eekai anain, nukumajüin tü nukumajeekalü amüin sükajee tü kasairua niʼyataayakat. Akaataajaʼa neʼe tü waaʼinrakat wayakana, wachajaainjana palajana na wayuu anamiakana otta süchikijee tia, wekirajüinjana naya sükajee tü kasairua saapakat wamüin nupueulose Jeʼwaa süpüla wekirajüin wayuu (Mat. 28:19, 20).

5. ¿Kasa watüjaainjatka aaʼu süchiki tü wekirajüinjatkalü aka wayuu? Püküja wanee shiyaawase. (Piirakaa sümüin tü ayaakuaa suluʼukat süpana 9).

⁵ Tü saapakat wamüin nupueulose Jeʼwaa süpüla wekirajüin wayuu, naatawai tü kapülajatkat shia. Jülüjataa paaʼin tü kasairua niʼyataayakat Jesuu. * Eesü eekai süpülajatüin emeriijia otta ejeettia tü taapülakat; eesü eekai süpülajatüin ashottia, oototia, anoutia suulia shokotuin shia jee süpüla wanaawain sajaʼapüin. Akaataajaʼa neʼe tü kasairua wekirajüinjatkalü aka wayuu, eesü tü kapülajatkat shia. Süka choʼujaain watüjain süpüleerua süpüshuaʼa, wekirajaainjatü anain waneʼewai sukua.

6, 7. (1) ¿Eeirü paapüin sümüin wayuu tü tarüjeeta süpülajatkat jw.org? ¿Jamüsü sukuwaʼipa putuma? (2) Püküja tü piamasükat kasa kapülajatka tü karaloʼutachon ounejaayakat.

⁶ Tarüjeeta süpülajatka jw.org. Mayaainjeʼe joʼuuchoin tia tarüjeetakat, anasü süpüla sütüjaain aaʼu wayuu waküjaliin pütchi nüchiki Jeʼwaa otta süpüla sütüjaainjatüin aaʼu süchiki tü paajinakat jw.org. Wainma kasa natüjaajeetka aaʼu wachiki suluʼu paajinakat tia otta eeshii süpüla nachuntüin ekirajünaa sünain tü Wiwüliakat suluʼuya. Alatüinna suulia 400.000 na wayuu achuntakana suluʼupünaa jw.org nekirajünüin sünain tü Wiwüliakat. Jee watta maʼin naalii na achuntawaikana tia kaʼiwai. Anashii walüʼüjawaire waneepia tü tarüjeeta süpülajatkat jw.org, süka jamüin, eein süpüla waküjain pütchi sümüin wayuu eepünaale woʼunuin.

⁷ Ounejaaya. Piamasü kasa anaka apüla tia karaloʼutachonkat. Palajana, müsü sünüiki sümüin wayuu: «Pikirajaa sünain tü Wiwüliakat namaa na aküjaliikana pütchi nüchiki Jeʼwaa». Shiasaʼa süchikijee, süküjaka eein süpüla shikirajaain wayuu sünain tü Wiwüliakat wamaa sünain tü outkajawaakat otta shipialuʼu. Karaloʼutachonkat tüü, anasü süpüla sütüjaain aaʼu wayuu waküjaliin pütchi nüchiki Jeʼwaa otta süpüla wounejaain sünain tü outkajawaakat «na eʼrakana sünain cheʼojaain chi Maleiwakai» namüin (Mat. 5:3). Talatüshii waya namaa napüshuaʼa na wayuu antakana sünain tü outkajawaakat jaʼitaina nnojoluin nekirajünüin sünain tü Wiwüliakat. Noutkajaale wamaa, neʼreerü wainmain kasa eeka süpüla natüjain sünainjee tü Wiwüliakat.

8. ¿Jamüsü anaka maʼin noʼunule na wayuukana sünain tü outkajawaakat, jaʼitairü uwatuain neʼe nakua sünain? Püküja tü alatakat nümüin Ray otta Linda.

