1. ¿Kasa anasü eeka sutuma naapajiraain nikii Jesuu?

WATTA SAALII kasa anasü eeka sutuma naapajiraain nikii Jesuu. Sutuma tia, eeshii süpüla nüpüshin Maleiwa soʼuweena wanee kaʼi na nuuʼuliwoʼu Adán lotokana akuwaʼipa. Jee müsia, eeinapa waya süpüla katüin woʼu süpüla kaʼikat süpüshuaʼa sümaa talatüin waaʼin. Tü naainjakat Jesuu sünain naapajiraain nikii, sünainpünaasü shia tü alatajatkat chaa iipünaa jee yaa Mmapaʼa (Heb. 1:8, 9).

2. (1) Wanaa sümaa nikirajüin Jesuu na nikirajüinkana, ¿kasa nachuntajatka naashin? (Piirakaa sümüin tü ayaakuaakat). (2) ¿Kasa wekirajaajeetka anain jooluʼu?

² Piama juya süpülapünaa ouktüin Jesuu, nikirajüin na wayuukana sünain oʼuraajaa mayaa: «Taata Maleiwa chakai sirumatuʼu, wule putuma tü pünüliakat. Püntira tü puluwataayakat. Saainjüna tü keeʼireekat paaʼin yaa mmapaʼa maʼaka saainjünüin chaa iipünaa» (Mat. 6:9, 10, TNM). Eesü apünüinsü kasa sünainpünaaka naapajiraain nikii Jesuu: 1) tü nünüliakat Maleiwa, 2) tü Nuluwataayakat Maleiwa otta 3) tü keeʼireekat naaʼin. Wekirajaajeerü anain jooluʼu tia.

3. ¿Kasa watüjaka nüchiki Jeʼwaa sutuma tü nünüliakat? ¿Kasa perulaa nüküjaka Satanaa nüchiki Jeʼwaa?

³ Tü nuchuntakat palajana Jesuu shia wuleinjatüin nünülia Maleiwa. Tü nümakat shia kojutüinjatüin sümüin wayuu tü nünüliakat Jeʼwaa. Tü nünüliakat Jeʼwaa shiiʼiyatüin wamüin tü nukuwaʼipakat. Pülashaatashi nia saaʼu kasa süpüshuaʼa jee lotusü nukuwaʼipa. «Wulesü tü pünüliakat Taata», müshi Jesuu nümüin Jeʼwaa (Juan 17:11, TNM). Wulesü süpüshuaʼa tü kasa nukumajakat Jeʼwaa, akaʼaya neʼe tü nuluwataakalü anain. Naashin Satanaa, nnojoishi niainjachin Jeʼwaa aküjaka namüin na wayuukana tü anakat süpüla naaʼinrüin. Aküjüshi perulaa nüchiki Jeʼwaa (Gén. 3:1-5).

4. ¿Kasa kojutüka akajee nünülia Jeʼwaa nutuma Jesuu?

⁴ Kojutüshaatasü nümüin Jesuu tü nünüliakat Jeʼwaa, mojutsaisa Jeʼwaa nutuma Satanaa. Wainma kasa naainjaka Jesuu süpüla kojutüinjatüin nünülia Maleiwa nutuma (Juan 17:25, 26, TNM). Kojutüsü nünülia Jeʼwaa nutuma Jesuu sükajee tü naainjakat jee sükajee tü nikirajakalü anain. Süka tia, nikirajüin Jesuu na wayuukana sünain lotuin süpüshuaʼa tü nuluwataakat anain Jeʼwaa otta aneerüin nakuwaʼipa sutuma (paashajeʼera Salmo 40:8-10). Ayatüshia Jesuu waneepiain nümaa Jeʼwaa mayaapejeʼe müliashaatain nia nutuma Satanaa süpülapünaa ouktüin. Wanee wayuu eekai maainjalain eeshi süpüla waneepiain nia nümaa Jeʼwaa, ichaʼasa shia nutuma Jesuu.

