1, 2. ¿Kasa waaʼinrajatka waashajeʼerapa jee wekirajaapa sünain tü Bibliakat süpüla wayaawatüin maʼin saaʼu tü sümakat? Püküja wanee sukuwaʼipa.

 PIYAʼLAJÜINJACHIRE wanee piichi, ¿kasa paaʼinrajatka palajana? ¿Piyaʼlajeetche shia sünainjee neʼe piʼrüin shiyaakua? Nnojo, ¿aashi müin? Oʼunuinjachi pia chamüin süpüla pünaʼlaain sümüin anooipaʼajee, ekerotuinjachi pia süpüla pünaʼlaain sümüin miyoʼule sukuattase otta eeshi süpüla paashajaweein nümaa wanee wayuu atüjakai süpüleerua sukuwaʼipa sukumajia tia piichikat. Paaʼinrüin süpüshuaʼa tia sutuma piʼraajeein tü piichi eeinjachire pia.

² Meematüsü aka saaʼin tü waaʼinrakat waashajeʼerapa jee wekirajaapa sünain tü Bibliakat. Anuu nünüiki wanee wayuu ekirajaakai süchiirua sukuwaʼipa tü Bibliakat: «Tü sümakat tü Bibliakat müsü aka saaʼin wanee piichi miyoʼu, müloʼuka maʼin asepü jee oʼutaka maʼin ooʼui». ¿Kasa waaʼinrajatka süpüla wayaawatüin saaʼu süpüshuaʼa tü sümakat tü Bibliakat? Kajaalapüle waya sünain aashajeʼeraa tü Bibliakat, eesü süpüla watüjaain neʼe saaʼu «tü kasa sütüjaainjatkalü aaʼu wayuu palajana nüchiki Maleiwa» (Heb. 5:12). Choʼujaasü maʼin wekirajaainjatüin sünain tü Bibliakat süpüla wayaawatüin maʼin saaʼu tü sümakat, maʼaka saaʼin tü waaʼinrajatkat süpüla weʼraajüin maʼin tü piichi wayaʼlajüinjatkat. Anuu waneirua kasa waaʼinrajatka waashajeʼerapa tü Bibliakat süpüla wayaawatüin maʼin saaʼu tü sümakat: jülüjainjatü waaʼin jamüin pansaaka tü sümakat wanee wetsiikulo sümaa tü sümakat wane, wachajaainjatü sukuwaʼipa süpüla pansaain wamüin tü wanoujakalü anain otta jamüin wanoujaka sünain tia.

3. (1) ¿Kasa nütütüleʼeraka anain Pablo naaʼin na anoujashii namaiwajanakana? (Éfeso 3:14-19). (2) ¿Jamüsü naaʼinraka tia?

 ³ Süpüla wayaawatüin saaʼu süpüshuaʼa tü sümakat tü Nünüikikat Maleiwa, wekirajaainjatü anain tü pütchi kapüleekat suluʼujee. Nütütüleʼerüin Pablo naaʼin na anoujashii namaiwajanakana süpüla nekirajaain maʼin sünain tü Nünüikikat Maleiwa «süpüla natüjaainjatüin saaʼu jeʼtsüin maʼin seeruluin, jeʼtsüin maʼin sajaʼapüin, jeʼtsüin maʼin shia iipünaamüin otta jeʼtsüin maʼin shia wünapümüin». Naaʼinrüle tia, icheerü maʼin tü nanoulakat «maʼaka ichein nuurala wanee wunuʼu» (paashajeʼera Éfeso 3:14-19). Shia waaʼinrajatka tia maaʼulu. Wekirajaa süchiki tü waaʼinrajatkat süpüla wayaawatüin saaʼu süpüshuaʼa tü sümakat tü Bibliakat.

4. ¿Kasa waaʼinrajatka süpüla aleewain maʼin waya nümaa Jehová? Püküja waneirua kasa anaka süpüla wekirajaain achiirua.