⁸ Ayatüinjana wounejaain na wayuukana sünain tü outkajawaakat, jaʼitairü uwatuain neʼe nakua sünain, süka jamüin, neʼreerüin naatain wakuwaʼipa suulia tü wane iküleesiakalüirua, neʼreerü wekirajüin tü shiimainkat otta wakaalinjain wayuu süpüla sütüjaainjatüin saaʼu nüchiki Maleiwa (Isa. 65:13). Tia shia tü alatakat nümüin wanee wayuu sümaa nuʼwayuuse, Ray nünülia otta Linda sünülia nuʼwayuuse, chejeʼewalii naya Estados Unidos. Anoujapuʼushii naya nünain Maleiwa otta oʼuneeshii naya suluʼumüin wanee iküleesia süpüla neʼraajüin maʼin nukuwaʼipa Maleiwa. Müshiijeseʼe noʼunuin suluʼupünaa tü iküleesiairua eejatkat suluʼu tü pueulo eere kepiain naya. Wainma iküleesia chayaa sümaa naatawalin tü shikirajakalü anain. Sutuma tia, jülüjasü naaʼin piamasü kasa süpüla naneeküin jaralüinjatüin kaluʼuin naya. Wanee kasa jülüjaka naaʼin shia müleka natüjale sünainjee otta müsia jülüjasü naaʼin nnojorüle müin maʼaka süsheʼinpala manoujainsalii na wayuu oʼunakana sünain. Kojuya juya süchikijee tia, noʼtta achikirü süpüshuaʼa tü iküleesiakalüirua; nnojotsü kasain natüjain sünainjee otta nnojotsü müin aka saaʼin nasheʼinpala anoujashii na oʼunawaikana suluʼu. Ashajuushitüjülia natuma sünülia tü iküleesiairua noʼunuinjatkalü aluʼumüin, shiasaʼa nojuʼitapa suluʼujee tü chiiruaajatkat iküleesia, chakuwatsü Linda sünain aʼyatawaa otta Ray nepialuʼumüin. Wopuluʼupa Ray, niʼrüin wanee Piichi noutkajaale na aküjaliikana pütchi nüchiki Jeʼwaa, nümaka suluʼu naaʼin: «Anashi talatüle yalapünaa teʼraiwa kasain aainjünüin yala». Ponusü maʼin naaʼin tü niʼrakat. Kamaneeshii napüshuaʼa na yalajanakana nümüin jee anasü maʼin naʼanaaya. Aikalaashi Ray palajana maʼin jee kamalainsü maʼin nümüin tü naapajakat. Tü alatakat nümüin Ray, müsü aka saaʼin tü nüküjakat Pablo süchiki tü nümakat wanee wayuu soʼu palajatüin nukua sünain tü outkajawaakat, shiasaʼa sünainjee tia meechi nia: «Shiimüin sünain eein [Maleiwa] jaʼaka» (1 Cor. 14:23-25). Suluʼujee tia, oʼunawaishi Ray sünain tü outkajawaakat  rimiinkoʼuluwai neʼe jee mapa sünain tü outkajawaakat süseʼeruʼu semaanaka. Oʼunawaisü Linda nümaa waneepia. Eerejeʼe sülatüin suulia 70 nouyase, ekirajaashii naya sünain tü Wiwüliakat otta woutiisashii naya.

9, 10. (1) ¿Jamüsü mapüleeka aküjaa pütchi süka tü karaloʼutacheinkalüirua? (2) Püküja jamüinjatüin wanüiki waküjapa pütchi süka tü karaloʼutachonkat ¿Paapüirü süchiki Nuluwataaya Maleiwa?

⁹ Karaloʼutachein. Mekiisat karaloʼutachein eeka wamaʼana mapüleeka akajee yooto namaa na wayuukana. Eeirü maʼaka 5.000 miyoone karaloʼutachein eʼinprimiijünaka soʼujee tü juyakat 2013. Pütüjale aküjaa pütchi süka wanee, mapüleejeerü pümüin aküjaa pütchi süka tü waneirua süka müinya neʼe aka saaʼin. ¿Jamüinjatü sukuwaʼipa watuma süpüla waküjain pütchi süka?

¹⁰ Anuu wanee sukuwaʼipa. Müleka püküjeere pütchi nümüin wanee wayuu süka tü karaloʼutachonkat ¿Paapüirü süchiki Nuluwataaya Maleiwa? Eesü süpüla piiʼiyatüin palajana nümüin tü pütchi suʼttiajeekat otta eesü süpüla pümüin nümüin: «¿Paapüirü süchiki Nuluwataaya Maleiwa?». Süchikijee tia, paashajeʼera nümüin tü apünüinsükat pütchi ashajuushika wünaapünaa sünain tü asakiraakat otta puuʼulaa nüneekaiwa wanee saʼakajee. Nusoutapa chi wayuukai, nnojo pümüin nümüin müleka anale jee mojule tü nümakat, pujutala tü karaloʼutakat jee paashajeʼera nümüin tü pütchi ashajuushikat eere «Tü sümakat tü Wiwüliakat» sümüin. Ashajünüsü yala tü sümakat Daniel 2:44 otta Isaías 9:6. Yooto pia nümaa chi wayuukai otta sajaʼttiamüin pünüiki püsakira nia sünain tü pütchi yalakat süsapoʼujee tü karaloʼutachonkat, eere sümüin «Püsakireʼera paaʼin»: «¿Jameerü nukuwaʼipa wanee wayuu sutuma tü Nuluwataayakat Maleiwa?». Shieerü paashajaaka achiki tia nümaa wane pukueena. Puuyantapa püchikuaʼa eemüin chia wayuukai, eeshi süpüla pikirajüin nia sünain tü poyeetokot Pütchi anasü nutuma Maleiwa, ekirajaaya 7. Anasü maʼin tia poyeetokot süpüla woʼttüin sünain ekirajaa wayuu.