5. ¿Kasa waaʼinrüinjatka süpüla kojutüin watuma nünülia Maleiwa?

⁵ ¿Kasa waaʼinrüinjatka süpüla kojutüinjatüin watuma tü nünüliakat Jeʼwaa? Tü nüchekakat Jeʼwaa shia wuleinjatüin wakuwaʼipa (paashajeʼera 1 Pedro 1:15, 16). Müshijeseʼe waʼwaajüin nia otta woonooin nümaa süka süpüshuaʼa waaʼin. Akaʼaya neʼe müliale waya atumawaa ayatüsia waaʼinrüin weinshi tü nuluwataakalü anain. Waaʼinrüle tü nuluwataakalü anain Jeʼwaa, kojuteerü wamüin tü nünüliakat (Mat. 5:14-16). Otta müsia weeʼiyateerü anain tü nuluwataakalü anain otta alaain Satanaa. Shiimainjasaʼa eein kaʼi wojutuuka oʼu sünain aainjaa kasa mojusü, ayaawajaashii waya suulia otta wanoukteʼeramaatüin wakuwaʼipa suulia mojutüin atumawaa nünülia Jeʼwaa (Sal. 79:9).

6. ¿Kasa lotoko atuma wakuwaʼipa naashin Jeʼwaa?

⁶ Weʼitaale waaʼin sünain naapajiraain nikii Jesuu, nülaʼajaajeerü Jeʼwaa waainjala jaʼitainna chainjanain waya chaa iipünaa jee yaainjanale waya yaa mmapaʼa. Chi eekai nuʼwaajeein Jeʼwaa, naapüinjatü naaʼin nümüin süpüla kaʼikat süpüshuaʼa. Lotusü nakuwaʼipa na anoujashii chainjanakana iipünaa nutuma Jeʼwaa otta nücheka achikichii naya süpüla nüchonniin naya. Akaataajaʼa neʼe na yaainjanakana yaa mmapaʼa nücheka achikichii süpüla naʼaleewainjanain naya (Juan 10:16; Roma 5:1, 2; Sant. 2:21-25). Süka naapajiraain nikii Jesuu waaʼu, eeinapa süpüla naʼaleewain waya Jeʼwaa otta kojutüin watuma nünülia.

7. ¿Kasa anasü eejeetka sutuma naapajiraain nikii Jesuu?

⁷ Müsü nünüiki Jesuu yaa: «Püntira tü puluwataayakat». ¿Jamüsü sünainpünaaka tü Nuluwataayakat Maleiwa naapajiraain nikii Jesuu? Chi shikiipüʼükai tü Nuluwataayakat Maleiwa nia Jesuu otta eeshii 144.000 wayuu aneekünaka yaa mmapaʼajee süpüla aluwatawaa wanaa nümaa. Eeitpa süpüla süsoʼiraain naaʼin wayuukana naainnua sutuma naapajiraain nikii Jesuu (Alat. Map. 5:9, 10; 14:1). Chapa naya iipünaa, aluwataaliinjana  jee sacerdooteinjana naya wanaa nümaa Jesuu jee aluwataainjana naya saaʼu tü Mmakat soʼu 1.000 juya (Alat. Map. 5:13; 20:5, 6). Nuʼuteechi aaʼin Jesuu Satanaa jee najaʼlajeʼereerü süpüshuaʼa tü kasa mojusü naainjakat (Gén. 3:15).

8. (1) ¿Kasa naainjaka Jesuu süpüla kojutüin namüin na nikirajüinkana tü Nuluwataayakat Maleiwa? (2) ¿Kasa waaʼinrajatka kojutüle wamüin Nuluwataaya Maleiwa?