⁴ Nnojotsü talatüinjatüin neʼe waaʼin sümaa tü kasa sütüjaainjatkalü aaʼu wayuu palajana nüchiki Maleiwa. Nükaalinjain waya Maleiwa sükajee tü nüpülainkat süpüla wayaawatüin saaʼu tü jülüjakat naaʼin (1 Cor. 2:9, 10). Anasü pikirajaale maʼin süchiirua waneirua pütchi aleeweechika maʼin atuma pia nümaa Jehová, maʼaka saaʼin tü naaʼinrakat Jehová napüleerua na anoujashii namaiwajanakana saaʼujee alin naya nüpüla otta tü naaʼinrakat maaʼulu püpüleerua süka alin pia nüpüla. Eesü süpüla pikirajaain süchiki tü nuchuntakat Jehová namüin na israelitakana süpüla naʼwaajüin nia sümaa tü nuchuntakat wamüin maaʼulu süpüla waʼwaajüin nia. Otta eesü süpüla pikirajaain süchiirua tü pütchi ekeraajakat nünain Jesús yaaiwaʼaya nia mmapaʼa.

5. ¿Jarat tü pütchi pikirajaweekalü achiirua suluʼujee tü Bibliakat?

⁵ Asakinnüshii waneinnua wawalayuu süchiki jaralüin tü pütchi nekirajaweekat maʼin achiirua suluʼujee tü Bibliakat. Wousütüin soʼutku tia pütchi nekirajaweekalü anain suluʼu tü pütchi süttakat makalü anülia « Waneirua pütchi anaka süpüla wekirajaain achiirua». Kamalainjeerü pümüin ekirajawaa sünain tia pütchikat pikirajaale sükajee Índice de las publicaciones Watch Tower jee shiale sükajee Nachajaayainjatü pütchi na aküjaliikana pütchi nüchiki Jehová. Pikirajaale süchiirua tü sümakat tü Bibliakat, katchinjeerü punoula jee pütüjaajeerü aaʼu tü jülüjakat naaʼin Maleiwa (Prov. 2:4, 5). Wekirajaa soʼutku tü pütchi kapüleekat suluʼujee tü Bibliakat.

6. (1) Kapüleere wamüin wountuin wanee kasa keeʼireeka waaʼin, ¿weeʼiratüinjatche shia? (2) ¿Jamüsü watüjaaka saaʼu nnojoleerüin niiʼiratüin Jehová tü keeʼireekat naaʼin süpüleerua wayuu otta süpüleerua tü Mmakat? (Éfeso 3:11).

⁶ Jülüjataa waaʼin tü sümakat tü Bibliakat süchiki tü keeʼireekat naaʼin Maleiwa. Eesü süpüla wakumajüin sukuwaʼipa tü waaʼinrajatkat süpüla wountuin wanee kasa keeʼireeka waaʼin. Mayaainjeʼe nnojoluin weeʼiratüin tü keeʼireekat waaʼin, eesü süpüla weeʼiratüin tü waaʼinrajatkat süpüla wountuin shia. Tü waaʼinrakat süpüla wountuin wanee kasa müsü aka saaʼin wanee wopu antirüinjanaka waya eemüinjanale waya. Süttüle tü wopukot, eesü süpüla weeʼiratüin shia süpüla wantajanain eemüinjanale waya. Niiʼiyatüin Jehová shiʼipaʼaya suluʼu tü Bibliakat süchiki tü keeʼireekat naaʼin (Éf. 3:11). Jaʼitairü kasain maʼin alatüin, ayatüsia nikeraajüin waneepia tü keeʼireekat naaʼin, jama nunouteʼerüin wanee kasa wanaapünaa sümaa tü keeʼireekat naaʼin (Prov. 16:4). Aneerü süpüshuaʼa tü kasa naaʼinrakat Jehová süpüla kaʼikat süpüshuaʼa.

7. ¿Kasa naaʼinraka Jehová süpüla nikeraajüin tü keeʼireekat naaʼin wanaa sümaa niʼrüijaain wayumüin Adán sümaa Eva? (Mateo 25:34).

⁷ Nüküjain chi Maleiwakai namüin na palajanakana wayuu süchiki tü keeʼireekat naaʼin napüleerua. Müshi nia namüin: «Anakaja kachonniire jia, joulüiwa na juuʼuliwoʼukana sainküin mmakat süpüshua süpüla laülaainjanain jia saaʼu tü kasa [...] mmapaʼajatkat» (Gén. 1:28). Wanaa sümaa niʼrüijaain wayumüin Adán sümaa Eva, kaainjalasü wayuu süpüshuaʼa. Mayaainjeʼe sülatüin tia, nnojotsü amüloulin tü keeʼireekat naaʼin Maleiwa. Nukumajüin sukuwaʼipa tü naaʼinrüinjatkat süpüla ayatüin nikeraajüin tü keeʼireekat naaʼin. Nüikaleʼerüin sukuwaʼipa wanee aluwatawaa chaa iipünaa süpüla nikeraajüin tü keeʼireekat naaʼin napüleerua na wayuukana otta süpüleerua tü Mmakat (paashajeʼera Mateo 25:34). Soʼu tü kaʼi anakalü oʼu nümüin Jehová, nuluwataain chi waneeshikai Nüchon yaa mmapaʼamüin. Nikirajüin Jesús na wayuukana süchiki nuluwataainjachin Maleiwa jee outushi nia süpüla taashin wayuu suulia kaainjalaa jee outaa. Asoʼireʼennüsü naaʼin Jesús süchikijee outaa nutuma Jehová süpüla chainjachin nuluwataain iipünaa. Wekirajaa sooʼomüin süchiki tü naaʼinrakat Jehová süpüla nikeraajüin tü keeʼireekat naaʼin.

