Ekerotushi wayuu yalapünaa suluʼumüin tü Kuatta Wulekat. ¿Jeʼra maʼin sajaʼapüin tia? «Seeruluin tü kasa akumajünakat soʼuluʼujee supuettoʼuse tü piichi aʼwaajüleekat, müsia neʼe aka saaʼin seeruluin tü piichikat, 20 codo otta 120 sajaʼapüin iipünaamüin», müsü tü ashajünakat suluʼu tü Bibliakat Traducción del Nuevo Mundo süpülapünaa juyakat 2023 suluʼu 2 Crónicas 3:4. Eesü waneirua bibliaya aküjaka 120 codo sajaʼapüin, tia müsü aka saaʼin wanee torre kajaʼapüinka 53 meetüro iipünaamüin.

Soʼujee tü juyakat 2023 apansaajünüsü tia wetsiikulokot suluʼu tü Bibliakat Traducción del Nuevo Mundo. Anuu sünüiki: «20 codo sajaʼapüin iipünaamüin», 9 meetüro tia. a Wekiraja sünain waneirua kasa apansaajünaka anainjee tia wetsiikulokot.

Nnojotsü aküjünüin jeʼrain sajaʼapüin tia suluʼu 1 Reyes 6:3. Nüküjain Jeremías suluʼu tia wetsiikulokot jeʼrain seeruluin otta jeʼrain sülaüttain, nnojotpejeʼe nüküjain jeʼrain sajaʼapüin iipünaamüin. Akaʼaya sünain tü kapiitulokot 7, ashajünüsü süchiki waneirua kasa eejatka suluʼu tü aʼwaajüleekat, maʼaka saaʼin süchiki tü kuriiya aainjuushikat süka cobre, tü poloosükat kareeta aijiaka wüin otta piamasü süsaʼa miichi ashaʼwaleʼennaka süʼütpaʼa soʼu tü aʼwaajüleekat (1 Rey. 7:15-37). Shiimainreje jaʼralin shikii meetüro sajaʼapüin iipünaamüin miyoʼuleesejeʼe maʼin shia suulia tü aʼwaajüleekat. ¿Jamüsüche nnojotkaʼa nüküjain süchiki tia Jeremías? Naashin waneinnua judío ekirajaaliikana süchiki kasa alatüirü, nnojotsü miyoʼuleein tü kasa akumajünakat soʼuluʼujee supuettoʼuse tü aʼwaajüleekat suulialeʼeya tü miichikat.

Naashin waneinnua wayuu atüjakana süpüleerua sukumajia miichi, ojuichijaasüje süsepü tü aʼwaajüleekat müleka sukumajünüle wanee kasa soʼuluʼujee supuettoʼuse suluʼu 120 codo sajaʼapüin iipünaamüin. Jamüsüjaʼa sukumajünajatüle süka ipa otta ladrillo wanee miichi sümaiwa paala, maʼaka saaʼin tü aʼwaajülee eejatkat chaa Egipto, jeruluinjatü maʼin tü süsaʼakat shimoulijaainjatka iipünaamüin. Nnojotpejeʼe müin sukumajia tü aʼwaajülee nukumajirakat Salomón. Naashin waneinnua atüjakana süpüleerua sukumajia miichi, eesü maʼaka 2,7 meetüro sülaüttain süsepü tü aʼwaajüleekat. Anuu nünüiki Theodor Busink: «Nnojotsü 120 codo sajaʼapüin iipünaamüin tü kasa akumajünakat soʼuluʼujee supuettoʼuse tü aʼwaajüleekat, mülejeʼe shia, ojuichijaasüje süsepü tü aʼwaajüleekat sutuma saawain».

Eesü mojukuwaʼiparüle süshajia atumawaa tü wetsiikulo suluʼukat 2 Crónicas 3:4. Suluʼu waneirua sukoopiain tü Bibliakat sümaiwajatka ashajünüsü «120» otta suluʼu waneirua sukoopiain ashajünüsü «20 codo». Suluʼu tü kanüliakat Códice alejandrino (alatüirü suulia 1.500 juya süshajünüin) ashajünüsü «20 codo» müsia suluʼu tü kanüliakat Códice ambrosiano (alatüirü suulia 1.400 juya süshajünüin). ¿Jamakaʼa mojukuwaʼipatka atumawaa süshajia tia pütchikat? Jamüsüjaʼa tü pütchikat sien suluʼu hebreo meematsü aka saaʼin süshajia tü pütchikat codo. Shiasaʼa nüshajapa shia wanee wayuu eesüjaʼa mojukuwaʼiparüle süshajia nutuma, eesü nüshajüle neʼe siento veinte suulia veinte codo.

Anasü süka watüjaain saaʼu jeʼrain sajaʼapüin tü kasa eejatkat suluʼu tü aʼwaajülee nukumajirakat Salomón. Shiapejeʼe anain maʼin wayaawatüle saaʼu kasain kayaawaseyaain tü aʼwaajüleekat. Shiyaawaseyaasü tü miichi aʼwaajülee nukumajakat Jehová sükajee tü nüpülainkat. Talatüsü maʼin waaʼin süka nukumajirüin Jehová sukuwaʼipa süpüla waʼwaajüinjachin nia maaʼulu (Heb. 9:11-14; Apoc. 3:12; 7:9-17).