1, 2. (1) ¿Kasa nüküjaka wamüin Jeʼwaa? (2) ¿Kasa shikirajaka anain waya tü sümakat Isaías 46:10, 11 otta 55:11?

MAPÜLEESAT tü pütchi suʼttiajeekat tü Wiwüliakat otta kojutüshaatasü shia. Müsü mayaa: «Sümaiwa paala, oʼttüshi chi Maleiwakai sünain nukumajüin tü kasa chakat iipünaa jee tü Mmakat» (Gén. 1:1). Nnojotsü weʼraajüin süpüshuaʼa tü kasa nukumajakat Maleiwa. Nnojotsü weʼraajüin maʼin tü kasa chakat iipünaa, tü kasa warattuuikat atuma tü mmapaʼakat otta tü gravedaakat (Ecl. 3:11). Nüküjüin Jeʼwaa wamüin tü nüchekakat süpüleerua Mmakat jee tü wayuukalüirua süpüshuaʼa. Nukumajüin wayuu süpüshuaʼa maʼaka naaʼin niakai otta keeʼireesü naaʼin kepiain naya yaa mmapaʼa (Gén. 1:26). Nüchoinjana na wayuukana otta nashinjachi niakai.

² Amojujaasü sukuwaʼipa tü keeʼireekat naaʼin Jeʼwaa sutuma wanee kasa saashin Génesis kapiitulo 3 (Gén. 3:1-7). Nunoukteʼerüitpa shia Jeʼwaa, nnojotsü kasain isain nüchiki. Nnojoishi eein wanee jarai yaa ooʼuleʼereechika nia suulia aaʼinraa tü keeʼireekat naaʼin (Isa. 46:10, 11; 55:11). Weʼitaain waaʼin sünain  shikeraajeerüin tü keeʼireekat naaʼin Jeʼwaa soʼu tü kaʼi nüneekakat.

3. (1) ¿Kasa ekirajünaka anain waya suluʼujee tü Wiwüliakat? (2) ¿Jamüsü wekirajaainjatka sünain tia apünüinsükat pütchi? (3) ¿Jarat tü pütchi wekirajaainjatkalü anain jooluʼu?

³ Watüjaa aaʼu tü naainjüinjatkat Jeʼwaa süka tü Mmakat otta müsia süpüleerua wayuu süpüshuaʼa. Watüjaa aaʼu shikeraajüin tü keeʼireekat naaʼin Jeʼwaa nükajee Jesuu. Tü makalü yaa shia tü kasa ekirajünakat suluʼu tü Wiwüliakat. Tia shia tü kasa ekirajünakalü anain waya woʼttaiwaʼaya sünain ekirajünaa sünain tü Wiwüliakat. Wekirajüinjanaʼaya na wayuukana sünain tia. Anasü maʼin waainjüle shia maaʼulu yaa suʼunnaa wounejaain na wayuukana sünain tü Outkajawaakat eere Sotuin Waaʼin Ouktüin Jesuu (Luc. 22:19, 20). Narütkaale sünain tü outkajawaakat, natüjaajeerü aaʼu sooʼomüin tü keeʼireekat naaʼin Jeʼwaa napüleerua. Anakajaʼa jülüjüle waaʼin apünüinsü kasa wasakirüinjanaka anain na wayuukana süpüla noutkajaain wamaa. Anuu shia: ¿Kasa keeʼireeka naaʼin Jeʼwaa süpüleerua Mmakat jee süpüleerua wayuu? ¿Jamüsü nnojotka shikeraajüin tü keeʼireekat naaʼin Jeʼwaa? ¿Jamüsü shikeraajüinjatka tü keeʼireekat naaʼin Jeʼwaa sutuma naapajiraain nikii Jesuu?

4. ¿Jamüsü sukuwaʼipa süpüla suʼwaajüin Maleiwa tü kasa nukumajakat?

⁴ Nnojoishi eein wanee kuʼyamai eekai müin aka naaʼin Jeʼwaa. Anasü maʼin süpüshuaʼa tü kasa nukumajakat (Gén. 1:31; Jer. 10:12). Anacheʼechonsü tü kasa nukumajakat Jeʼwaa jee lotusü sukuwaʼipa, ¿kasa shikirajaka anain waya tia? Shikirajüin waya sünain anain wakuwaʼipa sutuma süpüshuaʼa tü kasa nukumalakat, jaʼitasü joʼuucheʼechoin shia. Shialeekajaʼa watüjaapa saaʼu tü saainjakat tü célulakat, weʼrapa wanee joʼuu otta niishojoopa chi Kaʼikai; ana maʼin süpüshuaʼa tia. Anasü maʼin wamüin tia süka nukumajüin waya Maleiwa suluʼu müinjatüin wakuwaʼipa (paashajeʼera Salmo 19:1; 104:24).