8. (1) ¿Kasa saashajaaka maʼin achiki tü Bibliakat? (2) Sünainjee tü sümakat Éfeso 1:8-11, ¿jarat tü wane kasa keeʼireekat maʼin naaʼin Jehová? (Piirakaa sümüin tü ayaakuaa sünainkat süta tü rewiisütakat).

⁸ Tü saashajaakalü maʼin achiki tü Bibliakat shia kojutuinjachin atumawaa Jehová sümaʼainruʼu nikeraajüin tü keeʼireekat naaʼin süpüleerua tü Mmakat. Naaʼinreerü tia Jehová nükajee Cristo, chi nüneekakai süpüla aluwatawaa. Matüjainsat niiʼiratüin Jehová tü keeʼireekat naaʼin. Müshi nia: «Tü pütchi teweetirakat, eejeerü shia waneepia otta tekeraajeerü tü keeʼireekat taaʼin» (Is. 46:10, 11; Heb. 6:17, 18). Mapa maʼin, paʼaraiiseerü tü Mmakat otta na nüikeyuukana Adán sümaa Eva, aneerü nakuwaʼipa, anamieena naya otta kateerü noʼu süpüla kaʼikat süpüshuaʼa (Sal. 22:26). Eepejeʼe wanee kasa anaka maʼin keeʼireeka naaʼin Jehová shia paaʼinwajiraweein nutuma na aʼwaajakana nia chaa iipünaa namaa na aʼwaajakana nia yaa mmapaʼa. Aneerü namüin napüshuaʼa nuluwataainjachin Jehová naaʼu, oonoweena naya nümaa süka süpüshuaʼa naaʼin (paashajeʼera Éfeso 1:8-11). ¿Aashin ponuin maʼin waaʼin tü naaʼinrakat Jehová süpüla nikeraajüin tü keeʼireekat naaʼin?

9. Sünainjee waashajeʼerüin tü Bibliakat, ¿kasa watüjaaka saaʼu süchiki tü alatüinjatkat?

⁹ Jülüjataa waaʼin tü nüküjatüjütkalia Jehová suluʼu tü apainkat Edén, tü ashajünakat suluʼu Génesis 3:15. b Nüküjain yala tü alateetkat süpüla shikeraajüin tü keeʼireekat naaʼin. Alateetpejeʼe  wattashaata saalii juya süpüla shikeraajüin tia. Jamüshijaʼa Jehová, nüküjain nümüin Abrahán watteenain naalii na nüikeyuukana. Naʼakajee nayakana, eweeteechi chi Mesíaskai (Gén. 22:15-18). Soʼu juyaka 33, achotunusü shiineʼe nuuʼui Jesús maʼaka süküjain Génesis 3:15 (Aluw. 3:13-15). Tü wane pütchi aküjünakat yala shia süchuwerajaaneerüin nikii Satanás. Alateerü tia süchikijee tü miit juya nuluwataainjatkalü oʼu Jesús (Apoc. 20:7-10). Süküjainña tü Bibliakat süchiki tü alateetkat sutuma paʼünüüwajiraain na nümaajanakana Satanás namaa na nümaajanakana Jehová.

10. (1) ¿Kasa alateetka soʼu palit kaʼi? (2) ¿Kasa waaʼinrajatka süpüla eejüin waaʼin süpüla tia kaʼikat? (Paashajeʼera tü nootakat).