11. (1) ¿Kasapülajatü tü rewiisütakat Aapiria Wayuu otta ¡Eeja Waaʼin!? (2) ¿Kasa watüjaainjatka aaʼu süchiki tia rewiisütakalüirua?

¹¹ Rewiisütairua. Tü rewiisütakat Aapiria Wayuu otta ¡Eeja Waaʼin! ashajünüsü suluʼu wainma anüikii jee eitajünüsü maʼin shia sainküin mmakat süpüshuaʼa suulialeʼeya waneirua karaloʼuta. Süka wainmain maʼin wayuu aashajeʼeraka shia sainküinpünaa mmakat süpüshuaʼa, eʼitaanüsü sünain tü sütakat, pütchi natüjaweeka aaʼu na wayuukana. Anasü waküjale pütchi süka tia rewiisütakalüirua süpüla natüjaainjatüin saaʼu tü naaʼinrajatkat süpüla anainjatüin nakuwaʼipa. Watüjaainjatpejeʼe aaʼu palajana jaraliin na wayuu kamüinjanakana tia rewiisütakalüirua.

12. (1) ¿Jaralii kamüinjanakana tü rewiisütakat ¡Eeja Waaʼin! otta kasapülajatü shia? (2) Püküja wanee kasa anasü alataka pümüin jekenainka soʼu püküjain pütchi süka tia rewiisütakat.

¹² Anasü tü rewiisütakat ¡Eeja Waaʼin! süpüla waküjain pütchi sümüin wayuu nnojotka atüjaain maʼin süchiki tü sümakat tü Wiwüliakat. Eesüjaʼa nnojorüle natüjaain saaʼu tü nanoujakalü anain na oushikajaakana süchiirua nukuwaʼipa Kürisüto. Eeshii na wainmajakana aaʼin sutuma tü shikirajakat tü iküleesiakalüirua jee eetaashii na matüjainkana saaʼu sükaalinjain maʼin wayuu tü Wiwüliakat süpüla talatüinjatüin saaʼin jee anainjatüin sukuwaʼipa. Tia rewiisütakat süpülajatü sunoujainjatüin wayuu sünain eein chi Maleiwakai (Roma 1:20; Heb. 11:6, TNM). Otta süpüla sunoujain wayuu nünüikin Maleiwa tü Wiwüliakat (1 Tes. 2:13). Anuu sünüliairua tü apünüinsükat rewiisüta ¡Eeja Waaʼin! ojuʼitaka soʼu juyaka 2018: «Wopu talataka  atuma waaʼin», «12 kasa talateetka atuma paaʼin sümaa püpüshi» otta «Amülialeetka paaʼin nünaajaale wanee püpüshi».

13. (1) ¿Jaralii kamüinjanakana tü rewiisütakat Aapiria Wayuu süpülajatka wayuu süpüshuaʼa? (2) Püküja wanee kasa anasü alataka pümüin jekenainka soʼu püküjain pütchi süka tia rewiisütakat.

¹³ Tü rewiisütakat Aapiria Wayuu süpülajatka wayuu süpüshuaʼa süküjain tü shikirajakat maʼin tü Wiwüliakat. Rewiisütakat tia namüinjatü na wayuu kojutukana amüin tü sümakat tü Wiwüliakat otta kojutukana amüin Maleiwa. Eeshiijaʼa natüjaale saaʼu tü sümakat tü Wiwüliakat, nnojotpejeʼe nayaawatüin saaʼu tü shikirajakat maʼin (Roma 10:2, TNM; 1 Tim. 2:3, 4). Anuu sünüliairua tü apünüinsükat rewiisüta Aapiria Wayuu soʼujatka tü juyakat 2018: «¿Choʼujaasüche sümüin wayuu maaʼulu tü Wiwüliakat?», «¿Jameetche maʼin wakuwaʼipa mapeena?» otta «¿Naaʼinmajüinche pia Maleiwa?».