5. ¿Kasa naainjaka Jeʼwaa süpüla anainjatüin sukuwaʼipa tü kasa nukumajakat?

⁵ Süpüshuaʼa tü kasa nukumajakat Jeʼwaa niʼitaain shia süpüla wanee kasa, akaʼaya nia, nüküjüin nümüin chi wayuukai tü naaʼinrajatkat süpüla wulein nukuwaʼipa noʼuluʼu. Naaʼinrüin tia süpüla anainjatüin süpüshuaʼa tü kasa nukumajakat yaa mmapaʼa jee chaa iipünaa (Sal. 19:7-9) (paashajeʼera «Pütchi pütüjaainjatka aaʼu»). Süpüshuaʼa tü kasa nukumajakat Jeʼwaa eesü tü kasa anakalü apüla shia. Anuu wanee sukuwaʼipa: Sutuma tü gravedaakat, ayatüsü eein tü atmósferakat sünain akoʼoyoloo tü Mmakat jee nnojotsü asetüin tü palaakat sutuma. Nnojotsüje kasain katüin oʼu yaa Mmapaʼa nnojorüle tü gravedaakat. Anasü sukuwaʼipa tü kasa yaakat mmapaʼa jee tü kasa chakat iipünaa sutuma nukumajatüjülüin Jeʼwaa sukuwaʼipa. Shiimainkalaka eein tü kasa nukumajakalü apüla Jeʼwaa tü Mmakat jee wayuu süpüshuaʼa. Waküjapa pütchi sümüin tü wayuukalüirua wekirajüin naya nüchiki chi Kakumainkai tia kasakalüirua süpüshuaʼa (Alat. Map. 4:11).

6, 7. ¿Kasa naapaka Jeʼwaa nümüin Adán sümaa Eva?

⁶ Tü keeʼireekat naaʼin Jeʼwaa napüleerua na wayuukana shia kepiainjanain naya süpüla kaʼikat süpüshuaʼa yaa Mmapaʼa (Gén. 1:28; Sal. 37:29). Süka nüsülajülin Jeʼwaa, wainma tü kasa naapakat nümüin Adán sümaa Eva (paashajeʼera Santiago 1:17). Nuuʼulaain naya süpüla naneeküin tü anakat saaʼin  namüin, nasakireʼerüin naaʼin süchiirua wanee kasa, alin wayuu napüla jee kaʼaleewainjanain naya (paashajeʼera «Pütchi pütüjaainjatka aaʼu»). Nüküjüin Jeʼwaa nümüin Adán tü anakat süpüla naaʼinrüin. Nüküjüin nümüin tü aneetkalü atuma nukuwaʼipa, sukuwaʼipa tü mmakat jee tü mürütkalüirua (Gén. 2:15-17, 19, 20). Nukumajüin Jeʼwaa Adán sümaa Eva süpüla nayaawatüin saaʼu tü kasa anasü nukumajakat namüin; eesü süpüla natüjaain saaʼu tü naapaakat, tü neʼrakat, tü nooʼulakakat eʼejü, tü naapakat jee tü naatakat eejuu. Sükajee tia talatüinjatü naaʼin. Wainma kasa anasü niʼyateʼeraka anain naya Jeʼwaa. Atüja atüja müinjana naya shiʼipaʼaya.

⁷ ¿Jarat tü wanee kasa keeʼireekat naaʼin Jeʼwaa? Nukumajüin Adán sümaa Eva süpüla lotuin nakuwaʼipa na nachonniikana. Kachon müshiijaʼa na nachonniikana, suluʼujee tia, wainmainjatü wayuu Mmapaʼa. Tü keeʼireekat naaʼin Jeʼwaa shia alinjanain na tepichikana napüla na kachoinkana naya maʼaka alin Adán sümaa Eva nüpüla Jeʼwaa; naapüin Jeʼwaa tü Mmakat namüin jee müsia süpüshuaʼa tü kasa anachonsü yaakat mmapaʼa. Yaainjanayaa naya süpüla kaʼikat süpüshuaʼa (Sal. 115:16).

8. ¿Kasapülajatü tü pütchi nüküjakat Jeʼwaa nümüin Adán sümaa Eva suluʼu Génesis 2:16, 17?