¹⁰ Jülüjataa waaʼin waneirua kasa alatüinjatka saashin tü Bibliakat. Palajana meerü nanüiki na sülaülashiikana mma mayaa: «Jimatüitpa waaʼin jee anainnapa waya» (1 Tes. 5:2, 3). Süchikijee tia, oʼtteerü tü müliaa miyoʼukat nashutapa na sülaülashiikana mma saaʼu tü iküleesia ekirajakalü alawaa (Apoc. 17:16). Sülatapa tia, eesüjaʼa shiʼnneerüle kasa pülasü, «shiʼreechi wayuu chi Süchonkai Wayuu sünain antaa saaʼu siruma sümaa pülasheechin nia otta kojuteechin nia atumawaa» (Mat. 24:30). Süsaleetka saainjala wayuu nutuma Jesús. Nükataleena na wayuu makana aka saaʼin sukuwaʼipa anneerü noulia na wayuu makana aka saaʼin sukuwaʼipa kaaʼula (Mat. 25:31-33, 46). Nnojoleechipajaʼa talatüin Satanás soʼu tia. Sutuma jashichin maʼin nia, nuutkajeereena na sülaülashiikana mma, «Gog chi chejeʼewaikai Magog» münüsü tia sutuma tü Bibliakat. Naaʼinreerü tia Satanás süpüla nashutuinjanain naaʼu na aʼyataashiikana nümüin Jehová (Ezeq. 38:2, 10, 11). Wanaa maʼin sümaa tia, asaajaaneena na aneekuushikana yaayüliikana mmapaʼa süpüla chainjanain naya chaa iipünaa nümaa Cristo otta namaa na nümaajanakana süpüla tü atkawaa kanüliakat Armagedón, sajaʼtteetkalaka tü müliaa miyoʼukat sükajee tia (Mat. 24:31; Apoc. 16:14, 16). c Oʼtteechikalaka Cristo sünain aluwatawaa. Aluwataajeechi nia soʼu 1.000 juya yaa mmapaʼa (Apoc. 20:6).

11. ¿Jamüsü saaʼin pümüin eein süpüla katüin poʼu süpüla kaʼikat süpüshuaʼa? (Piirakaa sümüin tü ayaakuaakat).

¹¹ Jülüjataa paaʼin jameerüin pukuwaʼipa kettaapa tü miit juya nuluwataainjatkalü oʼu Cristo. Saashin tü Bibliakat, niʼitaain Jehová suluʼu saaʼin wayuu kateein soʼu waneepia (Ecl. 3:11).  Jülüja paaʼin jamüin sünainpünaaka pukuwaʼipa tia otta jamüin sünainpünaaka pukuwaʼipa nümaa Jehová. Müsü wanee pütchi anashaatasü maʼin ashajünaka suluʼu tü karaloʼutakat Acerquémonos a Jehová suluʼuka süpana 319: «Katapa woʼu wattashaata saalii juya, watteerü maʼin saalii tü kasa watüjaajeetkalü aaʼu nüchiki Jehová suulialeʼeya tü kasa watüjaaitpakalü aaʼu nüchiki maaʼulu, choʼujaayülia watta saalii kasa wekirajaainjatka nüchiki. [...] Eetaayaai süntapünaain wekiiruʼu süpüshuaʼa tü kasa waaʼinrajatkat katapa woʼu süpüla kaʼikat süpüshuaʼa. Tü anaʼleejeetkat maʼin shia aleeweenain maʼin waya nümaa Jehová». Sümaʼainruʼu waʼatapajüin süntüin tia kaʼikat, ¿kasa amaa anaka süpüla waaʼinrüin süpüla wekirajaain sooʼomüin nüchiki Jehová suluʼujee tü Bibliakat?

12. ¿Kasa waaʼinrajatka süpüla jülüjain waaʼin tü nukuwaʼipakat Jehová chaa iipünaa?

¹² Süküjain tü Bibliakat süchiki waneirua kasa süpüla wayaawatüin saaʼu nukuwaʼipa Jehová chaa iipünaa (Is. 33:5). Süküjainña tü Bibliakat waneirua kasa anashaatasü maʼin nüchiki Jehová jee nachiki na aʼwaajakana nia chaa iipünaa (Is. 6:1-4; Dan. 7:9, 10; Apoc. 4:1-6). Jamüshiijaʼa waya, eesü süpüla waashajeʼerüin süchiki tü kasa pülasü niʼrakat Ezequiel nutuma chi Maleiwakai wanaa sümaa sujutalaʼalaa sümüin tü sirumatuʼukat noʼuluʼu (Ezeq. 1:1).