⁸ Niiʼiyatüin Jesuu namüin na nikirajüinkana choʼujaain maʼin süntüinjatüin tü Nuluwataayakat Maleiwa. Müshijeseʼe nüküjüin pütchi süchiki Nuluwataaya Maleiwa sainküin mmakat süpüshuaʼa süchikijee woutiisain nia (Luc. 4:43). Nüküjüin Jesuu namüin na nikirajüinkana naküjüinjanain pütchi «suluʼupünaa süpüshuaʼa mma wattapünaa maʼi» (Aluw. 1:6-8). Sutuma tia watta naaliin na wayuu eekana süpüla natüjüin süchiki naapajiraain nikii Jesuu jee eekana süpüla katüin oʼu suʼunnaa Nuluwataaya Maleiwa. Kojuteerü wamüin tü Nuluwataayakat Maleiwa müleka wakaaliinjüle na anoujashii chainjanakana chaa iipünaa sünain aküjaa pütchi sainküin mmakat süpüshuaʼa (Mat. 24:14; 25:40).

9. ¿Jamüsü watüjaaka saaʼu shikeraajeerüin tü nümakat Jeʼwaa?

⁹ Anuu sooʼomüin nünüiki Jesuu: «Saainjüna tü keeʼireekat paaʼin». ¿Jamaluʼulu tia? Ekeraajüsü süpüshuaʼa tü nümakat Jeʼwaa maluʼulu (Isa. 55:11). Mayaapejeʼe niʼrüijaain wayumüin Satanaa, nnojoishi aawalaain Jeʼwaa suulia tü naainjüinjatkat süka tü Mmakat. Tü keeʼireekat paala naaʼin Jeʼwaa shia piratüinjatüin tü Mmakat natuma na nuuʼuliwoʼukana Adán sümaa Eva (Gén. 1:28). Nnojotsüje ekeraajüin tia nümakat Jeʼwaa machonle Eva nümüin Adán. Ekeraajapejeʼe tü nümakat Jeʼwaa süka nuuʼulaain kachoin Adán sümaa Eva mapa. Shiasaʼa sutuma naapajiraain nikii Jesuu, kepieena yaa saaʼu mmakat süpüla kaʼikat süpüshuaʼa na wayuu aaʼinrakana tü nümakat Jeʼwaa. Aishii maʼin na wayuukana napüshuaʼa nüpüla Jeʼwaa, keeʼireesü naaʼin anainjatüin nakuwaʼipa maʼaka nücheküin paala shia.

10. Sutuma naapajiraaichipain nikii Jesuu, ¿kasa alateetka namüin na ouktüinnakana?

¹⁰ Watta naalii na wayuu ouktakana sümaa nnojolin neʼraajüin Jeʼwaa. Nüsoʼireʼereena aaʼin Jeʼwaa naya süka keeʼireein naaʼin katüinjatüin soʼu wayuu. Shiimain saainjüneerüin tia süka naapajiraaichipain nikii Jesuu. Nasoʼiraapa aaʼin na wayuukana ekirajüneena nüchiki Jeʼwaa jee kateerü noʼu süpüla kaʼikat süpüshuaʼa (Aluw. 24:15). Sutuma niain Jeʼwaa kanainjeejachin tü kataakalü oʼu, nieechi Nashika napüshuaʼa na asoʼiraainjanakana aaʼin (Sal. 36:9). Shiimaintaʼaleejaʼa tia, «Taata Maleiwa» müshijeseʼe nümüin Jesuu (Mat. 6:9, TNM). Nia Jesuu niʼitaaka Jeʼwaa süpüla nüsoʼireʼerüin naaʼin na wayuu ouktüinnakana, müshijeseʼe nümüin: «Taya chi asoʼireʼerakai saaʼin wayuu» (Juan 6:40, 44; 11:25, TNM).

11. ¿Kasa nüchekakat Jeʼwaa napüleerua na wayuu wattakana aalii?