⁸ Amojujaasü tü keeʼireekat naaʼin Jeʼwaa soʼu tia, ¿kasa atuma? Wekirajaa sünain. Nnojotsü kapüleein tü nuchuntakat Jeʼwaa nümüin Adán sümaa Eva, tü nüküjakat namüin süpülajatü natüjaain saaʼu nnojoluinjanain nalanaain saaʼu tü keeʼireekat naaʼin. Müshi Jeʼwaa: «Anuu süchon tü wunuʼukolüirua süpüshua yaa suluʼu tü apainkat süpüla piküinjatüin shia. Shiasaʼa nnojolüinjatüin piküin süchon tü wunuʼu atüjaweetkat atüma wayuu saaʼu tü anasükat je saaʼu tü mojusükat. Müleka piküle süchon wunuʼukot tüü, shiimüinshaana ouktajachin pia» (Gén. 2:16, 17). Nnojotsü mayaawatujuuin saaʼu tü nümakat Jeʼwaa, nnojotsü shia kapüleʼeinya. Wainma süchon tü wunuʼulia eekat süpüla neküin.

9, 10. (1) ¿Kasa alawaa nüküjaka Satanaa nüchiki Jeʼwaa? (2) ¿Kasa nüneekaka Adán sümaa Eva? (Piirakaa sümüin tü ayaakuaa suluʼukat süpana 3).

⁹ Nüneeküin Satanaa wanee wüi süpüla nimeejüin Eva, nnojotsüjeseʼe shia oonooin mapa nümaa Jeʼwaa, chi Süshikai (paashajeʼera Génesis 3:1-5; Alat. Map. 12:9). Nüküjüin sümüin Eva nnojoluin anain tü naainjakat Jeʼwaa süka nnojoluin nuuʼulaain naya neküin süchon süpüshuaʼa tü wunuʼukalüirua. «Aluʼusaʼa joʼuuchonle jia süpüla nnojoluinjanain jaaʼinrüin tü keeʼireekat jaaʼin», müshi nümakai aaʼin. Mapa nüküjaka naʼalain sümüin: «Nnojoleena jia ouktüin», müshi; nüküjaka sümüin Eva nnojoluin choʼujaain noonooinjanain nümaa Jeʼwaa, müshi nia: «Müleka jiküle süchon tü wunuʼukot, kekiijeena maʼi jia süpüla kasa süpüshua». Nüküjüin Satanaa nüpülajüin Jeʼwaa nuulia Adán sümaa Eva neküinjanain süchon tia wunuʼukat süka nnojoluin nücheküin natüjüinjanain maʼin. Anuu suwalaʼata tü alawaa nüküjakat: «Meena aka jia Maleiwakai sünain jiyaawatüin saaʼu tü anasükat je tü mojusükat».

¹⁰ Adán sümaa Eva naneeküinjachi jaralinjachin noonooin amaa, niale Jeʼwaa niataapa Satanaa. Niapejeʼe naneeküin Satanaa, nnojoluichipa nacheküin Jeʼwaa süpüla niainjachin Nashin. Suluʼujee tia, namüiwaʼainnapa naya, nnojoliinnapa naaʼinmajüin Jeʼwaa (Gén. 3:6-13).

11. ¿Kasaje alataka nnojorüle kasajatüin nümüin Jeʼwaa naainjala Adán sümaa Eva?

¹¹ Amojujaasü nukuwaʼipa Adán sümaa Eva süka nnojoluin noonooin sümaa nünüiki  Jeʼwaa. Nüʼünüüshii naya Jeʼwaa mapa, süka jamüin, üttüin naaʼin Jeʼwaa sünain tü mojulawaakat. Anuu sünüiki tü Wiwüliakat nüchiki Jeʼwaa: «Wulesü maʼin tü poʼukot süpüla piirakaainjachin sümüin kasa mojusü» (Hab. 1:13, TNM). Nnojorüleje kasajatüin nümüin Jeʼwaa naainjala Adán sümaa Eva, amojujaasüje sukuwaʼipa süpüshuaʼa tü kasa nukumajakat. Naainjayüleje Jeʼwaa tia, nnojoishiije anoujain mapa na aapieekana jee na wayuukana sünain nünüiki Jeʼwaa. Nnojotpejeʼe naainjain Jeʼwaa tia, kojutüsü nümüin tü nünüikikat (Sal. 119:142). Mayaapejeʼe eein süpüla nüneeküin Adán sümaa Eva tü anakat saaʼin namüin, neʼrüinjatü joo namüliala saaʼujee neʼrüliijaain wayumüin nümüin Jeʼwaa. Ouktüshii naya mapa, mmashii naya nachikuaʼa (Gén. 3:19).