14. (1) ¿Kasa anasü eeka sünainjee weeʼiyatüin sümüin wayuu tü pienchisükat video wekirajüinjatka aka wayuu? (2) Püküja wanee kasa anasü alataka pümüin soʼu piiʼiyatüin soʼutku tü pienchisükat video.

¹⁴ Videokalüirua. Nükalioʼu Jesuu, nnojotpuʼusü eein tü aʼyataaya eekat maaʼulu. Jamüsüjaʼa maaʼulu, aʼyataasü süka koriente tü oʼyonoojiakat taapüla, tü ootojiakat, aliijiakat jee tü eʼinaajütkat külaawa. Akaataajaʼa neʼe tü waküjakalü aka pütchi jee tü wekirajakalü aka wayuu, nnojotsü shiain neʼe tü karaloʼutairua eekat wamaʼana, eeitpa videoirua maaʼulu. Eesü pienchisü video süpüshi tü wekirajüinjatkalü aka wayuu, anuu sünülia: ¿Jamüshii wekirajaainjanaka sünain tü Wiwüliakat?, ¿Kasa sünainpünaaka ekirajawaa sünain tü Wiwüliakat?, ¿Kasache aainjünaka suluʼu tü Piichi Outkajaaleekat? otta ¿Jaraliiche na aküjaliikana pütchi nüchiki Jeʼwaa? Soʼutku videokalüirua tüü, eesü eekai nnojoluin sülatüin suulia piama minuuto otta eesü eekai miyoʼuin. Tü nnojotkalü alatüin suulia piama minuuto, eesü süpüla piiʼiyatüin sümüin wayuu soʼu tü palajatkat pukua sünain yootoo namaa. Jee tü waneirua eesü süpüla piiʼiyatüin namüin na puuyantakana amaʼanamüin otta namüin na nnojoliikana kupaain maʼin. Eesü anashiijeerüle namüin na wayuukana ekirajawaa sünain tü Wiwüliakat jee oʼunaa sünain tü outkajawaakat sutuma tü neʼrakat suluʼu tia videokalüirua.

15. Püküja süchiki jamüin nanüiki na wayuukana nanajapa tü videokot suluʼu nanüiki.

¹⁵ Wekirajaa sünain jamüin sünüiki wayuu sutuma sünajüin tü videokalüirua. Antiraasü wanee wawala sümaa wanee wayuu chapuʼuka kepiain Micronesia jee shiiʼiyataka tü wawalakat sümüin tia wayuukot tü videokot ¿Jamüshii wekirajaainjanaka sünain tü Wiwüliakat? Suluʼu sünüiki tia wayuukot, yapés. Suʼttaiwaʼaya tü videokot, müsü tü wayuukot: «¡Anakatche maʼin türa, suluʼusü shia tanüiki! Chi wayuu aashajaakai suluʼu tü videokot müshi aka saaʼin sünüikipala wayuu chejeʼewat suluʼu toumain». Süchikijee tia, süküjain tü wayuukot saashajeʼerüinjatüin jee sünaʼlaainjatüin sümüin süpüshuaʼa tü kasa eekat suluʼu jw.org suluʼu yapés (anasü paashajeʼerüle Aluwataaushikana 2:8, 11). Tia meematüsü aka saaʼin tü alatakat sümüin wanee wawala chejeʼewat Estados Unidos, aluwataasü shia wanee enlace nümüin wanee süchoʼinrü süpüla niʼrüinjatüin tü videokot ¿Jamüshii wekirajaainjanaka sünain tü Wiwüliakat? Süchikijee niʼrüin tia videokot, nuluwataain wanee mensaaje suluʼupünaa Internet sümüin tü wawalakat, müshi nia suluʼu: «Tü kasa anakat maʼin sünainjee tia, shia eere süküjain süchiki eein wanee mojulaashi aluwataakai saaʼu tü Mmakat. Achuntushi taya ekirajawaa sünain tü Wiwüliakat». Chashi nia suluʼu wanee mma eere süpülajünüin noulia na wawalayuukana naküjain pütchi.

16. Püküja kasapülajatüin tü poyeetokot: (1) Poonoo nümaa Maleiwa süpüla katüin poʼu waneepia. (2) Pütchi anasü nutuma Maleiwa. (3) ¿Jaralii na aaʼinrakana maaʼulu tü nüchekakat Jeʼwaa?