13. ¿Jamüsü kojutuka wamüin tü naaʼinrakat wapüleerua Jesús chejee iipünaajee maʼaka süküjain Hebreokana 4:14-16?

¹³ Jülüjataa waaʼin tü naaʼinrakat wapüleerua Jesús chejee iipünaajee, chi Aluwataakai waaʼu otta chi Laülaashikai napüleerua na sacerdotekana amüliajaka waya. Nükajee Jesús, eeshii süpüla warütkaain nünainmüin Jehová süpüla wachuntuin nümüin kamaneeinjachin maʼin nia wamüin jee nümüliajüinjanain waya wanaa sümaa choʼujaain wakaalinjünüin (paashajeʼera Hebreokana 4:14-16). Anasü jülüjale waaʼin waneepia tü naaʼinrüitkat Jehová otta Jesús wapüleerua otta süchiki tü naaʼinrakat wapüleerua maaʼulu chejee iipünaajee. Saaʼujee alin maʼin waya napüla, suchuntaainjatü maʼin waaʼin  waaʼinmaain tü waʼyataainkat namüin (2 Cor. 5:14, 15).

14. ¿Jarat tü wane kasa waaʼinrajatka sutuma kojutuin wamüin tü naaʼinrakat Jehová otta Jesús wapüleerua? (Piirakaa sümüin tü ayaakuaakat).

¹⁴ Wane kasa waaʼinraka sutuma kojutuin wamüin tü naaʼinrakat wapüleerua chi Wamaleiwasekai nümaa chi Nüchonkai, shia wakaalinjale na waneinnua süpüla nanoujain nünain Jehová otta süpüla noushikajaain süchiirua nukuwaʼipa Jesús (Mat. 28:19, 20). Naaʼinrüin tia chi aluwataaushikai Pablo sutuma kojutuin nümüin tü naaʼinrakat Maleiwa otta Cristo nüpüleerua. Nütüjaa aaʼu Pablo nücheküin Jehová «suʼttaainjatüin wayuu maʼleekalia jee shiyaawatüinjatüin saaʼu tü pütchi shiimainkat» (1 Tim. 2:3, 4). Naaʼinmaasü maʼin Pablo tü niʼyataainkat. Müshi nia: «Tooʼulaküin kasa süpüshuaʼa shiiʼiree takaalinjeein wayuu maʼleekalia. Eejeechijaʼa chira eekai nuʼttaain» (1 Cor. 9:22, 23).

15. ¿Kasa talateetka atuma waaʼin saashin Salmo 1:2?

¹⁵ Naashin chi salmistakai, anasü maʼin nukuwaʼipa chi wayuu aashajeʼerawaikai tü Nünüikikat Maleiwa «soʼukai jee saʼwai sümaa jiattain nünüiki» (Sal. 1:1-3). Joseph Rotherham nia wanee wayuu ekirajaakai süchiirua sukuwaʼipa tü Bibliakat. Anuu tü nüshajakat suluʼu tü karaloʼutakat Studies in the Psalms: «Anasü keeʼireere maʼin naaʼin wanee wayuu niain Maleiwa oʼunirüin nukuwaʼipa. Müshijeseʼe nikirajaainjachin maʼin süchiirua tü Nünüikikat Maleiwa sümaa nüsakireʼerüinjatüin naaʼin sünain. [...] Nülatirüle wanee kaʼi sümaa nnojoluin naashajeʼerüin tü Nünüikikat Maleiwa, amülouisü tia kaʼikat nutuma». Kamalainjeerü maʼin pümüin pikirajaain sünain tü Bibliakat paaʼinmaale tü süküjakat süchiki wanee kasa otta jülüjale paaʼin wanaawain süpüshuaʼa tü sümakat. Anataʼaleesüjaʼa maʼin wakuwaʼipa sutuma wekirajaain süchiirua tü sümakat tü Nünüikikat Maleiwa.

16. ¿Kasa wekirajaainjatka anain sünain tü wane ekirajaayakat?

¹⁶ Eesü süpüla wayaawatüin saaʼu tü kasa anasü nüshajiralakat Jehová suluʼu tü Nünüikikat. Sünain tü wane ekirajaayakat, wekirajaajeerü süchiki tü sukuwaʼipakat nutuma Jehová maaʼulu süpüla nuʼwaajünüinjachin, tü nüküjakalü achiki Pablo namüin na anoujashii hebreokana. Kasataalejeseʼe anain pukuwaʼipa sutuma pütüjaain saaʼu tia.