12. ¿Kasa alataka namüin na nüchoinkana Adán?

¹² Wanaa sümaa niküin Adán sümaa Eva süchon tü wunuʼukot, nnojoliinnapa süpüla naʼakain naya na nüpüshikana Jeʼwaa. Nujuʼitirüin naya suluʼujee tü apainkat Edén, nnojoishii nuuʼulaain nekerotüinjanain nachikuaʼa (Gén. 3:23, 24). Nuuʼulaain naya Jeʼwaa neʼrüin namüliala saaʼujee tü naainjakat (paashajeʼera Deuteronomio 32:4, 5). Suluʼujee tia isaitpa nachiki nashatüin süpüshuaʼa nukuwaʼipa Jeʼwaa. Numojujüin Adán nakuwaʼipa na nuuʼuliwoʼukana. Shia neʼe nüpütaka napüla mojuin nakuwaʼipa, tü kaainjalaakat otta tü ouktaakat (Roma 5:12). Nnojoliinnapa süpüla katüin noʼu süpüla kaʼikat süpüshuaʼa na nüchoinkana. Adán sümaa Eva nnojoliinnapa süpüla kachoin naya wayuu lotokana akuwaʼipa, akaataajaʼa neʼe na nachonkanaʼaya. Soʼujee numojujüin Satanaa nukuwaʼipa Adán sümaa Eva süpüla neʼrüliijaain wayumüin nümüin Maleiwa, ayatüsia naaʼinrüin shia naka na wayuukana maaʼulu yaa (Juan 8:44).

13. ¿Kasa ayataka kachiiruain naaʼin Jeʼwaa?

¹³ Mayaapejeʼe niyouktajünüin Jeʼwaa nutuma Adán sümaa Eva, ayatüshii alin nüpüla na wayuukana. Ayatüshia aleeweein Jeʼwaa namaa na wayuukana, nnojotsü nücheküin ouktüinjachin waneeshiaakaijeʼe (2 Ped. 3:9). Müsüjeseʼe nukumajamaatüin Jeʼwaa sukuwaʼipa süpüla aleewainjatüin wayuu nümaa. ¿Jamüsü sukuwaʼipa nutuma süpüla pansaainjatüin tia sümaa tü pütchi nüikkaleʼerakat paala? Wekirajaa sünain tia.

14. (1) ¿Kasa naainjaka Maleiwa süpüla taashin waya suulia waainjala jee ouktaa saashin Juan 3:16, TNM? (2) ¿Jarat tü asakiraa wekirajüinjatkalü anain wayuu?

¹⁴ (Paashajeʼera Juan 3:16, TNM). Pütchikat tüü eesüjaʼa süpüla natüjain shia noʼutku na wayuu wounejaakana sünain tü Outkajawaakat eere Sotuin Waaʼin Ouktüin Jesuu. ¿Natüjaa aaʼuche na wayuukana jamüin kateetka noʼu sutuma naapajiraain nikii Kürisüto? Eeshii süpüla wekirajüin na wayuukana sünain tia wounejaapa naya sünain tü outkajawaa wamayütkat, noʼunapa sünain jee  wouyantapa wachikuaʼa nepialuʼumüin. Natüjaapa saaʼu tia, nayaawateerü aaʼu alin maʼin waya nüpüla Jeʼwaa jee kekiin maʼin nia. ¿Kasa eeka süpüla waküjüin namüin naya wayuukana wekirajapa naya sünain naapajiraain nikii Jesuu?

15. ¿Jamüsü waneejatka nukuwaʼipa Jesuu nuulia Adán?

¹⁵ Naapüin Jeʼwaa nikii wanee wayuu loto akuwaʼipachi süpüla taashinjanain waya. Chia wayuukai waneepiainjachi nümaa Jeʼwaa jee aapajiraainjachi nikii naaʼu na wayuukana (Roma 5:17-19). Nia nüneekaka Jeʼwaa chi palajaikai nukumalain, chia nia Jesuu. Nuluwataain nia iipünaajee süpüla joʼuuinjachin nia yaa Mmapaʼa (Juan 1:14). Müsüjeseʼe lotuin nukuwaʼipa Jesuu maʼaka paala nukuwaʼipa Adán. Waneejatpejeʼe nukuwaʼipa Jesuu nuulia Adán süka noonooin nümaa Jeʼwaa. Ayatüshia oonooin Jesuu nümaa Jeʼwaa mayaapejeʼe kapüleein maʼin tü ooʼulakünakalü aka naaʼin.

16. ¿Jamüsü choʼujaashaataka naapajiraain nikii Jesuu?