¹¹ Anuu sooʼomüin nünüiki Jesuu: «Tü wayuu ‹teikat› je na wayuu ‹tawalayuukana› tamüinjanakana amüin, naya na eekai naaʼinrüin waneepia tü nuluwataakat anain chi Maleiwakai» (Mar. 3:34, 35). Shiaʼaya keeʼireeka naaʼin Jeʼwaa nuʼwaajünüinjachin sutuma wayuu saʼakajee eʼirukuukat süpüshuaʼa jee sainküinjee mmakat süpüshuaʼa. Neʼitaain naaʼin naya wayuukana sünain naapajiraain nikii Jesuu jee kamalainsü namüin aaʼinraa tü nümakat Jeʼwaa. Naʼwaajüin Jeʼwaa sünain maa: «Wamaleiwasekalee, piakai joyotakai saaʼu tü einaseekat, oʼttaashii waya pütüma  je nütüma chi Anneetchonkai» (Alat. Map. 7:9, 10).

12. ¿Kasa watüjaka sünainjee nünüiki Jesuu wanaa sümaa nuʼuraajüin?

¹² Watta saalii tü kasa watüjakat sünainjee nünüiki Jesuu wanaa sümaa niʼiküin na nikirajüinkana sünain oʼuraajaa. Sünainjee tia, wekirajaa anainrü nukuwaʼipa Jeʼwaa jee tü nüchekakat süpüleerua wayuu süpüshuaʼa. Palajana nüküjüin wamüin Jesuu kojutüinjatüin watuma nünülia Maleiwa (Isa. 8:13). Sutuma naapajiraain nikii Jesuu eeshii süpüla woʼtteʼennüin jee kojutüsü nünülia Maleiwa. Jamüsüjaʼa nünülia Jesuu, «Nia Jeʼwaa Oʼtteʼeraka» maluʼulu. Tü piamakat shia watteerüin saaliin kasa anasü eejeetka sutuma tü Nuluwataayakat Maleiwa namüin na wayuu oonookana nümaa, eejeerü tia süka naapajiraaichipain nikii Jesuu. Tü wanee shia ayateerüin ekeraajüin süpüshuaʼa tü nümakat Jeʼwaa (Sal. 135:6; Isa. 46:9, 10).

13. ¿Jamüshii woutiisaka waya?

¹³ Waapüin waaʼin nümüin Jeʼwaa sümaa woutiisain waya sutuma kojutüin wamüin naapüin Jeʼwaa chi Nüchonkai waaʼu. Sükajee tia, weeʼiyatüin kojutüin wamüin naapajiraain nikii Jesuu otta niain Jeʼwaa laülaain waaʼu (Roma 14:8, TNM). Jee sükajee tia, wachuntüin nümüin Jeʼwaa wüleinjatüin waaʼin (1 Ped. 3:21, TNM). Niasaʼa Jeʼwaa shiʼipajee tia waainjakat, naapüin wamüin tü kasa anasü eekat sünainjee naapajiraain nikii Jesuu. Weʼitaain waaʼin sünain naapeerüin wamüin süpüshuaʼa tü kasa nümüitpakat (Roma 8:32).

14. ¿Jamüshii alinjanaka wapüla na waneeinnua?

¹⁴ Süpüshuaʼa tü kasa naainjakat Jeʼwaa shia süka aipüralin nia wayuu otta keeʼireesü naaʼin müinjatüin nakuwaʼipa na wayuu aʼwaajakana nia (1 Juan 4:8-11). Aire wayuu wapüla, weeʼiyatüin sünain keeʼireein waaʼin nümaain waya chi Washi iipünaajachikai (Mat. 5:43-48). Saashin tü Wiwüliakat, tü pütchi alanaʼaleekat maʼin saʼakajee süpüshuaʼa shia alinjachin wapüla Jeʼwaa jee tü wanee shia alinjatüin wayuu wapüla (Mat. 22:37-40). Wanee kasa waaʼinrajatka süka alin wapüla wayuu shia waküjüin namüin süchiki tü Nuluwataayakat Maleiwa. Waaʼinrüle tü nümakat Jeʼwaa sünain alinjatüin wapüla wayuu jee alin wapüla na wawalayuukana, «kettaasü tü nüchekakat chi Maleiwakai wapüleerua» (1 Juan 4:12, 20).