¹⁶ Poyeetoirua. Isaataʼain sümüle nüchiki wanee wayuu aashajeʼeraa karaloʼuta jee nnojorüle eein tü karaloʼutairua weitajawaikat sümüin wayuu suluʼu nünüiki, ¿kasa waaʼinrajatka süpüla wekirajüin nia sünain tü shiimainkat? Eesü wanee poyeeto anaka maʼin süpüla wekirajüin aka nia, shia Poonoo nümaa Maleiwa süpüla katüin poʼu waneepia makat. * Wane poyeeto anaka süpüla ekirajaa wayuu sünain tü shiimainkat shia Pütchi anasü nutuma Maleiwa. Eesü süpüla weeʼiyatüin sümüin wayuu sünülia tü 14 ekirajaaya ashajünakat süsapoʼujee tü poyeetokot, süchikijee, wasakireetka shia jaralüin kamalain sümüin süpüla wekirajüin shia sünain. ¿Eesia puuʼulaküin tia puuyantapa püchikuaʼa sümaʼanamüin wayuu? Tü wane poyeeto wekirajüinjatkalü aka wayuu shia ¿Jaralii na aaʼinrakana maaʼulu tü nüchekakat Jeʼwaa? Poyeetokot tüü süpülajatü wekirajüin wayuu süchiki nupueulose Jeʼwaa. Süpüla pütüjaain saaʼu jamüinjatüin shikirajia wayuu süka tia poyeetokot paashajeʼera tü karaloʼutakat Wakuwaʼipa otta Waʼyataain nümüin Maleiwa ojuʼitaka maatsoʼu 2017.

17. (1) ¿Kasapülajatü tü piamasükat karaloʼuta wekirajaka aka wayuu? (2) ¿Kasa naaʼinrajatka napüshuaʼa na woutiisakana otta jamüsü choʼujaaka naaʼinrüin tia?

¹⁷ Karaloʼutairua. Woʼttüle sünain ekirajaa wanee wayuu süka wanee poyeeto, eeshii süpüla wekirajüin nia mapa süka tü karaloʼutakat ¿Kasa shikirajaka maʼin tü Wiwüliakat? Nnojotsü choʼujaain najaʼttirüin tü poyeetokot süpülapünaa tia. Sükajee karaloʼutakat tia, atüjeerü maʼin wayuu süpüleerua tü shikirajakat maʼin tü Wiwüliakat. Najaʼttirüle tü karaloʼutakat wanee wekirajüin sümaa niiʼiratüin nukuwaʼipa, wekirajüinjachi nia süka tü karaloʼutakat Wayaawata waneepia waalin nüpüla Maleiwa. Karaloʼutakat tia süpülajatü nütüjain eʼitawaa suluʼu nukuwaʼipa tü sümakat tü Wiwüliakat. Jaʼitaichi woutiisain wanee wayuu, najaʼttirajatü tü piamasükat karaloʼuta. Sükajee tia, akatsüinraajeerü naaʼin sünain tü shiimainkat ekirajünaka anain nia (paashajeʼera Colosas 2:6, 7).

18. (1) ¿Kasa tü waaʼinrajatkat saashin 1 Timoteo 4:16 otta kasa eejeetka sünainjee tia? (2) ¿Kasapülajatü tü aapünakat wamüin süpüla wekirajüinjatüin wayuu?

¹⁸ Wayakana aküjaliikana pütchi nüchiki Jeʼwaa, aküjainjana waya süchiki tü shiimainkat süka eein süpüla katüin soʼu wayuu süpüla kaʼikat süpüshuaʼa sünainjee (Col. 1:5; paashajeʼera 1 Timoteo 4:16). Süpüla wountuin waaʼinrüin tia aapünüsü wamüin tü wekirajüinjatkalü aka wayuu (pünaʼlaa sümüin tü pütchikat « Wekirajüinjatka aka wayuu»). Wekirajeein maʼin wayuu sükajee tia. Akaʼaya shia, eesü süpüla waneeküin waneʼewai wakua jaralüin tü wekirajeekalü aka wayuu otta joujain anashiin ekirajaa sükajee. Nnojotpejeʼe waapaʼayatüinjatüin tü karaloʼutakalüirua sümüin wayuu eekai eein, nnojotsü waapüinjatüin shia namüin na mojutüyaakana amüin tü shiimainkat. Tü waaʼinrajatkat shia wachajaain na wayuu kettaakana süpüla katüin oʼu waneepia, na nnojoliikana yaletüin aaʼin otta na atüjaweekana saaʼu tü shiimainkat süpüla noushikajaain süchiirua nukuwaʼipa Kürisüto (Aluw. 13:48, TNM; Mat. 28:19, 20).