¹⁶ Sutuma naapajiraain nikii Jesuu waaʼu taashishii waya nutuma suulia tü kaainjalaakat jee tü ouktaakat. Naaʼinrüin Jesuu tü nnojotkat naaʼinrüin Adán. Jamüshijaʼa Jesuu, waneepiashi nümaa Jeʼwaa otta kacheʼeshi sümüin nünüiki (1 Tim. 2:6). Sutuma naapajiraain nikii Jesuu eeshii süpüla katüin noʼu süpüla kaʼikat süpüshuaʼa na tooloyuukana, na jieyuukana jee na tepichikana (Mat. 20:28). Choʼujaashaatasü naapajiraain nikii Jesuu süpüla shikeraajüin tü keeʼireekat naaʼin Jeʼwaa (2 Cor. 1:19, 20, TNM).

17. ¿Kasa eeka sutuma naapajiraain nikii Jesuu?

¹⁷ Kojutüshaatasü maʼin tü naapakat Jeʼwaa  süpüla taashinjanain waya (1 Ped. 1:19). Sutuma kojutüshaatain waya nümüin Jeʼwaa, nuluwataain chi Nüchonkai süpüla naapajiraain nikii waaʼu (1 Juan 4:9, 10, TNM). Müshijaʼa washikai aaʼin Jesuu nuulia Adán süka niaichipain nüchikumüinka (1 Cor. 15:45). Sutuma naapajiraain nikii Jesuu, eeinapa süpüla katüin woʼu suluʼu kaʼikat süpüshuaʼa, eeshii süpüla nüpüshin waya Jeʼwaa soʼuweena wanee kaʼi. Jee müsia loteerü wakuwaʼipa mapa jee nüpüsheena waya Jeʼwaa, pansaajeetpejeʼe tia nutuma Jeʼwaa sümaa tü pütchi nüikkaleʼerakat. Anashaateerü maʼin lotopa nakuwaʼipa napüshuaʼa na wayuu waneepiakana nümaa Jeʼwaa. Nüpüsheena Jeʼwaa napüshuaʼa na chakana iipünaa jee na yaakana Mmapaʼa. Nüchonniijeena waya Jeʼwaa wapüshuaʼa (Roma 8:21).

18. ¿Joujeechi laülaaka Jeʼwaa saaʼu kasakat süpüshuaʼa?

¹⁸ Mayaapejeʼe niyouktajünüin Jeʼwaa nutuma Adán sümaa Eva, ayatüshii alin nüpüla na wayuukana. Müshijeseʼe naapüin nikii chi Nüchonkai süpüla taashinjanain waya. Mayaapejeʼe waleʼeruʼuin tü kaainjalaakat, nnojoishii süpüla nuluwanaajüinjanain waya Satanaa süpüla nnojoliinjanain waneepiain waya nümaa Jeʼwaa. Süka naapajiraain nikii Jesuu, nükaaliinjeena waya Jeʼwaa süpüla lotuinjatüin wakuwaʼipa. Na kojutükana amüin Jesuu jee na eʼitaakana naaʼin sünain naapajiraain nikii waaʼu nayeena katakana oʼu süpüla kaʼikat süpüshuaʼa; anashaateerü maʼin tia (Juan 6:40). Nikeraajeerü Jeʼwaa tü keeʼireekat naaʼin jee nükaaliinjeena na wayuukana napüshuaʼa süpüla lotuinjatüin nakuwaʼipa, naaʼinreerü tia süka alin waya nüpüla. «Nieechikalaka Maleiwa laülaain saaʼu kasakat süpüshuaʼale» (1 Cor. 15:28).

19. (1)  ¿Kaseerü waaʼinraka kojutüle maʼin wamüin naapajiraain nikii Jesuu? (Paashajeʼera tü pütchikat « Jüchajaa jaralin acheküin tü pütchikat»). (2) ¿Kasa wekirajaajeetka anain sünain tü wanee ekirajaayakat?

¹⁹ Kojutüle maʼin wamüin naapajiraain nikii Jesuu, wekirajeena na waneeinnua süchiki tia. Choʼujaasü maʼin natüjaainjatüin saaʼu na wayuukana naapüin Jeʼwaa nikii chi nüchonkai süpüla katüinjatüin woʼu süpüla kaʼikat süpüshuaʼa. Wanee kasa atüjaanaka aaʼu sutuma naapajiraain nikii Jesuu shia nnojoluin shiimain tü nümakat Satanaa chaa Edén. Sünain tü wanee ekirajaayakat, wekirajaajeerü anain jamüin sukuwaʼipa tia.