15. (1) ¿Kasa nüküjaka wamüin Jeʼwaa maaʼulu yaa? (2) ¿Kasa anasü naapeetka wamüin Jeʼwaa mapeena?

¹⁵ Nüküjüin Jeʼwaa wamüin maaʼulu yaa, nülaʼajaajeerüin waainjala müleka weʼitaale waaʼin sünain naapajiraain nikii Jesuu waaʼu (paashajeʼera Aluwataaushikana 3:19-21). Wekirajaaitpa anain nüneeküin Jeʼwaa noʼutku waneeinnua wawalayuu süpüla nüchoinjanain naya. Chainjana naya chaa iipünaa sünain aluwatawaa (Roma 8:15-17). Nuunejaainya Jeʼwaa na yaainjanakana kepiain yaa Mmapaʼa süpüla nüpüshinjanain naya. Mapa, ooʼulaküneena aaʼin nachikuaʼa, shia sajattiamüinjatka tia. Waneepiale naya nümaa Jeʼwaa, nüneekeena naya süpüla nüchonniinjanain (Roma 8:20, 21; Alat. Map. 20:7-9). Aijeena waneepia nüpüla Jeʼwaa napüshuaʼa na nüchonniikana. Jee aapüneerü wamüin kasa anasü süpüla kaʼikat süpüshuaʼa süka naapajiraain nikii Jesuu (Heb. 9:12). Nüsülajüin Jeʼwaa wamüin tia, nnojotsü süpüla süsütünüinjatüin woulia.

16. ¿Kasa taashika oulia waya sutuma naapajiraain nikii Jesuu?

¹⁶ Nüpüsheena waya Jeʼwaa wayaawajaale suulia tü waainjalakat, nnojotsü kasakainjatüin nutuma Satanaa tia. Aapajiraashi nikii Jesuu «wwatua neʼe» süpüla kaʼikat süpüshuaʼa, nnojotsü choʼujaain naapajiraainjachin nikii nüchikuaʼa (Heb. 9:24-26). Ouktüsü wayuu nünainjee Adán jee kateerü soʼu wayuu waneepia nünainjee Jesuu. Sutuma naapajiraain nikii Jesuu taashinnapa waya suulia tü kasa nuluwataakalü aaʼu Satanaa jee müsia suulia mmoluwaa seema ouktaa (Heb. 2:14, 15).

17. ¿Jamüsü paaʼin sutuma pütüjaain saaʼu alin pia nüpüla Jeʼwaa?

¹⁷ Shiimainshaata shikeraajeerüin waneepia süpüshuaʼa tü nümakat Jeʼwaa. Matüjüinsat eeʼirataa sukuwaʼipa tü kasa nukumajakat Jeʼwaa, müshia neʼe niakai, nnojotsü aʼwanajaain nukuwaʼipa (Mal. 3:6). Naapüin wamüin Jeʼwaa tü kataakat oʼu otta aishii waya nüpüla. «Shiimüin maʼi sünain alin waya nüpüla Maleiwa. Nikirajüin waya chi Maleiwakai sünain jamüinjatüin saaliipala wayuu wapüla maa aka waalii nüpüla niakai» (1 Juan 4:16). Anacheʼechonjeerü tü Mmakat, paʼraiseerü shia süka shikeraajeerüin nünüiki Jeʼwaa. Nashateechi Jeʼwaa napüshuaʼa na wayuukana jee aijiraajeena naya. Aʼwaajüneechi Jeʼwaa natuma na chainjanakana chaa iipünaa jee na yaainjanakana yaa Mmapaʼa sünain maa: «Wamaleiwasekalee, alanaʼaleeshijaʼa maʼi pia sünain anain. Waʼwaajüin pia süka kekiin maʼi pia je süka pülashin maʼi pia. Waapüin pümüin analuʼut saaʼu kojütüin pia watüma süpüla kaʼikat süpüshua. Amén» (Alat. Map. 7:12).